Jisɔs bəndɨ beŋ buhu bə nɨŋ'ə bə fiəfiə
5
Butsu budɔ nə̀ ji Jisɔs lɨmi fə kɨfɨsə kɨ Jɛnɛsalɛt ku, ɨji bənɨ fiəlɨ yu ba yiŋkə kɨ woko diɛ yi Nyɔ. 2 Yu ŋəŋ bikpɔŋkɔ bifɛ ŋgɔŋ nəkpo, bənɨ bə nə̀ keŋkɛɛ ba bi nə̀ fɔdiɛ nə nɔ kɨ wwo gɨ yibɔlə yi bíɔsu lə. 3 Yu gəŋ ba be kɨdɔ ntɨŋ, əji kɨ Semon lə ba tə lə Semon me kɨ be ba gəŋ ŋgɔŋ ntɨŋ tsəsɨ. Semon me, Jisɔs jiŋ sɔ kɨ tɨfiə bənɨ sɛŋ fəkpa.4 Lə yu tɨfiə ba kanə lɨ, yu tə bə Semon lə, “Tsâ kɨkpɔŋkɔ wə gəŋ di bɨŋ, bə lî gɨ yɛnɨ ba kwe bíɔsu.”
5 Semon chi lə, “Miɨ wubəŋ, kə sə me wə bu wɔ kə liyi gɨ, kə jikə kwekɛhɛ fiɔŋ. Bəmanɨ, dzefə na wə wu tədiə, njiwa nli.” 6 Bɔ gəŋ li ba kwe bíɔsu kɨyɛŋ. Lə bɔ kɨ kpa, gɨ yibɔlə kɨ tɨ lə yi kəmbiə. 7 Bəma, bɔ kpashi nsáŋ yibɔlə nə kɨkpɔŋkɔ kɨdɔ ka ntɨŋ lə yi ba chitə bɔ. Bɔ ba ba se bíɔsu ya, yi yi bikpɔŋkɔ bibɔlə ntɨŋ, bi kɨ tɨ lə bi midi ŋgɔŋ ntɨŋ. 8 Lə Semon Pita ŋəŋ fiɔŋ fi tɨchə wɨ, yu bu gəŋ ba tuŋ nu Jisɔs nəfiə ba tə lə, “Butɨɨ Baba, dzâ fiɔhɔ nə mɛni shə mɨ, nna nji miɨ wubiə.”
9 Yu nə̀ chanyɛ manɨ ndzɨ bɔ bə nsáŋ yihi nə̀ ŋəŋ bíɔsu yi bɔ nə̀ kwɛɛ, gwɨ dadiɛ bɔ. 10 Gwɨ dadiɛ tɨ Jɛm bɔ bə Jɔŋ beŋ bə Dzɛbɛdi lə bə nə̀ ji kɨntsu kɨ Semon lə ntɨŋ. Jisɔs tə bə Semon lə, “Wə kə̂ lekɛhɛ. Dze nə fɛŋ bɨŋ gəŋ fiə, wə jiwa ɨ wə kɨ kwete ji bənɨ.”
11 Nɨ bɔ wɔɔ manɨ, bɔ tə foso bikpɔŋkɔ bibɔlə fəkpa ba shə biɔŋ bichi kɨ biəlɨ Jisɔs.
Jisɔs wəmiəsɨ miɨ wu kɨnsansa
12 Lə kɨ ji tsa yidɔ wɨ, Jisɔs ji kɨtuŋ kɨdɔ ntɨŋ, miɨ wudɔ ji sɔ ɨji kɨnsansa' diə yu gwɨ chi. Lə Miɨ wa ŋəŋ Jisɔs wɨ, yu gbɔ yu nəfiə ba nende yu lə, “Baba, naji ɨ wə wəmiəsɨ mɨ ŋkɨ nji ntsaaŋ, jilə wə na se lɨ.”
13 Jisɔs nambɔ kɨbandə ba bukɔ yu wɨ ba tə lə, “Nna nse lɨ, wə̂miə la wə tsalə.” Mɨ kɨsɨkɨ, kɨnsansa ka bu fɔ nə yu wɨ. 14 Jisɔs loso yu lə, “Dzê tsa, wə kə̂ tədiə bə miɨ. Bəmanɨ, gə̂ŋ donchɛ gwɨ yɔhɔ bə chɛ bintɔfiɛ, wə nyâ kɨnya kɨ Mose nə̀ tədiə lə miɨ naji lə yu nyâ bə ndonchɛ bənɨ lə yu' wəmiə nə gwɨ nyi wɨ ba kɨ ji ntsaaŋ.”
15 Nɨ Jisɔs losɔ miɨ wa manɨ, shɔŋ yi Jisɔs tsu ba tsaŋ ya lɨ, kuta wu bənɨ kɨ ba yu tɛshɛ yu woko bitɨfiɛ bihi, fə yu kɨ wəmiəsɨ gwɨ́ yibɔlə. 16 Bəmanɨ, Jisɔs gəŋ yu shə bɔ ba gəŋ kɨ tsɨsə kpa.
Jisɔs wəmiəsɨ miɨ wu nə̀ kkpə dia mo
17 Lə kɨ ji butsu budɔ Jisɔs tɨfiəə bənɨ, ɨji buŋga bu Baba lə ji yu wɨ bu wəmiəsɨ bənɨ bə gwɨ́ lə. Bəfalasi bə bənɨ bə nə̀ tɨfiə bilaŋ bi Nyɔ lə' jiŋ mɨ, bɔ nə̀ fɔdiɛ nə bituŋ bichi bi Galili ntɨŋ bə bituŋ bi Judɛya bə bi Jɛlosalɛm. 18 Fi fɔ lə bənɨ bədɔ nə̀ ba ɨji bɔ' tɔ miɨ wudɔ kɨta ntɨŋ, ɨji yu' kkpə dia mo. Bɔ diɔ lə bɔ be sɔ tsɔŋ ba memɛ miɨ wa Jisɔs nəfiə. 19 Bəmanɨ, bɔ jikə keŋkɛ dzə, ndzɨ bənɨ nə̀ yiŋkə kɨtso. Bɔ bu bəndɨ ji fuŋ ba gu gba, shisəsɨ miɨ wa bənɨ ntɨŋ Jisɔs nəfiə kɨta ka ntɨŋ. 20 Nɨ Jisɔs nə̀ ŋəŋə lə bənɨ ba nə̀ ga shəŋ yibɔlə yu wɨ, yu tə bə miɨ wa lə, “Mbwə, mɨ' ŋgufiɛ məmbiə mɔhɔ.”
21 Bəfalasi bə bənɨ bə nə̀ tɨfiə bilaŋ bi Nyɔ lə gbɔ kɨ nuŋɔ bɔ tɨdi lə, “No tə na yəŋ wu dzɛɛ dɨ wu Nyɔ lə? Na yəŋ su wu naji ɨ yu gufiɛ məmbiə yasə Nyɔ kwa?”
22 Jisɔs kkə fiɔŋ fi bɔ na nuŋɔ ba bi bə bɔ lə, “Bə na keŋkɛ ŋgwe yi biŋ biŋgɔmbiɛ shəŋ yɛnɨ ntɨŋ mɛ ndzɨ la? 23 Fi ŋkəmə na fi la, bə ntə lə mɨ' ŋgufiɛ məmbiə mə miɨ no lə, maa lə yu dza wə ba kɨ gəndə lə? 24 Bəmanɨ, njiwa ndonchɛ bəŋ fɛŋ lə Wɛŋ wu Miɨ na keŋkɛ buŋga sɛŋ koso bu gufiɛ məmbiə.” Yu tə bə miɨ wu nə̀ kkpə wa dia mo lə, “Na chanyɛ mɨ bə wə, dzâ wə, dzê kɨta kɔhɔ kɨ kwəlɨ.”
25 Mɨ kɨsɨkɨ, miɨ wa bu dza wə ba ləŋ bənɨ nəfiə, tə dze kɨta kɨ yu nə̀ mɛɛ ka bɨŋ mɨ ba kɨ kwəlɨ, yu nyaa Nyɔ kɨŋkuntə. 26 Bənɨ ŋəŋ manɨ, kɨgəsə wɨŋ bɔ, bɔ gbɔ kɨ kuntə Nyɔ, bɔ tɨdi lə, “Kə ŋəŋ biɔŋ bi kə nə̀ tsɨ kə ŋəŋkəhə ndɛŋ.”
Jisɔs bəndɨ Lɛbi
27 Jisɔs dza ba fɔ nə nɔ kɨ gəndə. Lə yu kɨ gɨntɨ, yu ŋəŋ miɨ wudɔ wu nə̀ kwete kɨŋwatɨ, bə́ tsɨsə yu lə Lɛbi, yu' jiŋ dɨ wuhu wu nɨŋ'ə bɨŋ. Jisɔs tə bə yu lə, “Kɨ bîəlɨ mɨ.” 28 Lɛbi shə biɔŋ bichi ba dza wə, kɨ biəlɨ Jisɔs.
29 Bəma, Lɛbi fə kɨgbeyɛ kɨbəŋ yu tsɔŋ lə yu ləkə Jisɔs. Bənɨ bə nə̀ kwete kɨŋwatɨ yi mɨ bə bənɨ bədɔ bə bɔ bə bɔ nə̀ diɨ. 30 Bəfalasi bə bənɨ bəbɔlə bə kɨntsu lə bə nə̀ tɨfiə bilaŋ bi Nyɔ lə gbɔ kɨ nuŋɔ, bɔ bi bə beŋ bə nɨŋ'ə bə Jisɔs lə lə, “Bə na diɨ, bə mu bə bənɨ bə na kwete kɨŋwatɨ ma bənɨ bədɔ bəbiə ndzɨ la?”
31 Jisɔs chi bə bɔ lə, “Bəntɛgwɨ noŋkɔhɔ dɔta. Ə ba kɨ noŋko ji bənɨ bə na gwente. 32 Ŋkə mbaha lə mbəndɨ bənɨ bə na ji diəŋ. Mɨ mba lə mbəndɨ ji bənɨ bəbiə lə bɔ fichə shəŋ yibɔlə.”
Bə́ bi bə Jisɔs tsukɔ nchinə yi bidiəŋ wɨ
33 Bɔ tə bə Jisɔs lə, “Beŋ bə Jɔŋ'ə bə nɨŋ'ə ba bɔ kɨ chinə gwɨ́ yibɔlə bidiəŋ bɔ tsɨsə sususu, ɨji tɨ nɨ Bəfalasi ba bɔ kɨ fɨtɨ, bəmanɨ bɔhɔ ba ji kwa fibɔlə bɔ diɨ bɔ mu.”
34 Jisɔs li diɛ bə bɔ lə, “Naji ɨ bə́ bəndɨ bənɨ kɨgbeyɛ kɨ bibinə lə ntɨŋ, bɔ gəŋ'ɨ, ɨ miɨ tsu ba fə lə bɔ chinə bidiəŋ ɨji nomə kpansɨ wufa ji bə bɔ? 35 Bəmanɨ, tsa ná ba yi bə́ ná fasə nomə kpansɨ wufa wa nə bɔ lɨ, ɨ bɔ tə gbɔ kɨ chinə bidiəŋ.”
36 Yu tə ma ŋgaŋ wudɔ bə bɔ lə, “Miɨ na sɨŋ wu naji ɨ yu tandɨ kɨndzu kɨfa ba kɔ kɨko wɨ. Ɨ yu fə manɨ, kɨjilə yu' bɨsɨ kɨndzu kɨfa ka. Naji ɨ kɨdiadia kɨ findzukiɛ fia lə gəŋ diəŋ bə kɨndzu kɨko ka kə. 37 Naji tɨ ɨ miɨ dze kə mbiŋ məŋfa, ba ga kɨŋgə kɨ sə ka gwɨ ntɨŋ kə. Ɨ yu fə manɨ, ɨ mbiŋ məŋfa ma kwe ba kpɨshə kɨŋgə kɨ' ka ka gwɨ, ɨ mbiŋ bə kɨŋgə la kɨlɔlɔ. 38 Fiɔŋ fi diəŋ na lə, bə́ naji lə bə́ ga mbiŋ məŋfa kwa ji kɨŋgə kɨ na bambi bə gwɨntɨŋ. 39 Bə na kkɨ tɨ lə miɨ na sɨŋ su wu naji ɨ yu mu mbiŋ mə' kwɛɛ ba kɨ bambi yu se mə kə kwekɛhɛ. Yu ba yu kɨ sɛnti ji mə' kwɛɛ ma kwa.”