Lut 3

Lut keŋkɛ nyunso

Lə tsa ba chɛ su, Naomi tə bə kpansɨ wene lə, “Njiwa nnɔŋ nyunso wə lɨ fə wə kɨ ji nə wə kaŋ. 2 Kkə̂ lə Bwas nyunso wu wə nə tɛshɛ wa bəkansɨ bə nə nɨntɨ ba yu kə, na ka yaha. Bô ŋəŋ, fudiɔ yu jiwa ɨ yu kɨ fishi jiŋ. 3 Wə wwɔ̂ gwɨ, fi məŋ mə ntsɔŋfu lə ba dɔŋ bindzu biɔhɔ bi ndzeŋe ba gəŋ dɨ wu yu na fishi wa jiŋ. Bəmanɨ, wə kə̂ shafɔ gwɨ yu wɨ fiəŋkə lə yu' kanə bə ndiə ba mu lɨ. 4 Tsa yi yu mɛɛ, wə jiŋgə dɨ wa; wə gəŋ tɔtu kɨndzu kɨ yu' fukiɛ nə goshiŋ, wə me mɨ; yu jiwa yu tə wə fiɔŋ fi fənə.” 5 Lut tə lə, “Fiɔŋ fichi fi wə tədiə, njiwa mfə.” 6 Nə mɨ, yu gəŋ dɨ wu Bwas nə̀ fishi wa jiŋ ba fə diəŋ nɨ mə nomo sə tɨfiə cha yu. 7 Tsa yi Bwas nə̀ kanə bə ndiə ba mu lɨ, gwɨ yihi tsu ntɨŋ. Yu gəŋ me fə kɨmbintsə kɨ jiŋ ya lə ku. Lut wədi ba ba mɨ ba tɔtu kɨndzu kɨ Bwas lə kɨ fukiɛ nə goshiŋ ba me lɨ. 8 Lə kɨ ji bbutsu kɨntɨŋ kɨntɨŋ, Bwas fichə gwɨ ba ŋəŋ miɨ kpansɨ' me goshiŋ, shəŋ kəmbə yu. 9 Yu bi lə, “Na yəŋ?” Lut chi lə, “Na mɨ miɨ wɔhɔ wu nɨŋ, fûkiɛ mɨ bə kɨndzu kɔhɔ kɨ fukiə, na wə ndiəku.” 10 Bwas tə bə yu lə, “Baba tsə̂ wə, wɛnɛ. Fiə wu wə donchə wuŋ fɛŋ' ya wu fiəfiə wa, wə kə̂ chiŋkə lə wə biə beŋ butsɔ bə kpə lə makə bə fiəŋkə. 11 Bə fɛŋ, wɛnɛ, nyiŋ wə kə̂ kwekɛhɛ, njiwa mfə fiɔŋ fichi fi wə na se ndzɨ miɨ chi na kkɨ lɨ lə wə naji tsuŋ wu kpansɨ. 12 Mɛfə fi naji yɛyi lə nna nji ndiəku, bəmanɨ, wudɔ ndiəku wa lɨ mɨ fiə. 13 Kə̂tə mɛni bə mɨ fɛŋ bbutsu, butsu wɔ kə fənə ba ŋəŋ lə yu jiwa ɨ yu bɨŋ njiŋ bə wə lə, ɨ yu bɨŋ'ɨ, kɨ ji buni. Jilə yu kə sɛhɛ ndze dɨ wuhu nɨ ndiəku, kɨjilə chi Baba na ji wuwəŋ, ndze dɨ wu ndiəku lə ba fə wə lɨ chi wə na se. Mê ta butsu wɔ.” 14 Bəma Lut me Bwas goshiŋ, lə butsu kɨ woto ə bambi futə ntɨŋ, yu dza kɨ kwəlɨ ndzɨ Bwas nə̀ tə bə yu lə, “Bə́ na jimiɛhɛ lə bə́ kkə lə miɨ kpansɨ' ba dɨ wu bə́ na kɨtɨ wuŋ jiŋ.” 15 Bwas tə bə yu lə, “Yânshɛ kɨndzu kɔhɔ wə ba tashɛ mɛ.” Yu tashɛ kɨ, Bwas fɨkə jiŋ bəkpaŋ buse ba nya yu ba dza gəŋ toko. 16 Lə Lut kwə ba tsu fə mə nomo ku, yu bi bə yu lə, “Biɔŋ gəndə nəŋ dia wɔhɔ, wɛnɛ?” Lut tə yu fiɔŋ fichi fi Bwas fəə 17 ba yinə lə, “Yu fɨkə bəkpaŋ bə jiŋ'ə bɛŋ buse ba nya mɨ, ba tə lə, naji ntsu fə wə ku kaya kə.” 18 Naomi tə bə Lut lə, “Wɛnɛ, wôkɔ ba fɔ tsa yi wə jiwa wə ŋəŋ biɔŋ tɨchə, ndzɨ naji ɨ miɨ nu fufiɛ kə ndɛŋ, fiəŋkə lə yu' nachɛ fiɔŋ fiŋ.”