Jisɔs be Jɛlosalɛm nɨ Ŋkuŋ
21
Lə Jisɔs bɔ bə beŋ buhu bə nɨŋ'ə kɨ foto gwɨgwɨ fə Jɛlosalɛm ku, bɔ ji Bɛtfash Dzo yi Bitɨ bi Ɔlif lə bɨŋ, yu faŋ beŋ buhu bə nɨŋ'ə bədɔ bəfɛ 2 ba tə bə bɔ lə, “Bə gə̂ŋ kɨtuŋ ka ntɨŋ sa fiə, bə jiba bə gəŋ ba bu ŋəŋ sɔmbwa wɨ, ɨji bə́' su, wene ji fə yu ku, ɨ bə yanshɛ ba ba bə bɔ. 3 Ɨ miɨ wudɔ bi fiɔŋ bə bəŋ, bə chi bə yu lə Miɨ Wubəŋ na keŋkɛ nɨŋ su, ɨ yu bu tɔkaŋ tsa miu, ɨ bə ba bə bɔ.” 4 Fiŋfi nə̀ ji mɛni bə mfə lə fi ba fɔ diəŋ nɨ miɨ wu shɔŋ yi Nyɔ wudɔ nə̀ chanyɛɛ, yu tɨdi lə,5 “Miɨ tə̂ bə kɨtuŋ kɨ Dzayɔnª lə,
‘Bə bô bə ŋəŋ, Ŋkuŋ wɛnɨ bawa bəŋ'ɨ.
Yu' dze gwɨ yihi koso,
ba bəndɨ sɔmbwa bɨŋ, ɨji wɛŋ wu sɔmbwa,
sɔmbwa wu na bambi wubiɨ.’”
6 Lə beŋ bə Jisɔs lə bə nɨŋ'ə ba gəŋ, bɔ fə diəŋ nɨ yu nə̀ chanyɛ. 7 Bɔ ba bə sɔmbwa wa ma bə wene wa ba tsu bindzu bibɔlə bɔ bɨŋ, Jisɔs bəndɨ ba jiŋ wudɔ bɨŋ, kɨ gɨntɨ. 8 Kuta wu bənɨ kɨ tsuku bindzu bibɔlə dzə, bədɔ shɔkiɛ chɛ́ yi bitɨ lə bɔ tsuku. 9 Kuta wu nə̀ gɨntɨ Jisɔs nəfiə bə wu nə̀ biəlɨ nəjiŋ kɨ wudiə lə, “Lilililililiª, bubəŋ kɨ ji bə wɛŋ wu Ŋkuŋ Dɛbi lɔɔɔ! Budə kɨ ji bə miɨ wu na ba yɨ wu Baba lə lɨ lɔɔɔ! Lililililili, bubəŋ kɨ ji bə Nyɔ wu ji bɔ́ lɔɔɔ!”
10 Lə Jisɔs gəŋ fɔ Jɛlosalɛm, kɨtuŋ ka kɨchi nɨkə. Bənɨ kɨ masə, bɔ bishɛ lə, “No na yəŋ?” 11 Kuta wu bənɨ wa chi lə, “Na Jisɔs miɨ wu shɔŋ yi Nyɔ wu fɔɔ nə Nadzalɛt sha yi Galili ntɨŋ.”
Jisɔs kɔŋ bənɨ bə shɨ lə nə mbaŋ wu tsɔŋ yi bintɔfiɛ ntɨŋ
12 Lə Jisɔs gəŋ mbaŋ wu tsɔŋ yi bintɔfiɛ ntɨŋ, yu kɔŋ bənɨ bəchi bə nə̀ taŋŋə bə bə nə̀ taŋkɨ biɔŋ mɨ, yu gboshɛ bita bi bənɨ bə nə̀ yashɛnɨ kpə lə ba gboshɛ tɨ bitɨ bi bənɨ bə nə̀ taŋŋə biyakiki lə. 13 Yu nə̀ koŋko bɔ yu tɨdi lə, “Fi na ji bubɔndɔ Nyɔ tɨdi lə, ‘Bə́ ná kɨ tsɨsə tsɔŋ yɛmɨ lə tsɔŋ yi kɨntsɨsɨ.’ Bə fə yi tsu ji kɨnyələ kɨ bənɨ bə buyi lə.”
14 Jisɔs kɨ ji mbaŋ wu tsɔŋ yi bintɔfiɛ ntɨŋ, bənyimə bə bəŋkpesɛ ba yu wəmiəsɨ bɔ. 15 Bəmanɨ, lə bəchɛ bintɔfiɛ bəbəŋ bə bənɨ bə nə̀ tɨfiə bilaŋ bi Nyɔ lə ŋəŋ biɔŋ bi kɨgəsə kɨ wɨŋə lə bi yu nə̀ fɨtɨ, bə nɨ beŋ bəbiɨ na wudiɛ mbaŋ wu tsɔŋ yi bintɔfiɛ ntɨŋ bɔ tɨdi lə, “Lilililili, bubəŋ kɨ ji bə wɛŋ wu Ŋkuŋ Dɛbi lɔɔɔ,” shəŋ lɔ bɔ bulɔnɔ. 16 Bɔ bi bə Jisɔs lə, “Wə na woko tɨ fiɔŋ fi beŋ bɛŋ na tɨdi?” Yu chi bə bɔ lə, “Ɨŋŋ, nna ŋ'woko lɨ. Kɨjilə bə kə sa ba tanchə fiɔŋ fi bə́ nə̀ bɔndɔ lə, ‘Nyɔ' fə kɨŋkuntə kɨ ndzeŋe kɨ foto nə beŋ bəbiɨ dze, ma tɨ bə beŋ bə na bambi bɔ mambu mbəndɨ?’” 17 Jisɔs jiji ba shə bɔ ba fɔ nə kɨtuŋ ka ntɨŋ, yu gəŋ kɨtuŋ kɨ Bɛtani ntɨŋ ba me sɔ.
Jisɔs nya kɨtɨ kɨ muntaŋ'ə kɨdɔ lɔŋ
18 Lə kɨ ji fuwɔki, nɨ Jisɔs nə̀ fichɛɛ yu tsu kɨtuŋ kɨ Jɛlosalɛm ntɨŋ, ɨji dzɔŋ wo yu. 19 Yu ŋəŋ kɨtɨ kɨ muntaŋ'ə kɨdɔª fə dzə ku, kɨ bə́ nə̀ ba bə́ kɨ diɨ muntaŋ nə kɨ wɨ, yu gəŋ mɨ, bəmanɨ yu jikə ŋəŋkəhə fiɔŋ kɨ wɨ, yu ŋəŋ kwa ɨji nyí su kɨ wɨ. Yu bu nya kɨtɨ ka lɔŋ tə lə, “Naji wə ná shəshə muŋ fintaŋ kə!” Mɨ kɨsɨkɨ, kɨtɨ ka bu wɨŋ. 20 Lə beŋ bə nɨŋ'ə bə Jisɔs lə ŋəŋ manɨ, kɨgəsə wɨŋ bɔ. Bɔ kɨ masə lə, “Na la fi fəə fə kɨtɨ ka kkpəyə tsa miu mɛ?” 21 Jisɔs chi bə bɔ lə, “Ntə bəŋ yɛyi lə, ɨ bə ga shəŋ Nyɔ wɨ, ba jikə kɨ masə, ɨ bə jikə fəkə kwa ji fiɔŋ fi mɨ mfəə bə kɨtɨ kɨŋ. Ɨ bə tə tɨmo bə dzo nyi lə, ‘Wôɔ nə mɛ wə gəŋ gbɔ ŋgɔŋ məmbəŋ ntɨŋ,’ ɨ fi kɨ ji manɨ. 22 Ma la fi bə na tsɨsə bə nendee, bə ná keŋkɛ lɨ fi jilə bə' ga shəŋ Nyɔ wɨ.”
Bə́ bi dɨ wu buŋga bu Jisɔs lə fɔɔ
23 Jisɔs chi tsɔ ba be mbaŋ wu tsɔŋ yi bintɔfiɛ ntɨŋ, bəchɛ bintɔfiɛ bəbəŋ bə bənɨ bə sakɨ kɨtuŋ kɨ Bəju lə ba ba ŋəŋ nɨ yu na tɨfiə bənɨ, bɔ bi bə yu lə, “Wə dze buŋga nə məŋ tə kɨ fɨtɨ biɔŋ biŋ? Ə nya yəŋ wə buŋga bwa?” 24 Jisɔs chi bə bɔ lə, “Njiwa mbi tɨ fiɔŋ bə bəŋ. Ɨ bə chi lɨ, ntə bəŋ miɨ wu nya mɨ buŋga lə ŋkɨ mfɨtɨ biɔŋ biŋ. 25 Jɔŋ nə̀ chɛsɛ bənɨ biɔ ɨji buŋga bwa nə̀ fɔ nə məŋ? Nə̀ Nyɔ wu nə̀ nya maa miɨbəwəŋ lə?” Nɨ yu biɛ manɨ, bɔ kɨ kpənənɨ bɔbɔ, bɔ tɨdi lə, “Ɨ kə chi lə nə̀ nya Nyɔ, ɨ yu bi bə bɨ lə nə̀ fə la lə kə kə bɨmiə bə Jɔŋ? 26 Bəmanɨ, naji ɨ kə chi kə lə, ‘Nə̀ nya miɨbəwəŋ,’ ndzɨ kə na lete kuta wu bənɨ no, nɨ bɔ bəchi' bɨmiə lə Jɔŋ nə̀ miɨ wu shɔŋ yi Nyɔ.” 27 Bəma, bɔ chi bə Jisɔs lə, “Kə na kkəhə.” Jisɔs tə bə bɔ lə, “Tə naji ntə tɨ bəŋ miɨ wu nya mɨ buŋga lə ŋkɨ mfɨtɨ biɔŋ biŋ kə.”
Ŋgaŋ tsukɔ beŋ bənɨnsə bəfɛ wɨ
28 Jisɔs gəŋ fiə ba bi lə, “Bə na gɔmbiɛ lə la tsukɔ fiŋ wɨ? Miɨ wudɔ nə̀ ji bə beŋ buhu bənɨnsə bəfɛ. Yu tə bə wɛŋ wu fiəfiə wa lə, ‘Wɛnɛ, lɛ̂ wə nɨŋ kə ndɛŋ.’ 29 Wɛŋ wa chi lə, ‘Ŋgɨntəhə.’ Bəmanɨ yu jiji ba fichə shəŋ yihi ba gəŋ sɔ kə kɨ nɨntɨ. 30 Miɨ wa tə bə wɛŋ wu nəjiŋ wa fiɔŋ fi yu sə tədiə tɨ bə wu fiəfiə wa. Wa chi bə yu lə, ‘Taa, Njiwa ŋgəŋ.’ Bəmanɨ, yu jikə gəŋkə. 31 Nə beŋ bəfɛ bɛŋ ntɨŋ, wu nə̀ fəə fiɔŋ fi tɨɨ nə̀ se na wu la?” Bɔ chi lə, “Na wu fiəfiə wa.” Jisɔs tə bə bɔ lə, “Ntə bəŋ yɛyi lə, bənɨ bə na kwete kɨŋwatɨ ma bənɨ bə ndzenɛ lə beke ba buŋkuŋ bu Nyɔ lə ntɨŋ nə bəŋ'ɨ. 32 Nna nchanyɛ mɛ ndzɨ Jɔŋ Nchɛsebiɔ nə̀ ba lə yu donchə bəŋ dzə yi diəŋ, bə jikə bɨmiə bə yu, bəmanɨ bənɨ bə kwete kɨŋwatɨ bə bənɨ bə ndzenɛ lə bɨŋ bə yu. Lə bə ŋəŋ tɨmo nɨ bɔ bɨmiə manɨ, bə jikə fichə shəŋ yɛnɨ ba bɨŋ tɨ bə yu.”
Ŋgaŋ tsukɔ bənɨ wɨ, bə miɨ wudɔ nə̀ galə kə
33 Jisɔs chi chanyɛ lə, “Bə wɔ̂ ŋgaŋ wudɔ. Chɛ kə wudɔ nə̀ nɨŋ kə wu muntaŋ'ə mu bə́ fɨtɨ mbiŋ su, yu fə mbaŋ ba fiədiɛ lɨ ba chiŋ kɨsɔ kɨ mbiŋ'ə. Yu tuŋ kɨntalə miɨ wu ŋkɨ lɨ, wu kɨ kɨki kə wa, ba ga bənɨ bədɔ sɔ kə, yu dza ba gəŋ kɨtuŋ kɨdɔ ntɨŋ. 34 Lə tsa yi wəŋə muntaŋ mwa kwətsə, yu faŋ bənɨ buhu bə nɨŋ'ə bənɨ ba lɨ lə bɔ gəŋ ləkə muhu muntaŋ. 35 Lə bɔ gəŋ, bənɨ bə bə́ nə̀ galə ba kə kwe bɔ ba kə wudɔ, kkpɨsɨ wudɔ ba tumiɛ wudɔ bə ta. 36 Yu chi faŋə bədɔ bənɨ bə nɨŋ'ə bə na yɛnti bɔ yakɨ bə fiəfiə ba, bənɨ ba chi fəə diəŋ nɨ bɔ nə̀ fəə bə bə fiəfiə ba. 37 Nəjiŋ wusu yu faŋ ji wene, yu gɔmbiɛ lə bɔ jiba ɨ bɔ gəŋ kuntə wene no. 38 Bəmanɨ, yu gəŋ, bənɨ ba ŋəŋ yu wɨ ba chanyɛ bɔbɔ lə, ‘No na ndiəku wu chɛ kə wuŋ. Bə bâ kə kkpɨsɨ yu ba diə bishəŋə bia.’ 39 Bɔ kwe yu foso nɔ nə kə ba kkpɨsɨ yu, ba jiŋ biɔŋ bia bɨŋ.”
40 Nɨ Jisɔs maa mɛ, yu bi lə, “Chɛ kə wa ná ba ɨ yu fə nəŋ bə bənɨ ba?” 41 Bɔ chi lə, “Yu ná ba ba jishi munɨntə mwa ba ga ji bənɨ bədɔ chichi sɔ kə bə ná kɨ nya muhu muntaŋ tsa yi wəŋə bɨŋ.” 42 Jisɔs bi bə bɔ lə, “Bə kə sa tanchɛ nə Kɨŋwatɨ kɨ Nyɔ lə ntɨŋ lə,
‘Ta wu bənɨ bə na wɛyɛ nə̀ nɨŋŋə wa,
nə̀ tsu ta wu bo wu tsɔŋ'ə.
Fiŋfi ji mfə yi Baba,
kə jiŋgə kɨgəsə wɨntɨ bɨ?’
43 Mɨ ŋkɨ ntɨdi bə bəŋ lə, Nyɔ jiwa yu ləkə buŋkuŋ buhu nə bəŋ kaŋ ba nya ji bə kɨtuŋ kɨ ná kɨ fɨtɨ nɨ yu na se.” 44 [“Ta wuŋ ji ɨ miɨ gbɔ wu bɨŋ, ɨ yu tsəŋkiə, ɨ wu gbɔ miɨ bɨŋ, ɨ wu tishɛ miɨ wa.”]ª