Bitɨfiə bi Jɔŋ Nchɛsebiɔ lə
3
Tsa ya wɨ nə̀ ji, Jɔŋ Nchɛsebiɔ dza ba fɔ gəŋ kpa sha yi Judɛya ntɨŋ kɨ tɨfiə bənɨ lə, 2 “Bə fîchə shəŋ yɛnɨ, ndzɨ buŋkuŋ bu bɔ́ bwa gwɨgwɨ.” 3 Jɔŋ no nə̀ miɨ wu Adzaya miɨ wu shɔŋ yi Nyɔ nə̀ chanyɛ tsukɔ yu wɨ tsa yi yu nə̀ tədiə lə,“Diɛ yi miɨ wunə ya kpa lə,
‘Bə́ fə̂ dzə yi Baba,
ba lɨmə yi kɨ ji nyɨlɨlɨ.’”
4 Jɔŋ nə̀ doŋko bindzu bi bə́' fəə bə dí yi nyɛŋ yidɔ lə yi bə́ tsɨsə lə kamɛl, yu kansɨ kɨtsa chi kɨ bə́' fəə bə dzɨ yi nyɛŋ, bidiəŋ bihi ji tsɨmɨ bə nyuŋ yi kpa. 5 Nɨ yu nə̀ tɨdi manɨ, bənɨ kɨ fɔdiɛ nə Jɛlosalɛm bə bituŋ bichi bi sha yi Judɛya ntɨŋ chi ma bituŋ bi fə Kɨnchɛŋ kɨ Jɔdan ku bichi bɔ gɨntɨ yu wɨ. 6 Bɔ nə̀ gɨntɨ manɨ bɔ tɨdi məmbiə məmbɔlə bə Nyɔ, Jɔŋ tə chɛsɛ bɔ biɔ, Kɨnchɛŋ kɨ Jɔdan ntɨŋ.
7 Bəmanɨ, lə yu ŋəŋ chi Bəfalasi bə Bəsadusi kɨyɛŋ na ba lə yu chɛse bɔ biɔ, yu tə bə bɔ lə, “Ŋkɨkɨ wu yé, na yəŋ wu tɨfiə bəŋ fə bə tə kɨ lətə bulo bu Nyɔ lə bu yu ná donchɛ? 8 Bə kɨ fɨtɨ biɔŋ bi na donchɛ lə bə' fichə shəŋ yɛnɨ. 9 Bə kə kɨ tɨdi bə gwɨ́ yɛnɨ lə, ‘Ablaham na taa waha.’ Ntə bəŋ lə naji ɨ Nyɔ fichə ta yiŋ, ɨ yi tsu beŋ bə Ablaham lə. 10 Bə kkə̂ lə fɔ wa buganə bitɨ fəchiŋ. Kɨtɨ kɨchi kɨ na munchɛhɛ muntaŋ mu ndzeŋe, bə́ jiba bə́ gbe kɨ dze nə gaŋ wɨ ba tiŋ'ɨ. 11 Nna nchɛsɛ bəŋ biɔ ndzɨ bə' fichə shəŋ yɛnɨ. Bəmanɨ, miɨ wu na ba wa mɨ nəjiŋ na ko ba ya mɨ. Ŋkə ŋkwətsə wu naji ntɔ bikpa bihi. Yu jiwa yu chɛse bəŋ ji Kɨn'yɨntɨ kɨ Ntsaaŋ ntɨŋ bə boso ntɨŋ. 12 Yu na keŋkɛ kɨyəsə kɨhɨ kaŋ kɨ yu jiwa ɨ yu wɨ jiŋ su, ɨ yu yənsɨ dɨ wu yu' wɨtɨ wa ba banchɛ jiŋ ga kɨjiŋə ntɨŋ, tə kɔ miu wa ba tiŋ boso ntɨŋ wu na fiɨ nyimə sɨŋ.”
Jɔŋ chɛse Jisɔs biɔ
13 Lə Jɔŋ kɨ chɛsɛ bənɨ biɔ manɨ, Jisɔs dza nə sha yi Galili ntɨŋ ba gəŋ fə Kɨnchɛŋ kɨ Jɔdan ku lə Jɔŋ chɛse yu biɔ tɨ. 14 Bəmanɨ Jɔŋ kɨ nɨnntɨ, yu tɨdi lə, “Na wə wu naji lə wə chɛse mɨ biɔ, wə tsu kɨ ba ji mɨ lɨ nəŋɨlɨ?” 15 Jisɔs chi bə yu lə, “Gâ fi kɨ ji manɨ fɛŋ. Na nə nyi dzə ntɨŋ yi kə naji lə kə fə fiɔŋ fichi diəŋ Nyɔ nəfiə.” Bəma Jɔŋ tə bɨŋ ba chɛse Jisɔs biɔ. 16 Mɨ kɨsɨkɨ Jisɔs dza kɨ foto nə ŋgɔŋ ma ntɨŋ. Nɨ yu nə̀ foto, bɔlu bu gulɔ, yu ŋəŋ Kɨn'yɨntɨ kɨ Nyɔ lə nɨ kɨ na shichi kɨ ba nɨ fiŋkukulu, kɨ ba ba shi yu wɨ. 17 Fi fɔ lə diɛ nə̀ chanyɛ nə bɔ́ lə, “No na Wɛnɛ. Yu na ji shəŋ yɛŋ. Nna ŋ'woko buni bə yu kɨtso.”