Jisɔs wəmiəsɨ miɨ wu nə̀ kkpə dia mo
9
Jisɔs be kɨkpɔŋkɔ ntɨŋ ba llə tsu kɨtuŋ kɨhɨ ntɨŋ. 2 Bənɨ bədɔ bu ba bə miɨ wudɔ fə yu ku ɨji yu' kkpə dia mo, bɔ' tɔ yu kɨta ntɨŋ. Jisɔs ŋəŋ nɨ bənɨ ba galə shəŋ yu wɨ, yu tə bə miɨ wu nə̀ kkpə wa dia mo lə, “Mbwə, kânsɨ shəŋ. Mɨ' ŋgufiɛ məmbiə mɔhɔ.” 3 Bənɨ bədɔ bə nə̀ tɨfiə bilaŋ bi Nyɔ lə gbɔ kɨ nuŋɔ bɔbɔ, bɔ tɨdi lə, “Miɨ no na fɨkə gwɨ yihi bə Nyɔ.” 4 Jisɔs kkə fiɔŋ fi bɔ na gɔmbiɛ ba bi bə bɔ lə, “Bə na keŋkɛ biŋgɔmbiɛ bibiə shəŋ yɛnɨ ntɨŋ mɛ ndzɨ la? 5 Fiɔŋ fi ŋkəmə bə ntə na fi la? Bə ntə bə miɨ no lə, ‘Mɨ' ŋgufiɛ məmbiə mɔhɔ,’ maa lə, ‘Dzâ wə, wə kɨ gəndə lə?’ 6 Bəmanɨ, njiwa mfə ɨ bə kkə lə Wɛŋ wu Miɨ na keŋkɛ buŋga sɛŋ koso bu gufiɛ məmbiə.” Lə yu tədiə manɨ, yu tə tə bə miɨ wu nə̀ kkpə wa dia mo lə, “Dzâ wə, dze kɨta kɔhɔ wə kɨ kwəlɨ.” 7 Miɨ wa bu dza wə kɨ kwəlɨ. 8 Lə kɨntsu kɨ bənɨ lə ŋəŋ fiɔŋ fi tɨchə, nyiŋ kwe bɔ, bɔ kɨ nya kɨŋkuntə bə Nyɔ wu nya wa ŋgwe yi buŋ buŋga bə miɨbəwəŋ.Jisɔs bəndɨ Matiɔ
9 Lə Jisɔs dza nə mɨ kɨ gɨntɨ, yu ŋəŋ miɨ wudɔ bə́ tsɨsə lə Matiɔ, ɨji miɨ wu nə̀ kwete kɨŋwatɨ, miɨ wa' jiŋ dɨ wuhu wu nɨŋ'ə bɨŋ. Jisɔs tə bə yu lə, “Kɨ biəlɨ mɨ.” Miɨ wa bu dza wə kɨ biəlɨ yu.
10 Lə Jisɔs gəŋ ba jiŋ kɨ diɨ Matiɔ tsɔŋ, bənɨ bədɔ kɨyɛŋ bə nə̀ kwete kɨŋwatɨ bə bənɨ bəbiə bədɔ tɨ bu tɛshɛ mɨ ba jiŋ kɨ diɨ bə Jisɔs bɔ bə beŋ buhu bə nɨŋ'ə. 11 Lə Bəfalasi ŋəŋ nɨ yu na diɨ bə bɔ manɨ, bɔ bi bə beŋ buhu bə nɨŋ'ə lə, “Miɨ wɛnɨ wu Bitɨfiɛ na diɨ bə bənɨ bə kwete kɨŋwatɨ ma bənɨ bəbiə bədɔ ndzɨ la?” 12 Lə Jisɔs wɔ nɨ bɔ biɛ manɨ, yu tə bə bɔ lə, “Bəntɛgwɨ noŋkɔhɔ dɔta. Ə ba kɨ noŋko ji bənɨ bə gwente. 13 Bə gə̂ŋ gɔmbiɛ bə ŋəŋ lə, fa kɨnyi kɨ fiɔŋ fi na ji fiŋ bubɔndɔ Nyɔ chanyɛ lə, ‘Nna nse ji lə bənɨ kɨ kwesɛ yaa bə bənɨ, nna nsɛhɛ lə bɔ kɨ fɨtɨ bintɔfiɛ mɨ lɨ,’ lə manɨ na lə la lə? Bə kɨ kkɨ lə ŋkə mbaha lə mbəndɨ bənɨ bə diəŋ. Mɨ mba lə mbəndɨ ji bəbiə.”
Bənɨ bi tsukɔ nchinə yi bidiəŋ wɨ
14 Beŋ bə nɨŋ'ə bə Jɔŋ Nchɛsebiɔ lə dza ba bi bə Jisɔs lə, “Bɨ bə Bəfalasi na ba kə kɨ chinə bidiəŋ, beŋ bɔhɔ bə nɨŋ'ə jikə kɨ chinə ndzɨ la?” 15 Jisɔs chi bə bɔ lə, “Bə na se lə naji ɨ bə́ bəndɨ bənɨ kɨgbeyɛ kɨ bibinə lə ntɨŋ, ɨ bɔ gəŋ kɨ ji yaa yaa ɨji nomə kpansɨ wufa ji bə bɔ? Bəmanɨ, butsu ba bwa bu bə́ ná ləkə nomə kpansɨ wufa wa nə bɔ lɨ, ɨ bɔ tə gbɔ kɨ chinə bidiəŋ. 16 Naji ɨ miɨ dze kə nshɛŋkiɛ yi kɨndzu kɨfa ba kɔ kɨndzu kɨko wɨ. Ɨ yu fə manɨ, ɨ nshɛŋkiɛ yi kɨndzu kɨfa ka fə ɨ kɨndzu kɨko ka kanə shakiɛ, ɨ kɨkpɔ kɨ' ji ka su kanə ŋgbɔŋkɔ ya nɨ kɨ sə sa kɨ ji. 17 Naji tɨ ɨ miɨ dze kə mbiŋ məŋfa ba ga kɨŋgəª kɨ sə ka gwɨ ntɨŋ kə. Ɨ yu fə manɨ, ɨ mbiŋ məŋfa ma kwe, ɨ kɨŋgə ka kkpəyə ba saŋfiə lɨ, ɨ mbiŋ ma shishɛ. Fi diəŋ na lə, bə́ naji lə bə́ ga mbiŋ məŋfa ji kɨŋgə kɨ kə kaha gwɨ ntɨŋ. Bəma, ɨ mbiŋ bə kɨŋgə kɨ ji.”
Kpansɨ wudɔ bukɔ Jisɔs wɨ ba wəmiə lɨ Jisɔs dzakɔ wɛŋ wu miɨ wubəŋ nə kkpə lɨ
18 Nɨ Jisɔs nə̀ bambi yu chanyɛ bə bɔ manɨ, miɨ wubəŋ wudɔ be ba tuŋ nu yu nəfiə ba nende yu lə, “Wɛnɛ wu kansɨ' kkpə fɛŋ fɛŋ, bəmanɨ ba bukɔ yu wɨ bə kɨbandə kɔhɔ fə yu tsɔ wuwəŋ.” 19 Jisɔs dza wə bɔ bə yu kɨ gɨntɨ, beŋ buhu bə nɨŋ'ə biəlɨ yu.
20 Kpansɨ wudɔ wu nə̀ gwente bikpaŋ biya yɔɔ ntse bifɛ bu ba Jisɔs nəjiŋ, yu bukɔ bifuŋ bi kɨndzu kɨ Jisɔs lə. 21 Yu nə̀ bukɔ manɨ, ɨji yu nə̀ tə yu shəŋ lə, “Naji mbukɔ kwa ji kɨndzu kɨhɨ wɨ, tə mɨ ŋ'wəmiə.” 22 Lə yu bukɔ manɨ, Jisɔs fichə gwɨ ba ŋəŋ yu wɨ, tə bə yu lə, “Nɛ, wə kə̂ lekɛhɛ. Shəŋ yi wə galə mɨ wɨ' fə wə wəmiə.” Mɨ kɨsɨkɨ, kpansɨ wa bu wəmiə.
23 Lə Jisɔs gəŋ fɔ miɨ wubəŋ wa ku, yu ŋəŋ bənɨ bə nə̀ ba bɔ kɨ tinti minshiŋ mi kkpə lə ma bə kɨntsu kɨ bənɨ lə mɨ, bɔ fuku gwɨ bə məndəŋ. 24 Jisɔs tə bə bɔ lə, “Bə sâŋfiə, wɛŋ wa kə kkpəhə, yu na me lɨ.” Bənɨ ba kɨ sɨŋfɨ yu busəŋfə. 25 Lə bə́ foso bənɨ ba binchi, yu be sɔ tsɔŋ ba chiŋfi wɛŋ wa kɨbandə wɨ, yu bu dza wə. 26 Shɔŋ yi fiɔŋ fia tsaŋ ba gəŋ sha ya ntɨŋ chi.
Jisɔs gu yəsɨ yi bənyimə bəfɛ lə
27 Lə Jisɔs dza nə ku wa ntɨŋ kɨ gɨntɨ, bənyimə bədɔ bəfɛ bə nɨnsə kɨ biəlɨ yu, bɔ wunəə, bɔ tɨdi lə, “Wɛŋ wu Ŋkuŋ Dɛbi, kwêse yaa bə bɨ.” 28 Lə Jisɔs gəŋ be tsɔŋ, bənyimə ba biə yu tɨ, yu bi bə bɔ lə, “Bə' bɨŋ lə naji mfə fiɔŋ fi bə na dɨ fiŋ?” Bɔ bɨŋ lə, “Ɨŋŋ Baba.” 29 Jisɔs tə bukɔ yəsɨ yibɔlə ba tə lə, “Fi kɨ ji manɨ bə bəŋ, ndzɨ shəŋ yi bə galə mɨ wɨ.” 30 Yəsɨ yibɔlə bu gulɔ. Jisɔs loso bɔ lə, “Bə dzê tsa, bə kə̂ mɔŋkɔ lə bə fə miɨ wudɔ kkə nu.” 31 Bəmanɨ, bɔ tsuba gəŋ kɨ tsaŋkɨ shɔŋ tsukɔ nɨŋ yi Jisɔs wɨ kɨtuŋ ka ntɨŋ kɨchi.
Jisɔs wəmiəsɨ miɨ wu nə̀ jikə chanyə
32 Nɨ bənɨ ba nə̀ dza kɨ gɨntɨ, bənɨ bədɔ bu ba bə miɨ wudɔ fə Jisɔs ku ɨji miɨ wa jikə chanyə, tsə ji yu wɨ. 33 Jisɔs foso tsə wa nə miɨ wa wɨ, miɨ wa bu gbɔ kɨ chanyɛ. Kuta wu bənɨ ŋəŋ manɨ ba yasə kɨdze lə, “Bə́ kə saa wɔ makə ŋəŋ fiɔŋ nɨ fiŋ kɨtuŋ kɨ Isla ntɨŋ.” 34 Bəmanɨ, Bəfalasi tə yibɔ ji lə, “Yu na foshɛ bətsə bɛŋ mɛ ɨji bə buŋga bu ŋkuŋ wu bətsə lə.”
Bidiəŋ yɛŋ kɨtso, bənɨ bə banchɛ ji tsəsɨ
35 Jisɔs dza kɨ gəndə bituŋ bintse bə bibəŋ ntɨŋ bichi yu tɨfiə bənɨ tsɔ́ŋ yibɔlə yi kɨntsɨsɨ lə ntɨŋ, yu tɨfiə tɨ shɔŋ yi ndzeŋe tsukɔ buŋkuŋ bu bɔ́ wɨ. Yu nə̀ gəndəə manɨ yu wəmiəsɨ gwɨ́ chi bə dzéŋ chi. 36 Lə yu ba ŋəŋ bintsu bi bənɨ lə, yaa kwe yu bə bɔ ndzɨ bɔ nə̀ ji funyi ntɨŋ, miɨ wu chitə bɔ sɨŋ, nɨ shíŋ yi na sɨŋ bə ntɨŋkɨ wu yi. 37 Yu tə bə beŋ buhu bə nɨŋ'ə lə, “Bidiəŋ yɛŋ kɨtso, bəmanɨ bənɨ bə banchɛ ji tsəsɨ. 38 Bəma, bə kɨ tsɨsə lə Baba wu na ji Chɛ kə faŋ bənɨ bə banchɛ kə wuhu ntɨŋ.”