Kɨŋwatɨ kɨ
Jɔna lə
Jɔna nɨŋŋ ŋgəŋ bə shɔŋ yi Nyɔ
1
Butsu budɔ Baba Nyɔ nə̀ tə bə Jɔna wɛŋ wu Amitai lə, 2 “Dzâ fɛŋ wə gəŋ Ninifɛ kɨtuŋ kɨbəŋ ka ntɨŋ wə laŋə kɨ bubiə bubɔlə lə, ndzɨ bu nə bəndɨ ba fɔ mɨ wɨ.” 3 Jɔna tsu ba kɨ lətə nə Baba Nyɔ wɨ yu gɨntɨ ji Tashi. Nə̀ shi Jɔpa ba ŋəŋ kɨkpɔŋkɔ kɨbəŋ kɨ ji mɨ fəbiɔ lə kɨ llə ba gəŋ Tashi. Lə yu sɔmbu kɨjimiɛ kɨhɨ kɨkpɔŋkɔ ka ntɨŋ, yu be kɨgɨntɨ Tashi bə bənɨ bə kɨkpɔŋkɔ ka lə yu lətə nə Baba Nyɔ wɨ. 4 Fiŋ nə̀ fə Baba Nyɔ faŋ fiə yintaŋ kɨnchɛŋ kɨbəŋ ka bɨŋ, kɨfuŋ kɨntaŋ ka nə̀ nɨkə kɨnchɛŋ ka, kɨkpɔŋkɔ ka shə ŋgbədiə bɨŋ. 5 Bənɨ bəchi bə nə̀ nɨntɨ ba kɨkpɔŋkɔ ka ntɨŋ, nyiŋ nə̀ kwe bɔ, miɨ chi kɨ dɨ bə nyɔ wuhu. Bɔ foshɛ ntə́ yi nə̀ ji sɔ ba liyɛ yi kɨnchɛŋ ka ntɨŋ ma kɨkpɔŋkɔ ka yɨŋkɨlɨ fə kɨ jɛkə midiɛ. Fiɔŋ fiŋ nə̀ dze dɨ ji Jɔna' shi gəŋ kɨkpɔŋkɔ ka ntɨŋ ba me gbɔ kɨnɨ. 6 Nsafiə wu bənɨ bə kɨkpɔŋkɔ ka lə gəŋ ba buŋ yu bi bə yu lə, “Wə na me fiɔhɔ ji bumenɛ? Dzâkɔ wə bəndɨ wɔhɔ nyɔ! Diŋkəla ɨ yu kwese yaa bə bɨ ɨ kə jikə kkpəyɛ.” 7 Bənɨ bə kɨkpɔŋkɔ ka lə tə bə gwɨ́ yibɔlə lə, “Kə fîəŋ ba ŋəŋ miɨ wu ba wa bə ŋgə no.” Bɔ nə̀ fiəŋ, fi tseyɛ lə na Jɔna. 8 Chi fi nə̀ tseyɛ manɨ, bɔ tə bi bə Jɔna lə, “Tə bɨ miɨ wu ŋgə no ba wa bɨ bɨŋ ndzɨ yu. Nɨŋ yɔhɔ ji la? Wə fɔ nə məŋ? Wə na ji miɨ kɨtuŋ yɨ la? Wə na ji miɨ yɨla?” 9 Jɔna chi lə, “Nna nji miɨ Bəhiblo, ŋkuntə Baba Nyɔ, Nyɔ wu bɔ́, wu nə̀ fəə kɨnchɛŋ kɨbəŋ bə sha.” 10 Gwɨ kɔ bɔ kɨtso bə fiŋ fiɔŋ, bɔ bi bə Jɔna lə, “Wə fiŋ fə la?” Bɔ nə̀ bi ma ndzɨ bɔ nə̀ kkə lə yu nə̀ lətə nə Baba Nyɔ wɨ ndzɨ yu nə̀ sa tə bɔ manɨ. 11 Chi kɨnchɛŋ ka nə̀ bu nɨkə, bɔ bi bə Jɔna lə, “Kə fɨtɨ nəŋ bə wə fə ŋgɔŋ mɛŋ də?” 12 Yu chi bə bɔ lə, “Bə fôso mɨ ba li sɛŋ kɨnchɛŋ kɨŋ ntɨŋ, kɨ jika ɨ kɨ də. Nna ŋkkɨ lə na ndzɨ mɨ wu kɨfuŋ kɨntaŋ kɨŋ ba bəŋ bɨŋ.” 13 Bənɨ bə kɨkpɔŋkɔ ka lə tsu ba kɨ dio bə buŋga bubɔlə buchi lə bɔ tsa kɨkpɔŋkɔ ka ba tsu bə kɨ kɨnchɛŋ ka nəkpo, dzə jikə jimiə ndzɨ kɨfuŋ ka nə̀ ya buŋga. 14 Nə mɨ fɛŋ, bɔ də bə Baba Nyɔ lə, “Ɔɔ Baba Nyɔ, kə na nende lə wə kə kpɨ̂shɛ bɨ lə ndzɨ kə' dze kɨn'yɨntɨ kɨ miɨ no lə, Wə kə chiŋfiɛhɛ bɨ lə ndzɨ kə' kpɨsɨ miɨ wu na sɨŋ bə ŋgbɔ. Ɔɔ Baba Nyɔ, wə fə fiɔŋ fiŋ mɛ ə ji chi wə nə̀ galə lə fi kɨ ji.” 15 Bɔ tə foso Jɔna ba li sɔ kɨnchɛŋ ka ntɨŋ, kɨ bu də mɔɔɔŋ. 16 Fiɔŋ fiŋ nə̀ fə bənɨ ba le Baba Nyɔ kɨtso, bɔ fə bintɔfiɛ Baba Nyɔ ba fə tɨ bikaŋə bə Nyɔ. 17 Baba Nyɔ faŋ biɔsu yibəŋ yi mɨ Jɔna. Jɔna nə̀ jiŋ biɔsu ya shəŋ díɔ tɛ bushə bə bbutsu.