Fo wu bənɨ bə bitsa lə ga shəŋ Jisɔs wɨ
7
Nɨ Jisɔs nə̀ kanə bə ntɨfiə bənɨ biɔŋ biŋ bichi, yu dza ba gəŋ kɨtuŋ kɨ Kapanaum ntɨŋ. 2 Fo wu kɨntsu kɨ bənɨ bə bitsa lə bə Lom ji sɔ, yu ji bə mfia wuhu wudɔ, yu laŋkɨ mfia wa kɨtso. Mfia wa gwente, yu ji nchitə bɨŋ. 3 Lə Fo wa wɔ kɨ Jisɔs lə, yu ku kaŋ bə bənɨ bə sakɨ kɨtuŋ kɨ Bəju lə ba faŋ lə bɔ gəŋ nende Jisɔs lə yu ba wəmiəsɨ mfia wuhu. 4 Bɔ gəŋ ba ŋəŋ Jisɔs ba ku kaŋ bə yu tə lə, “Butɨɨ bâ wə gəŋ chitə miɨ waha no, na miɨ wu naji ɨ wə chitə yu. 5 Yu na laŋkɨ kɨtuŋ kaha kɨtso, na yu wu nə̀ wɛyɛ tsɔŋ yaha yi kɨntsɨsɨ.”6 Jisɔs bu dza, bɔ bə bɔ kɨ gɨntɨ. Lə bɔ kɨ ba gwɨgwɨ fə tsɔŋ yi fo wu kɨntsu kɨ bənɨ bə bitsa lə wa ku, fo wa faŋ nsáŋ yihi yidɔ lə yi gəŋ chichə Jisɔs lə yu kə̂ baha. Yi gəŋ, bɔ bɨkənɨ, yi tə bə yu lə, “Baba, fo wu bənɨ bə bitsa lə' tə lə wə kə̂ wɔkɔhɔ ŋgə bə mba. Lə yu kə kwətsə miɨ wu naji ɨ wə be yu tsɔŋ. 7 Fia na fiɔŋ fi sə fəə lə yu kə̂ baha ba ŋəŋ wə bə kaŋ yihi. Bəmanɨ, lə wə fôso kwa diɛ nə wə dze, mfia wuhu jiwa yu wəmiə. 8 Lə yu wu yu na ji buŋga bu miɨ wudɔ lə nəkoso, bənɨ bə bitsa lə ji tɨ yu nəkoso. Yu ba yu tə bə wudɔ lə, ‘Kɨgɨntɨ,’ yu kɨ gɨntɨ, yu tə bə wudɔ lə, ‘Bâ,’ yu ba. Yu tə tɨ bə mfia wuhu lə, ‘Fə mɛ,’ yu bu fə.”
9 Jisɔs wɔ shɔŋ ya manɨ, kɨgəsə wɨŋ yu, yu fichə ba tə bə kuta wu bənɨ wu nə̀ biəlɨ yu lə, “Ntə bəŋ lə, ŋkə nsaa ba ŋəŋ miɨ wudɔ wɨ ma tɨ nə Isla ɨji yu' ga ŋgwe yi yiŋ shəŋ mɨ wɨ mɛ.” 10 Lə bənɨ bə fo wu kɨntsu kɨ bənɨ bə bitsa lə nə̀ faŋə ba tsu tsɔŋ, bɔ ŋəŋ kɨ ji mfia wa' wəmiə.
Jisɔs dzakɔ wɛŋ wu nɨnsə nə kkpə lɨ
11 Nə mɨ, Jisɔs bə beŋ buhu bə nɨŋ'ə dza kɨ gɨntɨ kɨtuŋ kɨdɔ ntɨŋ bə́ tsɨsə lə Nɛn, kɨntsu kɨ bənɨ lə biəlɨ yu nəjiŋ. 12 Nɨ bɔ nə̀ gɨntɨ fɔɔ fə fiənsɨ wu mbaŋ wu kɨtuŋ ka lə ku, bɔ bo ba ŋəŋ bə́' tɔ kɨŋgundu kɨ foto bə kɨ. Miɨ wa nə̀ ka kwa yu nə mɛni shəŋ. Mɛni nə̀ ji kpansɨ ŋku. Bɔ nə̀ foto bə kɨ manɨ, kɨntsu kɨ bənɨ lə nə kɨtuŋ ka ntɨŋ kɨyɛŋ biəlɨ mə wɛŋ wa. 13 Lə Baba ŋəŋ kpansɨ wa wɨ, yaa kwe yu, yu tə bə kpansɨ wa lə, “Wə kə̂ tsɔhɔ dəə.” 14 Nɨ yu tədiə manɨ, yu gəŋ ba bukɔ bitɨ bi bə́ nə̀ tɔɔ bia kɨŋgundu ka bɨŋ. Bənɨ bə nə̀ tɔɔ ba bu ləŋ. Yu tə lə, “Wɛŋ wu nɨnsə, nna nchanyɛ bə wə, dzâ wə!” 15 Wɛŋ wa bu dza wə ba jiŋ'ɨ ba gbɔ kɨ chanyɛ. Jisɔs chiŋfi yu ba nya bə mɛni.
16 Bənɨ bəchi ŋəŋ manɨ, kɨgəsə wɨŋ bɔ. Bɔ kɨ kuntə Nyɔ bɔ tɨdi lə, “Miɨ wu shɔŋ yi Nyɔ wubəŋ' ba bɨ ntɨŋ. Nyɔ ba lə yu chîtə bənɨ buhu.”
17 Shɔŋ nyi tsukɔ Jisɔs wɨ tsaŋ ba gəŋ kɨtuŋ kɨ Judɛya ntɨŋ kɨchi ma bituŋ bi nɔ bichi.
Jɔŋ Nchɛsebiɔ faŋ beŋ buhu bə nɨŋ'ə Jisɔs lɨ
18 Lə beŋ bə nɨŋ'ə bə Jɔŋ'ə wɔ biɔŋ biŋ bichi, bɔ gəŋ ba tə bə yu. Yu bəndɨ bədɔ bəfɛ 19 ba faŋ Baba lɨ lə bɔ gəŋ bi bə yu lə na yu wu nə̀ ji bə mba, maa bə́ kɨ wokɔ miɨ wudɔ lə.
20 Bɔ gəŋ ŋəŋ Jisɔs ba tə bə yu lə, “Jɔŋ Nchɛsebiɔ' faŋ bɨ lə kə bi bə wə lə na wə wu nə̀ ji bə mba, maa kə kɨ wokɔ miɨ wudɔ lə?”
21 Nə̀ ji Jisɔs ji tsa ya wɨ yu wəmiəsɨ bənɨ bə gwɨ́ lə bə bə dzéŋ'ə kɨyɛŋ, yu foshɛɛ bin'yɨntɨ bibiə nə bənɨ wɨ, yu guyɛɛ yəsɨ yi bənyimə lə kɨyɛŋ. 22 Jisɔs chi bə bɔ lə, “Bə fîchɛ bə gəŋ tə Jɔŋ biɔŋ bi bə' ŋəŋə bə bi bə' wɔɔ. Bənyimə ŋɨntɨ ba, bəŋkpesɛ gəndə nyɨlɨlɨ, bənɨ bə kɨnsansa lə wəmiə. Bənchindiɛ woko, bənɨ bə ŋkkpə dzakɔ nə kkpə lɨ, bə́ tɨfiə tɨ shɔŋ yi ndzeŋe yi Nyɔ bə bənɨ bə fiəŋkə. 23 Kɨnlaŋ kɨbəŋ na bə miɨ wu kə masə mɨ.”
24 Lə bənɨ bə Jɔŋ nə̀ faŋə ba dza, Jisɔs gbɔ kɨ chanyɛ bə kɨntsu kɨ bənɨ lə tsukɔ Jɔŋ wɨ yu bishɛ lə, “Bə nə shɨ bə foto bə gɨntɨ kpa la ŋəŋə? Wɔŋ wu fiəfɨ na foŋko wu nɨkə? 25 Jikə jimiɛ manɨ, kɨjilə bə nə̀ foto bə gɨntɨ ŋəŋə ji la? Miɨ wu' dɔŋɔ bindzu bi yuu? Bə wôkɔ bə wɔ, bənɨ bə na doŋko bindzu bi kpə lə, bɔ diɨ mbi wubɔ ba bɔ kɨ ji ɨji ntɔ. 26 Bə nə shɨ bə gɨntɨ manɨ ŋəŋə ji la lə? Miɨ wu shɔŋ yi Nyɔ maa? Ɨŋŋ, kɨjilə bə nə ŋəŋ. Ntə bəŋ lə, yu na yakɨ miɨ wu shɔŋ yi Nyɔ. 27 Na yu wu fi na ji bubɔndɔ tsukɔ yu wɨ Nyɔ tɨdi lə,
‘Wôkɔ wɔ, njiwa mfaŋ miɨ wɛmɨ yu sa gəŋ wə nəfiə,
yu jiwa ɨ yu gəŋ lɨmə dzə yɔhɔ fə wə tə kɨ ba.’
28 Ntə bəŋ lə, nə bənɨ ntɨŋ bə bə́ nə̀ tɔɔ mbɛyɛ ba fɔ fɛŋ, miɨ wubəŋ na sɨŋ wu na yakɨ Jɔŋ. Bəmanɨ, miɨ wu na ji wu ntse buŋkuŋ bu Nyɔ lə ntɨŋ na ko ba ya Jɔŋ.”
29 Bənɨ bəchi ma tɨ bənɨ bə nə̀ kwete kɨŋwatɨ wɔ nɨ Jisɔs chanyɛ lə Jɔŋ nə̀ ji miɨ wu shɔŋ yi Nyɔ bɔ sɛŋ lə buŋkuŋ bu Nyɔ lə na bu nyɨlɨlɨ, ndzɨ nə̀ ji bɔ' bɨŋ, Jɔŋ chɛse bɔ biɔ. 30 Bəmanɨ, Bəfalasi bə bənɨ bə nə̀ kkɨ bilaŋ bi Nyɔ lə nə̀ nɨŋŋ fibɔlə bimbɨchɛ bi Nyɔ nə̀ ba bə bi ndzɨ bɔ nə̀ nɨŋŋ, Jɔŋ jikə chɛsɛ bɔ biɔ.
31 Jisɔs jiji ba tə lə, “Fiɔŋ fi naji mfɨkə ŋkɨkɨ wu bənɨ bə fɛŋ'ə su na la? Bɔ na ji diəŋ nɨ la? 32 Njiwa ntə bəŋ fiɔŋ fi bɔ na ji nɨ fi. Bɔ na ji nɨ beŋ bəbiɨ bə' jimiɛ shɨbɨŋ, bədɔ bɨndɨ bədɔ bɔ bishɛ lə, ‘Kə na tinti munshiŋ bə jikə biŋkɛhɛ? Kə nyaa ŋkɨ yi kkpə bə jikə bɨmiə?’ 33 Na tɨ nɨ Jɔŋ Nchɛsebiɔ nə̀ ba kɨ shɨ dzɔŋ, yu jikə mwɔhɔ mbiŋ, bə́ lə yu na keŋkɛ tsə yu wɨ. 34 Wɛŋ wu Miɨ ba kɨdiɨ, yu mu, bə lə bə́ bo bə́ ŋəŋ, yu na gəndə yu bu diə, yu bu mwɔ mbiŋ, yu ji bushə bə bənɨ bə na kwete kɨŋwatɨ ma bənɨ bəbiə bədɔ. 35 Bəmanɨ, bənɨ bəchi bə na bɨmi bufɨ bu Nyɔ lə na donchɛ lə na bu diəŋ.”
Jisɔs gufiɛ bubiə bu kpansɨ wu ndzenɛ lə
36 Miɨ Bəfalasi wudɔ jiji ba bəndɨ Jisɔs lə yu ba diə yu tsɔŋ. Jisɔs bɨŋ ba gəŋ'ɨ, bɔ kɨ diɨ.ª 37 Fi fɔ lə kpansɨ wu ndzenɛ wudɔ nə̀ ji kɨtuŋ ka ntɨŋ. Lə yu wɔ lə Jisɔs diɨ wa miɨ Bəfalasi wa tsɔŋ, yu dze fiŋgəª fi məŋ məndɔ mə ntsɔŋfu lə ba gəŋ bə fi sɔ. 38 Yu gəŋ ba be ləŋ Jisɔs nəjiŋ ba gbɔ kɨ dɨ, məndəŋ təkiɛ go yi Jisɔs lə bɨŋ. Lə yu tsəkə, yu tse bushi buhu kɨ shiŋkiɛ go yi Jisɔs lə bə yu yihi yi fi, yu nambiɛ go yi Jisɔs lə ba fi yi bə məŋ ma. 39 Lə miɨ Bəfalasi wa ŋəŋ manɨ, yu gɔmbiɛ nə yu shəŋ lə, “Jilə miɨ no tə sə ji miɨ wu shɔŋ yi Nyɔ, yu tə kkə fiɔŋ fi kpansɨ wu bukɔ no yu wɨ naji fi lɨ, lə na kpansɨ wu ndzenɛ.”
40 Jisɔs tə bə miɨ Bəfalasi wa lə, “Semon, nna ŋkeŋkɛ fiɔŋ fi chanyɛ bə wə.”
Yu chi lə, “Miɨ wu Bitɨfiə, chânyɛ.”
41 Jisɔs tə gbɔ lə, “Miɨ wudɔ nə̀ fe bənɨ bəfɛ kpə, yu fe miɨ wudɔ biba gɨ tɨŋ ba fe wudɔ biba mbaashɨŋ. 42 Fi ya bɔ bəchi bə nsɔmbu, yu bu shə kpə wa bə bɔ. Fɛŋ, wə ŋəŋ lə nə bənɨ bəfɛ bɛŋ ntɨŋ, miɨ wu naji ɨ yu kɨ laŋkɨ yu kɨtso na wu la?”
43 Semon chi lə, “Naji ɨ kɨ ji miɨ wu bə́ nə̀ shə fie yihi ɨji yibəŋ.”
Jisɔs bɨŋ lə, “Wə fichɛ diəŋ.” 44 Nɨ yu bɨmiə manɨ, yu fichə ba bo kpansɨ wa ba tə bə Semon lə, “Wə ŋəŋ kpansɨ no? Nɨ nsə mba wə tsɔŋ, wə sə kə nyaha mɨ tɨmo ŋgɔŋ lə ŋ'wwɔ go. Bəma, kpansɨ no' wwɔ go yɛmɨ ji bə məndəŋ ba shiŋkiɛ bə yu yihi yi fi. 45 Wə sə kə kukɔ mɨ. Bəmanɨ, dze nə nsə mba mɛni, kpansɨ no kə chində su bə nambiɛ yi go yɛmɨ. 46 Wə sə kə fikɛhɛ fo wɛŋ bə məŋ. Bəmanɨ, kpansɨ no' fi go yɛmɨ ji bə məŋ mə ntsɔŋfu lə. 47 Kɨjilə, mɨ ntə bə wə lə, kpansɨ no' donchɛ kɨnse kɨbəŋ ndzɨ bə́' gufiɛ məmbiə muhu mə kɨtso lə. Bəmanɨ, miɨ wu bə́' gufiɛ məmbiə muhu mɔ ji tsəsɨ, miɨ wa ba yu donchɛ kɨnse kɨ tsəsɨ.”
48 Jisɔs tə tə bə kpansɨ wa lə, “Bə́' gufiɛ məmbiə mɔhɔ.”
49 Bənɨ bə bɔ bə bɔ nə̀ diɨ, gbɔ kɨ nuŋɔ bɔbɔ, bɔ tɨdi lə, “No na tə yəŋ wu na gufiɛ məmbiə mə bənɨ lə?”
50 Jisɔs kanə ba tə bə kpansɨ wa lə, “Kɨ gɨntɨ fiɔhɔ bə budə, shəŋ yi wə galə mɨ wɨ fə wə fɔfo.”