Kɨŋwatɨ kɨ
Jɔna lə
Fiɔŋ fi na ji Kɨŋwatɨ kɨ Jɔna lə kɨŋ ntɨŋ
Kɨŋwatɨ kɨ Jɔna lə kɨŋ na jimiɛhɛ nɨ biŋwatɨ bi bənɨ bə shɔŋ yi Nyɔ lə bədɔ ba lə, bi nə̀ ba bi kɨ tsɛntsɛ chanyɛ ji shɔŋ yi Nyɔ nə̀ tədiə lə bənɨ bə shɔŋ yi Nyɔ lə laŋə. Kɨŋwatɨ kɨ Jɔna lə kɨŋ nə kɨ kaŋ, na mbɔndu yi na donchɛ bəŋgə bə nə̀ tɨchə miɨ wu shɔŋ yi Nyɔ wudɔ wu nə̀ noŋko lə yu tɛ bitiu bə shɔŋ yi Nyɔ. Nyɔ nə̀ tə lə Jɔna gəŋ ba tə bə kɨtuŋ kɨ Ninifɛ lə, ŋgə jiwa ɨ yu ba bɔ bɨŋ, Ninifɛ no nə̀ fo wu kɨtuŋ kɨ Asilia lə, ɨji Asilia nə̀ bənɨ bə nə̀ keŋkɛ nchɛnɛ bə Bəisla. Jɔna nə̀ kə sɛhɛ ŋgəŋ sɔ bə shɔŋ yi Nyɔ. Yu nə̀ kkɨ lə naji ɨ Nyɔ foso kə bulo buhu ba jishi kɨtuŋ ka lə yu jiwa ɨ yu kwese ji yaa bə kɨ. Nyɔ tə fə bəŋgə kɨyɛŋ biə Jɔna fə yu tə bɨmiə ŋgəŋ sɔ Ninifɛ, ɨ jikə jimiə nə kɨnse kɨhɨ ntɨŋ. Fi tə fɔ yɛyi yɛyi lə Nəjiŋ wusu Nyɔ nə̀ kwese yaa bə Ninifɛ ba ji kə jishɛ bɔ, fi fə Jɔna kɨ nuŋɔ yu lo bə Nyɔ ndzɨ Nyɔ na jimiɛhɛ lə yu kwese yaa bə kɨtuŋ kɨdɔ fiəŋkə kɨtuŋ kɨ Isla.
Kɨŋwatɨ kɨŋ na tseyɛ buŋga bu Nyɔ na keŋkɛ biɔŋ bichi bɨŋ bi yu nə̀ fəə bi woko bə yu. Bəmanɨ nə biɔŋ bichi ntɨŋ, kɨŋwatɨ kɨŋ na donchɛ Nyɔ nɨ Nyɔ wu na laŋkɨ bənɨ kɨtso, yu ji tɨ bə yaa wu kwesɛ. Yu na ba yu gufiɛ məmbiə mə bənɨ lə bə na dɨ bə yu ma tɨ ji bɔ keŋkɛ nchɛnɛ bə bənɨ buhu Bəisla, bə tə lə yu nya bɔ ŋgə ba jishi bɔ.
Biŋuni bi kɨŋwatɨ kɨŋ'ə
Jɔna nɨŋŋ ŋgəŋ bə shɔŋ yi Baba Nyɔ 1:1-17
Jɔna tsɨsɨ bə Nyɔ 2:1-10
Jɔna bɨŋ ŋgəŋ bə shɔŋ yi Nyɔ 3:1-10
Jɔna lɔ ndzɨ Nyɔ' kwese yaa bə Ninifɛ 4:1-11