Maliya bɛyɛ Jisɔs
2
Tsa ya wɨ nə̀ ji, kɨlaŋ fɔ lə bə́ bɔmbiɛ bənɨ bəchi bə na ji bituŋ bi sha yi Lom ntɨŋ. Kɨlaŋ ka nə̀ fɔ nə Kaisa Ɔgɔstu lɨ wu nə̀ ji Ŋkuŋ wubəŋ sɔ. 2 Mbɔmbiɛ nyi nə̀ yi fiəfiə tsa yi Kwilinus nə̀ ji buŋkuŋ bu Lom bɨŋ, yu sakɨ sha yi Silia. 3 Bəma, miɨ chi kɨ tsu kɨtuŋ kɨhɨ ntɨŋ, lə yu bɔndu yɨ wuhu bə́ bɔmbiɛ yu.4 Jɔsɛ dza tɨ nə Nadzalɛt kɨtuŋ kɨdɔ sha yi Galili ntɨŋ, ba bəndɨ gəŋ Bɛtɨlhɛm kɨtuŋ kɨ sha yi Judɛya ntɨŋ, dɨ wu bə́ nə̀ bɛyɛ Ŋkuŋ Dɛbi. Yu nə̀ gəŋ sɔ ndzɨ yu nə̀ ji miɨ nə kɨtsɔŋ kɨ Ŋkuŋ Dɛbi lə ntɨŋ. 5 Jɔsɛ nə̀ gɨntɨ bɔ bə Maliya wu yu nə̀ bɛɛ lə yu kɨ ji kpansɨ, nə̀ ji Maliya ji bə tɔ. 6 Nɨ bɔ nə̀ gəŋə fɔ sɔ, lə tsa yi Maliya yi bɛyɛ ba kwətsə, 7 yu bɛyɛ wene wu fiəfiə ɨji wɛŋ wu nɨnsə, yu kwɨdi yu bindzu ntɨŋ, ba memɛ kələ wu nyɛŋ'ə ntɨŋ, ndzɨ bɔ nə̀ fiəŋkə dɨ tsɔŋ yi bənɨ bə ŋkɔŋ'ə ntɨŋ.
Nchinda wu Nyɔ tə kɨbɛyɛ bə bəntɨŋkɨ bə shíŋ'ə
8 Tsa ya wɨ nə̀ ji, bəntɨŋkɨ bə shíŋ'ə bədɔ ji dia wa wɨ, bɔ kɨki shíŋ yibɔlə bbutsu. 9 Nchinda wu Baba bu lafu bɔ nəfiə, Kɨŋgbooŋ kɨ Nyɔ lə tsalə dɨ wu bɔ nə̀ ji wa, nyiŋ kwe bɔ kɨtso. 10 Bəmanɨ, nchinda wa tə bə bɔ lə, “Bə kə̂ lekɛhɛ. Bə wɔ̂, mɨ mba ji bə shɔŋ yi ndzeŋe bəŋ'ɨ, yi ná nya kɨnlaŋ kɨbəŋ bə bənɨ bəchi. 11 Butsu buŋ ndɛŋ, bə́' bɛyɛ Nchitə kɨtuŋ kɨ Ŋkuŋ Dɛbi lə ntɨŋ, wu na ji Klistu Baba. 12 Fiŋ na fiɔŋ fi jifia fi donchɛ wɛŋ wa bə bəŋ. Bə jiba bə gəŋ ŋəŋ yu wɨ bə́' kwɨdi bindzu ntɨŋ ba memɛ yu kələ wu nyɛ́ŋ'ə ntɨŋ.”
13 Mɨ kɨsɨkɨ, bɔ buŋ nchinda wu Nyɔ wa bə kɨntsu kɨ bədɔ lə kɨyɛŋ bɔ nyaa kɨŋkuntə bə Nyɔ bɔ tɨdi lə,
14 “Bubəŋ kɨ ji bə Nyɔ wu ji bɔ́
budə kɨ ji sɛŋ koso bə bənɨ bə Nyɔ na woko buni bə bɔ.”
15 Tsa yi bənchinda bə Nyɔ lə nə̀ shə bəntɨŋkɨ bə shíŋ'ə ba ba bəndɨ tsu bɔ́, bəntɨŋkɨ bə shíŋ'ə ba chanyɛ bə gwɨ́ yibɔlə lə, “Kə gə̂ŋ sɔ Bɛtɨlhɛm fɛŋ no, kə gə̂ŋ ŋəŋ fiɔŋ fi fɔɔ fiŋ, Nyɔ fə kə kkə.”
16 Mɨ kɨsɨkɨ, bɔ bu sokiɛ bə ŋgəŋ, bɔ gəŋ ŋəŋ Jɔsɛ bə Maliya bə wɛŋ wa, yu' me kələ wu nyɛ́ŋ'ə ntɨŋ. 17 Nɨ bɔ ŋəŋə manɨ, bɔ tə biɔŋ bichi bi nchinda wu Nyɔ sə tədiə bə bɔ tsukɔ wɛŋ wa wɨ. 18 Kɨgəsə wɨŋ bənɨ bəchi nə̀ wɔɔ ba biɔŋ bi bəntɨŋkɨ bə shíŋ'ə ba' tədiə bə bɔ. 19 Bəmanɨ, Maliya wɔ ba ga shəŋ kɨ gɔmbiɛ tsá chi. 20 Bəntɨŋkɨ bə shíŋ'ə ba fichə kɨ tsu jiŋ, bɔ nyaa Nyɔ bubəŋ, bɔ sɛnti yu ndzɨ bɔ nə̀ gəŋ ba ŋəŋ biɔŋ bichi diəŋ nɨ nchinda wu Nyɔ nə̀ nachɛ.
Bə́ gəŋ ba nya Jisɔs bə Nyɔ tsɔŋ yi bintɔfiɛ ntɨŋ
21 Lə Wɛŋ wa fɔ díɔ yaŋ, bə́ sɔmbu yu dzɔ, ba dɔŋ yɨ wuhu lə Jisɔs, yɨ wuŋ ji wu nchinda wu Nyɔ nə̀ tədiə fə mɛni wa tə fiəfiə tɔ.
22 Tsa yibɔ ba kwətsə yi fənə bintɔfiɛ bi wwɔlɔsɨ gwɨ́ yibɔlə nɨ kɨlaŋ kɨ Mose lə nə̀ tɨdi. Bɔ dze wɛŋ wa ba bəndɨ bə yu sɔ Jɛlosalɛm lə bɔ nya bə Baba. 23 Fiŋfi nə̀ nɨ fi nə̀ ji bubɔndɔ kɨŋwatɨ kɨ Baba lə kɨ bilaŋ'ə ntɨŋ lə,
“Miɨ bɛyɛ wɛŋ wu fiəfiə ɨji wɛŋ wu nɨnsə,
yu nya, wɛŋ wa kɨ ji wu Baba.”
24 Bɔ nə̀ gəŋ lə bɔ fə bintɔfiɛ biŋ bə muŋkukulu muŋfɛŋ, makə bə biyakiki bifɛ biəlɨ nɨ fi nə̀ ji kɨŋwatɨ kɨ Baba lə kɨ bilaŋ'ə ntɨŋ.
25 Tsa ya wɨ nə̀ ji chɛku wudɔ ji Jɛlosalɛm, bə́ tsɨsə yu lə Semiɔn. Yu nə̀ ji miɨ wu diəŋ, yu fɨtɨ nɨ Nyɔ na tɨdi, yu wokɔ miɨ wu ná ba dɨshɛ shəŋ yi bənɨ bə Isla lə. Kɨn'yɨntɨ kɨ Ntsaaŋ nə̀ ji yu wɨ, 26 kɨ fə yu kkə lə kkpə ná dzɛhɛ yu, yu bambi kə ŋəŋkəhə Nchitə wu Baba wu yu nə̀ kaa. 27 Kɨn'yɨntɨ kɨ Ntsaaŋ fə Semiɔn gəŋ tsɔŋ yi bintɔfiɛ ntɨŋ. Jɔsɛ bɔ bə Maliya ba bə wɛŋ tsɔŋ yi bintɔfiɛ ntɨŋ lə bɔ fə nɨ kɨlaŋ na tɨdi. 28 Semiɔn ləkə wɛŋ wa ba kukɔ lɨ ba kɨ nya Nyɔ kɨŋkuntə, yu tɨdi lə,
29 “Baba, nɨ wə fəə ŋka yɔhɔ ba ba kwətsə lɨ,
dzê la miɨ wɔhɔ wu nɨŋ budə ntɨŋ.
30 Yəsɨ yɛmɨ' ŋəŋ Nchitə
31 wu wə faŋə wɨ, bənɨ bəchi' ŋəŋ tɨ yu.
32 Yu ná kɨ ji kɨŋgbooŋ bə bənɨ bə na jimiɛhɛ Bəisla,
fə bɔ kkə tɨ wə
ba kɨ fɨtɨ bə́ toto yɨ wu bənɨ bɔhɔ Bəisla lə bɔ́.”
33 Chɛ wɛŋ bə mə wɛŋ wɔ biɔŋ bi Semiɔn chanyɛ wɛŋ no bɨŋ, kɨgəsə wɨŋ bɔ. 34 Semiɔn nya bɔ budə ba tə bə Maliya mə wɛŋ lə, “Nyɔ nə sa wana no, mba yihi jiya yi fə bənɨ bə Isla kɨyɛŋ kɨgbɔyɛ, ɨ bədɔ kɨ lɨmi buləmiə. Yu na ji ndonchɛ yi bənɨ ná kɨ chanyɛ biɔŋ yu wɨ. 35 Bəma, fiŋfi tə kɨ donchɛ biɔŋ bi bənɨ na nyələ bɔ shəŋ. Biɔŋ biŋ bichi ná fɨtɨ ɨ shəŋ yɔhɔ kɨ ji wələ bə́' bəmbɨ yi bə fisɔ.”
36 Tsa ya wɨ tɨ nə̀ ji kpansɨ wudɔ ji bə́ tsɨsə yu lə Ana, ɨji miɨ wu shɔŋ yi Nyɔ. Yu nə̀ ji wɛŋ wu Fanwɛl, miɨ nə kɨtsɔŋ kɨ Ashɛl lə ntɨŋ. Kpansɨ wa nə̀ tɛ kɨtso. Yu nə̀ jiŋ bə nomo biya fumba kwa, nomo bu kkpə. 37 Yu kətə fihi kpansɨ ŋku, yu ji tsɔŋ yi bintɔfiɛ ntɨŋ, yu kuntəə Nyɔ bbutsu bə bbushə, yu chinəə gwɨ yihi bidiəŋ, yu tsɨsə. Biya bihi nɨ kpansɨ ŋku nə̀ ji gbɨ yaŋ ntse bina (84). 38 Kwa tsa ya wɨ yi bɔ nə̀ ba bə wɛŋ tsɔŋ yi bintɔfiɛ ntɨŋ, kpansɨ wa nə̀ ŋəŋ bɔ wɨ ba nya kɨmbafə bə Nyɔ, yu chanyɛ tsukɔ wɛŋ no wɨ bə bənɨ bəchi bə nə̀ wokɔ tsa yi Nyɔ ná kɨ fosɔ bənɨ bə Jɛlosalɛm nə ŋgə ntɨŋ.
39 Tsa yi Jɔsɛ bə Maliya nə̀ kanə biɔŋ bichi nɨ kɨlaŋ kɨ Nyɔ lə nə̀ tɨdi, bɔ tsu jiŋ Nadzalɛt, kɨtuŋ kɨbɔlə ntɨŋ sha yi Galili ntɨŋ. 40 Wɛŋ wa kɨ ko yu keŋkɛɛ buŋga, yu yi bə bufɨ bubəŋ, kɨbandə kɨ Nyɔ lə ji yu wɨ.
Jisɔs gəŋ ba shə tsɔŋ yi bintɔfiɛ yi Nyɔ ntɨŋ
41 Chɛ Jisɔs bə mɛni nə̀ ba bɔ kɨ bɨndɨ Jɛlosalɛm biya bichi Kɨgbeyɛ kɨ Nchɛnəbɨŋ'ə lɨ. 42 Lə Jisɔs fɔ biya yɔɔ ntse bifɛ, bɔ chi bəndə kɨgbeyɛ kɨsu lɨ nɨ bɔ nə̀ ba bɔ kɨ bɨndɨ. 43 Lə bɔ diə kɨgbeyɛ kasɨ lɨ ba kɨ tsu jiŋ, Jisɔs shə Jɛlosalɛm, bəmanɨ tɨɨ bə mɛni ŋkkə sɨŋ. 44 Bɔ gəndə butsu buchidi, bɔ kkɨ yibɔ lə yu wa bənɨ bə bɔ bə bɔ nə̀ gəndəə ntɨŋ. Bɔ gbɔ kɨ noŋko yu bəwəmɛni ntɨŋ bə mənshə məmbɔlə ntɨŋ. 45 Bɔ nɔŋ sɨŋsɨŋ ba ji yu kə ŋəŋkəhə. Bɔ fichə tsu Jɛlosalɛm lə bɔ nɔŋ yu sɔ. 46 Lə kɨ ji díɔ tɛ bɨŋ dze nə bɔ nə̀ gbɔɔ kɨ noŋko yu, bɔ ŋəŋ yu wɨ yu ji tsɔŋ yi bintɔfiɛ ntɨŋ, yu' jiŋ bə bənɨ bə nə̀ tɨfiə, yu woko bitɨfiɛ, yu bishɛ bəmbi. 47 Bənɨ bəchi bə nə̀ woko yu kɨ ji bə kɨgəsə kɨ wɨŋə kɨtso ndzɨ yu nə̀ kkɨ biɔŋ kɨtso, yu fichəə bəmbi diəŋ. 48 Nɨ mɛni bə tɨɨ nə̀ ŋəŋə yu wɨ, kɨgəsə wɨŋ bɔ kɨtso. Mɛni bəndɨ yu ba tə lə, “Wɛŋ, wə finchə nəŋ bə bɨ mɛ? Bô ŋəŋ, bɨ bə chaa kə sə ndzaŋkɔ kə noŋko wə.”
49 Yu chi lə, “Bə nə noŋko mɨ ndzɨ la? Bə nə kkəhə lə nna nji lə ŋkɨ nji tsɔŋ yi Taa ntɨŋ?” 50 Bəmanɨ, bɔ jikə kkə fiɔŋ fi yu chanyɛ.