Nappadda i Jesus so Pitu a Disipuluwera
21
Nappasa si pigya aw, nappadda imman i Jesus so disipulunera so bebay na Tiberias.a Kunna sitaweno akkapaddana. 2 Nammu-ammung sinay da Simon Pedro, i Tomas a mingananda si Siping, i Natanael a taga-Cana so Galilea, yo adwa a anak i Zebedeo anneno adwa kepay a disipulu i Jesus. 3 Sinapit i Simon Pedro so bulunnera, “Umangak a misesira.”Kunda sikwana, “Mebulung kami pay sikwam.” Nattakayera si barangay e makkatafiyera a misesira udde awan naappara.
4 Sin maddaddaramatin, nattaddag i Jesus so dappit udde ammera naimunuwan baggina. 5 E kunna sikwara, “Ana naappayu?”
Kunda, “Awan ingke.”
6 E kunna sikwara, “Iyassab diyaweno angngallut so diwanan na barangay e makaappa kayuna.” Nabu neyassabdeno angngallutda e ammera meyuddu gumafu so kaoddu yo naappara a busilad.
7 Kunneno disipulu a iddukan i Jesus sike Pedro, “I Afutam inay!” Sin nadingngag inay i Simon Pedro, nabbarasi baggina si panglawan se nakabarasi lamang si pang-unagnga anna nallattu baggina so danum. 8 Udde dinumatang ino korwan a disipuluwera a nakabarangay a maggonggo-gonggon so angngallut a napannu si busilad. Ammera aroyu so dappit se maturuk lamang si asiyam a fulu a metru. 9 Sin ginumaddang ira so dappit, naitareno baggang a nakatunuwan ino busilad e ana kepay tinapay sinay.
10 E kunna i Jesus sikwara, “Mangiyang kayu sitaw si busilad ira a naappayu.”
11 Antu inang i Simon Pedro so barangay e ginonggonneno angngallut a napannu si dorokkal a busilad. Tatut anna limafulu tallu amminan ino naappara. Udde maski kunna sinayeno kaodduna, ammena napissayeno angngallut. 12 E kunna i Jesus sikwara, “Kayutaw e mangngan etamun.” Awan maski sikwara a matuyag a nakamma a maffuut sikwana nu yanya baggina se ammuran a baggina i Afu. 13 Inumaranni i Jesus e inappaneno tinapay anna neyaddana sikwara, e kakunna keppay yo inangwana so busilad. 14 Antuweyaw yo pillu a appaddana i Jesus so disipulunera makiyad sin panantotolena.
I Jesus anni Pedro
15 Sin nabalin iran a nangngan, kunna i Jesus sike Simon Pedro, “Simon a anak i Juan, iddukannak kad mas ingke sitawera?”
Kunna i Pedro, “On, Afu, ammum a iddukan taka.”
Antu kunna i Jesus sikwana, “Pakkanannuweno tolek ira a kakunna yo appakkan ino gumappastu so ubbun a karnerunera.”
16 E pinidwa i Jesus a naffuut, “Simon a anak i Juan, iddukannak kad?”
E kunna i Pedro, “On, Afu, ammum a iddukan taka.”
Antu kunna i Jesus sikwana, “Tabburannuweno tolek ira a kakunna yo pattabbud ino gumappastu so karnerunera.” 17 Pinillu i Jesus a naffuut, “Simon a anak i Juan, iddukannak kad?”
Narraddam i Pedro se namillu a finuutna i Jesus sikwana e kunna, “Simon, anak i Juan, iddukannak kad?” Kunna, “Afu, ammum amminan, ammum a iddukan taka.”
E kunna i Jesus sikwana, “Pakkanannuweno tolek ira a kakunna yo appakkan ino gumappastu so karnerunera. 18 Itunduk sikwam ino kagakkuruwanna. Sin akkabbingngu, ikka ingkepay yo mabbarasi si baggim e umangka so maski sintaw a kanggammu angan. Udde nanu manakamkan, isoyyadnuneno kamatnu e barasiyan daka anna iyanggakana so ammem kanggam a angan.” 19 Sinapit iyaw i Jesus tapenu ipakaammu nu kasanna a matay i Pedro tapenu madayaw i Dios. Akkabalinna, kunna i Jesus sikwana, “Dandanannak!”
I Jesus anneno Disipulu a Iddukanna
20 Sin nallangngi i Pedro e naitaneno disipulu a iddukan i Jesus a dumaladandan sikwara. Baggineno disipulu a nassandig sike Jesus sin nananggafiyera e finuutna, “Afu, yanya yo mattraydor sikwam?” 21 Sin naitana i Pedro inay a disipulu, kunna sike Jesus, “Afu, nenay yo medemmuna sikwana?”
22 Kunna i Jesus sikwana, “Nu nakamku a matolay baggina makiyad si muliyak, awan a makwam sitan. Dandanannak!”
23 Gumafu sitaw a sinapit i Jesus, nassiwarak iyaw a sapi-sapit so minangikkurug ira a iyaw a disipulu e ammenana matay. Udde ammena sinapit i Jesus sikwana a ammena matay baggina, udde, “Nu nakamku a matolay baggina makiyad si muliyak, awan a makwam sitan.”
24 Baggineno disipulu a manaddag meafu sitawera, baggina keppay yo natturak sitawera e ammumi a gakkurug yo pakaammuna.
25 Oddu kepay a inangwa i Jesus a ammena kepay neturak sitaw a libru. Se nu meturak nad amminan iyawera, si ginanakamku ammena maffustu sito talubaggan ino libruwera a meturak.