Na Mapiya a Baga a Meantu Sike
Lukas
1
Madaya-dayaw a Teofilo:Odduwen ino natturak anna inangwara yo damaramara a nangistorya so maanteg a nedemmu sikwatam, 2 kakunna yo netundura sikwatam ino palunguwera a nakaimammat a nangipakaammu so sapit i Dios. 3 Akkabalingku a kinalakammu amminan si fustu mamefu so palunguna patamu so inangwa-angwa i Jesus, naddesisyonak pay a iturak iyaw a maanteg a nedemmu para sikwam 4 takesi ammunnuwengke a gakkurug yo netunturu sikwam.
Nepakaammuweno Akkeyanak i Juan a Gumabbawtismu
5 Sin i Herodes a Kaatannangan yo patul na Judea, ana pari a minganan si Zacarias, a nebilang so grupu na pariyeraa a nepalungwan i Abias siin nabayagin a tiyempu. I Elizabet a atawana e naggabwat pay so gaka i Aaron. 6 Parefu ira a matunung si aggita i Dios anna makurug ira a nakimoray si katunungan anna dundun ira i Afu. 7 Udde awan anakda gumafu se lupat i Elizabet anna manakam iran.
8 Tata aw, nasserbiyeno grupu i Zacarias sike Dios so Templu, e nekanna a akakwanneno kalangananna a tata pari. 9 Meantu so gagangayeno pappili nu yanya yo managgabna si insensu so altar, i Zacarias yo napili. 10 Sin maddaggun a matagga-taggab ino insensu so pattaggabban so altar, odduwengke tolayera a maddasa-dasal so lawan na Templu.
11 Antu, nappadda sike Zacarias ino tata anghel i Afu a nakataddag so diwanan na altar a nakataggabban ino insensu. 12 Sin naitana i Zacarias ino anghel, natalawan ingke baggina. 13 Udde sinapitneno anghel sikwana, “Ammeka mattalaw Zacarias gumafu se diningngagnga i Dios ino dasalnu. Manaknga si lalaki i Elizabet a atawam e pinganannuna baggina si Juan. 14 Maanggamkangkena anna odduna yo mammalamuwang so akkeyanaknga, 15 se kaawanna baggina si aggita i Afu. Ammena nad minum si binarayan a ubas onnu maski sanna a binarayan a makabuk. Maski sikwana a ana kepay so kuyung i inana, yo Espiritu i Dios e anana sikwana. 16 Odduneno Israelitera a pulin i Juan sike Afu a Diosda. 17 Kakunnanana i Juan i Elias a mangikakwa sike Dios anna ana nammuna a manundu. Palunguwannaneno paddatang i Afu tapenu pattatanneno gagginafan ira anneno anakdera. Ipamorayneno tolayera a amme makimoray sike Dios a tuntulandeno mapiya a annunturuwera inoyera a matunung si aggita i Dios. Akwannana iyaw tapenu meparan ino tolayera para so paddatang i Afu.”
18 Netundu i Zacarias so anghel, “Ammek mangurug a medemmuna iyaw se lakayakun anna bakattin pay yo atawak.”
19 Pinassapitanna anghel i Zacarias e kunna, “Ammem kad ammu a ikkanak i Gabriel a gumasserbi i Dios? Dinundunnak tapenu itunduk sikwam iyaw a Mapiya a Baga. 20 Udde gumafu se ammem kinurug ino sinapitkuwera a maparulotna iyaw so fustu a tiyempu, maggumalkana. Ammekana makaabid makiyad so aw a meyanak yo anakngu.”
21 Daggun, ninda-indag ino tolayera sike Zacarias anna nakkabbawera nu saay se nabayag baggina so unagngeno Templu. 22 Sin nallawan baggina, ammenengke makaabid. Naammuwanda se ana naitana so unagngeno Templu. Gumafu se ammenan makaabid, senyat lamangin yo pakitetabbagnga sikwara.
23 Sin nabalinnan a masserbi so Templu, nanaw baggina so Jerusalem e nuli so lubbunna. 24 Ammena nabbayag, nalwaring i Elizabet a atawana. Lima a dakkag a ammena nallawa-lawan so balera. 25 Kunna i Elizabet, “Mapiyengke i Afu sikwak! Mabussitakun. Inarineno akkeyatatallangku so tolayera so ammek panak.”
Nepakaammuweno Akkeyanak i Jesus
26 So meka-annam a dakkag a pabbussit i Elizabet, dinundunna i Dios i anghel Gabriel so Nazaret a lubbun na Galilea, 27 so tata sultera a ammena kepay nasiddun a mingan si Maria. Neyatawa baggina sike Jose a naggabwat so gaka i Patul David. 28 Nappaddeno anghel sike Maria anna kunna, “Maria, piya yo ana sikwam a pinaitan i Dios si simpatna. I Afu ana sikwam.”
29 Maburung i Maria so sinapit na anghel e ninonotna nu nenay kanggamma sapitan iyaw. 30 Kunneno anghel sikwana, “Ammeka mattalaw, Maria, gumafu se naanggamman i Dios sikwam. 31 Maningngagka, mabbussit anna manakkana si lalaki. Pinganannuna baggina si Jesus. 32 Mapadayawannengke baggina anna mingananna si Anak na Dios a Makapangwengke si amminan. Pabbalinan i Afu Dios baggina a patul kakunna i David a aggidiyafuwanna. 33 Mappatulna baggina so gakera i Jacob amu-amu anna awan pakiyaranneno pattangngalanna.”
34 Kunna i Maria so anghel, “Kasanna iyaw e ammek kepay a nasiddun?”
35 Kunneno anghel sikwana, “Anana sikwam ino Espiritu i Dios a yo nammu na Makapangwengke si amminan e kakunna yo dulam a massiyongnga sikwam. Kunnantu, yo abbing e meyaparte a makimoray sike Dios anna mingananna si Anak i Dios. 36 I Elizabet a kawayyannu e annam a dakkagin a mabussit si lalaki maski nu bakattin anna ammu amminan a lupat baggina. 37 Se awan a ammena dama a akwan i Dios.”
38 Kunna i Maria, “Gumasserbinak i Afu. Makwa nad sikwak ino sinapitnu.” Nabu nanawin ino anghel.
Na Paggannon i Maria Sike Elizabet
39 Sinoyera a aw, ginumikkat i Maria e nappala-palan a inang so tata lubbun so kabakuluran na Judea. 40 Naddulot baggina so balay i Zacarias e nakkidyot sike Elizabet. 41 Sin nadingngagnga i Elizabet ino akkidyot i Maria, nagguyuweno kalubit so kuyungnga. Negiyeno Espiritu i Dios baggina a mabid.
42 Madappa a kunna i Elizabet, “Nangwa i Dios si mapiya sikwam ammat so korwan a bafabbayera anna mangipaitana baggina si neduma a panggamma so anakngu a meyanaknguna. 43 Ammek kuruwan a bisitannak ino ina i Afuk! 44 So akkidyotnu sikwak, nagguyu si anggam ino kalubit so kuyungku. 45 Maanggamkangke se nangurugka so sinapit i Afu sikwam.”
Pammadayaw i Maria
46 Kunna i Maria,
“Dayawangkuwengke i Afu Dios,
47 Maanggammak gumafu sike Dios a Mannabbutku
48 se mapiya baggina sikwak a daludug a gumasserbina.
Mamefu sitoye, itunduna amminan a diyafuwan a mapiya i Dios sikwak
49 gumafu so kakkapallat a taddera a inangweno Mapakandama a Dios sikwak.
Awan kakunna yo kadayawanna.
50 Minaggikallak baggina so amminan a mattalaw sikwana,
mamefu so palungu a diyafuwan makiyad so tumuntufad a diyafuwan ira.
51 Nangipaita baggina si mapakandama a taddera si pakapangwana,
anna newaraknga inoyera a balagasay a ginanakamda.
52 Inarineno makapangwa a patul ira so tronora,
anna inangwana a kaawan ino kaibbafan a tolayera.
53 Binattugngeno mabisi-bisinan ira si mammit a maakkan,
anna pinaanawneno dammak ira a kama-kamat.
54 Dinuffunanneno Israelitera a gumasserbinera,
dengke a netambana a allakkannera,
55 meantu so netambana so aggidiyafuwantam ira,
sike Abraham anna so gakanera amu-amu.”
56 Nakiigyan i Maria sike Elizabet si tallu a dakkag liyena a nuli so balena.
Na Akkeyanak i Juan a Gumabbawtismu
57 Dinumatang ino tiyempu a nanak i Elizabet si lalaki. 58 Naammuwan ino kakkarebbingngera anna kawa-kawayyannera a minaggikallak ingke i Afu sikwana. Nakilamuwang ira amminan sikwana.
59 So meka-walu aw, naammung ira para so pabbanggit ino abbing e kanggamda nad a pinganan si Zacarias a ngan i amana. 60 Udde kunna i Elizabet, “Bakkan! Pinganantamma baggina si Juan.”
61 Kunneno tolayera sikwana, “Awangke so kawayyan diyawera a minganan si Juan.” 62 Sinenyattanda i Zacarias tapenu maammuwanda sikwana nu nenay kanggamma ipangan so abbing.
63 Narang i Zacarias si patturakkanna anna natturak, “Juan yo nganna.” Nalaggat ira amminan. 64 Siddarat a nakaabirin i Zacarias anna dinaya-dayawna i Dios. 65 Nalaggat amminan ino kakkarebbinggera! Neyabi-abid iyawera so amminan a lubbu-lubbun so kadangutulan na talubbunan na Judea. 66 Sigganonot amminan a nakadingngag sikwara meafu so nedemmu. Kunda, “Nenay antuna a pattabaliyanna iyaw a abbing?” Netundura iyaw gumafu so nadingngagga meafu sikwana anna mangurug ira a ana sikwaneno pakapangwa i Afu.
Na Profesiya i Zacarias
67 Negiyana i Espiritu i Dios i Zacarias a ama i Juan a mallabbun a nakkun:
68 “Dayawantam i Afu Dios na Israel,
gumafu se umang baggina a manuffun so tolenera anna ibali-balinna a tabbutan ira.
69 Manundun baggina sikwatam si makapangwa a manabbut sikwatam
a naggabwat so aggidiyafuwan i David a gumasserbina,
70 maningke si netambana iyaw siin nabayagin a tiyempu
megafu so profetanera a gakkurug ingke a nasserbi sikwana.
71 Matabbutna etam ino Mannabbuttam so kapakwatam ira a makalussaw sikwatam.
72 Dinundunna i Dios ino Mannabbut gumafu se ammena nakalyawan a nattamba so aggidiyafuwantam ira a allakkannerana.
anna parulotannaneno tamba a inangwana.
73 Iyaw a netambana so aggidiyafuwantam a Abraham e ipabulunna etam
74 a matabbut so kapakwatam ira takesi masserbi etam sikwana a awan talaw
75 a manolay a awan pakaliwatan anna matunung si aggita i Dios so amminan a awera na akkatoletam.”
76 Netundu i Zacarias so anaknga, “Minganangkana si profeta i Dios a Makapangwengke si amminan.
Mapalungukana so paddatang i Afu tapenu meparannuweno tolayera a mangarasaw sikwana.
77 Itundumma sikwara si tabbutannerana i Dios
si pammakoma na liwa-liwatda.
78 Minaggiidduk anna minaggikallak i Dios.
Umangnga i Mesiya sikwatam a dinundun i Dios a manilla mallattak a sinag,
79 tapenu mabaggawan ino nonot inoyera a amme makaammu sike Dios kakunna yo tolayera a natolay si kalammukan anna mattalaw a matay.
Igiyanana etam so masinak a pakibulun sike Dios.”
80 Dinumokal ino abbing e nattuyag ino agginonotanna anneno angngurugnga sike Dios. Nagyan baggina so kulolawat makiyad si nepakaammuneno baggina ingkepay anna nanundu so oddu a tolayera so Israel.