Bwas dze Lut kpansɨ lɨ
4
Bwas nə̀ gəŋ ba jiŋ fə fiənsɨ wu mbaŋ wu kɨtuŋ ka lə ku. Lə ndiəku wu fiəfiə wa kɨ chɛti, Bwas bəndɨ yu ba tə lə, “Mbwə, bâ jiŋ mɛni.” Yu gəŋ ba jiŋ'ɨ. 2 Bwas sa bəntaŋ bə kɨtuŋ'ə yɔɔ ba tə lə bɔ jiŋ fəkoso, bɔ jiŋ. 3 Yu tə bə ndiəku wu fiəfiə wa lə, “Naomi wu nə̀ kwə wa nə Mwab se wa lə yu taŋŋə ndəŋgə wu ŋgwɨŋ waha Ɛlimɛlɛk. 4 Bəma mɨ ŋgɔmbiɛ lə ntə wə kɨsu lə wə taŋ yu mɛni bənɨ bə jimiɛ bɛŋ nəfiə ma bəntaŋ bɛmɨ bɛŋ nəfiə. Jilə wə jiwa wə taŋ yu, wə fə ma, bəmanɨ, jilə wə kə kafɔ, wə fə ŋkkə ndzɨ miɨ na sɨŋ fiə nə wə lɨ wu naji lə yu chiŋfi yu, wə na ji tɨ mɨ fiə.” Ndiəku wu fiəfiə wa tə lə, “Njiwa ntaŋ yu.” 5 Bwas tə lə, “Butsu bu wə ná taŋə ndəŋgə nu nə Naomi lɨ, ɨ fi kɨ ji lə wə' dze tɨ ma Lut kpansɨ ŋku wa fə yɨ wu ŋku nomo lə jɛkə laa.” 6 Ndiəku wa tə lə, “Tə naji ŋkafu kə, ndzɨ mfə ma, ɨ beŋ bɛmɨ ná kɨ jikə keŋkɛ buŋga ndəŋgə nu bɨŋ. Dzê dɨ wɛŋ, wə chiŋfi yu.” 7 Tsa ya wɨ, fi nə̀ ji fiə wu Bəju lə ntɨŋ lə, ɨ miɨ taŋŋə sha yihi makə yu yashɛnɨ fiɔŋ bə fidɔ, tə miɨ wu taŋə wa jiwa ɨ yu se bikpa bihi ba nya bə miɨ wu yu taŋŋə wa bə yu 8 Lə ndiəku wa tə bə Bwas lə Bwas taŋ gwɨ yihi lɨ, yu foso bikpa bihi. 9 Nə mɨ, Bwas tə bə bəntaŋ ma bə bənɨ bəchi bə nə̀ ji mɨ lə, “Ndɛŋ no, bə ŋəŋ lə mɨ' ntaŋ biɔŋ bichi nə Naomi lɨ bi Ɛlimɛlɛk nə̀ keŋkɛ bə biɔŋ bichi bi Chiliɔn lə bə bi Ashlɔn lə. 10 Mɨ' ntaŋ tɨ Lut miɨ Bəmwab, kpansɨ Ashlɔn lə yu kɨ ji məku wɛmɨ. Fi ma na ji fə yɨ wu ŋku nomo lə bə biɔŋ bihi bichi jɛkə laa nə kɨtuŋ kɨhɨ ntɨŋ bə nə bənɨ buhu ntɨŋ. Ndɛŋ no, bə' ləŋ nsa ya nəjiŋ. 11 Nə mɨ, bənɨ bəchi bə nə̀ ji fə fiənsɨ wu mbaŋ wa lə ku ma bəntaŋ ba tə lə, “Kə' ləŋ nsa ya nəjiŋ. Nyɔ fə̂ kpansɨ wu na ba nu wə tsɔŋ kɨ ji nɨ Lashɛ bə Leya, bə nə̀ tɛshɛ ba wɛyɛ ku wu Isla. Wə yinshi miɨ lɨ kɨtsɔŋ kɨ Ɛflata ntɨŋ ba keŋkɛ yɨ wubəŋ kɨtuŋ kɨ Bɛtɨlhɛm ntɨŋ. 12 Tsɔŋ yɔhɔ kɨ ji nɨ yi Pɛlɛs mbɛyɛ yi Tama bɔbə Juda, ə ba nə beŋ bə Baba jiwa ɨ yu nya wə əji mbɛyɛ yi kpansɨ nu.”Kɨtsɔŋ kɨ Dɛbi lə
13 Bəma, Bwas dze Lut kpansɨ lɨ. Lə bɔ tɛshɛ kɨta, Baba fə Lut fiə tɔ ba bɛyɛ wɛŋ wu nɨnsə. 14 Fɛŋ, Lut tə bə Naomi lə, “Budə kɨ ji bə Baba wu gɔmbiɛ lə yu kə shə wə kaya díɔ yiŋ ntɨŋ, yu nya wə ndiəku; yɨ wuhu tsâŋ kɨtuŋ kɨ Isla ntɨŋ! 15 Yu jiwa yu fə ɨ buwəŋ bwɔhɔ gəŋ fiə ba fə ɨ buntaŋ bwɔhɔ tsuyɛ ndzɨ na kpansɨ ŋku wana wu na se wə, yu yakɨ beŋ bə nɨnsə fumba wə lɨ wu bɛyɛ yu.” 16 Naomi dze wɛŋ wa ba tɔ fəgə ba kɨ mambɔ yu. 17 Bəkansɨ bə bituŋ bi gwɨgwɨ fə kɨtuŋ ka ku nya yu yɨ ba kɨ tɨdi lə, “Naomi keŋkɛ wɛŋ wu nɨnsə.” Bə́ dɔŋ wɛŋ wa yɨ lə Ɔbɛd, yu ba kɨ ji chɛ Jɛse, Jɛse ji chɛ Dɛbi. 18 Fɛŋ, chinchi kɨtsɔŋ kɨ Pɛlɛs lə nə̀ ji mɛ: Pɛlɛs nə̀ ba ba kɨ ji chɛ Hɛslɔn, 19 Hɛslɔn ji chɛ Lam, Lam ji chɛ Aminadab, 20 Aminadab ji chɛ Nashɔŋ, Nashɔŋ ji chɛ Salmɔn, 21 Salmɔn ji chɛ Bwas, Bwas ji chɛ Ɔbɛd, 22 Ɔbɛd ji chɛ Jɛse, Jɛse ji chɛ Dɛbi.