Jisɔs faŋ beŋ buhu bə nɨŋ'ə bə yɔɔ ntse bəfɛ
9
Jisɔs bəndɨ beŋ buhu bə nɨŋ'ə bə yɔɔ ntse bəfɛ, bɔ tɛshɛ ba ba lɨ. Yu nya bɔ buŋga bə dzə yi bɔ jiba ɨ bɔ kɨ foshɛ bətsə nə bənɨ wɨ, bɔ wəmiəsɨ bənɨ bə gwɨ́ lə. 2 Yu faŋ bɔ lə bɔ gəŋ kɨ tɨfiə bənɨ kɨ buŋkuŋ bu Nyɔ lə, bɔ wəmiəsɨ bənɨ bə gwɨ́ lə. 3 Yu tə bə bɔ lə, “Ɨ bə na gɨntɨ lɨ, miɨ kə̂ dzɛɛ fiɔŋ. Miɨ kə̂ dzɛɛ kɨntɛ makə kɨba makə bidiəŋ, makə kpə. Miɨ kə̂ dzɛɛ bindzu bifɛ. 4 Ɨ bə gəŋ ba be dɨ wula wɨ, tsɔŋ yi bə́ galə bəŋ sɔ, bə kɨ me kwa sɔ gəŋ fɔ tsa yi bə dza nə dɨ wa wɨ. 5 Ɨ kɨtuŋ kɨdɔ nɨŋŋ nləkə bəŋ, bə dza nə kɨ ntɨŋ ba kuchɛ bidi nə go yɛnɨ wɨ, ɨ fi donchɛ lə bɔ' mɔŋ fiɔŋ.”6 Bɔ gəŋ kɨ gəndə bituŋ ntɨŋ bichi, bɔ tɨfiəə shɔŋ yi ndzeŋe tsukɔ buŋkuŋ bu Nyɔ lə wɨ, bɔ wəmiəsɨ bənɨ bə gwɨ́ lə bəchi.
Shɔŋ yi Jisɔs funsə Hɛlɔd
7 Lə Hɛlɔd wu nə̀ sakɨ sha yi Galili wɔ biɔŋ bichi bi nə̀ tɨchə, bi funsə yu ndzɨ bənɨ bədɔ nə̀ tɨdi lə Jisɔs no na Jɔŋ Nchɛsebiɔ wu dzakɔ nə kkpə lɨ ba fɔ lɨ. 8 Bədɔ tɨdi lə na Alaja wu lafɔ ba lɨ. Bədɔ tɨdi yibɔ lə na miɨ wu shɔŋ yi Nyɔ wu fiəfiə wudɔ wu dzakɔ nə kkpə lɨ. 9 Hɛlɔd masə lə, “Nnə̀ ŋkəmbɨ fo wu Jɔŋ no lə. No miɨ na tə yəŋ fɛŋ wu nna ŋ'woko ŋgwe yi biŋ biɔŋ tsukɔ yu wɨ?” Yu kɨ se lə yu ŋəŋ Jisɔs wa wɨ.
Jisɔs chɨ bənɨ bəntsuku bətɨŋ
10 Beŋ bə faŋə bə Jisɔs lə gəndə ba tsu jiŋ ba tə yu biɔŋ bichi bi bɔ fəə. Yu dze bɔ, bɔ bə bɔ baŋgə ba gəŋ kɨtuŋ kɨ Bɛsaida ntɨŋ. 11 Bəmanɨ, kuta wu bənɨ kkə ba gbɔ kɨ səndə bɔ biəlɨ yu, yu ləkə bɔ ba kɨ tɨfiə tsukɔ buŋkuŋ bu Nyɔ lə wɨ, yu wəmiəsɨ bənɨ bə gwɨ́ lə.
12 Lə diɔ kɨ gɨntɨ midiɛ, beŋ bə Jisɔs lə bə faŋ'ə bə yɔɔ ntse bəfɛ kɨnɨ ba tə bə yu lə “Tə̂ bə bənɨ bɛŋ lə bɔ gəŋ bituŋ bə ku yi gwɨgwɨ ntɨŋ, ba nɔŋ bidiəŋ bibɔlə bə dɨ wu bɔ jiba ɨ bɔ me, ndzɨ mɛni na kpa.”
13 Jisɔs chi ji lə, “Na bəŋ bə jiba ɨ bə nya bɔ fiɔŋ bɔ diə.” Bɔ tə lə, “Fiɔŋ fi kə na keŋkɛ na kwa bəblɛ bətɨŋ bə bíɔsu fiɛ, kɨjilə wə na se lə kə gəŋ taŋ bidiəŋ butaŋə ba nya bə bənɨ bɛŋ bəchi?” 14 Bɔ nə̀ tɨdi ma ndzɨ bənɨ nə̀ ji mɨ kɨyɛŋ, bənɨnsə kwa ji nɨ bəntsuku bətɨŋ. Jisɔs tə tə bə beŋ buhu bə nɨŋ'ə lə, “Bə tə̂ bənɨ jimiɛ fəkoso bintsu lɨ bintsu lɨ, nɨ mbaashɨŋ mbaashɨŋ.” 15 Bɔ tə, bənɨ ba jimiɛ bəchi. 16 Jisɔs dze bəblɛ bətɨŋ ba bə bíɔsu ya fiɛ, yu tɔ bushi bɔ́ ba nya kɨmbafə bə Nyɔ, tə gbədiə ba nya bə beŋ buhu bə nɨŋ'ə lə bɔ jɛchɛ bə bintsu bia. 17 Bɔ jɛchɛ, bənɨ bəchi diə ba fulu lɨ, beŋ bə Jisɔs lə bə nɨŋ'ə banchɛ bidiadia bi' shəkiə, bi yi bəŋka yɔɔ ntse bəfɛ.
Pita shafu lə Jisɔs na Nchitə wu Nyɔ nə̀ kaa wa
18 Lə kɨ ji butsu budɔ Jisɔs tsɨsə yu wumbɔŋ, beŋ buhu bə nɨŋ'ə ji fə yu ku. Yu bi bə bɔ lə, “Bənɨ na tɨdi lə nna nji yəŋ?” 19 Bɔ chi lə, “Bənɨ bədɔ na tɨdi lə wə na ji Jɔŋ Nchɛsebiɔ, bədɔ lə Alaja, bədɔ tɨdi lə wə na ji miɨ wu shɔŋ yi Nyɔ wu fiəfiə wudɔ wu nə̀ dzakɔ nə kkpə lɨ.” 20 Yu tə bi bə bɔ lə, “Bəŋ tə bə na tɨdi yɛnɨ lə nna nji yəŋ?” Pita chi lə, “Wə na ji Nchitə wu Nyɔ nə̀ kaa wa.” 21 Jisɔs dze tsa ba loso bɔ lə bɔ kə̂ mɔŋkɔ lə bɔ tə fiɔŋ fiŋ bə miɨ.
Jisɔs chanyɛ kɨ bəŋgə buhu lə bə kkpə yihi
22 Yu chanyɛ bə bɔ lə, “Wɛŋ wu Miɨ naji lə yu wɔ̂ ŋgə kɨtso, ɨ bənɨ bə sakɨ kɨtuŋ bə bəchɛ bintɔfiɛ bəbəŋ bə bənɨ bə na tɨfiə bilaŋ bi Nyɔ lə nɨŋŋ yu tɨ. Ɨ bə́ ná kkpɨsə yu, ɨ kɨ ji díɔ bɨŋ tɛ, ɨ Nyɔ dzakɔ yu nə kkpə lɨ.”
Kɨtɨ kɨ ŋ'wa lə kɨ miɨ wu na biəlɨ Jisɔs lə
23 Jisɔs chanyɛ bə bənɨ bəchi lə, “Ɨ miɨ na se lə yu kɨ ji miɨ wɛmɨ, tə yu naji lə yu nɨ̂ŋŋ gwɨ yihi, ba kɨ toto kɨtɨ kɨhɨ kɨ ŋ'wa lə díɔ chi yu biəlɨ mɨ. 24 Bə kkə̂ lə miɨ wu na bətə buwəŋ buhu lə bu tə kə laa, yu jiwa ɨ yu lasɨ bu. Bəmanɨ, miɨ wu na lasə buwəŋ buhu ndzɨ mɨ, wa miɨ na bətə buwəŋ busu bubətə. 25 Ɨ bə tɛshɛ tɨmo mbi no chi ba nya bə miɨ lə yu diə, ba tə tsu lasɨ makə jishi gwɨ yihi, ɨ mbɨ wusu kɨ ji la? 26 Bə kkə̂ lə, jilə yaa na kwete miɨ bə mbiə mɨ ma diɛ yɛmɨ, yu kkə̂ lə Wɛŋ wu Miɨ ná kɨ ji bə yaa tɨ bə miɨ wa tsa yi yu' fichə ba ba bubəŋ buhu ntɨŋ bu na ji tɨ bu Tɨɨ Nyɔ lə bə bənchinda buhu bə ntsaaŋ'ə. 27 Ntə bəŋ yɛyi lə, bənɨ bədɔ lɨmi ba mɛni bə ná wokɔhɔ ntsɔŋfu yi kkpə fiəŋkə lə bɔ' ŋəŋ nɨ Nyɔ na sakɨ buŋkuŋ buhu.”
Bushi bu Jisɔs lə yashənɨ
28 Lə kɨ ji chi díɔ yaŋ, nɨ Jisɔs nə̀ chanyɛ biɔŋ biŋ, yu dze Pita bə Jɔŋ bə Jɛm bɔ bəndɨ dzo yidɔ bɨŋ lə bɔ gəŋ tsɨsɨ. 29 Lə yu gəŋ kɨ tsɨsə, bushi buhu yashənɨ, kɨndzu kɨhɨ yashənɨ tɨ, kɨ kɨ lakiɛ mɛ mwamwamwam. 30 Bənɨ bəfɛ, ɨji Mose bə Alaja lafu mɨ ba kɨ chanyɛ bə Jisɔs. 31 Kɨŋgbooŋ kɨ Nyɔ lə nə̀ tsalə bɔ wɨ. Bɔ chanyɛ tsukɔ kkpə yi Jisɔs naji lə yu kkpə Jɛlosalɛm bə mfə lə fi ba fɔ diəŋ nɨ Nyɔ nə̀ galə. 32 Bɔ nə̀ chanyɛɛ manɨ ji kɨnɨ gweke Pita bə Jɔŋ bə Jɛm. Lə bɔ dzakɔ, bɔ ŋəŋ nɨ kɨŋgbooŋ kɨ Nyɔ lə na tsalə Jisɔs wɨ, bɔ ŋəŋ tɨ bənɨ bə bəfɛ bɛŋ bɔ lɨmi bə yu. 33 Lə bənɨ bəfɛ ba layɛ, Pita dzakɔ ba tə bə Jisɔs lə, “Miɨ Wubəŋ, fi ndzeŋ nɨ kə na ji mɛni. Ga kə tûŋ bitsawo bitɛ, kɨdɔ kɨ ji kɔhɔ, kɨdɔ kɨ Mose lə, kɨdɔ kɨ Alaja lə.” Yu nə̀ chanyɛɛ manɨ, yu ji tɨmo ŋkkə sɨŋ fiɔŋ fi yu na chanyɛ.
34 Kwa nɨ yu nə̀ bambi yu chanyɛ manɨ, kɨku ba kusə bɔ. Nɨ bɔ nə̀ ji kɨku ka ntɨŋ, nyiŋ kwe bɔ. 35 Diɛ fɔ nə kɨku ka ntɨŋ lə, “No na Wɛnɛ wu mɨ nchiŋɛ. Bə kɨ woko bə yu.” 36 Lə diɛ ya chanyɛ manɨ kanə lɨ, bɔ ŋəŋ Jisɔs lɨmi mɨ yu wumbɔŋ. Bɔ kətə nshiiŋ ba jikə tədiə bə miɨ tsa ya wɨ fiɔŋ fi bɔ ŋəŋə dzo ya wɨ.
Jisɔs foso tsə nə wɛŋ wu nɨnsə wɨ
37 Lə butsu wɔ, bɔ bə Jisɔs dza nə dzo wɨ ba shi lɨ. Lə bɔ shi, bɔ bɨkənɨ bə kuta wu bənɨ. 38 Lə bɔ bo, bɔ ŋəŋ miɨ wudɔ kuta wa ntɨŋ yu wunəə lə, “Miɨ wu Bitɨfiə, butɨɨ jiŋgə mɨ wɛnɛ no. Na ka kwa yu. 39 Wôkɔ wɔ, kɨn'yɨntɨ kɨdɔ na ba kɨ shɔ yu, yu gbo, yu kɨ dio, yu kpɔkiɛ, fu foto nə yu dze. Kɨ gɨntɨ bə yu bugəŋə, kɨ jikə bɨmiə tɨ lə yu yɨntɨ. 40 Nsə nende lə beŋ bɔhɔ bə nɨŋ'ə foso kɨn'yɨntɨ ka, bɔ jikə kafɔ.”
41 Jisɔs wɔ manɨ ba tə lə, “Ɔɔɔ! Ŋkɨkɨ wu kɨlɔlɔ no, wu kə galə shəŋ Nyɔ wɨ. Njiwa njiŋ bə bəŋ gəŋ fɔ tsa yi la, ŋkansɨ shəŋ bə bəŋ gəŋ fɔ tsa yi la?” Yu tə tə bə chɛ wɛŋ wa lə, “Bâ bə wana mɛni.” 42 Lə miɨ wa dze wɛŋ wa kɨ ba bə yu, tsə wa chi kufiɛ wɛŋ wa, yu gbɔ fəkoso kɨ dio. Jisɔs wɛŋ kɨn'yɨntɨ kɨbiə ka, kɨ fɔ nə wɛŋ wa wɨ, wɛŋ wa bu wəmiə. Jisɔs nya yu bə tɨɨ. 43 Bənɨ bəchi ŋəŋ buŋga bu Nyɔ lə, kɨgəsə wɨŋ bɔ.
Jisɔs chi chanyɛ kɨ bəŋgə buhu lə bə kkpə yihi
Nɨ kɨgəsə nə̀ bambi kɨ wɨntɨ bɔ bə biɔŋ bichi bi Jisɔs nə̀ fɨtɨ, yu tə bə beŋ buhu bə nɨŋ'ə lə, 44 “Bə dzê tsa bə gû bitiu biɛnɨ buni bə biɔŋ bi njiwa nchanyɛ bə bəŋ. Bə́ ná nya Wɛŋ wu Miɨ bənɨ kaŋ.” 45 Nɨ yu chanyɛ manɨ, bɔ jikə kkə fiɔŋ fi yu chanyɛ, ndzɨ fiɔŋ fidɔ nə̀ baŋ lə bɔ kə kkə, bəmanɨ bɔ kɨ lete mbi bə yu kɨ nchanyɛ ya lə.
Na yəŋ miɨ wubəŋ?
46 Bɔ jiji ba gbɔ yímbiɛ bɔ bɔ lə fa bɔ na ji mɛ miɨ wubəŋ nə bɔ ntɨŋ ji yəŋ lɛɛ. 47 Jisɔs kkə fiɔŋ fi bɔ na gɔmbiɛ bɔ shəŋ, yu dze wɛŋ wubiɨ ba ga fə yu ku, 48 tə tə bə bɔ lə, “Ɨ miɨ ləkə wɛŋ nɨ no yɨ wɛmɨ lɨ, kɨjilə yu ləkə ji mɨ. Ɨ miɨ ləkə mɨ, tə yu ləkə ji miɨ wu' faŋə mɨ. Fi kɨ ji lə, miɨ wu na dze gwɨ yihi koso nə bəŋ ntɨŋ, na yu wu na ji miɨ wubəŋ.”
Ɨ miɨ na yimbiɛhɛ wə, tə yu wa bə wə
49 Jɔŋ dza ba bəndɨ Jisɔs ba wə yu diɛ lə, “Miɨ wubəŋ, kə sə ŋəŋ miɨ wudɔ wɨ yu bɨndɨ yɨ wɔhɔ bətsə fɔdiɛ nə bənɨ wɨ, kə loso yu, ndzɨ yu na jimiɛhɛ miɨ nə kɨntsu kaha ntɨŋ.” 50 Jisɔs chi ji lə, “Bə kə kɨ losɔ ŋgwe yi wa miɨ, ndzɨ ɨ miɨ na yimbiɛhɛ bəŋ, kɨjilə yu wa bə bəŋ.”
Bənɨ bə Samaliya nɨŋŋ nləkə Jisɔs
51 Lə tsa yi Nyɔ nə̀ji lə yu dze Jisɔs yu bəndɨ bɔ́ yi kɨ ba kwətsə, Jisɔs fə gwɨ yi gəŋə Jɛlosalɛm. 52 Lə yu dza ŋgəŋ, yu faŋ bənɨ bədɔ fiə. Bɔ gəŋ ba be kɨtuŋ kɨdɔ kɨ Bəsamalita lə ntɨŋ lə bɔ fə dɨ sɔ yu lɨ. 53 Bənɨ bə sɔ nyiŋ yu dɨ ba jikə ləkə yu, ndzɨ bɔ nə̀ kkɨ ŋgbooŋ lə yu na chɛti yu gɨntɨ ji Jɛlosalɛm. 54 Bə Jɛm bə Jɔŋ bə nə̀ ji beŋ bə Jisɔs lə bə nɨŋ'ə wɔ fiɔŋ fia, bɔ bi lə, “Baba, kə bəndɨ boso nə bɔ́ wu shi ba kasɨ bənɨ bɛŋ?”ª 55 Jisɔs fichə ba wɛŋ bə bɔ,ª 56 tə dza bə beŋ buhu bə nɨŋ'ə kɨ gɨntɨ dzə yi kɨtuŋ kɨdɔ ntɨŋ chichi.
Miɨ wu nɨŋ wu Jisɔs kə kɨ bobi nəjiŋ
57 Lə bɔ kɨ gɨntɨ, miɨ wudɔ ba tə bə Jisɔs lə, “Njiwa ŋkɨ mbiəlɨ wə ma məŋ wu wə na gɨntɨ.” 58 Jisɔs chi bə yu lə, “Biŋfundɔ na keŋkɛ lɨ bikpɔ bibilə, munyinyi mu dimbi bɔ́ keŋkɛ tsú yimilə, bəmanɨ Wɛŋ wu Miɨ na keŋkɛhɛ tɨmo dɨ wu kɨnsə fo wuhu.”
59 Jisɔs tə tə bə miɨ wudɔ lə, “Kɨ biəlɨ mɨ.” Miɨ wa chi lə, “Baba, shə̂ mɨ ŋgəŋ ndi taa tsɔnyɔ ntə ŋkɨ mbiəlɨ.” 60 Bəmanɨ Jisɔs chi bə yu lə, “Shə̂ bənɨ bəŋkkpə bɔ kɨ diyi bənɨ bəbɔlə bəŋkkpə, wə gəŋ fiɔhɔ kɨ tɨfiə tsukɔ buŋkuŋ bu Nyɔ lə wɨ.”