Jɔna tsɨsɨ bə Nyɔ
2
Nɨ Jɔna nə̀ ji sɔ biɔsu ya shəŋ, yu kɨ tsɨsə bə Baba Nyɔ wu na ji Nyɔ wuhu. 2 Yu nə̀ tsɨsə lə, “Baba Nyɔ, nsə ndə bə wə ŋgə wɛmɨ ntɨŋ, wə wɔ mɨ. Nə bundzumbɔ bu mbi wu bənɨ bə ŋkkpə lə ntɨŋ, nsə ndə bə wə, wə wɔ məndəŋ mɛŋŋ. 3 Wə sə li mɨ, mɨ midi ba fɔ fəta, fəta wu bundzumbɔ bu kɨchɛŋ kɨŋ'ə kɨbɛɛ, ŋgɔŋ ma lɨŋkɨ mɨ bɨŋ, kɨnchɛŋ ka nɨkə kɨ fɨ kɨ chɛti mɨ bɨŋ. 4 Nsə nse lə wə' kɔŋ mɨ nə fə wə ku, bəmanɨ mbɨmi wa lə njiwa nchi ŋəŋə bə yəsɨ yɛŋ tsɔŋ yɔhɔ yi bintɔfiɛ yi ntsaaaŋ yi bə́ kuntə wə yi ntɨŋ. 5 Ŋgɔŋ ma sə kusə mɨ, ŋkɨ mɨyə bigɨndə, kɨnchɛŋ kɨbəŋ kɨŋ fu mɨ, wɔŋ wu biɔ kwɨdi fo wɛŋ. 6 Nsə nshi fəta ba fɔ dzó fəchiŋ, ba kɨ ji mbi wudɔ ntɨŋ wu miɨ foto sɔ jikə tsɔhɔ. Bəmanɨ, ɔɔ Baba Nyɔ wu ji Nyɔ wɛŋŋ, wə foso mɨ nə bundzumbɔ bwa ntɨŋ nji wuwəŋ. 7 Tsa yi nsə ŋkpɨ ya, nsə ŋgɔmbiɛ wə Baba Nyɔ, ba tsɨsɨ bə wə, wə wɔ kɨntsɨsɨ kɛŋŋ nə tsɔŋ yɔhɔ yi bintɔfiɛ yi ntsaaaŋ ntɨŋ. 8 Bənɨ bə na kuntə bənyɔ bə kɨlɔlɔ lə, bɔ' la nə nchitə yi Baba Nyɔ wɨ. 9 Nə mɨ lɨ, njiwa ntə yɨmbɨ yi kɨmbafə bə wə, mfə bintɔfiɛ wə lɨ, ɨ fiɔŋ fi mɨ ŋkaa lə mfə wə lɨ, mfə fi. Na kwa wə Baba Nyɔ wu ji wə fə ɨ miɨ diə buwəŋ.” 10 Jɔna tsɨsɨ manɨ Baba Nyɔ tə biɔsu ya yɛŋ yu fəkpa.