Jisɔs nachə bənɨ tsukɔ butsu bu fufiɛ wɨ
12
Tsa ya wɨ nə̀ ji, Jisɔs bə beŋ buhu bə nɨŋ'ə kɨ gəndə bɔ chɛti kə́ yi jiŋ'ə yidɔ ntɨŋ, ɨji butsu bu fufiɛ. Nə̀ ji dzɔŋ wo beŋ buhu bə nɨŋ'ə, bɔ gbɔ kɨ kəmbiə jiŋ bɔ diɨ. 2 Bəfalasi ŋəŋ ba tə bə Jisɔs lə, “Bô ŋəŋ, beŋ bɔhɔ bə nɨŋ'ə na fɨtɨ fiɔŋ fi kɨlaŋ na bɨmiɛhɛ lə miɨ fə butsu bu fufiɛ.” 3 Jisɔs bi bə bɔ lə, “Bə kə saa ba tanchɛ Kɨŋwatɨ kɨ Nyɔ lə nɨ dzɔŋ nə̀ wo Dɛbi bə kɨntsu kɨhɨ yu fə? 4 Yu nə̀ be tsɔŋ yi Nyɔ ntɨŋ, ba diə blɛ wu bə́ nə̀ sabiɛ ba ga lə na wu Nyɔ, ɨ nə̀ ji kɨlaŋ bə yu makə bə bənɨ bə nə̀ diə ba nu. Nə̀ bəchɛ bintɔfiɛ kwa bə nə̀ ji lə bɔ diə blɛ wa. 5 Makə lə bə kə saa ba tanchɛ tɨ bilaŋ bi Mose lə nɨ nə̀ ba ji butsu bu fufiɛ, bəchɛ bintɔfiɛ buŋ kɨlaŋ kɨ butsu bu fufiɛ lə ba fə nɨŋ yibɔ tsɔŋ yi bintɔfiɛ ntɨŋ, bəmanɨ nsa jikə jimiɛ? 6 Ntə bəŋ lə fiɔŋ fia mɛni fɛŋ fi na ko ba ya tsɔŋ yi bintɔfiɛ. 7 Bə́ nə̀ bɔndu Kɨŋwatɨ kɨ Nyɔ lə ntɨŋ Nyɔ tɨdi lə, ‘Nna nse lə bənɨ kɨ kwesɛ yaa bə bənɨ, nna nsɛhɛ lə bɔ kɨ fɨtɨ ji bintɔfiɛ mɨ lɨ.’ Bə tə na kkɨ fiɔŋ fi dɨ wa na tɨdi, bə tə jikə kɨ sakɨ bənɨ bə na sɨŋ bə ŋgbɔ. 8 Na lə Wɛŋ wu Miɨ na ji Miɨ Wubəŋ wu butsu bu fufiɛ.”Jisɔs wəmiəsɨ miɨ butsu bu fufiɛ
9 Jisɔs dza nə mɨ ba gəŋ be tsɔŋ yibɔ yi kɨntsɨsɨ ntɨŋ. 10 Fi kɨ ji lə miɨ wudɔ nə̀ jisu ɨji kɨbandə kɨhɨ kɨmo nə̀ kkpə. Bəfalasi bədɔ dza ba bi bə Jisɔs lə, “Kɨlaŋ na bɨmi lə naji ɨ bə́ wəmiəsɨ miɨ butsu bu fufiɛ?” Bɔ nə̀ bishɛ manɨ bɔ noŋko ji dyɛ yi bɔ buŋɔ yu wɨ. 11 Jisɔs chi bə bɔ lə, “Na yəŋ nə bəŋ ntɨŋ wu na ji bə shiŋ, ɨ yi gbɔ fɔŋ ntɨŋ butsu bu fufiɛ, ɨ yu jikə chiŋfiɛhɛ yi ba kpa foso lɨ? 12 Ntɨlə miɨbəwəŋ na yakɨ shiŋ dzəbudə. Kɨjilə kɨlaŋ na bɨmi lə miɨ fə ji nɨŋ yi ndzeŋe butsu bu fufiɛ.” 13 Jisɔs tə bə miɨ wu kɨbandə kɨkɨ nə̀ kkpə wa lə, “Nambiɛ kɨbandə kɔhɔ.” Miɨ wa nambiɛ, kɨ wəmiə kɨ ji diəŋ nɨ kɨdɔ ka. 14 Bəmanɨ Bəfalasi fɔ ba gəŋ gbɔ kɨ sesɛ nɨ bɔ fəə ba kkpɨsɨ Jisɔs.
Jisɔs na miɨ wu nɨŋ wu Nyɔ nə̀ sabiɛ
15 Jisɔs kkə fiɔŋ fi bɔ nə̀ sesɛ, yu dza nə mɨ. Bənɨ kɨyɛŋ biə yu. Yu wəmiəsɨ bɔ bəchi bə nə̀ ji bə gwɨ́, 16 yu loso bɔ lə bɔ kə̂ fəkə lə bənɨ kkə yu. 17 Fi nə̀ ji manɨ bə mfə lə fi fɔ diəŋ nɨ Adzaya miɨ wu shɔŋ yi Nyɔ nə̀ tədiə lə,
18 “Bə bô bə ŋəŋ, no na wɛnɛ wu nɨŋ wu mɨ nsabiɛ.
Nna nlaŋkɨ yu, shəŋ yɛŋ ndzeŋe bə yu.
Nná njiwa nnya yu Kɨn'yɨntɨ kɛŋ,
ɨ yu tɨfiə bituŋ tsukɔ dzə́ yi diəŋ yi ŋkɨmbɨ bənsa yi ntɨŋ.
19 Naji ɨ yu kɨ kpanə bə bənɨ kə, makə lə yu kɨ kɨtɨ bifuŋ.
Miɨ ná wokɔhɔ diɛ yihi nə dzə́ yashɛnɨ.
20 Naji ɨ yu ná kanə buŋɔ wɔŋ wu sə memɛ gwɨ kə.
Naji ɨ yu ná nyishə kɨbɨlə kɨ na doko diŋkidiŋki kə.
Fi ná kɨ ji manɨ gəŋ fɔ tsa yi dzə́ yi diəŋ yi yu na kɨmbɨ bənsa yi ntɨŋ ná yaa.
21 Bituŋ bichi ná kɨ jiŋgə fiə, ɨji bi' ga bufɨ yu wɨ.”
Buŋga bu Jisɔs lə fɔ nə məŋ?
22 Bənɨ bədɔ ba bə nyimə wudɔ, yu jikə kɨ chanyɛ, tsə ji yu wɨ. Jisɔs wəmiəsɨ yu, yu kɨ chanyɛ yu chisə ŋəŋə. 23 Kɨgəsə wɨŋ bənɨ bəchi bə nə̀ ji mɨ, bɔ kɨ bishɛ lə, “Naji ɨ miɨ no kɨ ji Wɛŋ wu Ŋkuŋ Dɛbi?” 24 Bəmanɨ Bəfalasi wɔ nɨ bə́ na bishɛ manɨ ba tə lə, “Miɨ no na foshɛ bətsə mɛ ɨji bə buŋga bu Bɛlsibu ŋkuŋ wu bətsə lə.” 25 Jisɔs kkə fiɔŋ fi bɔ na gɔmbiɛ ba tə bə bɔ lə, “Kɨtuŋ dza ba jɛ kɨ dio bə gwɨ yi kɨ, tə kɨ ná ji ka kɨ tsu bichə. Kɨtuŋ makə kɨtsɔŋ dza ba jɛ kɨ dio bə gwɨ yi kɨ, ɨ kɨ ləŋ kə. 26 Bəma, ɨ Satan na koŋko gwɨ yihi nə miɨ wɨ, kɨjilə yu na dio bə gwɨ yihi. Ɨ fi na ji manɨ, ɨ buŋkuŋ buhu jikə ləmiə. 27 Jilə nna mfoshɛ bətsə mɛ ɨji bə buŋga bu Bɛlsibu lə, kɨjilə bɛnɨ beŋ na foshɛ bə bu yəŋ'ə? Fiɔŋ fi beŋ bɛnɨ ba na fɨtɨ na donchɛ lə bə nə gbɔ nsa. 28 Bəmanɨ jilə nna mfoshɛ bətsə ba ɨji bə buŋga bu Kɨn'yɨntɨ kɨ Nyɔ lə, kɨjilə buŋkuŋ bu Nyɔ lə' ba bəŋ bɨŋ. 29 Bə na gɔmbiɛ lə naji ɨ miɨ be ntɛgwɨ tsɔŋ ba kondi biɔŋ bihi nə sɔ tsɔŋ, ɨji yu kə sa ba kwe ntɛgwɨ wa, kansɨ lɨ? Tsa yi yu' kansə manɨ, ɨ yu tə kondi biɔŋ bihi bichi ba fɔ bə bi. 30 Bə kkə̂ lə, ɨ miɨ na jimiɛhɛ kɨdia kəmɨ, tə yu na ti bə mɨ. Ɨ miɨ na chitəhə mɨ bə mbanchɛ, tə yu na tsaŋkɨ butsaŋə. 31 Ntə bəŋ lə naji ɨ Nyɔ gufiɛ biɔŋ bibiə bichi ma díɛ yibiə chi yi bənɨ na chanyɛ. Bəmanɨ ɨ miɨ chanyɛ diɛ yibiə tsukɔ Kɨn'yɨntɨ kɨ Ntsaaŋ wɨ, tə naji ɨ Nyɔ shəshə yu gufiə yu kə. 32 Ɨ miɨ chanyɛ diɛ yibiə tsukɔ Wɛŋ wu Miɨ wɨ, tə naji ɨ Nyɔ gufiɛ yu. Bəmanɨ ɨ miɨ chanyɛ diɛ yibiə ɨji tsukɔ Kɨn'yɨntɨ kɨ Ntsaaŋ wɨ, tə naji ɨ Nyɔ ná shəshə yu gufiə yu kə, se lɨ kɨ ji tsa nyi wɨ makə yi na ba wɨ.
Bə́ ba bə́ kkə kɨtɨ nə muntaŋ mukɨlə wɨ
33 Ɨ miɨ na ji bə kɨtɨ kɨ ndzeŋe, ɨ yu kɨ ji bə muntaŋ mu ndzeŋe mu na munchi kɨ wɨ. Ɨ miɨ na ji bə kɨtɨ kɨbiə, ɨ yu kɨ ji tɨ bə muntaŋ mumbiə mu na munchi kɨ wɨ. Bə́ ba bə́ kkə kɨtɨ ɨji nə muntaŋ mu kɨ na munchi wɨ. 34 Ŋgwe yi yé nyi. Naji ɨ bə chanyɛ bənchanyɛ bə ndzeŋe nəŋ, ɨji bə ji bənɨ bəbiə? Bə kɨ kkɨ lə fiɔŋ fi' yisə miɨ shəŋ na fi fi foto yu nə dze. 35 Ɨ miɨ na ji miɨ wu na ji bə kɨbə kɨ biɔŋ bi ndzeŋe lə yu ntɨŋ, ɨ yu kɨ foshɛ biɔŋ bi ndzeŋe. Ɨ yu na ji ji bə kɨbə kɨ biɔŋ bibiə lə, ɨ yu kɨ foshɛ tɨ ji biɔŋ bibiə.
36 Ntə bəŋ lə ná kɨ ji butsu bu nsa yi nəjiŋ'ə, ɨ miɨ nachɛ tsukɔ díɛ yi sɔkə wɨ chi yi yu nə̀ chanyɛɛ. 37 Bə kɨ kkɨ lə bə́ jiba ɨ bə́ ná saa miɨ ɨji nə bənchanyɛ wɨ bə na foto nə yu dze, na bənchanyɛ bə na foto nə miɨ dze bə ná fəə ɨ miɨ wa gbɔ nsa makə ɨ yu fɔfo.”
Bənɨ bədɔ kɨ se lə Jisɔs donchɛ fiɔŋ fi kɨgəsə kɨwɨŋə lə
38 Bənɨ bədɔ bə nə̀ tɨfiə bilaŋ bi Nyɔ lə ma Bəfalasi jiji ba tə bə Jisɔs lə, “Miɨ wu Bitɨfiə, kə na se lə wə fə fiɔŋ fi na donchɛ buŋga bwɔhɔ, kə ŋəŋ.” 39 Jisɔs chi bə bɔ lə, “Ŋkɨkɨ wubiə wu nə shə no Nyɔ ba kɨ ji nɨ kpansɨ wu sə fɔɔ nə nomo tsɔŋ kɨ dzenɛ, yu se wa lə yu ŋəŋ fiɔŋ fi na donchɛ buŋga bwɛŋ! Naji ndonchɛ fiɔŋ bə ŋkɨkɨ no kə, yasə fi Jɔna lə miɨ wu shɔŋ yi Nyɔ. 40 Nɨ Jɔna nə̀ jimiɛ biɔsu yibəŋ shəŋ díɔ tɛ, bbutsu bə bbushə, na tɨ diəŋ nɨ Wɛŋ wu Miɨ jiwa yu jiŋ sha ntɨŋ díɔ tɛ. 41 Ná kɨ ji butsu bu nsa yi nəjiŋ'ə, ɨ bənɨ bə Ninifɛ ləŋ bə ŋkɨkɨ wu fɛŋ no ba fə ɨ bə́ ga yu ŋgə ntɨŋ ndzɨ bənɨ bə Ninifɛ bəsu nə̀ wɔ fiɔŋ fi Jɔna nə̀ tɨfiə ba yashənɨ fiə wubɔlə. Bəmanɨ bə wôkɔ bə wɔ, miɨ wa mɛni bə fiɔŋ fi na ko ba ya fi Jɔna lə. 42 Ná kɨ ji butsu bu nsa yi nəjiŋ'ə, ɨ Ya yi na sakɨ kɨtuŋ kɨ Shɛba ləŋ bə ŋkɨkɨ wu fɛŋ no ba fə ɨ bə́ ga yu ŋgə ntɨŋ, ndzɨ yu nə̀ dza nə kɨtuŋ kɨhɨ kɨ dzəbudə ntɨŋ lə yu ba wɔ bufɨ bu Ŋkuŋ Sɔlɔmon lə. Bəmanɨ bə wôkɔ bə wɔ, miɨ wa mɛni bə fiɔŋ fi na ko ba ya fi Sɔlɔmon lə.
43 Kɨn'yɨntɨ kɨbiə ba kɨ fɔ nə miɨ wɨ kɨ gəŋ kpa kɨ noŋko dɨ wu kɨ kɨ ji. Jilə kɨ' nɔŋ sɨŋsɨŋ, 44 kɨ tə lə, ‘Njiwa ntsu mɨ tsɔŋ, dɨ wu mɨ' mfɔɔ.’ Tsa yi kɨ' tsɔ ba ŋəŋ tsɔŋ ya ɨji fiɔŋ sɨŋ sɔ, bə́' yənsɨ ba nachɛ yi, yi ji ntsaaŋ, 45 bəma kɨ tə tsu ba ba bə bin'yɨntɨ bidɔ fumba bibiə bi na bɨfi bi yakɨ kɨ, bi ba be kɨ me sɔ. Biɔŋ tə kanə bəfiə dia wu miɨ wa lə tsa ya wɨ ya nɨ bi nə̀ sa bi ji. Na tɨ diəŋ nɨ fi ná kɨ ji bə ŋkɨkɨ wubiə wu fɛŋ no.”
Mə Jisɔs bə bəjimə Jisɔs
46 Kwa nɨ Jisɔs nə̀ bambi yu chanyɛ bə bənɨ manɨ, mə Jisɔs bə bəjimə Jisɔs bu ba ləŋ binchi kɨ se lə bɔ təfɨ bə yu. 47 Miɨ wudɔ tə bə Jisɔs lə, “Mma bə bəwəma' ləŋ sa biŋ, bɔ se lə bɔ təfɨ bə wə.”ª 48 Yu bi bə yu lə, “Nɛ ji yəŋ, bəŋgwɨŋ ji bəyəŋ?” 49 Nɨ yu biɛ manɨ, yu kɨ tseyɛ beŋ buhu bə nɨŋ'ə bə kpaŋ yu tɨdi lə, “Nɛ bə bəŋgwɨŋ na bɛmbɛ mɛ. 50 Bə kɨ kkɨ lə miɨ chi wu na fɨtɨ fiɔŋ fi Taa wu bɔ́ na se, na yu wu na ji ŋgwɨŋ bə dzəmbɨtə yɛmɨ, bə nɛ.”