Nepakaammuweno Akkadaral na Templu
13
Sin nallawan i Jesus so Templu, tata so disipulunera a nakkun sikwana, “Mestru, itannu iyawera a makarasta a batuwera anneno kastana iyawera a dorokkal a nepataddag!”2 Antu finuutna i Jesus sikwana, “Maitam kad iyawera a dorokkal a nepataddag? Na kapakwera e darallandana iyawera anna awan maski tata batu a mabattangnga so nakapotunanna, amminan e madabbuknga.”
3 Sin nakatuttud i Jesus so Dangutul na kakayuwan a Olibu, a tafik na Templu, ira-ira pelamang da Pedro, Santiago, Juan anni Andres ino inumaranni sike Jesus e kunda, 4 “Itundum sikwami, nainsana iyaw a medemmu anna nenayna yo pemunuwan a medemmuna iyawera?”
5 Kunna i Jesus sikwara, “Mimud kayu a awan mangillokuna sikwayu. 6 Oddu a tolayera yo dumatangnga e massasan a baggira e ikkanaka anna sapitanda, ‘Ikkanak i Mesiya!’ Anna illokundaneno oddu a tolayera. 7 Amme kayu mattalaw nu makadingngag kayu si mededemmu a giyerera anna mededemmuna kepay. Maawag a medemmu iyaw, udde bakkan kepay iyaweno tamfut na talubaggan. 8 Maggigiyeraneno amminan a talubbunan anna gubyernuwera e anana bisin anna lunig ira so naddadaruma a luga-lugar. Udde antuweyaw lamang yo pefu na diyat a kakunna yo low na gampapanak.”
Nepakaammuweno Pallupet
9 Nebalinna i Jesus a nakkun, “Mimud kayu se idawawara kayuna so affuyug na Hudyuwera anna malassitang kayuna so sinagogera. Gumafu se mangurug kayu sikwak, tumallang kayuna so gumattangngal ira anna so patul ira. Iyawin yo tiyansayu a mangitundu si kagakkuruwan sikwara meafu sikwak. 10 Na Mapiya a Baga meafu sike Jesu Kristo e maawag nad abbu a mebalaggaw si amminan a tolayera. 11 Se nu iyang dakayuweno kapakwayuwera so usgadu, amme kayu mabburung nu nenay yo sapitan diyaw, udde sapitan diyaw nu nenay yo kanggam ino Espiritu i Dios a sapitan diyaw sitan a tiyempu. Se bakkan ikkayuna yo massapit udde yo sapitan diyaw e maggabwatna sike Espiritu i Dios.
12 “Traydoranneno wayi yo wayina tapenu ipapatena, kunnapay yo akwan na gagginafan so anakdera. Anna kapakwanneno anak ira yo gagginafandera e ipapatera. 13 Anna ikalussaw dakayuneno amminan a tolayera gumafu se mangurug kayu sikwak. Udde yo tolay a mangibali-balin a makimoray sike Dios si kiyanna e matabbutna.
Nepakaammuweno Akkadaral na Jerusalem
14 “Se nu maitayuweno kakkalussaw a passipitta sike Dios a pakegafuwan a anawan ino tolayera ino Templu so Jerusalem, neyekwa iyaw so bakkan nad a pangiyekwanan, (so mabbibbid ira, intindin diyaw iyaw si mapiya), antu inoyera a ana so Judea e makkarelera nad so kabakuluran. 15 Nu anaka so atap na balem, ammekan mullug anna tumallung so balem a mangappa si maski sanna. 16 Nu ana kayu so payaw, amme kayun muli so baleyu a mangappa si tafál diyaw. 17 “Sitan a aw, pakekkallak pay yo bafabbayera a mabussit anneno mappasusu a inera. 18 Maddasal kayu sike Dios a yo panoyu e ammenana medemmu so tiyempu na labbat 19 Se sitan a tiyempu, anana yo nafulotan a passufri a awan kakunnana sin kepay pefu na talubaggan makiyad sitoye, e ammenanna a mepidwa. 20 Nu ammena pinaibbafa i Dios ino bilang na awera na diyat, awan nad mesalak a tolay. Udde gumafu so napilinera, paibbafannaneno bilang na awera na diyat.
21 “Kunnantu sitan a tiyempu, nu ana massapit sikwayu, ‘Itan diyaw, anen sitaw i Mesiya!’ onnu ‘Anen baggina sinay!’ Ammeyu ke kuruwan baggina. 22 Anna sitan a tiyempu, odduna yo mappadda a sasan-mesiyas anna sasan-profetera. Mappaiterana si oddu a garannud a milagruwera tapenu maillokureno tolayera anna nu damana maski inoyera a pinili i Dios 23 Malertu kayu, sapi-sapitangku amminan iyawera sikwayu liyena medemmuna.
Na Pannuliyeno Anak na Tolay sito Lubag
24 “Udde inoyera a awera na diyat e nabalinin,
mallammukngeno sinag,
anna ammenana mabbaggaweno dakkag,
25 madannagngeno bitun ira so kalawatan,
anneno amminan a pakapangwab a ana si langit e mayuyyuknga.
26 “Antu maitaraknga a yo Anak na Tolay a ana so dulam a dumata-datang si pakapangwak anna pakadayawangku. 27 Anna dundunangkuneno anghelkuwera anna ammungandana inoyera a pinili i Dios a naggabwat so interu a lubag.”
Na Makalakammu so Kayu a Igos
28 Nebalinna i Jesus a nakkun, “Intindin diyaweno kalakammu a naggabwat so kayu a igos. Nanu mappanga-pangen anna mallimubbutin, ammuyu a mattali-taliyen ino tiyempu. 29 Kunnapay a nanu maitayu amminan ino pemunuwan ira a sinapitku, ammuyu a aranniyen ingkeno pannulik sito lubag. 30 Gakkurug yo itunduk sikwayu, mededemmuna amminan iyawera so amminan a tolayera a aggatolay liyera matay. 31 Tumallapneno kalawatan anna lubag, udde ammenengke maawan ino sapitkuwera amu-amu.”
Awan Makaammu so Pannuli i Jesus sito Lubag
32 Nebalinna i Jesus a nakkun, “Awan ingke makaammu nu nainsa a medemmuna iyawera maski yo anghel ira si langit onnu ikkanak a yo Anak i Dios. I Amak lamang yo makaammu. 33 Mimud kayu! Malertu kayu, se ammeyu ammu nu nainsa a dumatangnga iyaw a tiyempu.
34 “Meyarig iyaw si tata tolay a umang maddoyug so aroyu a lubbun e netalakngeno balena so imbutnera. Tinunannera so tarabafunda. Anna tinunanneno gumabbantay na lenab a malertu nanu dumatang baggina. 35 Kunna keppay, kakunna yo makan-akwa so balay, ammeyu ammu nu nainsaak a muli si gafina onnu si tangnga na gafi, onnu si passirallok na lalung onnu si maggibbat. 36 Se nu lannat a muliyak, tantaro madatangngan takayu a ammena nakaparan. 37 Anna nenay yo sinapitku sikwayu, sapitangku pena si amminan. Malertu kayu!”