Amme Nunutan ino Korwan Ira
(1 Corinto 8:1-13; 10:23-33; Colosas 2:16-17)
14
Ilawayu inoyera a makafuy yo angngurugga patamu so makweno minangikkurug ira. Anna amme kayu makitinnulyat sikwara meafu si naddadaruma a agginonotanda. 2 Mangurug ino korwan ira a damara akkanan maski sanna a maakkan. Udde inoyera a makafuy yo angngurugga e mangngan ira lamang si natang. 3 Inoyera a mangngan si naddadaruma a maakkan e ammera nad arariyan inoyera a mangngan lamang si natang. Anna inoyera a mangngan lamang si natang e ammera nad nunutan ino tolayera a mangngan si naddadaruma a maakkan, se i Dios, arasawannera amminan. 4 Yanyaka kad a mannunut so gumasserbi na korwan ira? Na amuna lamang yo mannunut nu yo akakwanna e fustu onnu ammena. Anna yo akakwanna e fustu gumafu se i Afu Jesus yo makaduffun sikwana.5 Ana yo korwan ira a ibilangga a mas kaawan ino tata aw ammat so korwan a awera. Ana pay yo korwan ira a ibilangga a parefu amminan a awera. Kada tolay e maangga-anggamman nad si nakamma ingkepay a fustuweno akakwanna. 6 Inoyera a ibilangga a kaawan ino tata aw e akwanda a maddayaw sike Afu Jesus. Anna inoyera a mangngan si maski sanna a maakkan e akwanda a maddayaw sike Afu Jesus gumafu se nappabalat ira sike Dios. Si kakunna keppay, inoyera a ammera mangngan si korwan a maakkan e akwanda a maddayaw sike Afu Jesus anna mappabala-balat ira sike Dios.
7 Awan sikwatam a matolay anna matay para si baggina ingkepay. 8 Nu matolay etam, matolay etam tapenu mapaanggamman i Afu Jesus, e nu matay etam, matay etam tapenu mapaanggamman i Afu Jesus. Kunnantu, nu matolay onnu matay etam, meyannung etam sike Afu Jesus. 9 Se i Kristo e natay anna nantotolay takesi bagginaneno Afu na natayera anneno aggatolayera.
10 Kunnantu, yanyaka kad a mannunut onnu mangarari si wawwayim? Se tumallang etamma amminan sike Dios a manunut. 11 Se yo neturak a sapit i Dios e makkun,
“Gakkurug a aggatolayak, kunna i Afu, mammalitudna sito allangangkuweno amminan a tolayera,
e sapitandana amminan a Ikkanak i Dios.”a
12 Nabu, manabbag etam sike Dios si amminan a kiya-kiyan a akakwantam.
Amme Pakegafuwan na Pakaliwatan ino Korwan ira
(1 Corinto 8:1-13)
13 Antu appattantam yo baggitam ingkepay a mannunut a siggatatan. Imbes, lillikantamun a mangwa si kiya-kiyan a pakegafuwan na pakaliwatan na wayitam si angngurug. 14 Gumafu so pakisittatak sike Afu Jesus, ammuk ingke a awan a maakkan a madakkut si aggita i Dios. Udde yo tolay a mannonot si madakkut ino korwan ira a maakkan, ammena nad akkanan. 15 Nu mapalowannuweno nakam ino wayim si angngurug gumafu si akkanannu, ammenan a meantu si idduk yo akakwannu. Ammem darallan ino angngurug ino tata tolay a nakatayan i Kristo gumafu lamang si akkanannu. 16 Ammem ipabulun a yo mapiya para sikwam a mebilang ino korwan ira a maral. 17 Se yo kaawan so pattangngalan i Dios e bakkan a meafu si maakkan anna mainum, udde mangwa si matunung a tadda, makipiya si korwan ira anna mammalamuwang megafu si Espiritu i Dios. 18 Nu kunna sitaweno annerbiyeno tata tolay sike Kristo, maanggamman i Dios sikwana anna ilaweno tolayera baggina. 19 Nabu, gaggaddantam nad a mangwa si maski sanna a makaiyadda si piya anna makaduffun a mapatuyag yo siggatatan. 20 Ammem nad darallan ino aggangwera i Dios so minangikkurug ira gumafu lamang si maakkan. Amminan a garannud a maakkan e malinis, udde ammena mapiya a malliwat ino korwan ira gumafu lamang si akkanannu. 21 Mas mapiya nu ammem mangngan si laman onnu minum si binarayan onnu mangwa si maski sanna a pakaliwatan ino wawwayim si angngurug. 22 Ikka pelamang anni Dios ino maawag a makaammu si angngurugngu meafu sitaw. Mapiya i Dios so tolay a ammena makonsensiya gumafu se ammuna si fustuweno akakwanna. 23 Udde yo tolay a mabbabang meafu si maakkan e makastiguwanna nu akkananna gumafu se ammena makurug si angngurugnga. Se nu wara akwanna a ammena kuruwan a fustu inay e malliwatna baggina.