Bilaŋ bi ku lə bə diɛ yi Nyɔ
15
Bəfalasi bə bənɨ bədɔ bə nə̀ tɨfiə bilaŋ bi Nyɔ lə, dza nə Jɛlosalɛm ba ba fə Jisɔs ku ba bi bə yu lə, 2 “Beŋ bɔhɔ bə nɨŋ'ə na gbosɔ bilaŋ bi ku lə bi bəchɛ bətaa baha bə fiəfiə nə̀ galɨ ndzɨ la? Bɔ diɨ ŋ'wwɔ sɨŋ kaŋ, ɨji kɨlaŋ na bɨmiɛhɛ manɨ.” 3 Jisɔs chi bə bɔ lə, “Bə na bunchi bilaŋ bi Nyɔ lə, bə biəlɨ ji bilaŋ biɛnɨ bi ku lə ndzɨ la? 4 Mɨ nchanyɛ mɛ ndzɨ Nyɔ nə̀ tə lə, ‘Kûntə chaa bə mma.’ Yu chi tədiə lə, ‘Ɨ miɨ sɛyi tɨɨ makə mɛni, bə́ kkpɨsɨ miɨ wa.’ 5 Bəmanɨ, bə na tɨdi yɛnɨ lə, ‘Ɨ miɨ tə bə tɨɨ makə mɛni lə, “Fiɔŋ fi sə ji lə wə keŋkɛ nə mɨ lɨ, mɨ' nnya ji bə Nyɔ,” 6 tə naji ɨ yu chi kuntə tɨɨ makə mɛni kə bə nchi dzɛɛ fiɔŋ fia nya bə bɔ.’ Bə' fə diɛ yi Nyɔ tsu fiɔŋ fi kɨlɔlɔ lə ndzɨ bilaŋ biɛnɨ bi ku lə. 7 Bənɨ bə na lɔshə bɛŋ! Fiɔŋ fi Adzaya miɨ wu shɔŋ yi Nyɔ nə̀ chanyɛ tsukɔ bəŋ wɨ na yɛyi, nɨ yu nə̀ tədiə lə,8 ‘Bənɨ bɛŋ na kuntə mɨ kwa nə bifuŋ wɨ,
shəŋ yibɔlə ji dzəbudə nə mɨ wɨ.
9 Bɔ tsɨsə mɨ kwa kɨlɔlɔ,
ndzɨ bɔ na dze bimbɨchə bi bənɨ lə, bɔ tɨfiə lə na diɛ yɛmɨ.’”
Fiɔŋ fi na yidiɛ miɨ
10 Jisɔs bəndɨ bənɨ ba, bɔ ba. Yu tə bə bɔ lə, “Bə wôkɔ bə wɔ, bə kkə̂ buni. 11 Fiɔŋ fi beke miɨ dze, naji ɨ fi yidiɛ miɨ wa kə. Na fiɔŋ fi foto nə miɨ dze fi na yidiɛ yu.”
12 Beŋ bə Jisɔs lə bə nɨŋ'ə jiji ba tə bə yu lə, “Wə na kkɨ tɨ lə Bəfalasi sə wɔ bubiə bə fiɔŋ fi wə sə chanyɛ fia?” 13 Yu chi bə bɔ lə, “Kɨtɨ kɨchi kɨ taa wu ji bɔ́ kə tishɛ, bə́ jiba ɨ bə́ ba kɨ. 14 Bə shə̂ bɔ manɨ. Bɔ na ji bənyimə bə na donchɛ dzə bə bənɨ. Ɨ nyimə tsɛtsɛ wudɔ, ɨ bɔ bəchi gəŋ gbɔ kɨkpɔ ntɨŋ.” 15 Pita tə bə Jisɔs lə, “Nâchɛ bɨ fiɔŋ fi ŋgaŋ wa na tɨdi.” 16 Jisɔs bi lə, “Kɨjilə bə na bambi tɨ biɔŋ kə kkə? 17 Bə kə kkə lə fiɔŋ fichi fi beke miɨ dze na ba fi shi shəŋ ba gəndə fɔ bufɔnɔ? 18 Bəmanɨ, fiɔŋ fi foto nə miɨ dze ba ji nə yu shəŋ. Na fiɔŋ fia fi na yidiɛ miɨ. 19 Nə miɨ shəŋ na ba biŋgɔmbiɛ bibiə, ŋkkpɨsɨ yi miɨ, ndze yi kpansɨ miɨ makə nomə miɨ, ndzenɛ, buyi, nləŋ yi nsa yi dyɛ makə mbɨsɨ yi yɨ wu miɨ lə. 20 Biŋ na biɔŋ bi na bɨsə miɨ. Bə ndiə ŋ'wwɔ sɨŋ kaŋ, na yidiɛhɛ miɨ.”
Kpansɨ wudɔ wu nə̀ ji miɨ kɨtuŋ ga shəŋ Jisɔs wɨ
21 Lə Jisɔs dza nə mɨ, yu baŋgə gwɨ ba gəŋ sha yi Taya bə yi Sidɔn ntɨŋ. 22 Fi fɔ lə kpansɨ wudɔ wu Kanan wu nə̀ ji sɔ nə̀ ba ba ŋəŋ Jisɔs wɨ, ba də bə yu lə, “Baba, Wɛŋ wu Ŋkuŋ Dɛbi, kwêse yaa bə mɨ. Tsə wudɔ wa wu funsə wɛnɛ wu kansɨ.” 23 Bəmanɨ Jisɔs wɔ ba jikə nyaha kɨgaŋ. Beŋ buhu bə nɨŋ'ə kɨnɨ ba nende yu tə lə, “Tə bə kpansɨ no lə yu kɨ gɨntɨ. Yu na biəlɨ bɨ yu kpɨsə wulu kɨtso.” 24 Jisɔs chi lə, “Bə́ nə̀ faŋ mɨ ji bənɨ bə Isla lɨ kwa. Bɔ na ji nɨ shíŋ yi nə laa.” 25 Bəmanɨ kpansɨ wa ba tuŋ kwa nu Jisɔs nəfiə ba tə bə yu lə, “Baba, butɨɨ chitə mɨ la.” 26 Jisɔs chi bə yu lə, “Fi na jimiɛhɛ diəŋ lə bə́ dze bidiəŋ bi beŋ'ə ba tɔfu bə bíə.” 27 Kpansɨ wa tə lə, “Na yɛyi Taa. Bəmanɨ, bíə ba tɨ yi kɨ dete mənambu mə na gbɔyɛ ma fəkoso tsa yi chɛ yi na diɨ.” 28 Jisɔs chi bə yu lə, “Kpansɨ no, kɨmbɨŋ kɔhɔ na tɛti lɨ. Fi kɨ ji wə lɨ chi wə na se cha.” Mɨ kɨsɨkɨ wene wa bu wəmiə.
Jisɔs chɨ bənɨ bəntsuku bəna
29 Jisɔs dza nə mɨ kɨ gɨntɨ, yu gəŋ ba chɛ fə ŋgɔŋ məmbəŋ mə Galili ku ba bəndɨ gəŋ dzo wɨ ba jiŋ mɨ. 30 Kuta wu bənɨ ba fə yu ku. Bədɔ nə̀ ba bə bənɨ bə nə̀ ji bəŋkpesɛ, bənyimə, bənɨ bə nə̀ ji bə gwɨ yi bimbunyɛ, bənɨ bə nə̀ kafɔhɔ nchanyɛ, bə bədɔ kɨyɛŋ bə kəkafɔ. Lə bɔ ba bə bɔ, bɔ memɛ bɔ yu nəfiə, yu wəmiəsɨ bɔ. 31 Kɨgəsə wɨŋ kɨntsu kɨ bənɨ lə ka chi kɨ nə̀ ŋəŋə bənɨ bə na kafɔhɔ nchanyɛ bɔ chanyɛ, bənɨ bə gwɨ yi bimbunyɛ lə wəmiə, bəŋkpesɛ gəndə nyɨlɨlɨ, bənyimə ŋɨntɨ. Bɔ kɨ nya bubəŋ bə Nyɔ wu bənɨ bə Isla.
32 Jisɔs bəndɨ beŋ buhu bə nɨŋ'ə, bɔ ba. Yu tə bə bɔ lə, “Nna ŋkwesɛ yaa bə kɨntsu kɨŋ, ndzɨ bɔ' jiŋ bə mɨ díɔ tɛ, bɔ kə shə bə bidiəŋ bi naji ɨ bɔ diə. Nna nsɛhɛ lə ntɔkaŋ nə bɔ wɨ lə bɔ kɨ gɨntɨ bə dzɔŋ, naji ɨ bɔ gəŋ gbɔyɛ dzə ndzɨ dzɔŋ.” 33 Beŋ buhu bə nɨŋ'ə bi bə yu lə, “Naji ɨ kə dze bidiəŋ nə məŋ sɛŋ kpa, bi naji ɨ bi kwətsə bə nchɨ ŋgwe yi no kuta wu bənɨ su?” 34 Jisɔs bi bə bɔ lə, “Bə na keŋkɛ bəblɛ bəmɛ?” Bɔ chi lə, “Na fumba bə mimbiɔshɛ mɛ tsəsɨ.” 35 Jisɔs tə lə kuta wu bənɨ wa jiŋ fəkoso. 36 Bɔ jiŋ. Yu dze bəblɛ ba fumba bə mimbiɔshɛ mia, yu nya kɨmbafə bə Nyɔ ba gbədiə nya bə beŋ buhu bə nɨŋ'ə, bɔ jɛchɛ bə bənɨ ba. 37 Miɨ chi diə ba fulu lɨ. Bɔ banchɛ bidiadia bi nə̀ shəkiə bia, bi yi bəŋka fumba. 38 Bənɨnsə bə nə̀ diə nə̀ bəntsuku bəna, ɨji bə kə bɔmbiɛ bəkansɨ bə beŋ. 39 Yu tə shə kuta wu bənɨ wa yu kɨ kwəlɨ. Yu be kɨkpɔŋkɔ ntɨŋ ba gəŋ sha yi Magadanª ntɨŋ.