Na Akkeyanak i Jesus
2
Sinoyera a tiyempu, nangwa si katunungan i Emperador Augusto a maawag a masensus amminan ino tolayera a migigyan so talubbunan ira a nelawum so Imperyo na Roma. 2 Antuweyaw yo palungu a sensus a naangwa sin i Kirenio ino Gubernador na Siria. 3 Antu inang a nappalista amminan ino tolayera so lubbun a naggabwatan na aggidiyafuwandera.4 Naggabwat i Jose so lubbun na Nazaret so kalubbunan na Galilea. Inang baggina so lubbun a naggabwatan i patul David so Betlehem so kalubbunan na Judea, se gaka baggina i David. 5 Nappalista i Jose sinay bulunna i Maria a atawanna. Mabussitin sinoy i Maria sin inang ira. 6 Sin anera sinay, dinumatangngin ino orat na panak i Maria 7 e neyanakngeno palungu a anaknga a lalaki. Binabbattanna si sinnun ira anna nepaiddana so lutung gumafu se awanin a pagyananda so balay a paffunduwanda.
Na Gumappastuwera si karneru anna na Anghel ira
8 Sinay a lubbun, ana yo gumappastuwera si karneru so pastura sinoy a gafi. 9 Lannat a nappadda sikwareno tata anghel i Afu anna nabbaggaweno kadayawan i Afu so lebutdera. Natalawan irengke. 10 Udde kunneno anghel sikwara, “Amme kayu mattalaw! Inangngak sitaw takesi ipakaammuk sikwayuweno Mapiya a Baga a kurwengke makapaanggam si amminan a tolayera. 11 Se neyanak ino kalubit so lubbun a nakeyanakan i patul David a Mannabbut diyaw. Baggineno Mesiyaa a yo Afu. 12 Iyawneno pemunuwan diyaw: matumpalan diyawneno tata kalubit a nababbattan si sinnu-sinnun anna nakaidda so lutung.”
13 Kapiyena nabid ino anghel, lannat a nappaddeno odduwengke a anghel ira si langit a binulundeno tata anghel. Naddaya-dayawera amminan sike Dios e kunda:
14 “Madaya-dayaw i Dios si langit!
Anna piya sito lubag gumafu si pakikkawayyan i Dios so tolayera a kaangga-anggam sikwana!”
15 Sin nuliyeno anghel ira si langit, nattataretabbag ino gumappastuwera e kunda, “Intamun so Betlehem! Itantam iyaw a nedemmu a netundu i Afu Dios sikwatam.” 16 Nappala-palan ira a inang so Betlehem e natumpalanda i Maria anni Jose anneno kalubit a nakaidda so lutung. 17 Sin inaranniyandera, netundureno sinapit na anghel meafu so kalubit. 18 Nalaggat amminan ino nakadingngag so netunduweno gumappastuwera. 19 Siggadandam amminan iyaw i Maria anna sigganonotna iyaw si mapiya. 20 Nanaweno gumappastuwera a naddaya-dayawerengke sike Dios gumafu so amminan a nadingngag anna naitara, meantu so amminan a sinapit na anghel sikwara.
21 Nappasa si walu aw, nepabanggitdeno abbing anna pinangananda si Jesus. Antuweyaw yo ngan a sinapit na anghel liyena malwaring i Maria.
Naitallang i Jesus so Templu
22 Sin dinumatang ino aw a angwanda Jose anni Maria yo seremonyas na pakkalinisb meantu so katunungan a neyaddana i Dios sike Moises, nekangkalindeno kalubit so Jerusalem takesi itallangga baggina sike Afu, 23 gumafu se neturak so katunungan i Dios, “Maawag a idutung sike Afuweno amminan a palungu a anak a lalaki.c” 24 Anna nangiwalliyera pay meantu so katunungan i Dios, “Adwa a pagaw onnu adwa abbing a guruk.d”
Naitana i Simeon i Jesus
25 Sinoy a tiyempu, ana tata lalaki so Jerusalem a mingan si Simeon. Matunung anna mangikakwa baggina sike Dios. Minda-indag baggina so Mannabbut na Israel. Ana sikwaneno Espiritu i Dios. 26 Nepakaammuneno Espiritu i Dios sikwana a ammenana matay makiyad si ammena maiteno Mesiya a netamba i Dios. 27 Negiyana i Espiritu i Dios i Simeon a umang so lawan na Templu. Ana sinay baggina sin nekangkalinda Jose anni Maria ino kalubit a i Jesus takesi akwandeno meantu so katunungan. 28 Inabbanna i Simeon ino kalubit anna naddayaw sike Dios. Kunna:
29 “Afu Dios, sitoye naparulotin ino netambam sikwak,
iyannutnu iyaw a imbutnu a maimammak a matay,
30 gumafu se naitakun ino Mannabbut,
31 a neparannu so amminan a tolayera.
32 Bagginaneno mangiyadda si baggaw so bakkan a Hudyuwera a ammena makaammu sikwam,
anna mangiyadda si dayaw so tolem a Israelitera.”
33 Nalaggat ino gagginafan na kalubit gumafu so sinapit i Simeon meafu sikwana. 34 Anna naddasal i Simeon sike Dios a indannera si mapiya a akkatolay. Kunna pay i Simeon sike Maria, “Dingngaggannu, pinili i Dios iyaw a abbing a pakadarallan anna pakatabbutan ino oddu a tolayera so Israel. Bagginaneno pemunuwan a naggabwat sike Dios udde oddu a tolayera a mammayna sikwana. 35 Ipakaammuneno ana so nakam na tolayera. E ikka a inana, marraddammengkeno nakammu gumafu so akwanda sikwana a mallengke masuduk si mataram a espada.”
Dinayawna i Ana i Dios Gumafu sike Jesus
36 Ana pay sinayeno tata profeta a bafay a mingan si Ana a anak i Fanuel a naggabwat so aggidiyafuwan i Aser. Bakat ingkein baggina. Pitu rawun lamang a naddawum ira a matawa liyena nabalu. 37 Sinoy a tiyempu, walufulu appat a dawunnan. Maumid baggina so lawan na Templu, makkataw anna makkatafi baggina a naddaya-dayaw sike Dios a nangngili-ngilin anna naddasa-dasal. 38 Sinoy keppay a orat, inumaranni baggina sike Jose anna Maria e naddaya-dayaw sike Dios. Nabid baggina meafu so kalubit so amminan a tolayera a minda-indag so pannabbut i Dios so Jerusalem.
Naddokal i Jesus so Nazaret
39 Sin nabalin a inangwa da Jose anni Maria ino amminan meantu so kaawan na katunungan i Afu, nuliyera so Galilea, so lubbunda a Nazaret. 40 Dinumokal ino abbing a malalanggat, mangngammu anna inindan i Dios si makasta a akkatolay.
Na Abbing a i Jesus so Templu
41 Kada rawun a umang ino gagginafan i Jesus so Jerusalem so Fiyesta na Attalebade. 42 Sin tafulu adwa rawun i Jesus, inang ira a nakilamu-lamu meantu so negagangera. 43 Sin nabalin ino fiyesta anna pauliyeran so lubbunda, nappabattang ino abbing a i Jesus so Jerusalem, udde ammena ammuweno gagginafanna. 44 Se arigga a nebulun i Jesus so korwan a gumaddoyug ira, nebalinda a nallaka-lakad si makkataw. Na si uddina, inintufukda baggina so kawayyandera anna kolakdera. 45 Sin ammera a maintufukan baggina, nuliyera so Jerusalem takesi sinayera a mintufuk. 46 Nappasa si tallu aw, naintufukanda i Jesus so lawan na Templu a nakituttud so mestruwera. Naningnga-ningngag anna naffuu-fuut baggina sikwara. 47 Nalaggat amminan a nakadingngag sikwana gumafu so porena a mintindi anna so pattabbagnga so fuut na mestruwera. 48 Sin maitara baggina, nalaggat ino gagginafannera. Kunneno inana sikwana, “Anakku, saay se inangwam iyaw sikwami? Maburungak ingke anni amam a mintu-intufuk sikwam.”
49 Kunna i Jesus sikwara, “Saay se intu-intufukandak? Ammeyu kad ammu se maawag a anaak sito balay i Amak?” 50 Udde ammera naintindiyan ino sinapitna sikwara.