Netundu i Juan a Gumabbawtismu a i Jesus ino Mesiya
3
So meka-tafulu lima rawun a pattangngal i Emperador Tiberio,
i Poncio Pilato ino gubernador na Judea.
Anni Herodes Antipas a gumattangngal na Galilea,
anni Felipe a wayina e gumattangngal so Iturea anna Traconite,
anni Lisanias e gumattangngal so Abilene.
2 Sin da Anas anni Caifas ino katannangan a pari so Jerusalem, nepakaammuna i Dios ino mensahena sike anak i Zacarias a i Juan sikwana a ana so kulolawat. 3 Inang i Juan so amminan a kalubbunan a aranni so māt na Jordan e tinunturuwanneno tolayera a mattale-talebad a mabboboliyera anna mappabawtismuwera takesi pakomanna i Dios ino liwatdera. 4 Antuweyaw yo neturak i profeta Isaias patamu sike Juan a sinapit i Dios so Anaknga,
“Ana a maggira-girawa so tolayera a mattale-talebad so kulolawat a nakkun,
‘Iparan diyaweno baggiyu so paddatang i Afu
kakunna yo pattunung so dalan para so kaawan a tolay,a
5 kakunna pay yo pattabbun so kada dabbak anna
pappatad so kada bakulud anna dangutul ira,
patunungan ino malliku-liku a dalan anna
limpiyan ino battu-battung a dalan
6 antu amminan a tolayera e maitaraneno pannabbut i Dios.’ ”
7 Kunna i Juan so oddu a tolayera a inang sikwana a nappabawtismu, “Maral kayu! Kakunnayu yo nagita a irawera! Mapiya nu malillikan diyaweno akkastigu i Dios! 8 Ipaitayu si akkatoleyu a gakkurug a nabboboli kayun so liwa-liwat diyaw. Ammeyu nad antu nonotan a gumafu se gaka nakayu i Abraham e ammena kayu a kastiguwan i Dios. Itunduk sikwayu a dama kepay akwan i Dios iyawera a batu a anak ira i Abraham. 9 Meyarig i Dios si tata tolay a newaggatneno watena so fungal na kayu a nakaparan a magabbung. Kunnantu, kada kayu a ammena mamunga si makasta e metappolna so afuy.”
10 Naffuut ino tolayera, “Nenay antu akwammi?”
11 Antuweyaw yo netabbagnga, “Nu ana adwa a tafál diyaw, iyaddayuweno tata so awanan anna iballeyu pay yo akkanan diyaw so awan maakkanda.”
12 Na korwan a gumattuki si biyenes a inang a nappabawtismu e naffuut sikwana, “Mestru, nenay maawag a akwammi?”
13 Kunna sikwara, “Ammeyu pappagan si biyenes ino tolayera si tan-oddu ammat so mepangngat a paganda.”
14 Naffuut pay yo sundaluwera, “Ikkami pay ay? Nenay antu akwammi?”
Netunduna sikwara, “Amme kayu manantalaw si tolay nu marang kayu si pirak sikwara onnu dakkiyan ira maski awan inangwara a maral. Makuntentu kayu nu nenay yo suwelduyu.”
15 Innanamandengkeno tolayera yo paddatang i Mesiya. Nakkalakabbawera nu i Juan ino Mesiya a inda-indagganda. 16 Antu kunna i Juan sikwara, “Bawtismuwan takayu si danum a mangipaita a nabboboli kayu so liwa-liwat diyawera udde ana makapangwengke ammat sikwak e umangnga a katufadku. Ammek mepangngat a manguttar so siggut na sandalyatna a kakunna yo akwan ino tata gumasserbi so amuna. Bawtismuwannana kayu si Espiritu i Dios anna si afuy.b 17 Isinanana inoyera a mabboboli so ammena mabboboli. Kakunnana yo gumappayaw a nakaibbal si salungkayna a nakaparan a mangisina si aggik so attap. Imfunannaneno aggik so alang udde taggabbannaneno attap si afuy a ammena maaddap.”
18 Si kaodduna kepay a pannabarang ira, nebalaggona i Juan ino Mapiya a Baga so tolayera. 19 E pinassapitanna pay i Herodes Antipas a gumattangngal na Galilea gumafu sike Herodias a inatawana sikwana a atawa kepay i wayina a i Felipe. Pinassapitanna pay i Juan i Herodes so oddu a inangwa-angwana a maral a taddera. 20 Udde nepafukuknga i Herodes i Juan so sundalunera e nedagga iyaw so maral ira a inangwa i Herodes.
Na Akkabawtismu i Jesus
21 Tata aw liyena nefukuk i Juan, oddu tolay a nabawtismuwan nesapat i Jesus. Sin maddaggun a mabawtismuwan i Jesus anna maddasa-dasal baggina, nabbukkat ino langit. 22 I Espiritu i Dios a nafforma a tata guruk e inumaffun sikwana. Ana ngaral a naggabwat si langit a nakkun, “Ikkeno anakku a iddu-iddukangku, pakaanggamman takangke.”
Na Aggidiyafuwan ira i Jesus
23 Mattallufulu rawun i Jesus sin namefu a nanuntu-tunturu anna nanundu-nundu meafu sike Dios.
Na ammuweno tolayera e anak baggina i Jose
a anak i Heli,
24 i Heli e anak i Mattat,
i Mattat e anak i Levi,
i Levi e anak i Melki,
i Melki e anak i Jannai,
i Jannai e anak i Jose,
25 I Jose e anak i Mattatias,
i Mattatias e anak i Amos,
i Amos e anak i Nahum,
i Nahum e anak i Esli,
i Esli e anak i Naggai,
26 i Naggai e anak i Maat,
i Maat e anak i Mattatias,
i Mattatias e anak i Semein,
i Semein e anak i Josek,
i Josek e anak i Joda,
27 i Joda e anak i Joanan,
i Joanan e anak i Resa,
i Resa e anak i Zerubabel,
i Zerubabel e anak i Sealtiel,
i Sealtiel e anak i Neri,
28 I Neri e anak i Melki,
i Melki e anak i Addi,
i Addi e anak i Cosam,
i Cosam e anak i Elmadam,
i Elmadam e anak i Er,
29 i Er e anak i Josua,
i Josua e anak i Eliezer,
i Eliezer e anak i Jorim,
i Jorim e anak i Mattat,
i Mattat e anak i Levi,
30 i Levi e anak i Simeon,
i Simeon e anak i Juda,
i Juda e anak i Jose,
i Jose e anak i Jonam,
i Jonam e anak i Eliakim,
31 i Eliakim e anak i Melea,
i Melea e anak i Menna,
i Menna e anak i Mattata,
i Mattata e anak i Natan,
i Natan e anak i David,
32 i David e anak i Jesse,
i Jesse e anak i Obed,
i Obed e anak i Boaz,
i Boaz e anak i Sala,
i Sala e anak i Nason,
33 i Nason e anak i Amminadab,
i Amminadab e anak i Admin,
i Admin e anak i Arni,
i Arni e anak i Hesron,
i Hesron e anak i Perez
i Perez e anak i Juda,
34 i Juda e anak i Jacob,
i Jacob e anak i Isaac,
i Isaac e anak i Abraham,
i Abraham e anak i Tera,
i Tera e anak i Nahor,
35 I Nahor e anak i Serug,
i Serug e anak i Reu,
i Reu e anak i Peleg,
i Peleg e anak i Eber,
i Eber e anak i Sela,
36 i Sela e anak i Cainan,
i Cainan e anak i Arfasad,
i Arfasad e anak i Sem,
i Sem e anak i Noah,
i Noah e anak i Lamek,
37 i Lamek e anak i Metusela,
i Metusela e anak i Enok,
i Enok e anak i Jared,
i Jared e anak i Mahalaleel,
i Mahalaleel e anak i Cainan,
38 I Cainan e anak i Enos,
i Enos e anak i Set,
i Set e anak i Adam a anak i Dios.