Bitɨfiɛ bi Jɔŋ Nchɛsebiɔ lə
3
1-2 Tsa yi Jɔŋ wɛŋ wu Dzakaliya nə̀ ji kpa, shɔŋ yi Nyɔ ba yu wɨ. Kɨya ka nə̀ ji Tibɛlius nə̀ sa nɨ Ŋkuŋ wubəŋ wu Lom biya yɔɔ ntse bitɨŋ. Pɔntus Pailɛt sakɨ sha yi Judɛya, Hɛlɔd sakɨ Galili. Felip jimə Hɛlɔd nə̀ sakɨ sha yi Itulia bə yi Takɔnitis, Laisani sakɨ Abilɛn. Nə̀ tsa ya wɨ yi Anas bə Kaifas nə̀ ji fo yi bəchɛ bintɔfiɛ lə. 3 Lə Jɔŋ wɔ shɔŋ yi Nyɔ, yu dza ba gəŋ bituŋ ntɨŋ bichi bi na ji gwɨgwɨ fə Kɨnchɛŋ kɨ Jɔdan ku ba kɨ tɨfiə bənɨ lə bɔ fîchə shəŋ yibɔlə, yu chɛse bɔ biɔ, fə Nyɔ gufiɛ məmbiə məmbɔlə. 4 Fiŋfi ji nɨ Adzaya miɨ wu shɔŋ yi Nyɔ nə̀ bɔndɔ Kɨŋwatɨ kɨhɨ ntɨŋ lə,“Diɛ yi miɨ wunə ya kpa lə,
bə fə̂ dzə yi Baba,
ba lɨmə yi, yi kɨ ji diəŋ,
5 kpodiɛ dzó chi yibəŋ bə yintse,
yisəsɨ bikɨlɨ bichi,
lɨmə dzə́ yiŋkɨlə, yi kɨ ji nyɨlɨlɨ,
fə dzə́ yibiə, yi kɨ ji buni,
6 ɨ bənɨ bəchi ŋəŋ nɨ Nyɔ chitə bənɨ.”
7 Lə Jɔŋ tɨfiə manɨ, kuta wu bənɨ ba lə yu chɛse bɔ biɔ. Yu bi bə bɔ lə, “Ŋkɨkɨ wu yé, tɨfiə yəŋ bəŋ fə bə tə kɨ lətə bulo bu Nyɔ lə bu yu ná donchɛ? 8 Bə kɨ fɨtɨ biɔŋ bi na donchɛ lə bə' fichə shəŋ yɛnɨ. Bə kə̂ gbɔɔ kɨ tɨdi bə gwɨ́ yɛnɨ lə Ablaham na chaa wɛnɨ. Ntə bəŋ lə naji ɨ Nyɔ fichə ta yiŋ ɨ yi tsu beŋ bə Ablaham lə. 9 Bə kkə̂ lə fɔ wa buganə bitɨ fəchiŋ. Kɨtɨ kɨchi kɨ na munchɛhɛ muntaŋ mu ndzeŋe, bə́ jiba bə́ gbe kɨ dze nə gaŋ wɨ ba tiŋ'ɨ.”
10 Kuta wu bənɨ wa wɔ ba bi bə Jɔŋ lə, “Kə jiba ɨ kə fə nəŋ fɛŋ?”
11 Yu chi lə, “Miɨ wu na keŋkɛ bindzu bifɛ, yu nyâ kɨmo bə miɨ wu na keŋkɛhɛ, wu na keŋkɛ bidiəŋ, yu jɛ̂ ba nya bə miɨ wu na jikə keŋkɛ.”
12 Bənɨ bədɔ bə nə̀ kwete kɨŋwatɨ ba fə yu ku lə yu chɛse bɔ biɔ, bɔ bi bə yu lə, “Miɨ wu Bitɨfiə, kə fɨtɨ nəŋ?”
13 Yu chi bə bɔ lə, “Bə kə kɨ ləkə kpə wu kɨŋwatɨ lə yasə nɨ kɨlaŋ na tɨdi.”
14 Bənɨ bə bitsa lə ba fə yu ku ba bi tɨ lə, “Kə jiba ɨ kə fə nəŋ?”
Yu chi lə, “Bə kɨ dze tsa, bə kə kɨ fɨtɨ bənɨ bəŋgə, bə bunchi biɔŋ bɔ wɨ kɨlɔlɔ. Bə kɨ woko buni bə fiɔŋ fi bə́ na kwɨntɨ bəŋ su.”
15 Nɨ bənɨ nə̀ ji kwa bɔ wokɔ Nchitə wu Nyɔ nə̀ kaa wa, bɔ kɨ jiŋgə nɨŋ yi Jɔŋ, bɔ gɔmbiɛɛ lə diŋkəla ɨ kɨ ji yu Nchitə wa. 16 Jɔŋ kkə ba tə bə bɔ lə, “Nna nchɛsɛ bəŋ ɨji biɔ kwa, bəmanɨ miɨ wu na ko yu yakɨ mɨ bambi wa ba nəjiŋ, ŋkə ŋkwətsə tɨmo wu naji ntsəkə ba yanshɛ gɨ yi bikpa bihi lə. Yu ná kɨ chɛsɛ bəŋ ji Kɨn'yɨntɨ kɨ Ntsaaŋ ntɨŋ bə boso ntɨŋ. 17 Yu na keŋkɛ kɨyəsə kɨhɨ kɨ wɨnə jiŋ kaŋ kɨ yu jiwa ɨ yu wɨ jiŋ su, ɨ yu yənsɨ dɨ wu yu' wɨtɨ wa ba banchɛ jiŋ ga kɨjiŋə ntɨŋ, tə kɔ miu wa tiŋ boso ntɨŋ wu na fiɨ nyimə sɨŋ.”
18 Chinchi Jɔŋ nə̀ tɨdi bənɨ shɔŋ yi ndzeŋe, yu nyaa bɔ bitɨfiɛ dzə́ ntɨŋ kɨyɛŋ. 19 Bəmanɨ yu chanyɛ tsukɔ fiə wu Hɛlɔd lə wɨ wu nə̀ ji miɨ wu sakɨ, yu wɛmiɛ, ndzɨ Hɛlɔd nə̀ dze Ɛlɔdia wu nə̀ ji kpansɨ wəmɛni kpansɨ lɨ, tə kɨ chanyɛ tsukɔ biɔŋ bibiə bichi wɨ bi Hɛlɔd nə̀ fəə. 20 Hɛlɔd kanə bɨsə fiə wuhu ba tə lə bə́ kwê Jɔŋ ba fasɨ yu tsɔŋ yi buŋfia ntɨŋ.
Jɔŋ chɛse Jisɔs biɔ
21 Tsa yi Jɔŋ nə̀ kasə bə nchɛse yi bənɨ biɔ, Jisɔs ba tɨ Jɔŋ chɛse yu biɔ. Lə Jisɔs kɨ tsɨsə, bɔlu gulɔ, 22 Kɨn'yɨntɨ kɨ Ntsaaŋ shi yu bɨŋ kɨ boto fiŋkukulu. Diɛ chanyɛ nə bɔ́ lə, “Wə na ji wɛnɛ, wə ji shəŋ yɛŋ, nna ŋ'woko buni bə wə kɨtso.”
Kɨtsɔŋ kɨ Jisɔs lə
23 Jisɔs nə̀ gbɔ nɨŋ yihi yu ji nɨ biya mbaatiɛ. Bənɨ nə̀ kkɨ lə yu na ji wɛŋ wu Jɔsɛ, Jɔsɛ ji wɛŋ wu Ɛli, 24 Ɛli ji wɛŋ wu Mata, Mata ji wɛŋ wu Lɛbi, lɛbi ji wɛŋ wu Mɛlki, Mɛlki ji wɛŋ wu Janai, Janai ji wɛŋ wu Jɔsɛ, 25 Jɔsɛ ji wɛŋ wu Matatias, Matatias ji wɛŋ wu Ɛmɔs, Ɛmɔs ji wɛŋ wu Nahum, Nahum ji wɛŋ wu Ɛsli, Ɛsli ji wɛŋ wu Nagai, 26 Nagai ji wɛŋ wu Mat, Mat ji wɛŋ wu Matatias, Matatias ji wɛŋ wu Simɛn, Simɛn ji wɛŋ wu Jɔsɛk, Jɔsɛk ji wɛŋ wu Jɔda. 27 Jɔda nə̀ ji wɛŋ wu Jwanan, Jwanan ji wɛŋ wu Lɛsa, Lɛsa ji wɛŋ wu Dzɛlubabɛl, Dzɛlubabɛl ji wɛŋ wu Shɛltiɛl, Shɛltiɛl ji wɛŋ wu Nɛli, 28 Nɛli ji wɛŋ wu Mɛlki, Mɛlki ji wɛŋ wu Adi, Adi ji wɛŋ wu Kɔsam, Kɔsam ji wɛŋ wu Ɛlmadam, Ɛlmadam ji wɛŋ wu Ɛl, 29 Ɛl ji wɛŋ wu Jɔshwa, Jɔshwa ji wɛŋ wu Ɛliɛsa, Ɛliɛsa ji wɛŋ wu Jɔlim, Jɔlim ji wɛŋ wu Mata, Mata ji wɛŋ wu Lɛbi, 30 Lɛbi nə̀ ji wɛŋ wu Semiɔn, Semiɔn ji wɛŋ wu Juda, Juda ji wɛŋ wu Jɔsɛ, Jɔsɛ ji wɛŋ wu Jɔnam, Jɔnam ji wɛŋ wu Ɛliakim, 31 Ɛliakim ji wɛŋ wu Mɛlia, Mɛlia ji wɛŋ wu Mɛna, Mɛna ji wɛŋ wu Matata, Matata ji wɛŋ wu Natan, Natan ji wɛŋ wu Dɛbi, 32 Dɛbi ji wɛŋ wu Jɛse, Jɛse ji wɛŋ wu Ɔbɛd, Ɔbɛd ji wɛŋ wu Bwas, Bwas ji wɛŋ wu Sala, Sala ji wɛŋ wu Nashɔŋ. 33 Nashɔŋ nə̀ ji wɛŋ wu Aminada, Aminada ji wɛŋ wu Admin, Admin ji wɛŋ wu Alni, Alni ji wɛŋ wu Hɛlsɔn, Hɛlsɔn ji wɛŋ wu Bɛlis, Bɛlis ji wɛŋ wu Juda, 34 Juda ji wɛŋ wu Jakɔ, Jakɔ ji wɛŋ wu Adze, Adze ji wɛŋ wu Ablaham. Ablaham nə̀ ji wɛŋ wu Tɛla, Tɛla ji wɛŋ wu Nahɔ, 35 Nahɔ ji wɛŋ wu Sɛlu, Sɛlu ji wɛŋ wu Leu, Leu ji wɛŋ wu Bɛlɛ, Bɛlɛ ji wɛŋ wu Ɛba, Ɛba ji wɛŋ wu Shɛla. 36 Shɛla nə̀ ji wɛŋ wu Kainan, Kainan ji wɛŋ wu Afasad, Afasad ji wɛŋ wu Shɛm, Shɛm ji wɛŋ wu Nuwa, Nuwa ji wɛŋ wu Lamɛk, 37 Lamɛk ji wɛŋ wu Mɛtusɛla, Mɛtusɛla ji wɛŋ wu Ɛnɔk, Ɛnɔk ji wɛŋ wu Jalɛd, Jalɛd ji wɛŋ wu Mahalalɛ, Mahalalɛ ji wɛŋ wu Kainan, 38 Kainan ji wɛŋ wu Ɛnɔs, Ɛnɔs ji wɛŋ wu Sɛt, Sɛt ji wɛŋ wu Adam, Adam ji wɛŋ wu Nyɔ.