Jɔŋ Nchɛsebiɔ faŋ beŋ buhu bə nɨŋ'ə Jisɔs lɨ
11
Lə Jisɔs kanə bə nya yi bitɨfiə bə beŋ buhu bə nɨŋ'ə bə yɔɔ ntse bəfɛ, yu dza nə mɨ kɨ gəndə bituŋ bi sɔ ntɨŋ, yu tɨfiə bənɨ, yu tɨdi shɔŋ yi ndzeŋe. 2 Tsa ya wɨ nə̀ ji Jɔŋ Nchɛsebiɔ ji tsɔŋ yi buŋfia ntɨŋ. Lə yu wɔ tsukɔ biɔŋ bi Klistu nə̀ fɨtɨ wɨ, yu faŋ beŋ buhu bə nɨŋ'ə lə bɔ gəŋ 3 ba bi bə Jisɔs lə, “Na wə wu nə̀ji lə wə ba, maa kə kɨ wokɔ miɨ wudɔ lə?” 4 Bɔ gəŋ bi, Jisɔs chi bə bɔ lə, “Bə fîchɛ bə gəŋ tə Jɔŋ biɔŋ bi bə' wɔɔ bə bi bə' ŋəŋə. 5 Bənyimə ŋɨntɨ ba, bəŋkpesɛ gəndə nyɨlɨlɨ, bənɨ bə kɨnsansa lə wəmiə, bənchindiɛ woko, bənɨ bə ŋkkpə dzakɔ nə kkpə lɨ, bə́ tɨfiə tɨ shɔŋ yi ndzeŋe yi Nyɔ bə bənɨ bə fiəŋkə. 6 Kɨnlaŋ kɨbəŋ na bə miɨ wu kə masə mɨ.”7 Lə beŋ bə Jɔŋ'ə bə nɨŋ'ə ba kɨ dza, Jisɔs gbɔ kɨ chanyɛ bə kɨntsu kɨ bənɨ lə tsukɔ Jɔŋ wɨ, yu bishɛ lə, “Bə nə shɨ bə foto bə gɨntɨ kpa lə bə gəŋ ŋəŋ ji la? Wɔŋ wu fiəfɨ na chɛti wu kɨ nɨkə? 8 Chi na manɨ kə, bə nə foto bə gɨntɨ sɔ ndzɨ la? Bə nə gɨntɨ lə bə gəŋ ŋəŋ miɨ wu sə deŋɛ gwɨ bə bindzu bi ndzeŋe? Bə wôkɔ bə wɔ, bənɨ bə na dente gwɨ bə bindzu bi ndzeŋe ba bɔ kɨ ji ɨji ntɔ. 9 Bə nə shɨ bə gɨntɨ sɔ ndzɨ la? Lə bə gəŋ ŋəŋ miɨ wu shɔŋ yi Nyɔ maa? Ɨŋŋ, kɨjilə bə nə ŋəŋ. Ntə bəŋ lə, yu na yakɨ miɨ wu shɔŋ yi Nyɔ. 10 Na yu wu fi na ji bubɔndɔ tsukɔ yu wɨ Nyɔ tɨdi lə,
‘Wôkɔ wɔ, njiwa mfaŋ miɨ wɛŋŋ wu faŋə ɨ yu sa wə fiə,
ɨ yu lɨmə dzə yɔhɔ, fə wə kɨ gɨntɨ.’
11 Ntə bəŋ yɛyi lə, nə bənɨ ntɨŋ bə bəkansɨ bɛyɛ, bə́ kə sa bɛyɛ miɨ wubəŋ wu na yakɨ Jɔŋ Nchɛsebiɔ. Bəmanɨ, miɨ wu na ji tɨmo wuntse buŋkuŋ bu bɔ́ ntɨŋ na ko ba ya yu. 12 Dze nə tsa yi Jɔŋ Nchɛsebiɔ nə̀ gbɔɔ nɨŋ yihi ba fɔ fɛŋ, buŋkuŋ bu Nyɔ lə ko bwa bə buŋga, bənɨ bə buŋga lə dze bu.ª 13 Fi ji ma ndzɨ bənɨ bə shɔŋ yi Nyɔ lə bəchi ma bilaŋ bi Mose lə nə̀ chanyɛ tsukɔ buŋkuŋ bu bɔ́ wɨ sɨŋsɨŋ ba fɔ tsa yi Jɔŋ Nchɛsebiɔ wɨ. 14 Jilə naji ɨ bə bɨŋ lə Jɔŋ no na Alaja wu nə̀ ji bə mba, bə bɨŋ. 15 Miɨ wu na ji bə bitiu yu wɔ̂.”
16 Jisɔs jiji ba tə lə, “Naji mfɨkə ŋkɨkɨ wu fɛŋ no ji bə la? Yu na ji tɨmɛ nɨ beŋ bəbiɨ bə' jimiɛ bidɨ bi shɨ lə wɨ, bədɔ bɨndɨ bədɔ bɔ bishɛ lə, 17 ‘Kə tiŋ finshiŋ bə jikə biŋkɛhɛ? Kə nya yɨmbɨ yi kkpə bə jikə bɨmiə?’ 18 Mɨ nchanyɛ manɨ ndzɨ Jɔŋ nə̀ ba yu jikə kɨ diɨ, yu jikə kɨ mu, bə́ kɨ chanyɛ lə, ‘Yu na keŋkɛ tsə yu wɨ.’ 19 Wɛŋ wu Miɨ ba fɛŋ, yu diɨ, yu mu, bə́ lə bə́ bo bə́ ŋəŋ, yu gəndə wa yu bu diə, yu mu mbiŋ, yu ji bushə bə bənɨ bə na kwete kɨŋwatɨ ma bənɨ bəbiə bədɔ. Bə kɨ kkɨ lə bufɨ ba bu kɨ yinshi ɨji fiɔŋ fi bu nɨntɨ wɨ.”
Jisɔs kɨ yɛshi fiə yi bituŋ bidɔ lə
20 Jisɔs dza ba gbɔ kɨ yɛshi fiə yi bituŋ bidɔ lə bi yu nə̀ tsɛntsɛ fə biɔŋ bintaŋ kɨyɛŋ bi ntɨŋ, ndzɨ yu nə̀ fə manɨ bənɨ bə sɔ jikə yashənɨ tɨmo fiə wubɔlə. 21 Yu kɨ yɛshi bɔ manɨ, yu chanyɛ lə, “Lɔŋ bə bəŋ, bəŋ bənɨ bə Kɔlasin, lɔŋ bə bəŋ tɨ bənɨ bə Bɛsaida. Bə kɨ kkɨ lə, ntə nnə̀ mfə biɔŋ bintaŋ bi nnə̀ mfəə biŋ bəŋ ku ɨji Taya bə Sidɔn, bɔ tə nə̀ dɔŋ bindzu biyi, ba kushi bu bɔ gwɨ́ ndɛŋkə bə ndonchɛ lə bɔ' fichə shəŋ yibɔlə. 22 Bəma, ntə bəŋ lə, ná kɨ ji butsu bu nsa yi nəjiŋ'ə, ɨ biɔŋ kɨ ji lɨlɨ dia wu bənɨ bə Taya lə bə bənɨ bə Sidɔn ba ya bəŋ. 23 Ma bəŋ bənɨ bə Kapanaum, bə na gɔmbiɛ lə bə́ ná bəndɨsɨ bəŋ ɨ bə bəndɨ bɔ́? Yɛ! Bə́ ná shisəsɨ bəŋ ɨ bə shi ba gəŋ mbi wu bəŋkkpə ntɨŋ. Bə kɨ kkɨ lə, ntə nnə̀ mfə biɔŋ bintaŋ bi nnə̀ mfəə biŋ bəŋ ku ɨji Sɔdɔm, kɨtuŋ ka tə kɨ bambi su ba tuŋ ndɛŋ. 24 Ntə bəŋ lə, ná kɨ ji butsu bu nsa yi nəjiŋ'ə, ɨ biɔŋ kɨ ji lɨlɨ dia wu bənɨ bə Sɔdɔm lə ba ya bəŋ.”
Jisɔs dɨ bənɨ bə ntə́ yinjitə lə
25 Tsa ya wɨ, Jisɔs dza ba tə lə, “Mɨ nnya kɨmbafə bə wə Taa wəmɨ, Ŋkuŋ wu bɔlu bə sha, chi wə nə̀ nyələ biɔŋ biŋ nə bəfɨ lɨ ma bə kkɨ biɔŋ, ba donchɛ ji bə muŋwenɛ. 26 Na nɨ fi na ji Taa, ndzɨ na nɨ wə nə̀ se lə fi kɨ ji.
27 Taa nə nya mɨ biɔŋ bichi. Miɨ na sɨŋ su wu na kkɨ Wɛŋ fiəŋkə kwa Tɨɨ. Miɨ na sɨŋ su wu na kkɨ Taa, na kwa mɨ wene bə bənɨ bə Wɛŋ' sabiɛ lə yu donchɛ bɔ Tɨɨ.