Napili i Pablo a Manundu so Bakkan a Hudyuwera
3
Antuweyaw yo gafuna a ikkanak i Pablo a ana so paffukukan gumafu se nasserbiyak sike Kristo Jesus maipegafu sikwayu a bakkan a Hudyuwera. 2 Ammuk a nadingngag diyawin a gumafu si simpat i Dios, netalaknga sikwak iyaw a kargu para si pammakapiyan diyaw ingkepay ikkayu a bakkan a Hudyuwera. 3 Nepakaammuna i Dios sikwak ino planuna a ammena nepakaammu siin. Anna iyaw yo kanggamku a sapitan sito ibbafa a turakku. 4 Nu bibbiran diyaw iyaw si mapiya, maintindiyan diyawneno nepakaammu sikwak meafu si kagakkuruwan patamu sike Kristo a ammena nepakaammu sinoy. 5 Ammena iyaw a nepakaammu so tolayera siin nabayagin a tiyempu, udde sitoye, nepakaammuweno Espiritu i Dios so tolayera a pinili i Dios a mattabali si apostol ira anna profetera. 6 Antuweyaw yo planu i Dios a nepakaammuna: gumafu si angngurug diyaw si Mapiya a Baga, ikkayu a bakkan a Hudyuwera e meyannung so kapiyanan a iyaddana i Dios sikwatam a Hudyuwera. Anna nebilang etam a tata baggi i Kristo anna maarasoyu pena amminan a netamba i Dios a iyaddana so amminan a neyannung sike Kristo Jesus.7 Gumafu si simpat i Dios, inangwanak a gumasserbi tapenu itunturuk ino Mapiya a Baga megafu si pakapangwana. 8 Maski ikkanak ino kaibbafan so amminan a tolayera i Dios, pinilinak a ipakaammuweno baga so bakkan a Hudyuwera meafu so mapiya a kiya-kiyan a ammenengke maintindiyan a maarasotam sike Kristo. 9 Anna napiliyak pay a mepakaammu si amminan a tolayera ino kaparulotan ino planu i Dios a amme kepay nepakaammu. So nappasa a tiyempu e neyimadna iyaw i Dios a namaratu si amminan a kiya-kiyan, 10 takesi megafu sikwatam amminan a minangikkurug ira e maammuwanin ino gumattangngal ira anna so ana pakandamara si langit ino angngammu i Dios a nepakaammu si naddadaruma a pakaangwan. 11 Gakkadna iyaw i Dios sin ammena kepay pinaratu yo talubaggan, anna inangwana iyaw megafu sike Kristo Jesus a Afutam. 12 Gumafu si pakisittatatam sike Kristo anna gumafu si angngurugtam sikwana, matuyag yo nakamtam anna ana konfiyansatam a makaaranni sike Dios. 13 Kunnantu, arangngangku sikwayu a ammeyu pakkafuyan yo nakam diyaw gumafu si passufrik para sikwayu se antuweyaw yo pakadayawan diyaw.
Na Idduk i Kristo
14 Gumafu se inangwana i Dios amminan iyaw para sikwayu, mammaliturak anna maddasalak sike Dios a Amatam, 15 a antu yo naggabwatan na angat ino amminan a ana si langit anna sito lubag a inayanna si parte na familyana. 16 Arangngangku sike Ama si kapiyanannengke a ana sikwana si langit takesi indan nakayu si pakapangwa a mappatuyag si nakam diyaw megafu si Espirituna. 17 Idasalku a i Kristo e sigigyan si nakam diyaw megafu si angngurug diyaw. Nu iddukan diyaw i Dios anna siggatatan a matuyag kayu kakunna yo kayu a naggamut so lubag anna kakunna yo balay a nepataddag si tata a fundasyon, sigigyan nad i Kristo sikwayu. Antu idasalku a maski nenay akwan diyaw e antu yo kebalinan na idduk 18 takesi annanot a maintindiyan diyaw, bulun ino piniliyera i Dios, nu kasanna kawayang, karoddag, katannang, anna karollam ino idduknga. 19 Anna maammuwan diyaweno interu a idduk i Kristo a ammena dama gawatan na agginonotan takesi awan a pakkuranganna sikwayuweno kagagangayan i Dios.