Bə́ nɨŋŋ Jisɔs kɨtuŋ kɨhɨ ntɨŋ
6
Jisɔs dza nə mɨ ba gəŋ kɨtuŋ kɨhɨ ntɨŋ bə beŋ buhu bə nɨŋ'ə. 2 Lə kɨ ji butsu bubɔlə bu fufiɛ, yu gəŋ tsɔŋ yi kɨntsɨsɨ ntɨŋ ba kɨ tɨfiə bənɨ. Bənɨ kɨyɛŋ kɨ woko nɨ yu na tɨfiə bɔ keŋkɛɛ kɨgəsə kɨ wɨŋə. Bɔ kɨ masə bɔ tɨdi lə, “Miɨ no' fɨyə biŋ biɔŋ nə məŋ mɛ? Yu dze buŋ bufɨ nə məŋ? Yu fə nəŋ tə kɨ fɨtɨ biɔŋ bi kɨgəsə kɨ wɨŋə lə biŋ? 3 Ntɨlə na yu wu na kwende wa bitɨ, yu ji wɛŋ wu Maliya? Ntɨlə bəwəmɛni na Jɛm, Jɔsɛ, Judas, bə Semon? Dzə́mbɨtə yihi na sɨŋ mɛ bə bɨ?” Nɨ bɔ nə̀ masə manɨ, bɔ nɨŋŋ yu. 4 Bəma Jisɔs tə bə bɔ lə, “Bə́ ba bə́ kɨ kuntə miɨ wu shɔŋ yi Nyɔ bidɨ ntɨŋ bichi. Na kwa kɨtuŋ kɨhɨ ntɨŋ bə ku wuhu ntɨŋ ma nə yu tsɔŋ wu bə́ ba bə́ ji yu kə kuntə.” 5 Nɨ bɔ nɨŋŋə Jisɔs manɨ, fi ya yu fi chisə fəə biɔŋ bi kɨgəsə kɨ wɨŋə lə mɨ kɨyɛŋ, yasə kwa lə yu nə̀ bukɔ bənɨ bə gwɨ́ lə tsəsɨ, bɔ wəmiə. 6 Kɨgəsə wɨŋ yu kɨtso ndzɨ bɔ nə̀ kə galə shəŋ yu wɨ.Jisɔs faŋ beŋ buhu bə nɨŋ'ə bə yɔɔ ntse bəfɛ
Jisɔs dza nə mɨ kɨ gəndə bituŋ bi nɔ yu tɨfiə bənɨ. 7 Yu jiji ba dɨ beŋ buhu bə nɨŋ'ə bə yɔɔ ntse bəfɛ ba faŋ bɔ binchi bəfɛ bəfɛ, yu nya bɔ buŋga bu bɔ kɨ foshɛ bin'yɨntɨ bibiə nə bənɨ wɨ. 8 Chi yu nə̀ faŋkɨ bɔ, yu tə bə bɔ lə, “Bə kə̂ dzɛɛ fiɔŋ fiəŋkə kɨntɛ. Bə kə̂ dzɛɛ fidiənə. Bə kə̂ dzɛɛ kɨba makə kpə mundoləª mwɛnɨ ntɨŋ. 9 Bə dɔ̂ŋ bikpa, bəmanɨ bə kə̂ dɔŋkɔ bindzu bifɛ.” 10 Yu chi tədiə bə bɔ lə, “Bə gəŋ kɨtuŋ ntɨŋ ba be tsɔŋ ntɨŋ, bə kɨ me kwa ji sɔ gəŋ fɔ butsu bu bə kɨ dza nə mɨ. 11 Shi yi nɨŋŋə nləkə bəŋ, makə bə ŋ'wɔ fiɔŋ fi bə na chanyɛ, bə dza nə mɨ. Bə dze kɨ dza, bə kuchɛ bidi nə go yɛnɨ wɨ, ɨ kɨ ji ndonchɛ yi fiɔŋ fi bɔ' mɔŋɔ.”ª 12 Bəma, bɔ dza ba gəŋ kɨ gəndə bɔ tɨdi lə bənɨ fichə shəŋ yibɔlə. 13 Bɔ kɨ foshɛ bətsə kɨyɛŋ nə bənɨ wɨ, bɔ kushi bənɨ bə gwɨ́ lə kɨyɛŋ bə məŋ, bɔ wəmiəsɨ bənɨ ba.
Nɨ bə́ nə̀ kkpɨsə Jɔŋ Nchɛsebiɔ
14 Lə Ŋkuŋ Hɛlɔd wɔ shɔŋ yi na tsukɔ Jisɔs wɨ, nɨ bənɨ nə̀ woko tɨ yɨ wuhu bidɨ lɨ bichi, bənɨ bədɔ kɨ tɨdi lə, “Jisɔs no na Jɔŋ Nchɛsebiɔ wu' dzakɔ nə kkpə lɨ. Na fiɔŋ fi fəə yu kɨ keŋkɛ buŋga bu fənə biɔŋ bi kɨgəsə kɨ wɨŋə lə.” 15 Bədɔ tɨdi lə, “Na Alaja wu fichə ba lɨ.” Bədɔ lə, “Yu na ji miɨ wu shɔŋ yi Nyɔ wudɔ nɨ bə fiəfiə ba.” 16 Lə Hɛlɔd wɔ biɔŋ biŋ, yu tə yihi lə, “Na Jɔŋ Nchɛsebiɔ wu nnə̀ ŋkəmbə fo wuhu, wu dzakɔ nə kkpə lɨ.”
17 Nə̀ ji Hɛlɔd sə faŋ bənɨ, bɔ gəŋ ba kwe Jɔŋ ba kansɨ, fasɨ yu tsɔŋ yi buŋfia ntɨŋ ndzɨ Ɛlɔdia kpansɨ Felip wu nə̀ ji jimə Hɛlɔd, Hɛlɔd nə̀ dze yu kɨ ji kpansɨ. 18 Jɔŋ kɨ nɨnntɨ, yu tɨdi bə Hɛlɔd lə, “Kɨlaŋ kə bɨmiə lə miɨ dze kpansɨ wəmɛni.” 19 Nɨ Jɔŋ nə̀ tɨdi manɨ, Ɛlɔdia ga yu shəŋ bɨŋ kɨ noŋko dzə́ yi kkpɨsə yu, bəmanɨ yu jikə keŋkɛ dzə 20 ndzɨ Hɛlɔd nə̀ lete Jɔŋ lə Jɔŋ na ji miɨ wu diəŋ, yu ji tɨ miɨ wu Nyɔ. Hɛlɔd kɨ tɨntɨ ŋkɨ lə bɔ tə kə kkpɨsə Jɔŋ. Hɛlɔd nə̀ ba yu wɔ fiɔŋ fi Jɔŋ na chanyɛ, shəŋ kɨ bɨfi yu kɨtso, bəmanɨ yu kɨ se lə yu chi wɔɔ fiɔŋ fi Jɔŋ na chanyɛ. 21 Nəjiŋ wusu, Ɛlɔdia bɨkə dzə. Nə̀ butsu bu Hɛlɔd nə̀ fɨtɨ kɨgbeyɛ, ɨji yu' bəndɨ bənji buhu bə fó yi bənɨ bə bitsa lə ma bənɨ bəbəŋ bə Galili lə yu fə kɨbɛyɛ kɨhɨ. 22 Wɛŋ wu Ɛlɔdia wu kansɨ be ba biŋ kɨŋfidi, fi ndzeŋ Hɛlɔd lɨ bə bənɨ buhu bə kɨgbeyɛ lə. Yu tə tə bə wɛŋ wa lə, “Bî fiɔŋ yɨla fi wə na se, ndembiɛ wə bə fi.” 23 Yu chi chɛŋɛ lə, “Ɨ wə bi ma la nə mɨ lɨ, ma kɨ ji tɨmo kɨdiadia kɨ buŋkuŋ bwɛmɨ lə, nnya wə.” 24 Wɛŋ wu kansɨ wa fɔ ba gəŋ bi bə mɛni lə, “Ntə lə bə́ dimbiɛ mɨ bə la?” Mɛni chi lə, “Gə̂ŋ tə lə bə́ nya wə fo wu Jɔŋ Nchɛsebiɔ lə.” 25 Wɛŋ wa tsu jiŋ mɨ kɨsɨkɨ ba tə bə Ŋkuŋ Hɛlɔd lə, “Nna nse lə wə nya mɨ fo wu Jɔŋ Nchɛsebiɔ lə kɨləŋə ntɨŋ fɛŋ.” 26 Ŋkuŋ wa wɔ manɨ, gwɨ kkpə yu kɨtso. Bəmanɨ ndzɨ munchɛŋ mu yu nə̀ chɛŋɛ mwa bənɨ bə nə̀ ji kɨgbeyɛ ka ntɨŋ nəfiə, 27 yu bu faŋ miɨ wu kɨtsa lə yu gəŋ ba bə fo wu Jɔŋ'ə. Miɨ wa gəŋ tsɔŋ yi buŋfia ya ntɨŋ ba kəmbɨ fo wu Jɔŋ'ə, 28 yu ga kɨləŋə ntɨŋ, ba ba nya wu bə wɛŋ wa. Wɛŋ wa ləkə ba fɔ gəŋ nya bə mɛni. 29 Lə beŋ bə nɨŋ'ə bə Jɔŋ'ə wɔ, bɔ gəŋ dze kɨŋgundu kɨ Jɔŋ'ə ba di lɨ.
Jisɔs chɨ bənɨ bəntsuku bətɨŋ
30 Beŋ bə faŋə bə Jisɔs lə gəndə ba fichə tsu jiŋ fə yu ku, bɔ tə yu biɔŋ bichi bi bɔ nə̀ fəə bə bi bɔ nə̀ tɨfiə bənɨ. 31 Yu tə bə bɔ lə, “Bə bâ kwa bəŋ bəŋ kə gəŋ dɨ wu bənɨ na sɨŋ mɨ, kə fufiɛ tsəsɨ.” Yu nə̀ tə manɨ ndzɨ bənɨ kɨyɛŋ nə̀ ba bɔ kɨ ba dɨ wu bɔ nə̀ ji, bədɔ nə̀ dzaa, bədɔ baa. Jisɔs bə beŋ buhu bə nɨŋ'ə jikə keŋkɛ tɨmo tsa yi naji ɨ bɔ diə. 32 Bɔ be kɨkpɔŋkɔ ntɨŋ bɔbɔ ba kɨ gɨntɨ dɨ wu bənɨ na sɨŋ. 33 Bəmanɨ, bənɨ kɨyɛŋ ŋəŋ nɨ bɔ na gɨntɨ ba kkə lɨ tə dza nə kú chi ntɨŋ kɨ lətə bɔ kɨmbɨ bɔ nəfiə. Bɔ gəŋ ba sa fɔ mɨ nə Jisɔs bə beŋ buhu bə nɨŋ'ə lɨ. 34 Lə Jisɔs kɨ lafu kpa, yu ŋəŋ kuta wu bənɨ gbooo, yaa kwe yu bə bɔ ndzɨ bɔ nə̀ ji nɨ shíŋ yi na sɨŋ bə ntɨŋkɨ wu yi. Yu gbɔ kɨ tɨfiə bɔ, yu tɨfiə bɔ biɔŋ kɨyɛŋ. 35 Lə diɔ kɨ midi, beŋ buhu bə nɨŋ'ə kɨnɨ ba tə bə yu lə, “Shi nyi na kpa, ɨji tsa' gəŋ tɨ. 36 Tə̂ lə bənɨ bɛŋ gəŋ kú bə bituŋ bi gwɨgwɨ ntɨŋ ba taŋ bidiəŋ bibɔlə.” 37 Jisɔs chi yihi lə, “Na bəŋ bə naji lə bə nya bɔ fiɔŋ bɔ diə.” Bɔ bi bə yu lə, “Wə na tɨdi lə kə nɔŋ biba gɨfɛ ba taŋ bɔ bidiəŋ su?” 38 Jisɔs bi bə bɔ lə, “Bə na keŋkɛ bəblɛ bəmɛ? Bə gəŋ jiŋgə.” Bɔ gəŋ jiŋgə ba tə lə, “Na bəblɛ bətɨŋ bə bíɔsu fiɛ.” 39 Jisɔs tə tə lə beŋ buhu bə nɨŋ'ə tə lə bənɨ jimiɛ wɔŋ wufa bɨŋ, bintsu lɨ bintsu lɨ. 40 Bəma, bənɨ ba jimiɛ fəkoso bintsu lɨ, bidɔ gbɨ gbɨ, bidɔ mbaashɨŋ mbaashɨŋ. 41 Jisɔs dze bəblɛ ba bətɨŋ bə bíɔsu ya fiɛ ba tɔ bushi bɔ́, nya kɨmbafə bə Nyɔ, tə gbədiə nya bə beŋ buhu bə nɨŋ'ə, bɔ nya bə bənɨ ba. Yu jɛchɛ tɨ bíɔsu fiɛ ya bə bɔ bəchi. 42 Bənɨ bəchi diə ba fulu lɨ. 43 Beŋ bə Jisɔs lə bə nɨŋ'ə banchɛ bidiadia bi bəblɛ lə bə bi bíɔsu lə bi' shəkiə bia, bi yi bəŋka yɔɔ ntse bəfɛ. 44 Bənɨ bə nə̀ diə bidiəŋ bia nə̀ bənɨnsə bəntsuku bətɨŋ.
Jisɔs gəndə ŋgɔŋ bɨŋ
45 Jisɔs tə lə beŋ buhu bə nɨŋ'ə be kɨkpɔŋkɔ ntɨŋ tsa miu ba sa fiə Bɛsaida, lə yu shə ba tə kəshə bə bənɨ ba bɔ kwəyə. 46 Yu shə ba tə kəshə bə bɔ, tə dza ba bəndɨ dzo bɨŋ lə yu tsɨsɨ. 47 Lə diɔ ka, kɨkpɔŋkɔ ka ji ŋgɔŋ fəntɨŋ, Jisɔs bambi kpa yu wumbɔŋ. 48 Yu ŋəŋ nɨ beŋ buhu bə nɨŋ'ə na diɔnɔ bə ntsa yi kɨkpɔŋkɔ, ndzɨ fiəfɨ nə̀ ba yi meke kɨ. Lə kɨ ji futə ntɨŋ, yu dza kɨ ba fə bɔ ku, yu gəndəə ŋgɔŋ bɨŋ. Yu nə̀ ba yu se lə yu chɛ gwɨgwɨ fə bɔ ku. 49 Lə bɔ ŋəŋ nɨ yu na gəndə ŋgɔŋ bɨŋ, bɔ kɨ se lə na kɨŋku. Bɔ wɛŋ bə diɛ bɔ́, 50 ndzɨ bɔ bəchi nə̀ ŋəŋ yu wɨ nyiŋ kwe bɔ. Kɨsɨkɨ ka, Jisɔs bu chanyɛ bə bɔ lə, “Bə kânsɨ shəŋ yɛnɨ, na mɨ. Bə kə̂ lekɛhɛ.” 51 Nɨ yu tədiə manɨ, yu be ba jiŋ kɨkpɔŋkɔ ntɨŋ bə bɔ, fiəfɨ ya bu chində su. Bɔ jiŋgə mɛ, kɨgəsə wɨŋ bɔ kɨtso. 52 Bɔ nə̀ kə kkə tɨmo fiɔŋ fi bəblɛ ba nə̀ donchɛɛ tsukɔ Jisɔs wɨ, ə fɨtɨ ndzɨ bɔ nə̀ kə guyɛ shəŋ yibɔlə.
Jisɔs wəmiəsɨ bənɨ bə gwɨ́ lə Jɛnɛsalɛt
53 Lə bɔ llə ba fɔ dia wu Jɛnɛsalɛt, bɔ kansɨ kɨkpɔŋkɔ fəkpa. 54 Nɨ bɔ nə̀ fɔɔ nə kɨkpɔŋkɔ ka ntɨŋ, bənɨ bu kkə Jisɔs. 55 Bɔ kɨ lətə bɔ gɨntɨ sha ya ntɨŋ chi, bɔ tɔdiɛ bənɨ bə gwɨ́ lə bɔ ba bə bɔ bita ntɨŋ dɨ wula wu bɔ nə̀ woko lə Jisɔs wa mɨ. 56 Shi yɨla yi Jisɔs nə̀ ba yu gəŋ, se lɨ kɨ ji kɨtuŋ ntɨŋ, makə ku ntɨŋ, makə kpa, bənɨ kɨ galɨ kwa bənɨ bə gwɨ́ lə toko. Lə Jisɔs ba kɨ chɛti, bɔ nende lə yu ga bɔ bukɔ kwa bifuŋ bi kɨndzu kɨhɨ lə. Miɨ chi wu nə̀ bukɔ, yu nə̀ wəmiə lɨ.