Na Bawu a Angat na Minangikkurug ira i Kristo
2
Kakunnayu yo natay a tolayera gumafu se amme kayu nakimoray sike Dios anna nalliwat kayu. 2 Tinuntul diyaw sinoyeno maral a katotolayeno amme mangurug a tolayera sito talubaggan. Nakimoray kayu sike Satanas a manangngal si maral a afu-afuwera si langit anna manangngal sitoye so inoyera a amme makimoray sike Dios. 3 Sinoy, amminan etam e nanolay a kakunnara meantu si maral a panggamman na baggitam ira. Inangwatam ino maral a panggamman anna agginonotan na baggitam. Sinaliwat etam antu gakkurug a kastiguwannana etam i Dios kakunna yo pangastiguna so amminan a tolayera. 4 Udde napannu si allak i Dios anna iddukanna etam ingke 5 a maski nu nebilang etamun a natay gumafu si liwa-liwattam, pinantotolena etam a bulun i Kristo. Natabbut kayu gumafu si simpat i Dios. 6 Pinantotolena etam imman i Dios a bulun i Kristo gumafu si pakisittatatam sikwana takesi manangngal a bulunna si langit. 7 Inangwana iyaw i Dios takesi so dumatang a tiyempu e gakkurug a mepaitanana sikwatam ino simpatna a ammena magukud anna bastantengke gumafu si pakisittatatam sike Kristo Jesus.8 Se gumafu si simpatna i Dios e natabbut kayu megafu si angngurug sike Kristo anna bakkan a megafu si mapiya a aggangwayuwera. Inindan nakayu i Dios si libre a pannabbut. 9 Amme kayu natabbut megafu si aggangwayuwera, antu awan a makapakkaw. 10 I Dios ino nangwa sikwatam nu nenay etam sitoye. Megafu si pakisittatatam sike Kristo Jesus, inangwana etam i Dios a bawu a tolay takesi akwantammeno mapiya a taddera a plinanuwen i Dios a akwantam.
Na Pattata sike Kristo
11 Kunnantu, neyanak kayu a bakkan a Hudyuwera anna naayan ino Hudyuwera a “amme nabanggit.” Na Hudyuwera pay e ayandeno baggira si “nabanggit” (iyaw e angwa na tolay si baggi.) 12 Dandamman diyaw e siin nesina kayu sike Kristo, amme kayu nebilang a parte na Israelitera a napili a tolayera i Dios. Anna ammeyu ammuweno meafu si tambera a inangwa i Dios so tolenera. Nanolay kayu sito talubaggan a awan inanama anna awan Dios. 13 Udde sitoye nakisittata kayun sike Kristo Jesus. Aroyu kayu siin sike Dios udde sitoye e aranni kayun sikwana megafu si akkapatay i Kristo so kurut. 14 Se i Kristo baggineno nangadda sikwatam si piya gumafu se yo Hudyuwera anna bakkan a Hudyuwera e pinattatanera. Gumafu si akkapatena, inarineno lussaw a nappasina so Hudyuwera anna bakkan a Hudyuwera. 15 Gumafu si akkapatena so kurut, ammenan maawag a pakimorayan ino amminan a dundun ira na Hudyuwera tapenu matabbut etam. Na gakkadna e akwan ino adwa a grupu a mattata sikwana anna akwannerana a bawu a tolayera anna pakkakapiyannerana. 16 Gumafu si akkapatena si kurut, pinantotolineno Hudyuwera anna bakkan a Hudyuwera sike Dios anna pinattatanera. Gumafu sitaw, ammeran makkakalussaw. 17 Inang i Kristo sito lubag anna nepakaammuneno Mapiya a Baga meafu si piya so bakkan a Hudyuwera a aroyu sike Dios anna si Hudyuwera a aranni sike Dios. 18 Gumafu so inangwana i Kristo, amminan etam a Hudyuwera anna bakkan a Hudyuwera e makaaranni sike Dios a Amatam megafu si duffun ino Espirituna a ana sikwatam. 19 Nabu, ikkayu a bakkan a Hudyuwera e bakkan kayun a mebilang a ipping onnu taga-korwan a lubbun nu bakkan katalubbunanin ino piniliyera i Dios anna katabbalay i Dios. 20 Ikkayu a minangikkurug ira e kakunna yo dokal a balay a akwa i Dios. Inay a balay e nepataddag si fundasyon a neparan ino apostol ira anna profetera. I Kristo Jesus ingkepayeno gakkurug a fundasyon na balay. 21 Baggineno nappatubbud si kada parte na balay e pinadokalna anna pinattabalina si balay a meyaparte para sike Dios. 22 Anna gumafu si pakisittatayu sike Kristo, bulunan nakayu i Dios ikkayu a bakkan a Hudyuwera anna minangikkurug a Hudyuwera a manilla tata dokal a balay nu sintaw a manolayeno Espirituna.