Lut kɨ nɨntɨ kə wu Bwas lə ntɨŋ
2
Fɛŋ Naomi nə̀ ndzəŋkəə bə miɨ wudɔ əji ka yi nomo, miɨ wa ji chɛ biɔŋ yu ji tɨ bə kɨyaya, yɨ wuhu ji lə Bwas. 2 Lə kɨ ji butsu budɔ Lut tə bə Naomi lə, “Njiwa nlɛ yidi miɨ wula kə wu jiwa ɨ yu ləkə mɨ yu kə.” Naomi chi bə yu lə, “Gə̂ŋ, wɛnɛ.” 3 Bəma Lut gəŋ. Yu gəŋ ba kɨ biəlɨ bənɨ bə nə̀ banchə nəjiŋ yu kanə banchə bidiəŋ bi nə̀ shəkiə bia. Fi ba fɔ lə yu nə̀ lɛ ji kə wu Bwas lə ntɨŋ. 4 Lə tsa chɛ su tsəsɨ, Bwas ba nə Bɛtɨlhɛm ba tsɨsɨ bənɨ bə nɨŋ'ə ba lə, “Baba kɨ ji bə bəŋ.” Bɔ chi lə, “Baba tsə̂ wə. 5 Bwas bi bə bənɨ buhu bə nɨŋ'ə bə nə̀ jiŋgəə bənɨ bə nə̀ banchɛ ba lə, “Wɛŋ wu kansɨ wufa nu na wu yəŋ?” 6 Bɔ chi bə yu lə, “Na kpansɨ Bəmwab wu bɔ bə Naomi nə̀ ba wa nə Mwab. 7 Yu sə nende lə yu kɨ biəlɨ nəjiŋ yu banchə bidiəŋ bi na shəkiə bia. Bəma, yu sə gbɔ nɨŋ nə fuwɔki lɨ sɨŋsɨŋ ba tuŋ fɛŋ no bɨŋ, mfufiə sɨŋ.” 8 Fɛŋ, Bwas tə bə Lut lə, “Nnya wə bitɨfiə fɛŋ. Wə kə̂ tsɔhɔ lɛɛ mbanchɛ kə wudɔ ntɨŋ fiəŋkə sɛŋ kə wuŋ ntɨŋ. Tɛ̂shɛ bəkansɨ bɛŋ; 9 kɨ ji bə bɔ wə jiŋgə chi bɔ na banchə, wə biəlɨ bɔ nəjiŋ. Mɨ' ntə lə bənɨ bə na jiŋgə ba bəŋ kə nyaha wə ŋgə. Mbente wɔ wə, wə gəŋ mu ŋgɔŋ nə shɔ́ yi bənɨ ba' tɔɔ ya ŋgɔŋ ba ga yi ntɨŋ. 10 Lut tse bushi ba bi bə yu lə, “Mɨ mfə la fi ndzeŋe fi wə kuntə mɨ mɛ, nji miɨ kɨtuŋ?” 11 Bwas chi bə yu lə, “Bə́ nə tə mɨ fiɔŋ fichi fi wə nə fəə bə mə nya dze nə kkpə yi nya bɨŋ, bə chi wə nə shə chaa bə maa, shə sha yɛnɨ ba ba kɨtuŋ kɨ wə kə saa ba kkə ntɨŋ. 12 Baba kwəŋ wə ndzɨ fiə wɔhɔ, wə keŋkɛ bikwəntsə bichidi nə Baba lɨ, Nyɔ wu Bə Isla wu wə lətəə ba ba yu ŋkaŋka!” 13 Lut tə bə yu lə, “Kə̂tə wə tseyɛ fiə wu ndzeŋe wuŋ bə mɨ Baba, ndzɨ wə dɨsɨ shəŋ yɛŋ ba chanyɛ diɛ yidə bə miɨ wɔhɔ wu nɨŋ, njikə jimiɛ tɨmo miɨ miu nə bənɨ bɔhɔ bə nɨŋ'ə ntɨŋ.” 14 Lə tsa yi diənə bidiəŋ kwətsə, Bwas tə bə yu lə, “Bâ mɛ wə dze blɛ wə kɨ biŋkili sɛŋ bubu ntɨŋ.” Yu jiŋ ntɛshɛ bə bənɨ bə nɨŋ'ə ba, Bwas nya yu bidiəŋ kɨyɛŋ. Yu diə ba fulu lɨ, sɨŋsɨŋ bidɔ shə. 15 Lə Lut dza ba gbɔ mbanchə, Bwas tə bə bənɨ buhu bə nɨŋ'ə lə, “Bə ga yu kɨ gbete ma nə binjiŋkə bi wə bia wɨ, miɨ yu kə bakə. 16 Bə kɨ shəkiə tɨ jiŋ yidɔ binjiŋkə wɨ fə yu kɨ ba nəjiŋ yu gbete, miɨ yu kə losɔ.” 17 Bəma, Lut kətə yu nɨntɨ sɔ kə sɨŋsɨŋ diɔ ka. Yu kə jiŋ yi yu' bɨkə, yi fɔ ɨ gɨntɨ ŋka bə kɨdiadia. 18 Yu kwə bə yi ba gəŋ donchə mə nomo fiɔŋ fi yu bɨkə ba nya tɨ yu bidiəŋ bi yu sə diə sɔ kə bi ya ba shə lɨ. 19 Mə nomo bi bə yu lə, “Na kə wula ntɨŋ wu wə' lɛɛ ndɛŋ? Wə' nɨŋ yəŋ kə? Budə kɨ ji bə miɨ wu ndzeŋɛ nu shəŋ bə wə.” Bəma Lut tə bə mə nomo lə, “Kə wu mɨ' nlɛɛ nɨŋ wu ntɨŋ ndɛŋ; chɛ kə wa na bɨmi yɨ lə Bwas.” 20 Naomi tə bə kpansɨ wene lə, “Budə bu Baba lə kɨ ji bə yu wu shəŋ yihi yi ndzeŋe kə gufiə bəwəŋ makə bəŋkkpə!” Naomi tə tɨ bə yu lə, “Miɨ wa na ka yaha, yu tsukɔ bɨ wɨ kɨbɛɛ.” 21 Bəma Lut tə bə yu lə, “Fi ndzeŋe kɨtso na lə, yu sə tə bə mɨ lə ŋkətə nnɨntɨ yu kə bɨ bə bənɨ buhu bə nɨŋ'ə sɨŋsɨŋ fɔ tsa yi mbanchɛ yihi na ka.” 22 Naomi tə bə kpansɨ wene lə, “Mɨ mbɨŋ wɛnɛ, fi na ndzeŋe lə wə tɛshɛ ji bəkansɨ bə na nɨntɨ Bwas kə. Ndzɨ ji lə wə gəŋ ji miɨ wudɔ kə, ɨ bə́ kɨ funsə wə.” 23 Bəma Lut kətə bə bəkansɨ bə nɨŋ'ə bə Bwas lə, yu banchɛ sɨŋsɨŋ ba fɔ tsa yi mbanchɛ nə̀ ka; yu ji bɔ bə mə nomo.