Chi Jɔŋ Nchɛsebiɔ nə̀ kkpə
14
Tsa ya nə̀ ji Ŋkuŋ Hɛlɔd wu nə̀ sakɨ sha yi Galili wɔ kɨ nɨŋ yi Jisɔs lə. 2 Yu tə bə bənɨ buhu lə, “Miɨ no na Jɔŋ Nchɛsebiɔ wu dzakɔ nə kkpə lɨ. Fia na fiɔŋ fi fəə yu kɨ keŋkɛ buŋga bu fənə biɔŋ bintaŋ biŋ mɛ.”3 Nə̀ ji Hɛlɔd nə̀ tə, bə́' kwe Jɔŋ ba kansɨ fasɨ yu tsɔŋ yi buŋfia ntɨŋ, ndzɨ Ɛlɔdia kpansɨ Felip wu wəmɛni Hɛlɔd nə̀ dzɛɛ kpansɨ lɨ. 4 Jɔŋ kɨ nɨnntɨ yu tɨdi bə yu lə, “Kɨlaŋ kə bɨmiə lə wə dze yu kpansa lɨ.” 5 Hɛlɔd kɨ se lə yu kkpɨsɨ Jɔŋ, bəmanɨ yu kɨ lete bənɨ ndzɨ bɔ nə̀ bɨŋ Jɔŋ lə na miɨ wu shɔŋ yi Nyɔ.
6 Lə kɨ ji butsu budɔ, Ŋkuŋ Hɛlɔd kɨ fɨtɨ kɨgbeyɛ kɨ butsu bu kɨbɛyɛ kɨhɨ lə. Wɛŋ wu Ɛlɔdia wu kansɨ be ba biŋ kɨŋfidi bənɨ nəfiə, bə nə̀ ji kɨgbeyɛ ka ntɨŋ. Hɛlɔd ŋəŋ manɨ, gwɨ ndzeŋ yu. 7 Yu bu ka wɛŋ wa ba chɛŋ lə yu jiwa ɨ yu dembiɛ yu ma la fi yu biɛ lə yu dembiɛ yu su. 8 Mə wɛŋ nyishi wene lə yu tə lə Hɛlɔd nya yu fo wu Jɔŋ Nchɛsebiɔ lə kɨləŋə ntɨŋ. 9 Yu gəŋ ba tə lɨ. Ŋkuŋ Hɛlɔd wɔ manɨ, gwɨ kkpə yu. Bəmanɨ, ndzɨ munchɛŋ mu yu nə̀ chɛŋɛ mwa bənɨ bə nə̀ ji kɨgbeyɛ ka ntɨŋ nəfiə, yu bu tə lə bə́ fə nɨ wɛŋ wa tədiə. 10 Yu faŋ bənɨ bɔ gəŋ tsɔŋ yi buŋfia ntɨŋ ba kəmbɨ fo wu Jɔŋ'ə, 11 ba ga kɨləŋə ntɨŋ ba ba nya bə wɛŋ wu kansɨ wa, wɛŋ wa gəŋ ba nya bə mɛni. 12 Beŋ bə Jɔŋ'ə bə nɨŋ'ə gəŋ ba dze kɨŋgundu kɨ Jɔŋ'ə ba di lɨ, tə dza ba gəŋ tə shɔŋ ya bə Jisɔs.
Jisɔs chɨ bənɨ bəntsuku bətɨŋ
13 Lə Jisɔs wɔ fiɔŋ fi tɨchə Jɔŋ, yu be kɨkpɔŋkɔ ntɨŋ ba baŋgə gwɨ gəŋ dɨ wu bənɨ nə̀ jikə jimiɛ. Bəmanɨ kuta wu bənɨ wɔ ba fɔ nə bituŋ ntɨŋ ba gəndə bə go yibɔlə ba biə yu. 14 Lə yu fɔ nə kɨkpɔŋkɔ ka ntɨŋ ba shafu kpa, yu ŋəŋ kuta wu bənɨ, yaa kwe yu bə bɔ, yu kɨ wəmiəsɨ bənɨ bə nə̀ gwente. 15 Lə kɨ ji fudiɔ, beŋ buhu bə nɨŋ'ə kɨnɨ fə yu ku ba tə bə yu lə, “Dɨ wuŋ na kpa ɨji diɔ' midi. Tə̂ lə bənɨ bɛŋ gəŋ bituŋ ntɨŋ ba taŋ bidiəŋ bibɔlə.” 16 Jisɔs chi bə bɔ lə, “Bɔ na jimiɛhɛ lə bɔ dza. Na bəŋ bə jiba bə nya bɔ bidiəŋ bɔ diə.” 17 Bɔ chi bə yu lə, “Kə na keŋkɛ kwa ji bəblɛ bətɨŋ bə bíɔsu fiɛ.” 18 Yu tə bə bɔ lə, “Bə bâ nya mɨ bɔ.” 19 Lə bɔ ba nya yu, yu ləkə ba tə lə kuta wu bənɨ wa jiŋ fəkoso wɔŋ bɨŋ. Yu dze bəblɛ bətɨŋ ba bə bíɔsu ya fiɛ, yu tɔ bushi bɔ́ ba nya kɨmbafə bə Nyɔ, tə gbədiə bɔ ba nya bə beŋ buhu bə nɨŋ'ə, bɔ dze ba jɛchɛ bə bənɨ ba. 20 Bənɨ bəchi diə ba fulu lɨ. Beŋ bə Jisɔs lə bə nɨŋ'ə banchɛ bidiadia bi nə̀ shəkiə bia, bi yi bəŋka yɔɔ ntse bəfɛ. 21 Bənɨ bə nə̀ diə bidiəŋ bia nə̀ ji nɨ bəntsuku bətɨŋ, bənɨnsə kwa, bə́ mbɔmbiɛ sɨŋ bəkansɨ bə beŋ.
Jisɔs gəndə ŋgɔŋ bɨŋ
22 Jisɔs tə bə beŋ buhu bə nɨŋ'ə bɔ be kɨkpɔŋkɔ ntɨŋ ba sa yu fiə kɨ llɨ kɨwuŋ kɨdɔ ka, lə yu jiwa yu shə ba tə kəshə bə kuta wu bənɨ wa, bɔ kɨ kwəlɨ. 23 Yu shə ba tə kəshə bə bɔ ba tə dza ba bəndɨ dzo bɨŋ yu wumbɔŋ, lə yu gəŋ tsɨsɨ. Diɔ ka, yu ji mɨ kwa yu wumbɔŋ. 24 Bəmanɨ tsa ya wɨ nə̀ ji kɨkpɔŋkɔ ka' dəŋfi dzə ŋgɔŋ ntɨŋ, ɨji ŋgɔŋ ma finchɛ bə kɨ, ndzɨ fiəfɨ nə̀ baa kɨ nəfiə, yi meke kɨ. 25 Lə ba kɨ ji futə ntɨŋ, Jisɔs dza kɨ ba bɔ wɨ, yu gəndə ŋgɔŋ bɨŋ. 26 Lə beŋ buhu bə nɨŋ'ə ŋəŋ nɨ yu na gəndə ŋgɔŋ bɨŋ, shəŋ kəmbə bɔ. Bɔ kɨ tɨdi lə “Na kɨŋku!” Bɔ gbɔ kɨ wɛnti kɨtso bə nyiŋ. 27 Mɨ kɨsɨkɨ, Jisɔs bu chanyɛ bə bɔ lə, “Bə kânsɨ shəŋ, na mɨ. Bə kə̂ lekɛhɛ.”
28 Pita tə bə yu lə, “Baba jilə na wə, wə tə lə ŋgəndə tɨ ŋgɔŋ mɛŋ bɨŋ mba wə wɨ.” 29 Jisɔs tə bə yu lə, “Bâ.” Bəma Pita fɔ nə kɨkpɔŋkɔ ka ntɨŋ kɨ gəndə ŋgɔŋ bɨŋ, yu gɨntɨ Jisɔs wɨ. 30 Nɨ yu nə̀ gəndəə yu gɨntɨ, yu ŋəŋ nɨ fiəfɨ na foŋko ba kɨ lete. Yu gbɔ kɨ midi. Nɨ yu nə̀ midi, yu wɛŋ məndəŋ ba bəndɨ lə, “Baba, chîtə mɨ!” 31 Jisɔs nambɔ kɨbandə tsa miu ba chiŋfi yu, tə bə yu lə, “Ɔɔɔ, kɨmbɨŋ kɔhɔ na sɨ kɨtso! Wə sə kkpɨ maa ndzɨ la?” 32 Bɔ bə yu tə be kɨkpɔŋkɔ ntɨŋ. Fiəfɨ ya ka. 33 Beŋ buhu bə nɨŋ'ə bə nə̀ ji ba kɨkpɔŋkɔ ka ntɨŋ kuntə yu ba tə lə, “Yɛyi lɨ, wə na ji Wɛŋ wu Nyɔ.”
Jisɔs wəmiəsɨ bənɨ bə gwɨ́ lə Jɛnɛsalɛt