Satan mɔŋ Jisɔs
4
Jisɔs nə̀ dza nə fə Kɨnchɛŋ kɨ Jɔdan ku, ɨji yu' yi bə Kɨn'yɨntɨ kɨ Ntsaaŋ, kɨ dze yu ba gəŋ bə yu kpa. 2 Yu jiŋ sɔ díɔ mbaania Satan moŋko yu. Yu nə̀ ji sɔ manɨ yu jikə diəhə. Lə díɔ ya ba chɛ, dzɔŋ gbɔ kɨ wo yu. 3 Satan tə bə yu lə, “Ɨ wə na ji Wɛŋ wu Nyɔ, wə tə ta wuŋ tsu blɛ.” 4 Jisɔs chi bə yu lə, “Fi na ji bubɔndɔ lə,‘Miɨ jimiɛhɛ kwa ndzɨ bidiəŋ.’”
5 Satan dze yu ba bəndɨ bə yu dɨ wudɔ bɨŋ ba donchɛ yu bituŋ bi mbi lə bichi. Jisɔs ŋəŋ mɛ ŋgbooŋ. 6 Satan tə bə yu lə, “Bə́ nə nya mɨ mbi no chi, naji nnya tɨ ma yəŋ wu nna nse. Njiwa nnya ɨ wə kɨ sakɨ, wə keŋkɛ bubəŋ bə buŋga busu buchi. 7 Fi na ji kwa lə wə tsumbɔ mɨ nəfiə ba kuntə mɨ, ntə nnya wə biɔŋ bichi.”
8 Jisɔs chi bə yu lə, “Fi na ji bubɔndɔ lə,
‘Kɨ kuntə Baba Nyɔ wɔhɔ,
wə nɨntɨ kwa ji yu lɨ.’”
9 Satan dze yu ba gəŋ bə yu kɨtuŋ kɨ Jɛlosalɛm ntɨŋ ba tɨŋ yu fuŋ wu tsɔŋ yi bintɔfiɛ lə bɨŋ fəchɛ, tə bə yu lə, “Jilə wə na ji Wɛŋ wu Nyɔ, wə tə sa koso, 10 ndzɨ fi na ji bubɔndɔ lə,
‘Nyɔ jiwa yu tə ɨ bənchinda buhu kɨɨ wə.’
11 Fi ji tɨ bubɔndɔ lə,
‘Bɔ ná bakɨ wə lə wə kə̂ tsukɔ gbo ta wɨ.’”
12 Jisɔs chi bə yu lə, “Kɨŋwatɨ kɨ Nyɔ lə na tɨdi tɨ lə,
‘Wə kə kɨ moŋko Baba Nyɔ wɔhɔ.’”
13 Tsa yi Satan nə̀ kanə bə dzə́ yihi chi yi yu nə̀ moŋko Jisɔs yi ntɨŋ, yu dza ba gəŋ kɨ wokɔ tsa yidɔ.
Jisɔs gbɔ nɨŋ yihi Galili
14 Jisɔs nə̀ dza ba tsu Galili, ɨji yu' yi bə buŋga bu Kɨn'yɨntɨ kɨ Ntsaaŋ'ə. Shɔŋ yihi tsaŋ ba gəŋ sha ya ntɨŋ chi. 15 Yu nə̀ tɨfiəə bənɨ tsɔ́ŋ yi kɨntsɨsɨ lə ntɨŋ, bənɨ bəchi kuntəə yu.
Bə́ nɨŋŋ Jisɔs Nadzalɛt kɨtuŋ kɨhɨ ntɨŋ
16 Jisɔs dza ba gəŋ Nadzalɛt dɨ wu yu nə̀ kɔ. Lə kɨ ji butsu bu fufiɛ, yu gəŋ tsɔŋ yi kɨntsɨsɨ ntɨŋ ɨji nɨ yu nə̀ ba yu kɨ gɨntɨ. Yu dza ba ləŋ wə lə yu tanchɛ diɛ yi Nyɔ. 17 Bə́ nya yu kɨŋwatɨ kɨ Adzaya miɨ wu shɔŋ yi Nyɔ nə̀ bɔndɔ. Yu yanshɛ ba bo dɨ wudɔ wu bə́ nə̀ bɔndɔ mɨ lə,
18 “Kɨn'yɨntɨ kɨ Baba Nyɔ lə na ji mɨ bɨŋ,
ndzɨ yu nə tsə mɨ lə mba
ŋkɨ ntɨdi shɔŋ yi ndzeŋe bə bənɨ bə fiəŋkə.
Yu nə faŋ mɨ lə mba
ntə bə bənɨ bə na ji buŋfia ntɨŋ lə bə́ jiba bə́ foso bɔ nə buŋfia bwa ntɨŋ,
ntə tɨ bə bənyimə lə bə́ jiba bə́ gu yəsɨ yibɔlə.
Yu faŋ mɨ lə mba mfoshɛ bənɨ bə bə́ nə̀ chiŋfiɛ bɔ tsɔŋ yi buŋfia ntɨŋ,
19 ba tə lə kɨya kɨŋ,
na kɨ Baba jiwa yu chitə bənɨ.”
20 Nɨ Jisɔs tanchɛ mɛ, yu chɛ kɨŋwatɨ ka ba nya bə miɨ wu nə̀ ba yu kɨ galɨ, ba jiŋ fəkoso. Bənɨ bəchi bə nə̀ ji tsɔŋ yi kɨntsɨsɨ ya ntɨŋ dɔŋ yəsɨ yu wɨ. 21 Yu gbɔ kɨ nachɛ bə bɔ lə, “Fiɔŋ fi bə' wɔɔ fiŋ nə Kɨŋwatɨ kɨ Nyɔ lə ntɨŋ, fi' fɔ diəŋ ndɛŋ.”
22 Bənɨ wɔ fi ndzeŋ bɔ lɨ kɨtso, kɨgəsə wɨŋ bɔ bə nchanyɛ yi ndzeŋe yi fɔɔ nə yu dze. Bəmanɨ, bɔ dze kɨ masə, bɔ bishɛ lə, “No na kə wɛŋ wu Jɔsɛ?”
23 Jisɔs tə bə bɔ lə, “Nna masəhə lə bə jiba ɨ bə gbe ŋgaŋga mɨ wɨ lə, ‘Miɨ wu wəmiəsɨ bənɨ, wə̂miəsɨ gwɨ yɔhɔ.’ Bə jiba ɨ bə tə lə mfə tɨ biɔŋ mɛni bi bə nə̀ wɔɔ lə nnə̀ mfə Kapanaum.” 24 Jisɔs chi tədiə bə bɔ lə, “Ntə bəŋ yɛyi lə, naji ɨ bə́ kuntə miɨ wu shɔŋ yi Nyɔ kɨtuŋ kɨhɨ ntɨŋ kə. 25 Bə yɛyi, ntə bəŋ lə tsa yi Alaja miɨ wu shɔŋ yi Nyɔ nə̀ ji, dzaŋ nə̀ kətə bɔ́ biya bitɛ bə fiə buse, dzɔŋ kwe kɨtuŋ kɨchi. Bəkansɨ bə bəŋku lə nə̀ ji kɨtuŋ kɨ Isla ntɨŋ tsa ya wɨ kɨyɛŋ. 26 Bəmanɨ, Nyɔ nə̀ kə faŋkəhə Alaja ndzɨ wudɔ nə bɔ ntɨŋ, yu faŋ yu ji kpansɨ ŋku wudɔ lɨ wu nə̀ ji kɨtuŋ kɨ Dzalɛfat ntɨŋ, sha yi Sidɔn ntɨŋ. 27 Bə gɔ̂mbiɛ tɨ lə, tsa yi Ɛlisha miɨ wu shɔŋ yi Nyɔ, bənɨ nə̀ ji Isla kɨyɛŋ bə kɨnsansa, miɨ nə bɔ ntɨŋ nə̀ kə wəmiə. Nə̀ kwa Nɛman yu wumbɔŋ nə sha yi Silia ntɨŋ wu bə́ nə̀ wəmiəsɨ, yu tsalə.”
28 Lə Jisɔs chanyɛ manɨ, bənɨ bəchi bə nə̀ ji tsɔŋ yi kɨntsɨsɨ ntɨŋ wɔ, shəŋ lɔ bɔ kɨtso. 29 Bɔ dza wə ba me yu, fɔ bə yu nə kɨtuŋ ka ntɨŋ ba bəndɨ fɔ fə chɛŋ wu nə̀ ji dzo yi kɨtuŋ kɨbɔlə ntɨŋ, ndzɨ bɔ nə̀ se lə bɔ me yu, yu gbɔ. 30 Bəmanɨ, yu chɛ bɔ ntɨŋ kɨ gɨntɨ fihi.
Jisɔs kɔŋɔ kɨn'yɨntɨ kɨbiə nə miɨ wɨ
31 Jisɔs dza ba shi gəŋ Kapanaum, kɨtuŋ kɨdɔ sha yi Galili ntɨŋ. Lə kɨ ji butsu bu fufiɛ, yu gəŋ kɨ tɨfiə bənɨ tsɔŋ yi kɨntsɨsɨ ntɨŋ. 32 Bənɨ ba bəchi kɨ woko bɔ keŋkɛɛ kɨgəsə kɨ wɨŋə tsukɔ bitɨfiɛ bihi wɨ, ndzɨ bitɨfiɛ bihi nə̀ keŋkɛɛ buŋga. 33 Miɨ wudɔ nə̀ ji tsɔŋ yi kɨntsɨsɨ ya ntɨŋ, kɨn'yɨntɨ kɨbiə ji yu wɨ. Yu dza kɨ wɛnti bə diɛ bɔ́ lə, 34 “Hɛbɛɛ Jisɔs wu Nadzalɛt, wə na se la nə bɨ lɨ? Wə ba lə wə jishi bɨ? Nna ŋkkɨ lɨ wə. Na wə wu ntsaaŋ wa wu fɔɔ nə fə Nyɔ ku.”
35 Jisɔs wɛŋ bə kɨn'yɨntɨ kɨbiə ka ba tə lə, “Bâŋ, fɔ̂ nə miɨ no wɨ!” Kɨn'yɨntɨ ka tɔ miɨ wa ba li fəkoso bənɨ nəfiə, ba fɔ nə yu wɨ. Bəmanɨ kɨ jikə bɛnɛ yu.
36 Bənɨ bəchi ŋəŋ, kɨgəsə wɨŋ bɔ. Bɔ kɨ masə bɔ bishɛ lə, “Nyi na nchanyɛ yɨla yi miɨ no na keŋkɛ? Yu ji bə buŋga bubəŋ bu kɔŋɔ bin'yɨntɨ bibiə bi foto nə bənɨ wɨ.” 37 Shɔŋ yi Jisɔs gəndə bituŋ bi nə̀ ji sha ya ntɨŋ bichi.
Jisɔs wəmiəsɨ bənɨ kɨyɛŋ
38 Jisɔs dza ba fɔ nə tsɔŋ yi kɨntsɨsɨ ya ntɨŋ ba gəŋ be Semon tsɔŋ. Nə̀ ji mə kpansɨ Semon nɨkə bə fiəfɨ. Bɔ nende lə Jisɔs chitə yu. 39 Jisɔs gəŋ dɨ wu kpansɨ wa nə̀ mɛɛba dzasɨ yu wə ba wɛŋ fiəfɨ ya, yi fɔ nə yu wɨ, yu wəmiə. Mɨ kɨsɨkɨ, kpansɨ wa bu dza wə ba nɔŋ fiɔŋ fi diənə, bɔ diə.
40 Lə diɔ kɨ midi, bənɨ bəchi bə nə̀ keŋkɛɛ bənɨ bə na ji bə dzéŋ chichi chichi kɨ dze bɔ, bɔ ba bə bɔ fə Jisɔs ku. Jisɔs kɨ bukɔ bɔ wɨ bəchi, bɔ wəmiə. 41 Bətsə tɨ nə̀ foto nə bənɨ bədɔ wɨ kɨyɛŋ, bɔ wɛnti lə, “Wə na ji Wɛŋ wu Nyɔ.” Bəmanɨ, Jisɔs loso bɔ lə bɔ kə kɨ chanyɛ, ndzɨ bɔ nə̀ kkɨ Jisɔs lə na Nchitə wu Nyɔ nə̀ kaa wa.
42 Lə butsu wɔ, Jisɔs fɔ ba gəŋ dɨ wudɔ wɨ yu wumbɔŋ. Bənɨ shə ba gbɔ kɨ noŋko yu. Bɔ ŋəŋ yu wɨ, ɨji yu noŋko lə yu dza nə nɔ. Bɔ kɨ noŋko dzə́ lə yu kətə bə bɔ. 43 Bəmanɨ, yu nɨŋŋ ba tə bə bɔ lə, “Nna nji lə ntɨfiə shɔŋ yi ndzeŋe tsukɔ buŋkuŋ bu Nyɔ lə wɨ bituŋ bidɔ ntɨŋ tɨ, ndzɨ na fiɔŋ fi Nyɔ faŋə mɨ lə mba mfə.”
44 Yu dza ba gəŋ kɨ gəndə yu tɨfiə shɔŋ yi ndzeŋe ya tsɔ́ŋ yi kɨntsɨsɨ lə ntɨŋ, kɨtuŋ ka ntɨŋ kɨchi.