Maku 1

Shɔŋ yi ndzeŋe tsukɔ Jisɔs wɨ nɨ

Maku

nə̀ bɔndɔ

Shɔŋ yi Jɔŋ Nchɛsebiɔ nə̀ tɨfiə

(Matiɔ 3:1-12; Luka 3:1-18; Jɔŋ 1:19-28)

Nyi na shɔŋ yi ndzeŋe tsukɔ Jisɔs Klistu Wɛŋ wu Nyɔ wɨ. 2 Shɔŋ nyi nə̀ bɛyɛ nɨ Adzaya miɨ wu shɔŋ yi Nyɔ nə̀ bɔndɔ, Nyɔ tɨdi lə,

“Wôkɔ wɔ, njiwa mfaŋ miɨ wɛmɨ wu shɔŋ ɨ yu sa wə fiə,

yu jiwa ɨ yu gəŋ lɨmə dzə yɔhɔ.

3 Diɛ yi miɨ wa wunə ya kpa lə, ‘Bə́ lɨ̂mə dzə yi Baba,

bə́ fə yi kɨ ji nyɨlɨlɨ.’”

4 Bəma, miɨ wudɔ wu bə́ nə̀ tsɨsə lə Jɔŋ Nchɛsebiɔ jiji ba lafu kpa, kɨ tɨfiə bənɨ lə bɔ fichə shəŋ yibɔlə, yu chɛse bɔ biɔ fə Nyɔ gufiɛ məmbiə məmbɔlə. 5 Bənɨ kɨ fɔdiɛ nə sha yi Judɛya ntɨŋ chi ma nə kɨtuŋ kɨ Jɛlosalɛm ntɨŋ kɨchi bɔ gɨntɨ fə Jɔŋ ku, bɔ tɨdi məmbiə məmbɔlə, yu chɛsɛ bɔ biɔ Kɨnchɛŋ kɨ Jɔdan ntɨŋ.

6 Jɔŋ nə̀ doŋko bindzu bi bə́ nə̀ fəə bə dí yi nyɛŋ yidɔ lə yi bə́ tsɨsə lə kamɛl, yu kansɨ kɨtsa chi kɨ bə́' fəə bə dzɨ yi nyɛŋ, yu diɨ ji tsɨmɨ bə nyuŋ yi kpa. 7 Yu nə̀ tɨfiə yu tɨdi lə, “Miɨ wudɔ ba wa mɨ nəjiŋ wu na ko yu yakɨ mɨ, ŋkə ŋkwətsə tɨmo wu naji ntsəkə koso ba se gbɨ wu kɨkpa kɨhɨ lə. 8 Nna nchɛsɛ bəŋ ji biɔ, bəmanɨ, yu ná kɨ chɛsɛ bəŋ ji Kɨn'yɨntɨ kɨ Ntsaaŋ ntɨŋ.”

Nɨ bə́ nə̀ chɛsɛ Jisɔs biɔ bə nɨ Satan nə̀ moŋko yu

(Matiɔ 3:13–4:11; Luka 3:21-22; 4:1-13)

9 Kwa díɔ ya ntɨŋ, Jisɔs dza nə Nadzalɛt dia wu sha yi Galili ntɨŋ ba ba lɨ, Jɔŋ chɛse yu biɔ Kɨnchɛŋ kɨ Jɔdan ntɨŋ. 10 Nɨ Jisɔs nə̀ foto nɔ nə biɔ mɛ, yu bu ŋəŋ bɔlu gulɔ, Kɨn'yɨntɨ kɨ Ntsaaŋ shi ba ba yu wɨ kɨ ji nɨ fiŋkukulu. 11 Diɛ chanyɛ nə bɔ́ lə, “Wə na ji wɛnɛ wu shəŋ, nna ŋ'woko buni bə wə kɨtso.”

12 Mɨ kɨsɨkɨ, Kɨn'yɨntɨ kɨ Ntsaaŋ bu fə Jisɔs gəŋ kɨ me kpa. 13 Yu nə̀ jiŋ sɔ díɔ mbaania, Satan moŋko yu. Yu nə̀ ji sɔ manɨ bə nyɛ́ŋ yi ji, bənchinda bə Nyɔ lə chitəə yu.

Jisɔs dɨ bənɨ bəna lə bɔ kɨ ji beŋ buhu bə nɨŋ'ə

(Matiɔ 4:12-22; Luka 4:14-15; 5:1-11)

14 Bə́ kwe Jɔŋ ba fasɨ tsɔŋ yi buŋfia ntɨŋ, nəjiŋ wusu, Jisɔs gəŋ Galili ba kɨ tɨfiə shɔŋ yi ndzeŋe yi Nyɔ sɔ. 15 Yu kɨ tɨfiə yu tɨdi lə, “Tsa' kwətsə, buŋkuŋ bu Nyɔ lə bwa gwɨgwɨ. Bə fîchə shəŋ yɛnɨ nə məmbiə wɨ, bə bɨ̂ŋ shɔŋ yi ndzeŋe nyi.”

16 Lə Jisɔs kɨ chɛti fə ŋgɔŋ məmbəŋ mə Galili ku, yu ŋəŋ Semon bə wəmɛni Andulu, bɔ liyi gbɨ ŋgɔŋ məmbəŋ ntɨŋ, nɨ nɨŋ yibɔ nə̀ ji bíɔsu yi kwenɛ. 17 Jisɔs tə bə bɔ lə, “Bə kɨ biəlɨ mɨ, njiwa mfə ɨ bə kɨ kwete ji bənɨ.” 18 Mɨ kɨsɨkɨ, bɔ bu shə gɨ yibɔlə ba kɨ biəlɨ yu. 19 Lə Jisɔs dza ba gəŋ fiə, yu ŋəŋ Jɛm bɔ bə wəmɛni Jɔŋ, beŋ bə Dzɛbɛdi lə, bɔ ji kɨkpɔŋkɔ ntɨŋ bɔ koto gɨ yibɔlə. 20 Jisɔs bu dɨ bɔ tɨ. Bɔ shə tɨɨ wubɔ kɨkpɔŋkɔ ntɨŋ bə bənɨ bə bɔ nə̀ dzɛɛ lə bɔ kɨ nɨntɨ bɔ lɨ, ba biə Jisɔs.

Jisɔs foso kɨn'yɨntɨ kɨbiə nə miɨ wɨ

(Luka 4:31-37)

21 Bɔ bə Jisɔs dza ba gəŋ kɨtuŋ kɨ Kapanaum ntɨŋ. Lə kɨ ji butsu bu fufiɛ, Jisɔs gəŋ tsɔŋ yi kɨntsɨsɨ ntɨŋ kɨ tɨfiə bənɨ sɔ. 22 Bənɨ kɨ woko kɨgəsə wɨntɨ bɔ bə bitɨfiə bihi, ndzɨ yu nə̀ tɨfiə nɨ miɨ wu na keŋkɛ buŋga bu tɨfiə. Yu nə̀ tɨfiəhə nɨ bənɨ bə na tɨfiə bilaŋ bi Nyɔ lə ba bɔ kɨ tɨfiə. 23 Mɨ kɨsɨkɨ, miɨ wudɔ lafu tsɔŋ yi bitɨfiə ya ntɨŋ, ɨji nə̀ miɨ wu kɨn'yɨntɨ kɨbiə nə̀ ji yu wɨ. 24 Lə yu be sɔ, yu wɛŋ lə, “Jisɔs wu Nadzalɛt, wə na se la nə bɨ lɨ? Wə ba lə wə jishi bɨ? Nna ŋkkɨ lɨ wə. Na wə wa wu Ntsaaŋ, wu' fɔɔ nə fə Nyɔ ku.” 25 Jisɔs wɛŋ bə kɨn'yɨntɨ kɨbiə ka ba tə lə, “Bâŋ! Fɔ̂ nə miɨ no wɨ!” 26 Kɨn'yɨntɨ ka fə yu gbɔ fəkoso kɨ dio, yu wunə kɨtso, kɨ fɔ nə yu wɨ. 27 Lə bənɨ ŋəŋ manɨ, kɨgəsə wɨŋ bɔ, bɔ kɨ masə bɔbɔ, bɔ bishɛ lə, “Fiŋ na la? Na bitɨfiə bifa, miɨ no na keŋkɛ buŋga bu kɔŋɔ ma bin'yɨntɨ bibiə, bi woko bə yu.” 28 Mɨmɨ, shɔŋ yi Jisɔs tsaŋ ba gəŋ sha yi Galili ntɨŋ chi.

Jisɔs wəmiəsɨ bənɨ bə gwɨ́ lə kɨyɛŋ

(Matiɔ 8:14-17; Luka 4:38-41)

29 Mɨ kɨsɨkɨ, Jisɔs fɔ bɔ bə Jɛm bə Jɔŋ nə tsɔŋ yi kɨntsɨsɨ ya ntɨŋ ba gəŋ Semon bə Andulu tsɔŋ. 30 Nə̀ ji mə kpansɨ Semon ji ta bə gwɨ. Lə Jisɔs be sɔ tsɔŋ, bɔ tə yu kɨ kpansɨ wa lə. 31 Jisɔs gəŋ dɨ wu yu nə̀ me wa, chiŋfi yu kɨbandə wɨ ba dzasɨ yu wə. Gwɨ ya bu ka nə yu wɨ, yu dza wə ba nɔŋ fiɔŋ bɔ diə.

32 Lə kɨ ji butsu bwa fudiɔ, ɨji diɔ sə midi, bə́ kɨ ba bə bənɨ bəchi bə nə̀ gwente fə Jisɔs ku ma bənɨ bə bətsə nə̀ finchə bə bɔ. 33 Kɨtuŋ ka kɨchi tɛshɛ mɨ fiəŋ. 34 Yu wəmiəsɨ bənɨ kɨyɛŋ bə nə̀ ji bə gwɨ́ chichi chichi, yu foshɛ tɨ bətsə kɨyɛŋ nə bənɨ bədɔ wɨ. Yu nə̀ foshɛ yu jikə bɨmiə lə bətsə ba kɨ chanyɛ, ndzɨ bɔ nə̀ kkɨ miɨ wu yu nə̀ ji yu lɨ.

Jisɔs tə diɛ yi Nyɔ Galili ntɨŋ chi

(Luka 4:42-44)

35 Lə kɨ ji futə ntɨŋ, Jisɔs fɔ ba gəŋ dɨ wudɔ wɨ yu wumbɔŋ kɨ tsɨsə. 36 Semon bə bənɨ bə bɔ bə bɔ nə̀ ji, shə ba fɔ gəŋ kɨ noŋko yu. 37 Lə bɔ ŋəŋ yu wɨ bɔ tə bə yu lə, “Bənɨ bəchi' shə kɨ noŋko wə.” 38 Jisɔs chi yihi bə bɔ lə, “Kə dzâ kə gəŋ bituŋ bidɔ ntɨŋ fə ntɨfiə tɨ diɛ yi Nyɔ sɔ. Na fiɔŋ fi mɨ mba ndzɨ fi.” 39 Yu kɨ gəndə sha yi Galili ntɨŋ chi, yu tɨfiəə diɛ yi Nyɔ tsɔ́ŋ yibɔlə yi kɨntsɨsɨ lə ntɨŋ, yu foshɛɛ bətsə nə bənɨ wɨ.

Jisɔs wəmiəsɨ miɨ wu kɨnsansa

(Matiɔ 8:1-4; Luka 5:12-16)

40 Miɨ wudɔ wu nə̀ gwente kɨnsansa ba ba tuŋ nu Jisɔs nəfiə ba nende yu tə lə, “Naji ɨ wə wəmiəsɨ mɨ ŋkɨ nji ntsaaŋ, jilə wə na se lɨ.” 41 Jisɔs kwese yaa, yu nambɔ kɨbandə ba bukɔ miɨ wa wɨ, tə bə yu lə, “Nna nse lɨ, wə̂miə, wə tsalə.” 42 Mɨ kɨsɨkɨ, kɨnsansa ka ka nə yu wɨ, yu wəmiə ba kɨ ji ntsaaŋ. 43 Jisɔs tə lə yu kɨ gɨntɨ bugəŋə ba dze tsa chɛŋiɛ yu lə, 44 “Ŋəŋ, wə kə̂ tədiə bə miɨ. Bəmanɨ, gəŋ donchɛ gwɨ yɔhɔ bə chɛ bintɔfiɛ, wə nyâ kɨnya kɨ Mose nə̀ tədiə lə miɨ naji lə yu nya bə ndonchɛ bə bənɨ lə yu' wəmiə nə dzeŋ nyi wɨ ba kɨ ji ntsaaŋ.” 45 Nɨ Jisɔs nə̀ chɛŋiɛ yu manɨ, miɨ wa tsu kɨ gɨntɨ yu shafiɛ fiɔŋ fia. Shɔŋ ya tsaŋ, dzə jikə tsɔhɔ jimiɛ yi naji ɨ Jisɔs be kɨtuŋ ntɨŋ ŋgbooŋ. Yu kətə kwa kɨ ji nəkpu, bənɨ kɨ dza nə bidɨ lɨ, bɔ ba fə yu ku.