Jisɔs wəmiəsɨ miɨ wu kɨnsansa
8
Lə Jisɔs dza nə dzo bɨŋ ba shi lɨ, kuta wu bənɨ biə yu. 2 Miɨ wudɔ wu nə̀ gwente kɨnsansa bu ba ba tuŋ nu Jisɔs nəfiə ba tə bə yu lə, “Baba, naji ɨ wə wəmiəsɨ mɨ ŋkɨ nji ntsaaŋ, jilə wə na se lɨ.” 3 Jisɔs nambɔ kɨbandə bukɔ yu wɨ ba tə lə, “Nna nse lɨ, wə̂miə la wə tsalə.” Mɨ kɨsɨkɨ, kɨnsansa ka bu fɔ nə yu wɨ, yu tsalə. 4 Jisɔs loso yu lə, “Ŋəŋ, wə kə̂ tədiə bə miɨ. Bəmanɨ, gəŋ donchɛ gwɨ yɔhɔ bə chɛ bintɔfiɛ, wə nyâ kɨnya kɨ Mose nə̀ tədiə lə miɨ naji lə yu nya bə ndonchɛ bə bənɨ lə yu' wəmiə nə dzeŋ nyi wɨ ba tsalə lɨ.”Jisɔs wəmiəsɨ wɛŋ wu nɨŋ wu fo wu bənɨ bə bitsa lə
5 Jisɔs dza ba gəŋ be kɨtuŋ kɨ Kapanaum ntɨŋ. Fo wu kɨntsu kɨ bənɨ bə bitsa lə bə Lom ba ŋəŋ yu wɨ kɨ kuchi kaŋ bə yu lə, 6 “Baba, wɛnɛ wu nɨŋ me wa tsɔŋ ɨji yu' kkpə dia mo, yu woko bulo kɨtso.” 7 Jisɔs tə bə yu lə, “Njiwa mba ŋ'wəmiəsɨ yu.” 8 Bəmanɨ, fo wu kɨntsu kɨ bənɨ bə bitsa lə wa chi bə Jisɔs lə, “Baba, ŋkə ŋkwətsə miɨ wu naji ɨ wə ba mɨ tsɔŋ. Chânyɛ kwa ji diɛ, wɛnɛ wu nɨŋ jiwa yu wəmiə. 9 Nna nji buŋga bu miɨ wudɔ lə nəkoso, bənɨ bə bitsa lə ji tɨ mɨ nəkoso. Mba ntə bə wudɔ lə, ‘Kɨ gɨntɨ,’ yu kɨ gɨntɨ, mba ntə bə wudɔ lə, ‘Bâ,’ yu ba. Mba ntə tɨ bə mfia wɛŋ lə, ‘Fə mɛ,’ yu fə.” 10 Lə Jisɔs wɔ fiɔŋ fi yu chanyɛ, kɨgəsə wɨŋ yu. Yu chanyɛ bə bənɨ bə nə̀ biəlɨ ba yu lə, “Ntə bəŋ yɛyi lə, ŋkə nsaa ŋəŋ miɨ wɨ ma nə kɨtuŋ kɨ Isla ntɨŋ wu' galə ŋgwe yi yiŋ shəŋ mɨ wɨ mɛ. 11 Ntə bəŋ lə bənɨ kɨyɛŋ ná dza nə bidɨ bichi ntɨŋ, dze nə dia wu díɔ boso gəŋ fɔ dia wu wu midi, ba jimiɛ kɨ diɨ bə bəchaa bɛnɨ Ablaham bə Adze bə Jakɔ kɨtuŋ kɨ Nyɔ lə kɨ bɔ́ ntɨŋ, 12 bəmanɨ, ɨji bə́' tɔfu beŋ bə kɨtuŋ ka lə binchi kɨjuwɔ ntɨŋ, dɨ wu bənɨ ná kɨ dɨ bɔ diɨ gəsɨ.” 13 Lə Jisɔs chanyɛ manɨ, yu tə bə fo wu bənɨ bə bitsa lə wa lə, “Kɨ kwəlɨ, fi kɨ ji bə wə nɨ wə galə shəŋ mɨ wɨ.” Wɛŋ wu nɨŋ wu fo wu bənɨ bə bitsa lə wa bu wəmiə tsa ya bɨŋ.
Jisɔs wəmiəsɨ bənɨ bə gwɨ́ lə kɨyɛŋ
14 Jisɔs dza ba gəŋ be Pita tsɔŋ, yu ŋəŋ mə kpansɨ Pita me yu gwente bə fiəfɨ. 15 Jisɔs bukɔ kɨbandə kɨhɨ wɨ, fiəfɨ ya bu ka nə yu wɨ, yu bu dza wə ba nɔŋ fiɔŋ Jisɔs diə.
16 Lə kɨ ji butsu bwa fudiɔ, bənɨ kɨ ba bə bənɨ kɨyɛŋ bə bətsə nə̀ finchə bə bɔ. Jisɔs kɨ foshɛ bin'yɨntɨ bia ɨji bə diɛ kwa. Yu kɨ wəmiəsɨ tɨ bənɨ bəchi bə nə̀ gwente. 17 Fiŋfi nə̀ tɨchə bə mfə lə fi ba fɔ diəŋ nɨ Adzaya miɨ wu shɔŋ yi Nyɔ nə̀ chanyɛ lə, “Yu' dze dzéŋ yaha ba tɔ gwɨ́ yaha.”
Bəŋgə bə miɨ wu na biəlɨ Jisɔs lə
18 Lə Jisɔs ŋəŋ kuta wu bənɨ' tɛshɛ fə yu ku, yu tə bə beŋ buhu bə nɨŋ'ə lə, “Kə llə̂ ŋgɔŋ məmbəŋ ba gəŋ naha nəwuŋ.” 19 Miɨ wudɔ wu nə̀ tɨfiə bilaŋ bi Nyɔ lə kɨnɨ fə Jisɔs ku ba tə lə, “Miɨ wu Bitɨfiə, njiwa ŋkɨ mbiəlɨ wə ma məŋ wu wə na gɨntɨ.” 20 Jisɔs chi bə yu lə, “Biŋfundɔ na keŋkɛ lɨ bikpɔ bibilə, munyinyi mu dimbi bɔ́ keŋkɛ tsú yimulə, bəmanɨ Wɛŋ wu Miɨ na keŋkɛhɛ tɨmo dɨ wu kɨnsə fo wuhu.” 21 Wɛŋ wudɔ nə beŋ buhu bə nɨŋ'ə ntɨŋ tə bə yu lə, “Baba, shə̂ mɨ, ŋgəŋ ndi taa tsɔnyɔ ntə ŋkɨ mbiəlɨ.” 22 Bəmanɨ Jisɔs chi bə yu lə, “Kɨ biəlɨ mɨ, shə̂ bənɨ bəŋkkpə bɔ kɨ diyi bənɨ bəbɔlə bəŋkkpə.”
Jisɔs wɛŋ kɨkumɔ
23 Lə Jisɔs gəŋ ba be kɨkpɔŋkɔ ntɨŋ, beŋ buhu bə nɨŋ'ə biə yu sɔ. 24 Fi fɔ lə kɨkumɔ kɨdɔ kɨbəŋ nə̀ dza ba fɔ ŋgɔŋ ma bɨŋ kɨ nɨkə ŋgɔŋ mɔ bɨndɨ, mɔ noŋko lə mɔ yi kɨkpɔŋkɔ ntɨŋ. Nə̀ ji Jisɔs me kɨnɨ fihi. 25 Beŋ buhu bə nɨŋ'ə gəŋ kɨ dzakɔ yu bɔ tɨdi lə, “Baba, chîtə, kə kkpɨ ba.” 26 Jisɔs dzakɔ ba tə bə bɔ lə, “Ɔɔɔ bənɨ bə kɨmbɨŋ kɨntse lə. Nyiŋ na kwete bəŋ bə la?” Nɨ yu tədiə manɨ, yu bu dza wə ba wɛŋ kɨkumɔ ka ma ŋgɔŋ məmbəŋ ma, mɔ də, bidɨ də mɛ nshiiŋ. 27 Kɨgəsə wɨŋ bənɨ ba kɨtso. Bɔ tə lə, “No na ŋgwe yi miɨ yɨla wu ma kɨkumɔ bə ŋgɔŋ na woko bə yu?”
Jisɔs foso bətsə nə bənɨ bəfɛ wɨ
28 Jisɔs llə ba fɔ nəwuŋ kɨtuŋ kɨ Gadalaª ntɨŋ. Bənɨ bəfɛ tɨchə yu ɨji bətsə ji bɔ wɨ. Bənɨ bɛŋ nə̀ fɔ nə bəŋgbɔ bə bə́ nə̀ diyi bənɨ ntɨŋ, bɔ nə̀ ba bɔ kɨ luŋki kɨtso chi naji ɨ miɨ chɛ dzə ya ntɨŋ kə. 29 Bɔ bu dza kɨ wɛnti bə diɛ bɔ́, bɔ bi lə, “Wɛŋ wu Nyɔ, wə na se la nə bɨ lɨ? Wə ba mɛ lə wə nya bɨ ŋgə tsa yisu bambi?” 30 Nə̀ ji kɨkɨŋ kɨ bifi bidɔ lə diɨ dia wa wɨ kɨyɛŋ. 31 Bətsə ba nende Jisɔs lə, “Butɨɨ, wə foso bɨ, wə faŋ bɨ ji bifi bia wɨ.” 32 Jisɔs tə bə bɔ lə, “Bə gə̂ŋ.” Bətsə ba fɔ ba gəŋ be bifi bia ntɨŋ. Kɨkɨŋ kɨ bifi bia lə kɨchi bu wodiə ba shi chɛŋ wɨ, shi ŋgɔŋ məmbəŋ ma ntɨŋ ba kkpəyɛ sɔ. 33 Bənɨ bə nə̀ kɨki bifi bia lətə ba kwə binchi ba gəŋ tə biɔŋ bichi bi sə tɨchə bə bənɨ bə bətsə nə̀ ji ba bɔ wɨ. 34 Kɨtuŋ ka kɨchi bu fɔ lə bɔ ba ŋəŋ Jisɔs. Lə bɔ ba ba ŋəŋ yu wɨ, bɔ nende lə yu dza nə sha yibɔ ntɨŋ.