Na Panantotolay i Jesus
20
Lammuk kepay si maggibbat na Linggu sin inang i Maria a taga-Magdala so pattanamman i Jesus. Naitana a yo batu a passellad so pattanamman e naari. 2 Nabu nakkarantut baggina sike Simon Pedro anneno disipulu a iddukan i Jesus e kunna sikwara, “Inappareno baggi i Jesus so pattanamman e ammemi ammuweno nangiyanganda sikwana.”3 Antu inang da Pedro anneno disipulu so pattanamman. 4 Nakkarantut ira adwa udde mas tan-alistu a nakkarantut ino tata disipulu e napalungu a dinumatang so pattanamman ammat sike Pedro. 5 Naddomug anna nassirib baggina so unagngeno pattanamman, e naitaneno sinnun a pinabbabbat so baggi i Jesus, udde ammena tinumallung. 6 Dinumatang pay i Simon Pedro a tumuntufad sikwana anna tinumallung so pattanamman. Naitaneno sinnun a nakawaggat sinay, 7 anneno sinnun a pinabbabbat so ulu i Jesus e nadillaru anna nesina so sinnun a pinabbabbat so baggina. 8 Tinumallung pay inoy a disipulu a palungu a dinumatang so pattanamman. Naitaneno nedemmu e nangurug a nantotolay i Jesus. 9 Liyena iyaw a nedemmu, ammera kepay naintindiyan ino neturak a sapit i Dios a maawag a mantotolay i Jesus. 10 Antu nanaweno adwa a disipulu.
Nappadda i Jesus sike Maria a Taga-Magdala
11 Udde mattangi-tangit i Maria a taga-Magdala so lawan na pattanamman. Dengke a nattangit, naddomug a massiri-sirib so unagngeno pattanamman 12 e naitaneno adwa a anghel ira a nakabarasi si furaw. Aggatuttud ira so nakawaggatan na baggi i Jesus, ino tata so ulunan i Jesus anneno tata so dunan na takkina. 13 E kunda sike Maria, “Saay se mattangi-tangitka?”
E kunna sikwara, “Inappareno baggi i Afuk, e ammek ammuweno nangiyangnganda sikwana.” 14 Akkasapitna iyaw, nallangngi e naitana i Jesus a nakataddag sinay udde ammena naimunuwan baggina.
15 E kunna i Jesus, “Saay se mattangi-tangitka? Yanya yo intu-intufukannu?”
Arig i Maria a baggineno gumattaron so mulera sinay nabu kunna, “Afu, nu ikkeno nangiyanaw sikwana, sapitannu sikwak nu sintaw yo nangiwaggannu sikwana takesi appangku baggina.”
16 Kunna i Jesus, “Maria!”
Nallangngi i Maria e kunna sikwana so Hebreo, “Rabboni!” (Na kanggamma sapitan, “Mestru.”)
17 Kunna i Jesus, “Ammenak iggamman se ammek kepay nuli sike Ama. Udde itundum so disipuluk ira a muliyaknga sike Amak a Amayu pay anna sike Diosku a Dios diyaw pay.”
18 Antu inang i Maria so disipuluwera e kunna sikwara, “Naitak i Afu!” E netunduna kepay sikwareno sinapitna i Jesus sikwana.
Nappadda i Jesus so Disipulunera
19 Kagafiyananna si Linggu, nammu-ammung ino disipuluwera i Jesus. Neyalladureno balay se mattalawera so afu-afuwera na Hudyuwera. E nappadda i Jesus sikwara e kunna, “Piya yo ana sikwayu!” 20 Sin sinapitna iyaw, nepaitaneno kamatna anneno siwaknga sikwara. Maanggam ingkeno disipulunera se naitara i Afu.
21 E sinapitna imman i Jesus sikwara, “Piya yo ana sikwayu! Kakunna yo annundun i Ama sikwak, dundunan takayu pena.” 22 Akkabalinna iyaw, inangattannera e kunna sikwara, “Arasawan diyaweno Espiritu i Dios. 23 Se nu pakoman diyaweno liwa-liwat ino korwan a tolayera, napakomanin i Dios yo liwatdera. Udde nu ammeyuwera pakoman, ammenera pay pakoman i Dios.”
I Jesus anni Tomas
24 Sin nappadda i Jesus so disipulunera, tata sikwareno awan sinay, i Tomas a ayanda si Siping.a 25 Nabu kundeno korwan a disipulu sikwana a naitara i Afu Jesus. E kunna i Tomas sikwara, “Ammek mangurug makiyad si ammek maita anna maiggamman ino nakapatakkan na kamatnera anneno biyad so siwaknga.”
26 Akkabalinna tata linggu, nammu-ammung imman ino disipuluwera i Jesus so unagngeno balay, e bulunda i Tomas. Tinumallung i Jesus maski nu nakaserreno lenab e nattaddag so allanganda. Kunna sikwara, “Piya yo ana sikwayu!” 27 E kunna sike Tomas, “Itannu anna iggammannuweno kamatkuwera. Iggammannu pay yo siwakku e ammekan mabbabang, imbes e mangurugka!”
28 Kunna i Tomas, “Ikkeno Afuk anna Diosku!”
29 E kunna i Jesus sikwana, “Mangurugkan se naitanak. Mapiya i Dios so inoyera a mangurug maski ammerak naita.”
Na Gakkad Iyaw a Libru