Shɔŋ yi ndzeŋe tsukɔ Jisɔs wɨ nɨ
Matiɔ
nə̀ bɔndɔ
Kɨtsɔŋ kɨ Jisɔs Klistu lə
1
Yiŋ na yɨ yi bəchɛku bə kɨtsɔŋ kɨ Jisɔs Klistu lə: Jisɔs Klistu nə̀ ji wɛŋ nə kɨtsɔŋ kɨ Ŋkuŋ Dɛbi lə ntɨŋ, Dɛbi ji nə kɨtsɔŋ kɨ Ablaham lə ntɨŋ. 2 Ablaham nə̀ ji chɛ Adze, Adze ji chɛ Jakɔ, Jakɔ ji chɛ Juda bɔ bə bəwəmɛni, 3 Juda ji chɛ Pɛlis bə Dzɛla, mə bɔ nə̀ ji Tama. Pɛlis ji chɛ Hɛslɔn, Hɛslɔn ji chɛ Ɛlam. 4 Ɛlam ji chɛ Aminada, Aminada ji chɛ Nashɔŋ, Nashɔŋ ji chɛ Salmɔn. 5 Salmɔn ji chɛ Bwas wu mɛni nə̀ ji Lahab. Bwas ji chɛ Ɔbɛd wu mɛni nə̀ ji Lut. Ɔbɛd ji chɛ Jɛse. 6 Jɛse ji chɛ Ŋkuŋ Dɛbi.Ŋkuŋ Dɛbi ji chɛ Sɔlɔmon wu mɛni nə̀ ji kpansɨ Yulia. 7 Sɔlɔmon ji chɛ Lɛhɔboam, Lɛhɔboam ji chɛ Abija, Abija ji chɛ Asa. 8 Asa ji chɛ Jɛhɔshafat, Jɛhɔshafat ji chɛ Jɔlam, Jɔlam ji chɛ Ɔdzaya. 9 Ɔdzaya ji chɛ Jɔtam, Jɔtam ji chɛ Ahas, Ahas ji chɛ Ɛdzikaya, 10 Ɛdzikaya ji chɛ Manase, Manase ji chɛ Ɛmɔnª, Ɛmɔn ji chɛ Jɔsaya. 11 Jɔsaya ji chɛ Jɛkɔnaya bə bəwəmɛni. Bə́ nə̀ bɛyɛ bɔ ɨji nə̀ shə tsəsɨ lə kɨ ji tsa yi bənɨ bə Babilɔn nə̀ kwɛɛ bənɨ bə Isla ba gəŋ bə bɔ kɨtuŋ kɨbɔlə ntɨŋ Babilɔn.
12 Nəjiŋ wusu, nɨ bə́ nə̀ kwɛɛ bənɨ bə Isla ba gəŋ bə bɔ sɔ Babilɔn, Jɛkɔnaya nə̀ ji chɛ Shɛltiɛl, Shɛltiɛl ji chɛ Dzɛlubabɛl, 13 Dzɛlubabɛl ji chɛ Abiud, Abiud ji chɛ Ɛliakim, Ɛliakim ji chɛ Asɔ, 14 Asɔ ji chɛ Sadɔk, Sadɔk ji chɛ Akim, Akim ji chɛ Ɛliyu, 15 Ɛliyu ji chɛ Ɛliɛsa, Ɛliɛsa ji chɛ Matan, Matan ji chɛ Jakɔ. 16 Jakɔ ji chɛ Jɔsɛ nomə Maliya, Maliya ji wu nə̀ bɛyɛ Jisɔs wu bə́ na tsɨsə wa lə Klistu.
17 Bəma, bəchɛku bə kɨtsɔŋ kɨ Jisɔs lə bɛŋ kɨ ji yɔɔ ntse bəna dze nə Ablaham bɨŋ ba fɔ Ŋkuŋ Dɛbi bɨŋ, bɔ ji yɔɔ ntse bəna dze nə Ŋkuŋ Dɛbi bɨŋ ba fɔ tsa yi bə́ nə̀ kwɛɛ bənɨ bə Isla ba gəŋ bə bɔ sɔ Babilɔn, bɔ ji tɨ yɔɔ ntse bəna dze nə tsa yi bə́ nə̀ kwɛɛ bənɨ bə Isla bɨŋ ba fɔ tsa yi bə́ nə̀ bɛyɛ Klistu.
Nɨ bə́ nə̀ bɛyɛ Jisɔs
18 Kɨbɛyɛ kɨ Jisɔs Klistu lə nə̀ gəndə dzə nyi ntɨŋ mɛ: Nə̀ ji bə́' ka lə mɛni Maliya jiwa ɨ yu kɨ ji kpansɨ Jɔsɛ. Bə́ kɨ ji bə nnya yi bibinə, fi fɔ lə yu wa bə tɔ nə buŋga bu Kɨn'yɨntɨ kɨ Ntsaaŋ'ə ntɨŋ. 19 Nɨ fi fɔɔ manɨ, Jɔsɛ wu nə̀ ji nomo, nɨ yu nə̀ ji miɨ wu diəŋ, yu jikə sɛhɛ lə yu nya Maliya yaa, yu ŋəŋ lə yu jiwa ɨ yu shə yu ji bunyələ. 20 Nɨ yu nə̀ bambi yu gɔmbiɛ lə yu fə manɨ, nchinda wu Baba bu donchə gwɨ yihi bə yu budəŋfɨ ntɨŋ tsa yi yu nə̀ me ba tə bə yu lə, “Jɔsɛ, wɛŋ wu Ŋkuŋ Dɛbi, wə kə̂ lekɛhɛ ndze Maliya lə yu kɨ ji məku wɔhɔ, ndzɨ tɔ wu yu na ji wuŋ bə wu, yu keŋkɛ wu nə buŋga bu Kɨn'yɨntɨ kɨ Ntsaaŋ'ə ntɨŋ. 21 Yu jiwa yu bɛyɛ wɛŋ wu nɨnsə, ɨ wə dɔŋ yɨ wuhu lə Jisɔsª, ndzɨ yu ná chitə lɨ bənɨ buhu nə məmbiə məmbɔlə wɨ.” 22 Biɔŋ biŋ bichi nə̀ fɔ bə mfə lə fi ba fɔ diəŋ nɨ Baba nə̀ chanyɛ bifuŋ bi miɨ wuhu wu shɔŋ'ə wɨ lə, 23 “Bə wôkɔ, bə wɔ, sɔŋfa wudɔ jiwa yu fiə tɔ ba bɛyɛ wɛŋ wu nɨnsə ɨ bə́ kɨ tsɨsə yu lə Ɛmanwɛl.” Yɨ wuŋ na ji lə, “Nyɔ wa bə bɨ.” 24 Lə budəŋfɨ bwa kwɛɛ Jɔsɛ manɨ, lə yu dzakɔ, yu bu fə nɨ nchinda wu Baba wa sə tədiə bə yu. Yu nə̀ dze Maliya məku wuhu lɨ, 25 bəmanɨ bɔ bə yu jikə kɨ tɛshɛ kɨta. Bɔ bə yu jiŋ manɨ sɨŋ sɨŋ Maliya bɛyɛ. Jɔsɛ dɔŋ yɨ wu wɛŋ'ə lə Jisɔs.