Ɛlimɛlɛk dza bə kɨtsɔŋ kɨhɨ ba gəŋ kɨtuŋ kɨ Mwab ntɨŋ
1
Tsa yi fó yi kɨtuŋ kɨ Isla lə nə̀ bambi yi sakɨ, dzɔŋ yintaŋ nə̀ kwe kɨtuŋ ka. Miɨ wudɔ wu Bɛtɨlhɛm sha yi Juda ntɨŋ dza bɔ bə kpansɨ ma beŋ buhu bə nɨnsə bəfɛ ba lətə dzɔŋ ya gəŋ lə bɔ jiŋ kɨtuŋ kɨ Mwab ntɨŋ tsəsɨ. 2 Yɨ wu miɨ wa lə nə̀ ji lə Ɛlimɛlɛk, wu kpansɨ lə ji lə Naomi, yi beŋ buhu bəfɛ bə nɨnsə ba lə ji lə Malɔŋ bə Kiliɔŋ. Bɔ nə̀ ji bənɨ bə Ɛflatait nə Bɛtɨlhɛm sha yi Juda ntɨŋ. Tsa yi bɔ nə̀ fɔɔ Mwab, bɔ biəə mɨ. 3 Lə kɨ ji, Ɛlimɛlɛk kkpə, Naomi shə bə beŋ buhu bə nɨnsə ba bəfɛ. 4 Beŋ ba dze bəkansɨ nə kɨtuŋ kɨ Mwab ntɨŋ. Wudɔ dze kpansɨ yɨ wu kpansɨ wa lə ji lə Ɔpa, yɨ wu kpansɨ wu wudɔ wa lə ji lə Lut. Bəmanɨ lə biya yɔɔ chɛ, 5 Malɔŋ bɔ bə Kiliɔŋ kkpə. Naomi shə yumbɔŋ, beŋ bə bəfɛ ba sɨŋ, nomo tɨ sɨŋ. 6 Lə kɨ ji, Naomi wɔ nə Mwab lə Nyɔ' tsə bənɨ buhu bə Juda ba chi nya bɔ bidiəŋ. Bəma, Naomi bə bəkansɨ bə beŋ buhu lə fə gwɨ lə bɔ dza nə Mwab ba tsu sha yi bɔ ntɨŋ. 7 Yu dza bə bəkansɨ bə beŋ buhu lə ba nə dɨ wu bɔ nə̀ ji wa wɨ ba biə dzə yi bɔ jiba ɨ bɔ tsu Juda. 8 Bəmanɨ lə bɔ fɔ dzə, Naomi tə bə bəkansɨ bə beŋ buhu lə ba lə, “Bə tsû jiŋ bəma bɛnɨ ku. BABA kwə̂ŋ bəŋ ndzɨ fiə wɛnɨ wu ndzeŋe wu bə donchə bənɨnsə bɛnɨ ma bə mɨ.” 9 BABA chitə bəŋ bə chi dzɛɛ bənɨnsə.” Nə mɨ, yu kukɔ bɔ ba tə kəshə, gwɨ kkpə bɔ, bɔ gbɔ məndəŋ. 10 Bɔ tə lə, “Yɛ, kə jiba kə biə wə bəŋ ku.” 11 Bəmanɨ Naomi chi lə, “Bə jiba ɨ bə biə mɨ ndzɨ la? Naji nchi bɛyɛ bədɔ beŋ bənɨnsə bə jiba ɨ bɔ tɛ ba kɨ ji bənya bɛnɨ? 12 Yɛ, bə tsû bəchaa ku beŋ bɛŋŋ, ndzɨ mɨ ntɛ kɨtso wu naji lə naji ntsu dze nyunso kə. Jilə nna ŋgɔmbiɛ tɨmo lə dzə yasu yi naji nchi ndzɛ nyunso ba bɛyɛ beŋ bə nɨnsə kɨsɨkɨ kɨŋ, ɨ fia fə la? 13 Bə jiba ɨ bə jikə dzɛ bənɨnsə fə bə wokɔ sɨŋsɨŋ fɔ tsa yi beŋ ba tɛɛ? Yɛ, na ma kə, beŋ bɛŋ! Fi na ji lɨlɨ dia wɛnɨ ba ya mɨ ndzɨ BABA kɨbɛɛ' fichə yasɨ mɨ wɨ. 14 Bəma bɔ bəchi chi dəə məndəŋ, Ɔpa kukɔ mə nomo ba tə kəshə. Bəmanɨ Lut shiŋ Naomi wɨ ŋkɨɨŋ. 15 Naomi tə bə yu lə, “Bo ŋə̂ŋ, kpasa' tsu bətɨɨ ku bə bənyɔ buhu ku. Fə̂ tɨ ma diəŋ.” 16 Bəmanɨ Lut tə bə yu lə, “Wə kə̂ tombiɛ mɨ lə nshə wə ba tsu bɨ ku. Dɨ wula wu wə na gɨntɨ ŋgɨntɨ lɨ bə wə, dɨ yɨla wu wə biəə, mbiə mɨ tɨ. Bənɨ bɔhɔ jiba ɨ bɔ kɨ ji bənɨ bɛŋŋ, Nyɔ wɔhɔ ji Nyɔ wɛmɨ. 17 Dɨ wula lɨ wu wə jiwa wə kkpə na mɨ wu njiwa ŋkkpə ɨ bə́ di mɨ mɨ tɨ. Nyɔ bûmbu mɨ kɨtso jilə mɨ ŋga lə fiɔŋ fidɔ jɛ mɨ nə wə wɨ yasə kwa kkpə. 18 Lə Naomi ŋəŋ lə Lut' sese gaŋ bə mbiə yu, yu tsu kə chanyɛ. 19 Bəma bɔ bəfɛ gəŋ fiə bə gbəndɨ wubɔlə. Lə bɔ fɔ Bɛtɨlhɛm, kɨtuŋ ka kɨchi wɔ buni bə mba yi bɔ. Bəkansɨ bə mɨ bi lə, “Na tɨ Naomi kɨbɛɛ?” 20 Naomi chi bə bɔ lə, “Bə kə̂ tsɨsə mɨ lə Naomi, bə tsɨ̂sɨ mɨ lə Mala, ndzɨ Nyɔ wu buŋga buchi' fə biɔŋ bə dia wɛmɨ kɨtso. 21 Nnə̀ ŋgəŋ kpa təə, bəmanɨ BABA chi mɨ jiŋ kaya. Bə na tsɨsə mɨ lə Naomi ndzɨ la ɨji BABA fə mɨ ŋ'wɔ ŋgə, Nyɔ wu buŋga buchi ga mɨ funyi ntɨŋ?” 22 Bəma Naomi nə̀ tsu nə Mwab ɨji bɔ bə Lut kpansɨ wene, kpansɨ wene nu ji wɛŋ wufa wu kɨtuŋ kɨ Mwab ntɨŋ. Bɔ nə̀ fɔ Bɛtɨlhɛm budzaŋ shɨkɨ tsəsɨ bə ŋka əji tsa yi bə́ nə̀ gbo jiŋ ŋgbe.