Jisɔs chɨ bənɨ bəntsuku bəna
8
Díɔ ya ntɨŋ, kuta wu bənɨ chi ba ba yi lɨ. Fi tɨchə lə bɔ' fiəŋkə fiɔŋ fi diənə, Jisɔs bəndɨ beŋ buhu bə nɨŋ'ə ba tə bə bɔ lə, 2 “Yaa na kwete mɨ bə kuta no, ndzɨ bɔ' jiŋ bə mɨ díɔ tɛ, fɛŋfɛ fiɔŋ fi diənə na sɨŋ. 3 Na ji nshə bɔ lə bɔ kɨ kwəyɛ, ɨ dzɔŋ gəŋ ba ya bɔ dzə ndzɨ bədɔ nə bɔ ntɨŋ nə ba nə dzəbudə.” 4 Beŋ buhu bə nɨŋ'ə chi lə, “Naji ɨ miɨ dze fiɔŋ fi diənə nə məŋ sɛŋ kpa fi naji ɨ fi chɨ ŋgwe yi bɛŋ bənɨ?” 5 Yu bi bə bɔ lə, “Bə na keŋkɛ bəblɛ bəmɛ?” Bɔ chi lə, “Na fumba.” 6 Jisɔs tə lə kuta wu bənɨ wa jiŋ fəkoso. Lə bɔ jiŋ, yu dze bəblɛ ba fumba ba nya kɨmbafə bə Nyɔ ba gbədiə nya bə beŋ buhu bə nɨŋ'ə lə bɔ jɛchɛ bə bɔ. Bɔ jɛchɛ. 7 Bɔ nə̀ keŋkɛ tɨ mumbiɔshɛ tsəsɨ. Yu chi dzɛɛ ba nya kɨmbafə bə Nyɔ ba tə, bɔ jɛchɛ bə bənɨ ba. 8 Miɨ chi diə ba fulu lɨ. Lə beŋ bə Jisɔs lə bə nɨŋ'ə banchɛ bidiadia bi nə̀ shəkiə, bi yi bəŋka fumba. 9 Bənɨ bə nə̀ diə ba nə̀ ji nɨ bəntsuku bəna. 10 Yu tɔkaŋ, bɔ kɨ kwəyə. Mɨ kɨsɨkɨ yu be kɨkpɔŋkɔ ntɨŋ bə beŋ buhu bə nɨŋ'ə ba dza gəŋ sha yi Dalmanuta ntɨŋ.Bəfalasi kɨ se lə Jisɔs donchɛ fiɔŋ fi kɨgəsə kɨwɨŋə lə
11 Bəfalasi ba fə Jisɔs ku ba gbɔ yímbiɛ bə yu, bɔ tə lə yu fə fiɔŋ fi na donchɛ buŋga bu fɔɔ nə bɔ́. Bɔ nə̀ tɨdi manɨ bɔ foko yu bufɔŋɔ. 12 Jisɔs fieŋ kɨtso ba tə lə, “Ŋkɨkɨ no na se fiɔŋ fi na donchɛ buŋga bu fɔɔ nə bɔ́ lə yu fə nəŋ su? Ntə bəŋ yɛyi lə naji ɨ ŋkɨkɨ no ŋəŋ fiɔŋ wɨ kə.” 13 Yu shə bɔ ba fichə be kɨkpɔŋkɔ ntɨŋ, kɨ llɨ kɨwuŋ kɨdɔ ka wɨ.
Jisɔs tɨfiə beŋ buhu bə nɨŋ'ə lə bɔ kɨ dze tsa bə fiə wu Bəfalasi lə bə wu Hɛlɔd lə
14 Jisɔs nə̀ gɨntɨ ɨji beŋ buhu bə nɨŋ'ə' gufiɛ ndze blɛ, bɔ keŋkɛ kwa ji blɛ miuŋkpaŋ kɨkpɔŋkɔ ntɨŋ. 15 Yu kɨ chɛŋiɛ bɔ yu tɨdi lə, “Bə kɨ tɨntɨ ŋkɨ, bə dze tsa bə dzé yi Bəfalasi lə ma yi Hɛlɔd lə.” 16 Beŋ buhu bə nɨŋ'ə tə gbɔ kɨ chanyɛ bɔbɔ kɨ fiɔŋ fia lə, bɔ tɨdi lə, “Yu na chanyɛ mɛ ndzɨ kə na sɨŋ bə blɛ.” 17 Jisɔs kkə fiɔŋ fi bɔ na chanyɛ kɨ fi lə ba bi bə bɔ lə, “Fə la lə bə kɨ chanyɛ ji tsukɔ blɛ wɨ, wu bə na sɨŋ bə yu? Bə kə gbɔɔ kɨ ŋɨntɨ biɔŋ wɨ makə ŋkkə yi biɔŋ? Kɨjilə bufɨ bwɛnɨ kə gulɔ? 18 Bə na ji bə yəsɨ bə ŋəŋ sɨŋ? Bə ji bə bitiu bə ŋ'wɔ sɨŋ? Bə na gɔmbiɛhɛ? 19 Tsa yi nnə̀ ŋgbədiə ya bəblɛ bətɨŋ, bənɨ bəntsuku bətɨŋ diə, bə nə̀ banchɛ bidiadia bi nə̀ shəkiə bia bi yi bəŋka bəmɛ?” Bɔ chi lə, “Yɔɔ ntse bəfɛ.” 20 Yu chi biɛ lə, “Tsukɔ bəblɛ fumba bə bənɨ nə diə bəntsuku bəna, bə nə̀ banchɛ bidiadia bi nə̀ shəkiə bia bi yi bəŋka bəmɛ?” Bɔ chi lə, “Fumba.” 21 Yu bi bə bɔ lə, “Bə na bambi kə kkə biɔŋ?”
Jisɔs gu yəsɨ yi nyimə lə kɨtuŋ kɨ Bɛsaida ntɨŋ
22 Jisɔs bɔ bə beŋ buhu bə nɨŋ'ə llə ba fɔ Bɛsaida, bənɨ bədɔ ba bə nyimə wudɔ fə yu ku ba nende lə yu bukɔ yu fə yu wəmiə. 23 Jisɔs chiŋfi yu kɨbandə wɨ, bɔ fɔ nɔ nə bənɨ ba ntɨŋ. Yu chə mənchəŋ yəsɨ yi miɨ wa lə wɨ ba ga kaŋ yu wɨ ba bi bə yu lə, “Wə ŋɨntɨwa fiɔŋ wɨ?” 24 Nyimə wa tɔ yəsɨ bɔ́ ba jiŋgə tə lə, “Ŋŋɨntɨwa bənɨ wɨ diŋkidiŋki bɔ gəndə, bɔ ji nɨ bitɨ.” 25 Jisɔs chi galə kaŋ yəsɨ yi miɨ wa lə wɨ, miɨ wa jiŋgə mɛ ndzɔɔŋ, yəsɨ yihi bu tsalə, yu kɨ ŋɨntɨ biɔŋ bichi ŋgbooŋ. 26 Jisɔs tə bə yu lə, “Kɨ kwəlɨ, wə dze kɨ gɨntɨ, wə kə̂ tsɔhɔ toko.”
Pita tə lə Jisɔs na Nchitə wu Nyɔ nə̀ kaa wa
27 Jisɔs bɔ bə beŋ buhu bə nɨŋ'ə dza nə mɨ kɨ gɨntɨ bituŋ bi Kasaliya Filipi ntɨŋ. Nɨ bɔ nə̀ gɨntɨ, yu bi bə bɔ lə, “Bənɨ na tɨdi lə nna nji yəŋ?” 28 Bɔ chi lə, “Bənɨ bədɔ na tɨdi lə wə na ji Jɔŋ Nchɛsebiɔ, bədɔ lə Alaja, bədɔ tɨdi lə wə na ji miɨ wudɔ wu shɔŋ yi Nyɔ.” 29 Yu bi bə bɔ lə, “Bə na tɨdi yənɨ lə nna nji yəŋ?” Pita chi lə, “Wə na ji Nchitə wu Nyɔ nə̀ kaa wa.” 30 Jisɔs chɛŋiɛ bɔ lə bɔ kə̂ mɔŋkɔ lə bɔ tə fiŋ bə miɨ tsukɔ yu wɨ.
Jisɔs chanyɛ kɨ ŋgə wuhu lə bə kkpə yihi
31 Jisɔs gbɔ kɨ tɨfiə beŋ buhu bə nɨŋ'ə, yu chanyɛ kɨ gwɨ yihi lə lə, “Wɛŋ wu Miɨ naji lə yu ná wɔɔ ŋgə kɨtso, ɨ bənɨ bə sakɨ kɨtuŋ bə bəchɛ bintɔfiɛ bəbəŋ ma bənɨ bə na tɨfiə bilaŋ bi Nyɔ lə nɨŋŋ yu. Bɔ jiba bɔ kkpɨsɨ yu, ɨ kɨ ji díɔ bɨŋ tɛ, ɨ yu dzakɔ nə kkpə lɨ.” 32 Yu nə̀ chanyɛɛ biɔŋ biŋ bə bɔ ŋgbooŋ. Pita dze yu, bɔ baŋgə gwɨ, yu gbɔ kɨ chɛŋiɛ Jisɔs kɨ nchanyɛ ya lə. 33 Jisɔs fichə gwɨ ba bo beŋ buhu bə nɨŋ'ə ba wɛŋ bə Pita tə lə, “Dzâ mɨ nəjiŋ, Satan! Wə na jimiɛhɛ dia wu Nyɔ lə. Wə na ji ji dia wu miɨbəwəŋ'ə.”
34 Yu tə bəndɨ kuta wu bənɨ bə beŋ buhu bə nɨŋ'ə ba tə bə bɔ lə, “Ɨ miɨ na se lə yu kɨ biəlɨ mɨ, tə yu naji lə yu nɨ̂ŋŋ gwɨ yihi ba tɔ kɨtɨ kɨhɨ kɨ ŋ'wa lə kɨ biəlɨ mɨ. 35 Bə kɨ kkɨ lə miɨ yɨla wu na bətə buwəŋ buhu lə yu tə kə lasə bu, yu ná lasɨ lɨ bu. Bəmanɨ, miɨ wu na lasə buwəŋ buhu ndzɨ mɨ bə ndzɨ shɔŋ yi ndzeŋe, yu na bətə buwəŋ buhu bubətə. 36 Ɨ bə́ tɛshɛ mbi no chi ba nya bə miɨ lə yu diə, bəmanɨ lə nəjiŋ wusu yu lasɨ buwəŋ buhu, ɨ mbɨ wuhu kɨ ji la? 37 Fiɔŋ fi naji ɨ miɨ sɔmbu lə yu chi keŋkɛ buwəŋ buhu na la? 38 Bə kkə̂ lə jilə yaa na kwete miɨ bə mbiə mɨ ma diɛ yɛmɨ ŋkɨkɨ wubiə no ntɨŋ, wu na ji nɨ miɨ wu na shɨkɨ nomo makə kpansɨ yu dzenɛ binchi, yu kɨ kkɨ lə yaa ná kwete tɨ Wɛŋ wu Miɨ bə miɨ wa tsa yi Wɛŋ wu Miɨ ná fichə ba lɨ bubəŋ bu Tɨɨ lə ntɨŋ bə bənchinda bə Nyɔ lə bə ntsaaŋ.”