Netunduna i Juan a Gumabbawtismu a i Jesus ino Mesiya
3
Sinoyera aw, ana i Juan a Gumabbawtismu so kulolawat na Judea e nebalaggona so tolayera a mattale-talebad a nakkun, 2 “Mabboboli kayu si liwa-liwat diyaw, se aranniyen a dumatang ino pattangngalan i Dios.” 3 I Juan yo kanggam a sapitan i profeta Isaias sin kunna,“Ana a maggira-girawa so tolayera,
a mattale-talebad so kulolawat a nakkun,
‘Iparan diyaweno baggiyu so paddatang i Afu
kakunna yo pattunung so dalan para so kaawan a tolay.’ ”a
4 Nabbarasi si duddut na kamelyu i Juan anneno gayakatna e naangwa si gaddang na aggayam. Durun anna diyu yo akka-akkananna. 5 Inang sikwaneno oddu a tolayera a naggabwat so Jerusalem anna so amminan a lubbu-lubbun na Judea anna amminan a lubbu-lubbun a aranni so māt na Jordan. 6 Netundura sike Dios amminan a liwa-liwatda so allangan na tolayera antu binawtismuwan ira i Juan so māt na Jordan.
7 Udde sin naitana i Juan ino oddu a Fariseowera anna Saduseowera a mappabawtismu, kunna sikwara, “Maral kayu! Kakunnayu yo nagita a irawera! Mapiya nu malillikan diyaweno akkastigu i Dios! 8 Ipaitayu si akkatoleyu a gakkurug a nabboboli kayun so liwa-liwat diyaw. 9 Ammeyu nad antu nonotan a gumafu se gaka nakayu i Abraham e ammena kayu a kastiguwan i Dios. Itunduk sikwayu a dama kepay akwan i Dios iyawera a batu a anak ira i Abraham. 10 Meyarig i Dios si tata tolay a newaggatneno watena so fungal na kayu a nakaparan a magabbung. Kunnantu, kada kayu a ammena mamunga si makasta e metappolna so afuy.
11 “Bawtismuwan takayu si danum a mangipaita a nabboboli kayu so liwa-liwat diyawera udde ana makapangwengke ammat sikwak e umangnga a katufadku. Ammek mepangngat a makkit si sandalyatna a kakunna yo akwan ino tata gumasserbi so amuna. Bawtismuwannana kayu si Espiritu i Dios anna si afuy.b 12 Isinanana inoyera a mabboboli so ammera mabboboli. Kakunnana yo gumappayaw a nakaibbal si salungkayna a nakaparan a mangisina si aggik so attap. Imfunannaneno aggik so alang udde taggabbannaneno attap si afuy a ammena maaddap.”
Na Akkabawtismu i Jesus
13 Sinoy a tiyempu, ginumumwang i Jesus a naggabwat so Galilea e inang sike Juan so māt na Jordan a mappabawtismu sikwana. 14 Udde so palunguna finuwaddan i Juan baggina a nakkun, “Maawagku a mappabawtismu sikwam. Udde saay se umangka mappabawtismu sikwak?”
15 Udde kunna i Jesus sikwana, “Purayannu a maangwa iyaw sitoye, se antu yo mepangngat a akwanta tapenu tuntulanta amminan a kanggam i Dios a akwanta.” Antu inumannung i Juan.
16 Sin nabawtismuwanin i Jesus, sikwana a ginumaddang so danum, lannat a nabbukkat ino langit. Naitana i Jesus ino Espiritu i Dios a dumassa-dassag si forma na guruk anna inumaffun sikwana. 17 E ana ngaral a naggabwat si langit a nakkun, “Antuweyaw yo Anakku a iddu-iddukangku, pakaanggammantakangke.”