Jisɔs fə ŋgɔŋ tsu mbiŋ
2
Lə kɨ ji díɔ bɨŋ tɛ, bə́ kɨ fɨtɨ kɨgbeyɛ kɨ kpansɨ wufa lə kɨtuŋ kɨ Kana ntɨŋ, sha yi Galili ntɨŋ, mə Jisɔs ji mɨ. 2 Nə̀ ji bə́' bəndɨ tɨ Jisɔs bɔ bə beŋ buhu bə nɨŋ'ə kɨgbeyɛ ka ntɨŋ. 3 Lə mbiŋ ka, mə Jisɔs tə bə yu lə, “Mbiŋ məmbɔlə' ka.” 4 Jisɔs chi bə yu lə, “Kpansɨ, wə na tɨdi mɨ ndzɨ la? Tsa yɛmɨ bambi ya kə kwətsə.” 5 Mɛni tə bə bənɨ bə kɨjɛnɛ lə ba lə, “Mɛ la fi yu tədiə lə bə fə, bə fə fi.” 6 Nə̀ ji kənsɨ ji mɨ buse, bə́' fə bə ta. Kənsɨ yiŋ ji yi Bəju nə̀ ba bɔ kɨ galɨ ŋgɔŋ yi ntɨŋ bɔ wwo gwɨ́ su fə bɔ kɨ tsalə Nyɔ nəfiə. Kpənsɨ mo nə̀ dzee nɨ bəlita bə ŋgɔŋ'ə gbɨfumba ntse bətɨŋ (75) gəŋ fɔ bəlita gbɨ bə yɔɔ ntse bətɨŋ (115). 7 Jisɔs tə bə bənɨ bə kɨjɛnɛ lə ba lə, “Bə tɔ̂ ŋgɔŋ ba yishə kənsɨ yiŋ ntɨŋ.” Bənɨ ba yisəsɨ kənsɨ ya bə ŋgɔŋ. 8 Yu tə bə bɔ lə, “Bə kɔ̂tu məndɔ fɛŋ bə gəŋ nya bə chɛ kɨgbeyɛ.” Bɔ kɔtu ba gəŋ nya lɨ. 9 Lə chɛ kɨgbeyɛ ləkə ba fɔ ŋgɔŋ mə sə tsɔ ma mbiŋ, yu masə lə mɛŋ mbiŋ fɔ nə məŋ lə. (Bəmanɨ, bənɨ bə kɨjɛnɛ lə bə nə̀ kɔtɔ ba ŋgɔŋ ma nə̀ kkɨ lɨ dɨ wu mɔ nə̀ fɔɔ.) Chɛ kɨjɛnɛ bəndɨ nomə kpansɨ wufa wa, 10 ba bi bə yu lə, “Bənɨ ba bɔ sa jɛ ji mbiŋ mə ndzeŋe kɨgbeyɛ ntɨŋ, tsa yi bənɨ sə mwɔ kɨtso, bɔ tə jɛ mə na ji ma kə ndzeŋkɛhɛ. Wə tsu ba ga fiɔhɔ mbiŋ mə ndzeŋe kɨ ba bə mɔ ji fɛŋ'ɨ” 11 Fiŋ nə̀ fiɔŋ fi fiəfiə fi yu nə̀ fəə fi donchɛ bubəŋ buhu. Yu nə̀ fə fiɔŋ fiŋ Kana sha yi Galili ntɨŋ. Nɨ yu nə̀ fəə manɨ, fi tə donchɛ bubəŋ buhu, beŋ buhu bə nɨŋ'ə ga shəŋ yu wɨ.
12 Nəjiŋ wusu, Jisɔs dza ba shi Kapanaum bə mɛni bə bəwəmɛni bə nɨnsə ma beŋ buhu bə nɨŋ'ə, bɔ bə bɔ jiŋ sɔ díɔ tsəsɨ.
Jisɔs kɔŋ bənɨ bə shɨ lə nə mbaŋ wu tsɔŋ yi bintɔfiɛ ntɨŋ
13 Lə butsu bu kɨgbeyɛ kɨ Bəju lə kɨ bə́ nə̀ tsɨsə lə Nchɛnəbɨŋ kɨ ba gwɨgwɨ, Jisɔs dza ba bəndɨ Jɛlosalɛm. 14 Yu gəŋ ba be mbaŋ wu tsɔŋ yi bintɔfiɛ ntɨŋ ba ŋəŋ bənɨ bə nə̀ taŋŋə bənaŋ bə shíŋ bə muŋkukulu ma bənɨ bə nə̀ yashɛnɨ kpə, ɨji bɔ' jimiɛ. 15 Yu dze gɨ ba fə fintɨ su, kɔŋ bɔ bəchi nə nɔ ba kɔŋ ma shíŋ bə bənaŋ foso nə mbaŋ wu tsɔŋ yi bintɔfiɛ ya ntɨŋ. Yu tsaŋ tɨ kpə wu bənɨ bə nə̀ yashɛnɨ kpə lə ba gboshɛ bita bibɔlə bi shɨ lə 16 ba tə bə bənɨ bə nə̀ taŋŋə ba muŋkukulu lə, “Bə dzê biɔŋ biŋ bə dza bə bi nə mɛ! Bə kə̂ dzɛɛ tsɔŋ yi Taa ba chi lə yi tsu ji yi shɨ.” 17 Lə yu tə manɨ, beŋ buhu bə nɨŋ'ə tə gɔmbiə fiɔŋ fi nə̀ ji bubɔndɔ Kɨŋwatɨ kɨ Nyɔ lə ntɨŋ lə, “Kɨgaŋ kɨ nna ŋkeŋkɛ tsɔŋ yɔhɔ wɨ naji ɨ kɨ kasɨ bə mɨ.”
18 Fó yi Bəju lə bi bə yu lə, “Fiɔŋ fi na donchɛ bubəŋ bwɔhɔ fi naji ɨ wə fə fi donchɛ bɨ lə bə́ nə̀ nya wə buŋga bu fənə fiŋ na la?” 19 Jisɔs chi bə bɔ lə, “Bə kpôdiə tsɔŋ yi bintɔfiɛ nyi, njiwa ndze díɔ tɛ ba chi yi wə.”
20 Bəju ba bi bə yu lə, “Fi nə̀ dze biya mbaania ntse buse bə ŋ'wɛyɛ tsɔŋ yi bintɔfiɛ nyi, wə jiwa wə dze yɔhɔ ji díɔ tɛ ba chi yi wə?” 21 Bəmanɨ, Jisɔs nə̀ chanyɛɛ tsɔŋ yi bintɔfiɛ nyi, ɨji gwɨ yihi. 22 Tsa yi yu nə̀ dzakɔ nə kkpə lɨ, beŋ buhu bə nɨŋ'ə tə se lə fiŋ na fiɔŋ fi yu nə̀ tədiə. Bɔ bɨŋ fiɔŋ fi na ji Kɨŋwatɨ kɨ Nyɔ lə ntɨŋ, bɔ bɨŋ tɨ nchanyɛ yi Jisɔs nə̀ chanyɛ bə bɔ.
23 Lə Jisɔs kɨ ji Jɛlosalɛm Kɨgbeyɛ kɨ Nchɛnəbɨŋ'ə ka ntɨŋ, bənɨ kɨyɛŋ ga shəŋ yu wɨ ndzɨ biɔŋ bi nə̀ donchɛɛ bubəŋ buhu bi yu nə̀ fɨtɨ. 24 Bəmanɨ, Jisɔs nə̀ kə nyaha fihi gwɨ bə bɔ, ndzɨ yu nə̀ kkɨ bənɨ bəchi nɨ bɔ na ji. 25 Yu nə̀ sɛhɛ tɨmo lə miɨ wudɔ tə yu kɨ miɨbəwəŋ'ə, ndzɨ yu kɨbɛɛ nə̀ kkɨ fiɔŋ fi miɨbəwəŋ na keŋkɛ yu shəŋ.