Shɔŋ yi ndzeŋe tsukɔ Jisɔs wɨ nɨ
Jɔŋ
nə̀ bɔndɔ
Diɛ tsu miɨbəwəŋ
1
Tsakɨtɨ Diɛ nə̀ ji lɨ. Diɛ ya nə̀ ji bə Nyɔ, Diɛ ya nə̀ ji Nyɔ. 2 Tsakɨtɨ yu nə̀ ji lɨ bə Nyɔ. 3 Nyɔ nə̀ fə biɔŋ bichi bi chɛ yu kaŋ. Fiɔŋ na sɨŋ su fimo fi Nyɔ nə̀ fəə yu sɨŋ. 4 Yu na keŋkɛ buwəŋ yu wɨ, buwəŋ bwa ji kɨŋgbooŋ bənɨ lɨ. 5 Kɨŋgbooŋ ka tsalə kɨjuwɔ ntɨŋ, kɨjuwɔ ka jikə kafɔ nyishə kɨ.ª6 Miɨ wudɔ nə̀ jisu wu Nyɔ nə̀ faŋə, yɨ wuhu ji lə Jɔŋ. 7 Yu nə̀ ba lə yu chanyɛ tsukɔ kɨŋgbooŋ wɨ ba ləŋ nsa yi kɨŋgbooŋ ka nəjiŋ, fə yu kɨ fɨtɨ bənɨ bəchi galɨ shəŋ kɨŋgbooŋ ka wɨ. 8 Yu wu Jɔŋ nə̀ jimiɛhɛ kɨŋgbooŋ ka. Yu nə̀ ba kwa lə yu ləŋ ji nsa yi kɨŋgbooŋ ka nəjiŋ. 9 Kɨŋgbooŋ kɨ yɛyi kɨ na donchɛ kɨŋgbooŋ bə bənɨ bəchi nə̀ balɨ mbi no ntɨŋ.
10 Yu nə̀ ji mbi ntɨŋ, ɨji Nyɔ nə̀ ma mbi no yu chɛti yu kaŋ, bəmanɨ bənɨ bə mbi no lə jikə kkə yu. 11 Yu nə̀ ba kɨtuŋ kɨhɨ ntɨŋ, bənɨ buhu jikə ləkə yu. 12 Bəmanɨ, bənɨ bəchi bə nə̀ ləkə yu ba ga shəŋ yu wɨ, yu nə̀ nya bɔ buŋga lə bɔ kɨ ji beŋ bə Nyɔ lə. 13 Beŋ bə Nyɔ lə bɛŋ na jimiɛhɛ bə bə́' bɛyɛ ɨ biəlɨ ŋgwembe mə kɨtsɔŋ'ə, makə nɨ miɨ na se, makə mbɛyɛ yi miɨbəwəŋ. Na Nyɔ kɨbɛɛ wu bɛyɛ bɔ.
14 Diɛ ya nə̀ tsu miɨbəwəŋ ba kɨ ji bɨ ntɨŋ, shəŋ yi Nyɔ lə yi ndzeŋe' yi yu wɨ bə budə. Kə ŋəŋ bubəŋ buhu wɨ, bubəŋ bu na ji bu Wɛŋ wu na ka kwa yu lɨ wu fɔɔ nə fə Tɨɨ ku.
15 Jɔŋ nə̀ ləŋ nsa yi Jisɔs nəjiŋ ba kɨ wunə yu tɨdi lə, “No na miɨ wu nnə̀ nchanyɛɛ wa tsukɔ yu wɨ ntɨdi lə, ‘Miɨ wu na ba mɨ nəjiŋ na ko ba ya mɨ, ndzɨ fə nnə̀ nji nə̀ ji yu ji.’” 16 Yu nə̀ yi bə shəŋ yi ndzeŋe, yu kɨ donchə bɨ bəchi shəŋ yi ndzeŋe yi na mənə yidɔ bɨŋ. 17 Kə na kkɨ lɨ lə Nyɔ nə̀ nya bilaŋ bi chɛ Mose kaŋ. Bəmanɨ, shəŋ yi Nyɔ lə yi ndzeŋe bə kɨyɛyi nə̀ chɛti Jisɔs Klistu kaŋ. 18 Miɨ na sɨŋ wu nə̀ sa ŋəŋ Nyɔ wɨ. Na kwa wene, ɨji kwa yu wu na ji gwɨgwɨ fə Tɨɨ ku, wu fəə kə kkə Tɨɨ.
Miɨ wu Jɔŋ Nchɛsebiɔ nə̀ ji yu lɨ
19 Fiŋ na fiɔŋ fi Jɔŋ nə̀ chanyɛ tsa yi fó yi Bəju lə yi Jɛlosalɛm nə̀ faŋə bəchɛ bintɔfiɛ bə Bəlɛbi lə bɔ bi bə Jɔŋ lə na yu yəŋ lə. 20 Jɔŋ nə̀ kə nɨŋŋkəhə mfichə mbi yibɔ. Yu nə̀ chanyɛ bə bifuŋ bihi lə, “Nna njimiɛhɛ Nchitə wu Nyɔ nə̀ kaa wa.” 21 Bɔ bi bə yu lə, “Kɨjilə wə na ji yəŋ? Wə na ji Alaja?” Yu chi bə bɔ lə, “Nna njimiɛhɛ Alaja.” Bɔ chi biɛ lə, “Na wə Miɨ wu Shɔŋ yi Nyɔ wa?”ª Yu nɨŋŋ. 22 Bɔ chi biɛ bə yu lə, “Kɨjilə wə na ji yəŋ? Wə tə lə la kɨ gwɨ yɔhɔ lə? Tə̂ bɨ fə kə keŋkɛ fiɔŋ fi kə tsɔ ba chi bə bənɨ bə' faŋə bɨ.” 23 Jɔŋ chi bə bɔ nɨ Adzaya miɨ wu shɔŋ yi Nyɔ nə̀ chanyɛ lə,
“Na mɨ diɛ yi na wunə kpa lə,
‘Bə́ lɨmə dzə yi Baba, yi kɨ ji nyɨlɨlɨ.’”
24 Nə̀ Bəfalasi bə nə̀ faŋə Bənɨ bɛŋ. 25 Bɔ bi bə Jɔŋ lə, “Jilə wə na jimiɛhɛ Nchitə wu Nyɔ nə̀ kaa makə Alaja, makə Miɨ wu Shɔŋ yi Nyɔ wa, wə tə kɨ chɛsɛ bənɨ biɔ ndzɨ la?” 26 Jɔŋ chi bə bɔ lə, “Nna nchɛsɛ fiɛŋ bənɨ biɔ kwa, bəmanɨ miɨ wudɔ wasu bəŋ ntɨŋ wu bə na ji yu kə kkə. 27 Na yu wu na ba mɨ nəjiŋ, ŋkə ŋkwətsə tɨmo wu yanshɛ gɨ yi bikpa bihi lə.” 28 Biɔŋ biŋ bichi nə̀ tɨchə ji Bɛtani Kɨnchɛŋ kɨ Jɔdan nəwuŋ, dɨ wu Jɔŋ nə̀ chɛsɛ bənɨ biɔ.
Jɔŋ donchɛ Wɛŋ wu Shiŋ wu Nyɔ bə bənɨ
29 Lə butsu wɔ, Jɔŋ ŋəŋ Jisɔs baa, yu tə lə, “Bə bô bə ŋəŋ, no na Wɛŋ wu Shiŋ wu Nyɔ wu na fosɔ məmbiə mə mbi lə! 30 Na yu wu nnə nchanyɛɛ tsukɔ yu wɨ ntɨdi lə, ‘Miɨ wudɔ ba wa mɨ nəjiŋ wu na ko ba ya mɨ, ndzɨ fə nnə̀ nji, nə̀ ji yu ji.’ 31 Mɨ kɨbɛɛ nnə̀ ŋkkəhə yu. Bəmanɨ, nnə̀ mba lə ŋkɨ nchɛsɛ bənɨ biɔ fə bənɨ bə Isla kkə yu.” 32 Jɔŋ nə̀ chi chanyɛ bə nləŋ nsa yihi nəjiŋ tə lə, “Nnə̀ ŋəŋ Kɨn'yɨntɨ shichi kɨ baa nə bɔ́ nɨ fiŋkukulu, kɨ ba shi yu wɨ. 33 Mɨ kɨbɛɛ nnə̀ ŋkkəhə yu. Bəmanɨ, miɨ wu nə̀ faŋə wa mɨ lə mba ŋkɨ nchɛsɛ bənɨ biɔ nə̀ tə bə mɨ lə, ‘Miɨ wu wə ŋəŋə Kɨn'yɨntɨ' shi nə bɔ́ ba jiŋ yu wɨ, na yu wu jiwa ɨ yu kɨ chɛsɛ bənɨ ji Kɨn'yɨntɨ kɨ Ntsaaŋ ntɨŋ.’ 34 Fiŋ na fiɔŋ fi nnə̀ ŋəŋə, ŋkɨ nlɨmi nsa ya nəjiŋ ntɨdi lə miɨ no na Wɛŋ wu Nyɔ.”
Beŋ bə Jisɔs lə bə nɨŋ'ə bə fiəfiə
35 Lə butsu wɔ, Jɔŋ chi ləmiə dɨ wu yu nə̀ sa wa ləŋ'ɨ bə beŋ buhu bə nɨŋ'ə bəfɛ. 36 Yu ŋəŋ nɨ Jisɔs na chɛti ba tə lə, “Bə bô bə ŋəŋ, no na Wɛŋ wu Shiŋ wu Nyɔ.”
37 Lə beŋ buhu bə nɨŋ'ə bə bəfɛ ba wɔ nɨ yu tədiə manɨ, bɔ bu dza kɨ biəlɨ Jisɔs. 38 Jisɔs fichə ba ŋəŋ nɨ bɔ na biəlɨ yu, yu bi bə bɔ lə, “Bə na noŋko la?” Bɔ bi bə yu lə, “Labay, wə na me məŋ?” (Yɨ wuŋ lə Labay na lə, “Miɨ wu Bitɨfiə Wubəŋ.”) 39 Jisɔs chi bə bɔ lə, “Bə bâ ŋəŋ.” Bɔ gəŋ ba ŋəŋ dɨ wu yu na me. Bɔ bə yu me butsu wɔ. Tsa yi bɔ nə̀ biəlɨ ya yu nə̀ ji nɨ tsá nia fudiɔ. 40 Miɨ miu nə bənɨ bəfɛ ba ntɨŋ bə nə̀ wɔɔ nɨ Jɔŋ nə̀ chanyɛ tə biə Jisɔs nə̀ Andulu jimə Semon Pita. 41 Andulu bu gəŋ dzədzə ba nɔŋ wəmɛni Semon ba tə bə yu lə, “Kə' ŋəŋ Nchitə wu Nyɔ nə̀ kaa wa wɨ” (fi ji lə Klistu). 42 Bəma, yu dze Semon ba gəŋ bə yu fə Jisɔs ku. Jisɔs jiŋgə yu mɛ ndzɔɔŋ ba tə lə, “Na wə Semon wɛŋ wu Jɔŋ. Bə́ ná kɨ tsɨsə wə lə Sɛfas.” (Yɨ wuŋ lə Sɛfas na ji lə Pita).ª
Jisɔs bəndɨ Felip bə Natanial
43 Lə butsu wɔ, Jisɔs ŋəŋ lə yu jiwa yu gəŋ sha yi Galili ntɨŋ. Yu gəŋ ŋəŋ Felip ba tə bə yu lə, “Kɨ biəlɨ mɨ.” 44 Felip no nə̀ miɨ wu Bɛsaida. Kɨtuŋ kɨŋ ji tɨ kɨ bə Andulu bə Pita lə. 45 Felip gəŋ nɔŋ Natanial ba tə bə yu lə, “Kə' ŋəŋ miɨ wu Mose bə bənɨ bə shɔŋ yi Nyɔ lə nə̀ bɔndɔ wa Kɨŋwatɨ kɨ bilaŋ'ə ntɨŋ tsukɔ yu wɨ. Miɨ no na Jisɔs wu Nadzalɛt, wɛŋ wu Jɔsɛ.” 46 Natanial chi bə yu lə, “Naji ɨ fiɔŋ fi ndzeŋe fɔ nə Nadzalɛt?” Felip tə bə yu lə, “Bâ ŋəŋ.” 47 Lə Jisɔs ŋəŋ Natanial baa, yu chanyɛ tsukɔ yu wɨ lə, “Bə ŋə̂ŋ, miɨ no na miɨ wu Isla wu yɛyi. Yu na sɨŋ bə fiə wu fətsutsu.” 48 Natanial bi bə Jisɔs lə, “Wə fə nəŋ tə kkə mɨ?” Jisɔs chi bə yu lə, “Fə Felip sə ba ba bəndɨ wə, sə ji mɨ' ŋŋəŋ wə wɨ kɨtɨ kɨ fik ləª ka nəkoso.” 49 Natanial chi bə yu lə, “Labay, wə na ji Wɛŋ wu Nyɔ! Wə na ji Ŋkuŋ wu Isla!” 50 Jisɔs tə bə yu lə, “Wə bɨŋ bə mɨ fɛŋ ndzɨ mɨ ntə bə wə lə nsə ŋŋəŋ wə kɨtɨ ka nəkoso? Wə jiwa ɨ wə ŋəŋ biɔŋ bi na ko bi yakɨ biŋ.” 51 Jisɔs chi tədiə bə yu lə, “Ntə bəŋ yɛyi yɛyi lə bə ná ŋɨntɨ bɔlu' gulɔ, bənchinda bə Nyɔ lə bɨndɨ bɔ shichi Wɛŋ wu Miɨ wɨ.”