Na Paggannon na Mangngammu a Lallaki sike Jesus
2
So tiyempu i Patul Herodes, akkabalin a neyanak i Jesus so Betlehem so Judea, dinumatang so Jerusalem a naggabwat so Silawan ino mangngammu a lallakiyera a maayan si magowera.a Finuutdeno tolayera sinay a nakkun, 2 “Openo kalubit a neyanak a patul na Hudyuwera? Naitamiyeno bitun a naggabwat so silawan a pemunuwan a neyanakin baggina antu inumang kami sitaw takesi maddayaw sikwana.”3 Sin nadingngag i patul Herodes meafu sitaw, natalawan baggina tantaro nu iyaw a kalubit yo manali sikwana a patul. Natalawan pay yo oddu a bulunnera so Jerusalem. 4 Antu inammungngeno amminan a afu-afu a pariyera anneno mapoporay si katunungan na Hudyuwera e finuutnera, “Sintaw kad a meyanak i Mesiya?”
5 Tinumabbag ira, “So Betlehem na Judea se kunna sitaw yo neturak i profeta Mikias a sinapit i Dios:
6 ‘Ikkayu a taga-Betlehem so Judea,
amme nonotan ino afu-afuwera na Judea a bakkang kayu a kaawan a lugar
se maggabwat sikwayuweno
mattangngal so tolek ira so Israel.’ ”b
7 Antu paimad a inayan i patul Herodes yo magowera takesi maammuwanna sikwareno orat na appaddeno bitun. 8 Antu pinaumangngera so Betlehem e netunna, “Umang kayu sinay e intufukan diyaw si mapiya yo abbing. Nu maintufukan diyaw baggina, itunduyu sikwak takesi umangak pay a maddayaw sikwana.”
9 Akkadingngagga so tun ino patul, nebalinda a nintu-intufuk. Lannat a naitara imman ino bitun a nappadda sikwara sinoy so silawan e dinandananda iyaw makiyad si nimemmak ira so batug na nagyanan ino abbing. 10 Kurwengke yo anggamda sin naitara a nimemmak ino bitun. 11 Sin tinumallung ira so balay, naitareno abbing so karebbing i Maria a inana. Nallabbera e dinayoreno abbing. Akkabalinna, newallideno nekangkalinda a bulawan, insensu anna mira. 12 Sin paanaweran, nappatenap i Dios sikwara a ammeran muli sike Herodes, antu tameteno nallakaranda pauli so lubbunda.
Na Pattamang so Ehipto
13 Sin nakaanaw iran, nappadda sike Jose si tenap ino tata anghel i Afu Dios e kunna, “Gumumbwatka, ibulunnuweno masina so Ehipto anna magyang kayu sinay makiyad si ammek a itundu sikwayu a manaw kayu se intufukanna i Herodes ino abbing tapenu ipapatena.”
14 Antu sitan keppay a gafi, ginumumbwat i Jose anna nekangkalinneno masina so Ehipto. 15 Sinayera a nagyan makiyad si natay i Herodes. Si kunna sinay, megafu so tata profeta siin nabayagin a tiyempu, naparulot ino sinapit i Afu Dios a nakkun, “Gabwat so Ehipto inayangku yo anakku.”c
Nepapatena i Herodes ino Kalubit ira
16 Liyena natay i Herodes, naammuwanna a yo magowera e inillokura baggina. Nakaallang ingke baggina antu ipinapatena amminan ino abbing a lallakiyera so Betlehem anna so lebut na lubbun a maddawun si adwa padolam, meantu so tiyempuweno appadda na bitun a naammuwanna so magowera.
17 Si kunna sinay, naparulot ino sinapit i Dios megafu sike profeta Jeremias:
18 “Nadingngag so Rama ino madappa a ngaral na bafabbayera,
ngaral a mattala-tangit anna makkalli-kallit.
Tangi-tangitan i Raquel yo anakngera.
Inammayanna a mabannayan se natayeran amminan.”d
Na Panantotoli a Naggabwat so Ehipto
19 Sin natayin i Herodes, tata anghel i Afu Dios ino nappadda si tenap sike Jose so Ehipto. 20 Kunneno anghel sikwana, “Gumumbwatka, iyanomun ino masina se muli kayun so lubbun diyaw a Israel se natayin ino tolayera a manggam a mappapatay so kalubit.” 21 Antu ginumumbwat i Jose e neyulina so Israel ino masina.
22 Udde sin nadingngagnga a i Arquelao a anak i Herodes yo mappatul so Judea a tali i amana, mattalaw baggina a umang sinay. Pinalanánna i Dios baggina megafu si tenap a umang ira so Nazaret na Galilea. 23 So Nazaret ira a nagyan takesi yo sinapit na profetera siin palungu a tiyempu e maparulotin, “Maayanna baggina a Nazareno.”