Na Akkekakkap i Jesus
4
Kapiyena nabawtismuwan i Jesus, inanawanneno māt na Jordan e ana sikwaneno Espiritu i Dios. Negiyeno Espiritu i Dios baggina so kulolawat si appat a fulu aw. 2 Sinoy a tiyempu, kinakkapna i Diyablu a i Satanas i Jesus. Sin nabalin ino appat a fulu aw, nabisinan ingke baggina gumafu se awan inakka-akkanna. 3 Kunna i diyablu sike Jesus, “Nu gakkurug antu a ikkeno Anak i Dios, tunannu iyaw a batu a mattabali si tinapay.”4 Tinabbagnga i Jesus baggina, “Kunna so neturak a sapit i Dios, ‘Ammena matolay yo tata tolay si tinapay lamang.’a”
5 Antu neyangngeno Diyablu a i Satanas i Jesus so atannang ingke a bakulud e siddarat a nepaitana sikwana amminan ino talubbunan ira so talubaggan. 6 Kunna i diyablu sikwana, “Iyaddak sikwam ino pakandama a mattangngal sitawera anna maappam pena amminan a kadayawanda. Neyadda amminan iyawera sikwak e iyaddak so yanya yo kanggammangku a pangiyaddan. 7 Nu dayawannaknga, akwamma amminan iyawera.”
8 Tinabbagnga i Jesus baggina, “Kunna so neturak a sapit i Dios,
‘Dayawannu i Afu a Diosnu
e passerbiyannu pelamang baggina.’b”
9 Akkabalinna, neyangngeno Diyablu a i Satanas i Jesus so Jerusalem e pinataddagnga so tuttuk na Templu e nekunna sikwana, “Nu ikkeno Anak i Dios, mallattuka sitaw 10 se kunna so neturak a sapit i Dios a,
‘Dundunanna i Dios ino anghelnera a manabbud sikwam, takesi imuran daka e
11 ibballan daka sikwam a dumolam
takesi ammena mesenggid ino takkim so batu.’ ” c
12 Tinabbagnga i Jesus baggina,
“Kunna so neturak a sapit i Dios,
‘Ammem kakkappan i Afu a Diosnu.’d”
13 Sin inangweno Diyablu a i Satanas amminan a pakkakkap sike Jesus, inanawanna baggina anna nindag si makasta a tiyempu.
Na Pamefu i Jesus a Manunturu so Galilea
14 Nuli i Jesus so Galilea anna ana sikwaneno pakapangwa i Espiritu i Dios. Nassiwarak ino baga meafu sikwana so amminan a makkakarebbing a lubbu-lubbun so Galilea. 15 Namefu baggina a nanunturu so sinagogarera e dinayora amminan baggina.
Na Pammay sike Jesus so Nazaret
16 Sin dinumatang i Jesus so Nazaret a naddokallanna, inang baggina so sinagoga so Aw na Aggimemmang dengke a gagangena a akakwan. Nattaddag baggina a mabbibbid 17 anna nedawawa sikwaneno nadillaru a pabbibbiran a neturak i profeta Isaias. Binukkatanna e binibbidneno nakaiturakkanna:
18 “Na Espiritu i Afu e ana sikwak,
se pinilinak a mangibalaggaw si Mapiya a Baga so madidiyat ira.
Dinundunnak a mabbandu so akkelawan ino fukuk ira,
anna mapammapiyeno bulag ira,
anna maisalak ino napadiyatan ira,
19 anna mebalaggaw a dumatangin ino tiyempu
se ipaitana i Afuweno pannabbutna so tolenera.”e
20 Dinillaru i Jesus ino binibbidna anna netolina so gumàimfun liyena nattuttud. Pakatula-tulangngan ino tolayera baggina so sinagoga. 21 Antu kunna i Jesus sikwara, “Sitoye, iyaw a neturak a sapit i Dios a nadingngag diyaw e naparulotin.”
22 Makasta yo sinapitdeno tolayera sikwana anna napaanggamman ira so kakkapallat ira a sinapitna. Kunda, “Bakkang kad baggina e anak i Jose?”
23 Kunna i Jesus sikwara, “Ammuk a kun diyawna sikwak iyaw a lalenut, ‘Gumàuru, pammapiyannuweno baggim ingkepay!’ Ansa a kun diyawna sikwak, ‘Akwannu sito lubbuntam ino milagruwera a nadingngagmi a inangwam so Capernaum.’ ” 24 Kunnapay, “Gakkurug yo itunduk sikwayu, awan a profeta a maarasaw so lubbunna. 25 Na kagakkuruwanna, oddu yo baluwera so Israel sin tiyempu i profeta Elias sin ammena nuran si tallu rawun anna annam a dakkag. Oddu yo nabisinan sitan a talubbunan. 26 Udde dinundunna i Dios i Elias so tata lamang a balu a bakkan a Israelita so lubbun na Serapat so Sidon. 27 Oddu pay yo nattakit ira si madammat a taki-takit na gaddang so Israel sin tiyempu i profeta Eliseo udde awan nammapiya sikwara. I Naaman lamang a bakkan a Israelita a taga-Siria yo nammapiya.”
28 Sin nadingngagga iyaw, makaallang ingke amminan a tolayera so sinagoga. 29 Nattaddag ira amminan anna finuwersara a pinaanaw baggina so lubbunda. Neyangga baggina so uttun na dangutul a nakapataddaggan ino lubbunda, takesi idannaggana baggina so dabbak. 30 Udde nallakad a nanaw i Jesus so nallatanan ino tolayera.
Na Lalaki a Naaffunan si Demonyu
31 Tata aw inang i Jesus so Capernaum, tata lubbun so Galilea anna nanunturu so tolayera so Aw na Aggimemmang. 32 Nalaggat ira amminan so annunturuna gumafu se ana pakandamana a nassapit.
33 So sinagoga, ana tata lalaki a naaffunan si demonyu e naggirawa si madappa a nakkun, 34 “Anawan dakami! Jesus a Nazareno, ammeka mammolestiya sikwami. Umangka kad a manaral sikwami? Ammu taka. Ikkeno Dinundun i Dios.”
35 Udde pinassapitanna i Jesus baggina e kunna so demonyu, “Suminakka, anawannu baggina!” Sin nebakolluneno demonyuweno lalaki so allanganda, nallawan so inaffunanna a ammena pinalowan.
36 Nalaggat ira amminan so naitara e kunda si siggatatan, “Nerayaw? Nenay a sapi-sapitanna? Ana sikwaneno pakandama anna pakapangwa a manduwan ino demonyuwera a mallawan so tolay e makimorayera sikwana.” 37 Antu yo baga meafu sike Jesus e nassiwarak amminan so lubbu-lubbun sinay.
Pinammapiyana i Jesus ino Oddu a Tolayera
38 Kapiyera nallawan da Jesus anneno disipulunera so sinagoga, tinumallung baggina so balay i Simon. Makkulikug ino bafay a katuwangan i Simon e netundura sike Jesus meafu sikwana. 39 Inang i Jesus sikwana e tinunanna a maawanin ino kulikugnga. Sin nammapiyen ino bafay, siddarat a ginumumbwat baggina e inindannera si maakkan.
40 Sin massillapin, neyang ino tolayera sike Jesus amminan a matakit ira a ana naddadaruma a takitna. Nepotunna i Jesus ino kamatna so sittata sikwara e nammapiyera amminan. 41 Nallawan amminan ino demonyuwera so tolayera e naggira-girawera, “Ikkeno Anak i Dios!” Udde pinassapitannera i Jesus. Ammena nepabulun a mabid ira se ammuran a baggina i Mesiya.
Nanundu i Jesus so Sinagogera so Judea
42 Maggibbat sin nanaw i Jesus anna inang so lubbun a awan katole-tolena. Intu-intufukandeno tolayera baggina. Sin natumpalanda i Jesus, inarangga se ammenera a anawan. 43 Udde kunna i Jesus sikwara, “Maawagku a ibalaggaweno Mapiya a Baga meafu so pattangngalna i Dios so tolenera se antuweyaw yo nangidundunan i Dios sikwak.”
44 Antu nebalinna a ibalaggaweno mensahe so sinagogera so Judea.