Satan mɔŋ Jisɔs
4
Kɨn'yɨntɨ kɨ Ntsaaŋ dze Jisɔs ba gəŋ bə yu kpa lə Satan mɔŋ yu. 2 Yu gəŋ kɨ ji sɔ, ndiə sɨŋ fiɔŋ díɔ ntɨŋ mbaania bbushə bə bbutsu. Nəjiŋ wusu dzɔŋ kɨ wo yu. 3 Yu wu ba wa yu kɨ moŋko bənɨ ba ba tə bə Jisɔs lə, “Jilə wə na ji Wɛŋ wu Nyɔ, wə tə tá yiŋ tsu bəblɛ.” 4 Jisɔs chi lə, “Fi na ji bubɔndɔ lə, ‘Miɨ jimiɛhɛ kwa ndzɨ bidiəŋ.
Miɨ na ji tɨ ndzɨ diɛ chi yi foto nə Nyɔ dze.’”
5 Bəma Satan dze yu ba gəŋ bə yu kɨtuŋ kɨ ntsaaŋ ntɨŋ ba tɨŋ yu fuŋ wu tsɔŋ yi bintɔfiɛ lə bɨŋ fəchɛ 6 ba tə bə yu lə, “Jilə wə na ji Wɛŋ wu Nyɔ, wə tə sa koso, ndzɨ fi na ji bubɔndɔ lə,
‘Nyɔ jiwa yu tə ɨ bənchinda buhu kɨɨ wə.’
Fi ji tɨ bubɔndɔ lə,
‘Bɔ jiba bɔ ba wə lə wə kə̂ tsukɔ
gbo ta wɨ.’”
7 Jisɔs chi bə yu lə “Fi na ji bubɔndɔ tɨ lə,
‘Wə kə kɨ moŋko Baba Nyɔ wɔhɔ.’”
8 Satan chi dzɛɛ Jisɔs nə mɨ ba gəŋ bə yu fo wu dzo yidɔ lə bɨŋ yi dəŋfɨ bɔ́ kɨtso ba donchɛ yu bituŋ bi mbi lə bichi bə bubəŋ bu ji bi ntɨŋ. 9 Lə yu donchɛ manɨ, yu tə lə, “Njiwa nnya wə biɔŋ biŋ bichi, jilə wə' tsumbɔ mɨ nəfiə ba kuntə mɨ.” 10 Jisɔs tə bə yu lə, “Dzâ nə mɛ Satan! Fi na ji bubɔndɔ lə,
‘Kɨ kuntə Baba Nyɔ wɔhɔ,
wə nɨntɨ kwa ji yu lɨ.’”
11 Bəma Satan tɔkaŋ nə Jisɔs wɨ ba dza lɨ. Bənchinda bə Nyɔ lə bu ba ba chitə yu.
Jisɔs gbɔ nɨŋ yihi Galili
12 Jisɔs wɔ lə bə́ sə kwe Jɔŋ Nchɛsebiɔ ba fasɨ yu tsɔŋ yi buŋfia ntɨŋ, yu dza ba fichə tsu jiŋ sha yi Galili ntɨŋ. 13 Yu gəŋ fɔ Nadzalɛt ba dza nə nɔ gəŋ kɨ me kɨtuŋ kɨ Kapanaum ntɨŋ. Kɨtuŋ kɨŋ ji gwɨgwɨ fə ŋgɔŋ məmbəŋ mə Galili ku, kɨ ji tɨ fə sha yi Dzɛbulun bə Naftali ku. 14 Fiŋfi nə̀ tɨchə mɛ bə mfə lə fi fɔ diəŋ nɨ Adzaya miɨ wu shɔŋ yi Nyɔ nə̀ chanyɛ lə,
15 “Sha yi Dzɛbulun bə yi Naftali
yi na ji gwɨgwɨ fə ŋgɔŋ məmbəŋ ku, Kɨnchɛŋ kɨ Jɔdan nəwuŋ,
sha yi Galili, dɨ wu bənɨ bə na jimiɛhɛ Bəju lə.
16 Bənɨ bə nə shɨ ji kɨjuwɔ ntɨŋ,
bɔ' ŋəŋ kɨŋgbooŋ kɨbəŋ wɨ.
Butsu' wɔ
bənɨ bɛŋ bɨŋ bə nə shɨ bɔ ji sha yi kɨjuwɔ kɨ kkpə lə ntɨŋ.”
17 Dze nə tsa ya wɨ, Jisɔs gbɔ kɨ tɨfiə bənɨ yu tɨdi lə, “Bə fîchə shəŋ yɛnɨ, ndzɨ buŋkuŋ bu bɔ́ bwa gwɨgwɨ.”
Jisɔs bəndɨ bənɨ bəna lə bɔ kɨ ji beŋ buhu bə nɨŋ'ə
18 Lə Jisɔs dza kɨ gəndə fə ŋgɔŋ məmbəŋ mə Galili ku, yu ŋəŋ bənɨ bədɔ wɨ bəfɛ, ɨji miɨ bə wəmɛni. Bənɨ bɛŋ nə̀ Semon wu bə́ nə̀ tsɨsə lə Pita, bə wəmɛni Andulu, bɔ liyi gbɨ ŋgɔŋ məmbəŋ ntɨŋ. Nɨŋ yibɔ nə̀ bíɔsu yi kwenɛ. 19 Jisɔs tə bə bɔ lə, “Bə kɨ biəlɨ mɨ, njiwa mfə ɨ bə kɨ kwete ji bənɨ.” 20 Mɨ kɨsɨkɨ, bɔ bu shə gɨ yibɔlə ba kɨ biəlɨ Jisɔs. 21 Lə Jisɔs dza nə mɨ ba gəŋ fiə, yu chi ŋəŋə bənɨ bədɔ wɨ bəfɛ, ɨji tɨ miɨ bə wəmɛni. Bənɨ bɛŋ nə̀ Jɛm bə wəmɛni Jɔŋ. Nə̀ beŋ bə Dzɛbɛdi lə, bɔ ji kɨkpɔŋkɔ ntɨŋ bə tɨɨ wubɔ Dzɛbɛdi, bɔ koto gɨ, yu bəndɨ tɨ bɔ. 22 Mɨ kɨsɨkɨ, bɔ bu shə kɨkpɔŋkɔ ma bə tɨɨ wubɔ ba biə Jisɔs.
Jisɔs kɨ tɨfiə, yu wəmiəsɨ bənɨ bə gwɨ́ lə
23 Jisɔs dza ba kɨ gəndə sha yi Galili ntɨŋ chi, yu tɨfiə bənɨ tsɔ́ŋ yibɔlə yi kɨntsɨsɨ lə ntɨŋ, yu tɨfiə shɔŋ yi ndzeŋe tsukɔ buŋkuŋ bu Nyɔ lə wɨ. Yu nə̀ wəmiəsɨ tɨ gwɨ́ chi ma dzéŋ chi nə bənɨ wɨ. 24 Bəma, shɔŋ yihi tsaŋ ba gəŋ sha yi Silia ntɨŋ chi. Bənɨ kɨ ba bə bənɨ bəchi fə yu ku bə nə̀ gwente ma bə nə̀ ji funyi ntɨŋ, fa na bə bətsə na finchə bə bɔ, makə bə na ji bə gwɨ yi kɨŋgbɔ, makə bə nə̀ kkpə dia mo. Bɔ nə̀ ba bə bɔ manɨ, yu wəmiəsɨ bɔ bəchi. 25 Ma məŋ wu yu nə̀ gɨntɨ nə̀ ji kuta wu bənɨ kunə kwa yu nəjiŋ. Bənɨ bɛŋ nə̀ foto nə sha yi Galili ntɨŋ, bədɔ foto nə Bituŋ bi Yɔɔ ntɨŋ, bədɔ nə Jɛlosalɛm bə nə bituŋ bidɔ bi nə̀ ji tɨ sha yi Judɛya ntɨŋ. Bədɔ foto nə Kɨnchɛŋ kɨ Jɔdan nəwuŋ.