Nappili i Jesus si Palungu a Disipulunera
5
Namitta, sin mattadda-taddag i Jesus so idag na balanaw so Genesaret,a nassisinnissik ino oddu a tolayera a umang sikwana a maningngag so sapit i Dios. 2 Naitaneno adwa a barangay na misesira a awan nakatakay aranni so dappit na balanaw a inanawanda se inangga binagguwan ino angngallutdera. 3 Nattakay i Jesus so tata barangay a akwa i Simon anna inarangnga sikwana a iyaroyuna si bisang so dappit. Nattuttud i Jesus so barangay anna namefu a nanunturu so tolayera.4 Kapiyena tinunturuwan ino tolayera, kunna sike Simon, “Iyang diyaweno barangay so kaarollamman a parte na danum anna iyassab diyaweno angngallut ira takesi makaappa kayu si busilad.”
5 Netabbag i Simon, “Afu, makkatafi kami a nisesira udde awan ingke naappami. Udde nu iyan a kunnu, iyassabkuweno angngallut ira.” 6 Sin inangwara iyaw, oddu yo naappara a busilad makiyad si maggi nabaddit ino angngallutdera. 7 Sinenyattandeno bafulundera so tafik a barangay takesi umang ira a manuffun sikwara. Inang ira e pinannureno adwa a barangay makiyad si namefuweran a lumammad.
8 Udde sin naita i Simon Pedro iyaw a nakwa, nammalitud baggina so allangan i Jesus e kunna, “Aroyuwannak Afu, se sinaliwatak.” 9 Netunduna iyaw gumafu se i Simon anneno bulunnera e nalaggat pay gumafu so kaoddu yo busilad a naappara. 10 Na anak ira i Zebedeo, da Santiago anni Juan a bulun i Simon a ana so tafik a barangay e nalaggat pay.
Kunna i Jesus, “Ammeka mattalaw, Simon. Mamefu sitoye, bakkanin si busilad ino ammungannu udde tolayera takesi kuruwandaknga e mattabaliyera a disipuluk.”
11 Sin negaddanggeno barangera so dappit na balanaw, nebattanggeno negosyora so kamat ino korwan ira anna dinumandan ira sike Jesus.
I Jesus anneno Tolay a Ana Takitna si Gaddang
12 Sin ana i Jesus so tata so lubbu-lubbun, ana lalaki a kurwengkeno takitna si gaddang. Sin naitana i Jesus, nallabba baggina so lubag anna nakigumallak sikwana e kunna, “Afu, nu kanggammu, mapammapiyanak.”
13 Sinenggidna i Jesus baggina e kunna, “On, kanggammangku. Mammapiyakan.” Siddarat a naawan ino kurwengke takitna si gaddang e nammapiya baggina. 14 Netunna i Jesus sikwana, “Ammem iyaw itundu si maski yanya a tolay udde umangka mappaita so pari na Templu takesi sapitannana a nammapiyakan. Antu iyaddam sikwaneno nedundun i Moises a iwallim sike Dios a pakaitan si amminan a nammapiyakan.”
15 Udde maski nu kunna sitaw, oddu kepay a nangammu meafu so inangwa i Jesus nabu oddu tolay a inang maningngag sikwana anna mapammapiya so takitdera. 16 Udde maumid a umang i Jesus so luga-lugar a bisang yo tolayera a migigyan.
Pinammapiyana i Jesus ino Paralitiku
17 Tata aw, sin maddaggun a manuntu-tunturu i Jesus so tata balay, nakatuttud ino Fariseowera anna mapoporay si katunungan sinay. Naggabwat ira so Galilea, Judea anna Jerusalem. Anneno pakapangwa i Afu Dios e ana sike Jesus tapenu makapammapiya baggina so korwan ira. 18 Antu dinumatang ino korwan a lallakiyera anna inakkitdeno paralitiku a nakaidda so piddan. Pinurebanda a neyang baggina sike Jesus, 19 udde gumafu se awan a pallakaran si kaoddu yo tolayera, nunek ira so atapb e inarireno parte na atap so batug i Jesus anna nedolamdeno nakaidda a paralitiku so niddanna anna netallangga baggina sike Jesus. 20 Sin naitana i Jesus ino angngurugga sikwana, kunna so lalaki, “Wayi, napakomanin yo liwa-liwatnu.”
21 Kunneno Fariseowera anneno mapoporay si katunungan si ginanakamda, “Yanya iyaw a tolay a massipitta sike Dios? I Dios lamang yo mamakoma si liwa-liwat.”
22 Udde ammuna i Jesus ino ginanakamda. Kunna. “Saay se mannonot kayu si kunna sitan? 23 Ansa kad mas malan a sapitan, ‘Napakomanin ino liwa-liwatnu,’ onnu sapitan, ‘Gumumbwatka e mallakadka’? 24 Udde ipaitaknga sikwayu a ikkanak a yo Anak na Tolay e ana pakandamak sito lubag a mamakoma si liwa-liwat.” Kunna so paralitiku, “Itunduk sikwam, gumumbwatka anna appannuweno niddannu anna mulikan so balem.”
25 Siddarat a nattaddag ino paralitiku so allanganda, inakkitneno niddanna anna nanaw a naddaya-dayaw sike Dios. 26 Nalaggat ira amminan anna dinaya-dayora i Dios. Natalawan ira e kunda, “Neduma ingkeno naitatam sitoye aw.”
Inayanna i Jesus i Levi
27 Akkabalinna iyaw, inanawanna i Jesus ino lubbun anna naitana i Levi, tata gumattuki si biyenes a nakatuttud so lugar nu sintaw yo pappagan si biyenes. Kunna sikwana, “Mebulungka sikwak.” 28 Nattaddag i Levi e inanawanneno tarabafuna a gumattuki si biyenes anna dinumandan sike Jesus.
29 Nangiparan i Levi si dokal a funsyon so balena para sike Jesus. Odduwengke a gumattuki si biyenes anna korwan a tolayera a nakiakkan sikwara. 30 Narreklamuweno Fariseowera anna mapoporay si katunungan e kunda so disipuluwera i Jesus, “Saay se makiakkan anna makiinum kayu so gumattukiyera si biyenes anna so sinaliwat ira!”
31 Antuweyaw yo sinapitna i Jesus sikwara, “Inoyera a magawa-gawayyan e ammera maawag ino gumàuru udde imbes inoyera a matakit. 32 Antu sapitangku sikwayu a ammek inang sitaw a ayan ino matunung a tolayera udde yo sinaliwat ira a mabboboliyera.”
Na Fuut meafu si Angngilin
33 Kunda sike Jesus, “Maumid a mangngilin anna maddasal ino disipuluwera i Juan anneno Fariseowera udde yo disipulum ira e makaakka-akkan anna makainu-inum.”
34 Nangarig i Jesus sikwara e kunna, “Damana kad a mangngilin ino nakibodera nu daggun a bulunda kepay yo lalaki a mangatawa? Ammena ay! 35 Dumatangngeno aw a yo lalaki a mangatawa e meyanawna sikwara anna antuwenayneno tiyempu na angngilinda.”
Meafu so Tunturu i Jesus
36 Nangarig pay i Jesus sikwara a nakkun, “Awan a maggiri so bawu a sinnun anna iyappitna so dadan a sinnun se nu makwa iyan, mabadditneno bawu a sinnun anneno giri so bawu a sinnun e ammenana mepangngat so dadan a sinnun. 37 E awan pay a mangiyekwa si bawu a binarayan so dadan a gaddang a pangiyekwanan ira, nu kunna sitan a makwa, battakan ino bawu a binarayan ino pangiyekwanan. Massabbuneno binarayan anna madaralneno pangiyekwanan ira. 38 Maawag a meyekweno bawu a binarayan so bawu gaddang a pangiyekwanan. 39 Awan a manggam a minum si bawu a binarayan nu natantamandan ino dadan a binarayan. Sapitandana, ‘Mas mammit ino dadan a binarayan.’ ”