Bənɨ bəfɨ gəŋ kuntə Jisɔs
2
Bə́ nə̀ bɛyɛ Jisɔs Bɛtɨlhɛm sha yi Judɛya ntɨŋ. Tsa ya wɨ nə̀ ji Hɛlɔd ji Ŋkuŋ wu Judɛya. Fi fɔ lə bəfɨ bədɔ nə̀ dza nə kɨtuŋ kɨdɔ ntɨŋ dia wu diɔ boso ba ba Jɛlosalɛm kɨ bishɛ lə, 2 “Ŋkuŋ wu Bəju wu bə́' bɛyɛ wa na ji məŋ? Kə na bishɛ mɛ ndzɨ kə nə ŋəŋ mbiansɨ yihi wɨ nə dia wu diɔ boso, tə kɨ ba lə kə kuntə yu.” 3 Lə Ŋkuŋ Hɛlɔd wɔ fiɔŋ fiŋ, shəŋ bə yu. Shəŋ bə tɨ bənɨ bə Jɛlosalɛm bəchi. 4 Yu bəndɨ bəchɛ bintɔfiɛ bəbəŋ bəchi bə bənɨ bəchi bə nə̀ tɨfiə bilaŋ bi Nyɔ lə, bɔ tɛshɛ. Yu bi bə bɔ lə “Dɨ wu bə́ nə̀ji lə bə́ bɛyɛ Nchitə wu Nyɔ nə̀ kaa wa, na məŋ?” 5 Bɔ chi lə, “Bə́ nə̀ji lə bə́ bɛyɛ yu Bɛtɨlhɛm sha yi Judɛya ntɨŋ. Fiŋfi ji nɨ miɨ wu shɔŋ yi Nyɔ nə̀ bɔndɔ lə, 6 ‘Wə wu Bɛtɨlhɛm sha yi Juda ntɨŋ,wə kə kɨ gɔmbiɛ lə wə na ji fintseŋ kɨtso sha yi Juda ntɨŋ.
Kɨ kkɨ lə miɨ jiwa yu fɔ nə wə ntɨŋ
wu jiwa yu kɨ sakɨ bənɨ bɛmɨ Bəisla.’”
7 Ŋkuŋ Hɛlɔd bəndɨ bəfɨ ba nəjiŋ nəjiŋ bishɛ buni ba wɔ nə bɔ lɨ tsa yi mbiansɨ ya nə̀ fɔɔ. 8 Lə yu wɔ, yu faŋ bɔ Bɛtɨlhɛm ba tə lə, “Bə gə̂ŋ dze tsa bə nɔŋ wɛŋ wa buni. Ɨ bə nɔŋ ba ŋəŋ yu wɨ, bə fichə bə ba tə mɨ, fə ŋgəŋə tɨ ba kuntə yu.” 9 Lə bənɨ ba wɔ nɨ Ŋkuŋ tədiə manɨ, bɔ fɔ kɨ gɨntɨ gbəndɨ wubɔlə. Lə bɔ kɨ gɨntɨ, mbiansɨ yi bɔ nə̀ ŋəŋə ya nə dia wu diɔ boso kɨ gɨntɨ bɔ fiə yi donchɛ bɔ dzə. Lə yi kɨ gɨntɨ ma, yi fɔ dɨ wu wɛŋ wa nə̀ ji, yi ləŋ mɨ. 10 Lə bɔ ŋəŋ mbiansɨ ya wɨ manɨ, bɔ wɔ buni kɨtso, gwɨ kɨ ndzeŋe bɔ. 11 Lə bɔ gəŋ be tsɔŋ yi wɛŋ wa nə̀ ji ya ntɨŋ, bɔ ŋəŋ wɛŋ wa wɨ bə mɛni Maliya, bɔ tuŋ nu wɛŋ wa nəfiə ba kuntə yu. Bɔ gu biba bibɔlə ba foshɛ biɔŋ bi kuntə ŋkuŋ su ba nya yu. Biɔŋ biŋ nə̀ ŋgusa, bə ŋgwe yi kɨjəntɨ kɨdɔ kɨ bə́ na tsɨsə lə flaŋkinsen, ma ŋgwe yi məŋ məndɔ mə bə́ na tsɨsə lə mɛɛl. 12 Nyɔ loso bɔ budəŋfɨ ntɨŋ lə bɔ dze tsa, lə bɔ kə̂ fichə ba gəŋ ŋəŋ Ŋkuŋ Hɛlɔd. Bɔ bu biə dzə yidɔ chichi ba tsu kɨtuŋ kɨbɔlə ntɨŋ.
Jɔsɛ dze wɛŋ bɔ lətə ba gəŋ Ijip
13 Lə bəfɨ ba dza ba kɨ kwəlɨ, fi fɔ lə nchinda wu Baba nə̀ donchɛ gwɨ bə Jɔsɛ budəŋfɨ ntɨŋ ba tə bə yu lə, “Dzâkɔ, wə dze wɛŋ wa bɔ bə mɛni, bə lətə bə gəŋ kɨtuŋ kɨ Ijip ntɨŋ, bə kɨ ji sɔ gəŋ fɔ tsa yi nná ntədiə lə bə fichə. Nna ntɨdi mɛ ndzɨ Ŋkuŋ Hɛlɔd jiwa yu kɨ noŋko wɛŋ wa lə yu kkpɨsɨ.” 14 Jɔsɛ bu dza wə ba dze wɛŋ wa bɔ bə mɛni bbutsu ba lətə gəŋ Ijip 15 ba kɨ ji sɔ gəŋ fɔ tsa yi Ŋkuŋ Hɛlɔd nə̀ fiəŋkə. Fi nə̀ fɔ manɨ bə mfə lə fi fɔ diəŋ nɨ Nyɔ nə̀ chanyɛ bifuŋ bi miɨ wuhu wu shɔŋ'ə wɨ lə, “Mɨ mbəndɨ Wɛnɛ, yu fɔ nə kɨtuŋ kɨ Ijip ntɨŋ.”
Ŋkuŋ Hɛlɔd kkpɨshɛ beŋ nə Bɛtɨlhɛm
16 Lə Hɛlɔd ŋəŋ lə bəfɨ ba' fukiɛ yu, fiɔŋ fia lɔ yu kɨtso. Yu faŋ bənɨ lə bɔ gəŋ Bɛtɨlhɛm bə bituŋ bichi bi na ji fə Bɛtɨlhɛm ku ba kkpɨshɛ beŋ bə nɨnsə bə na ji dze nə biya bifɛ bɨŋ shi lɨ. Yu nə̀ nyaa biya biŋ yu biəlɨ nɨ yu nə̀ bishɛ bə bəfɨ ba ba wɔ buni tsa yi bɔ nə̀ ŋəŋə mbiansɨ ya wɨ. 17 Lə bɔ gəŋ ba kkpɨshɛ beŋ ba manɨ, fi fɔ diəŋ nɨ Jɛlimia miɨ wu shɔŋ yi Nyɔ nə̀ chanyɛ lə,
18 “Bə́' wɔ wulu kɨtuŋ kɨ Lama ntɨŋ,
miɨ wɛnti məndəŋ, yu dɨ, yu kɨtɨ gwɨ,
ɨji Lashɛl wu na dɨ beŋ buhu,
bə́ jisə yu sɨŋsɨŋ, yu nɨŋŋ
ndzɨ beŋ buhu na bambiɛhɛ su.”
Bəjɔsɛ dza nə Ijip ba fichə tsu jiŋ
19 Lə Ŋkuŋ Hɛlɔd ba fiəŋkə, nchinda wu Baba bu lafu fə Jɔsɛ ku budəŋfɨ ntɨŋ kɨtuŋ kɨ Ijip ntɨŋ ba tə bə yu lə, 20 “Dzâkɔ wə dze wɛŋ bɔ bə mɛni bə fichə bə tsu kɨtuŋ kɨ Isla ntɨŋ, ndzɨ bɔ bə nə̀ noŋko ba lə bɔ kkpɨsɨ wɛŋ no nə̀ kkpəyɛ.” 21 Bəma Jɔsɛ dza wə ba dze wɛŋ bɔ bə mɛni, bɔ kɨ tsu jiŋ kɨtuŋ kɨ Isla ntɨŋ. 22 Bəmanɨ, lə bɔ ba, Jɔsɛ wɔ lə wɛŋ wu Ŋkuŋ Hɛlɔd Akilius nə diə kɨtɨ kɨ tɨɨ lə Judɛya, yu le ŋgəŋ sɔ. Bə́ chi losɔ yu budəŋfɨ ntɨŋ lə yu kə̂ gəŋkə sɔ. Yu ya ba gəŋ ji sha yi Galili ntɨŋ, 23 gəŋ kɨ ji kɨtuŋ kɨdɔ ntɨŋ bə́ tsɨsə lə Nadzalɛt. Fi nə̀ tɨchə manɨ lə fi fɔ diəŋ nɨ miɨ wu shɔŋ yi Nyɔ nə̀ chanyɛ lə, “Bə́ ná kɨ tsɨsə yu lə miɨ wu Nadzalɛt.”