Bənɨ bə kɨtuŋ'ə bi dɨ wu Jisɔs dzɛɛ buŋga
20
Lə kɨ ji budɔ Jisɔs tɨfiə bənɨ, yu tɨdi shɔŋ yi ndzeŋe yi Nyɔ bə bɔ sɔ mbaŋ wu tsɔŋ yi bintɔfiɛ ntɨŋ. Bəchɛ bintɔfiɛ bəbəŋ bə bənɨ bə tɨfiə bilaŋ bi Nyɔ lə ma bənɨ bə sakɨ kɨtuŋ ba 2 ba bi bə yu lə, “Tə̂ bɨ miɨ wu nya wə buŋga lə wə kɨ fɨtɨ biɔŋ biŋ? Ə nya yəŋ wə buŋga bwa?”3 Jisɔs chi bə bɔ lə, “Njiwa mbi tɨ fiɔŋ bə bəŋ. Bə tə̂ mɨ fɛŋ. 4 Buŋga bu Jɔŋ nə̀ chɛsɛ bənɨ biɔ su nə̀ nnya yi Nyɔ maa miɨbəwəŋ lə?”
5 Bɔ kwe ntsuŋ bɔ bɔ lə, “Ɨ kə chi lə nə̀ nya Nyɔ, ɨ yu bi bə bɨ lə nə̀ fə la lə kə jikə bɨmiə bə Jɔŋ? 6 Ɨ kə chi lə nə̀ nya miɨbəwəŋ, ɨ bənɨ tumiɛ bɨ bə tá, ndzɨ bɔ' bɨŋ yɛyi yɛyi lə Jɔŋ nə̀ ji miɨ wu shɔŋ yi Nyɔ.” 7 Bəma, bɔ tə chi lə, “Kə na kkəhə miɨ wu nə̀ nya.”
8 Jisɔs tə tə bə bɔ lə, “Tə naji ntə tɨ bəŋ miɨ wu nya mɨ buŋga lə ŋkɨ mfɨtɨ biɔŋ biŋ kə.”
Ŋgaŋ tsukɔ bənɨ wɨ bə bə́ nə̀ galə kə
9 Jisɔs jiji ba ma ŋgaŋ bə bənɨ lə, “Miɨ wudɔ nə̀ nɨŋ kə wuhu ba tishɛ muntaŋ mu bə́ fɨtɨ mbiŋ su. Yu fansɨ kə wa bə bənɨ tə dza ba lɛ gbəndɨ kɨtuŋ kɨdɔ ku ba gəŋ tsə sɔ kɨtso. 10 Lə tsa yi wəŋə ba kwətsə, yu faŋ wene wu nɨŋ lə yu gəŋ ləkə muhu muntaŋ. Lə wene wa gəŋ, bənɨ bə yu nə̀ galə ba kə tsuba kəchə wɛŋ wa ba kɔŋ yu, chi yu jiŋ kaya. 11 Miɨ wa chi faŋə wudɔ wɛŋ wu nɨŋ, bɔ chi kəchə wa, nya yu yaa ba kɔŋ'ɨ, yu tsu jiŋ kaya. 12 Yu chi faŋə wudɔ wu bətɛ bɨŋ, bɔ bɛnɛ yu ba li yu mbaŋ nəbiŋ. 13 Miɨ wa bɨchə lə, ‘Njiwa mfə nəŋ? Njiwa mfaŋ fɛŋ ji wɛnɛ wu na ji shəŋ yɛŋ, diŋkəla ɨ yu gəŋ, ɨ bɔ kuntə yu.’ 14 Wɛŋ wa gəŋ be sɔ kə, bənɨ bə bə́ nə̀ galə ba kə ŋəŋ yu wɨ ba wənə bə gwɨ́ yibɔlə lə, ‘No na ndiəku wu chɛ kə wuŋ. Kə kkpɨ̂sɨ yu ba chi kə wuŋ.’ 15 Bɔ tə kwe yu ba foso nɔ nə kə ba kkpɨsɨ lɨ.”
Lə Jisɔs tə manɨ, yu bi lə, “Bə na gɔmbiɛ lə chɛ kə wa jiwa ɨ yu ba fə nəŋ bə bənɨ ba? 16 Ntə bəŋ lə yu jiwa ɨ yu ba jishi bənɨ ba ba ga ji bənɨ bədɔ chichi sɔ kə.” Lə bənɨ wɔɔ manɨ, bɔ nɨŋŋ bunɨŋŋə ba tə lə, “Nyɔ kɨ bakɨ.”
17 Jisɔs bo bɔ mɛ ba bi lə, “Kɨjilə fiɔŋ fi na ji fiŋ bubɔndɔ Kɨŋwatɨ kɨ Nyɔ lə ntɨŋ na chanyɛ lə la? Fi na ji lə,
‘Ta wa kɨbɛɛ wu bənɨ bə wɛyɛ nə̀ nɨŋŋə,
wu nə̀ tsu ta wu bo wu tsɔŋ'ə.’
18 Na ji miɨ gbɔ ta wuŋ bɨŋ, ɨ yu tsəŋkiə, ɨ wu gbɔ miɨ bɨŋ, ɨ wu tishɛ miɨ wa.”
Mbi tsukɔ ntsufu yi kɨŋwatɨ wɨ
19 Lə Jisɔs ma ŋgaŋ wa manɨ, bənɨ bə nə̀ tɨfiə bilaŋ bi Nyɔ lə bə bəchɛ bintɔfiɛ bəbəŋ kɨ se lə bɔ kwe yu kwa mɨ tsa ya bɨŋ. Bɔ nə̀ se lə bɔ kwe yu ndzɨ bɔ nə̀ kkɨ lə, yu ma ŋgaŋ wa ji bə bɔ, bəmanɨ bɔ le bənɨ. 20 Bɔ kɨ biəlɨ yu go bɨŋ go bɨŋ. Bɔ taŋ bənɨ ba faŋ bɔ gəŋ kɨ tɨntɨ ŋkɨ, bɔ lɔshɛ lə bɔ na ji bənɨ bəndzeŋe. Bɔ nə̀ fɨtɨ manɨ lə bɔ wɔ fiɔŋ nə yu dze fə bɔ kwɛɛ yu ba nya bə miɨ wu Lom wu nə̀ sakɨ dia wa. 21 Bənɨ ba ba bi bə Jisɔs lə, “Miɨ wu Bitɨfiə, kə na kkɨ lə biɔŋ bi wə na chanyɛ bə bi wə na tɨfiə na bi diəŋ, wə letɛhɛ yəsɨ wu miɨ lə. Wə ba wə kɨ tɨfiə kɨyɛyi, ɨji fiɔŋ fi Nyɔ na se lə bənɨ kɨ fɨtɨ. 22 Kə tə kɨ bi lə kɨlaŋ na bɨmi lə kə kɨ tsufu kɨŋwatɨ bə Kaisa Ŋkuŋ wu Lom lə?”
23 Jisɔs kkə fiɔŋ fi bɔ na wɨdi bə fi ba tə lə, 24 “Bə bâ bə danali miu ŋŋəŋ.” Lə bɔ ba bə yu, yu bi lə, “Bushi bu na ji buŋ kpə wuŋ wɨ na bu yəŋ'ə, yɨ wuŋ ji wu yəŋ'ə?” Bɔ chi lə, “Bushi bwa na bu Kaisa lə, yɨ wa ji tɨ wuhu.” 25 Jisɔs tə tə lə, “Bə nyâ Kaisa fiɔŋ fi na ji fi Kaisa lə, bə nyâ Nyɔ fi na ji fi Nyɔ lə.”
26 Bənɨ ba wɔ fiɔŋ fiŋ, fi funsə bɔ, bɔ kətə bifuŋ bimbaŋə ba jikə keŋkɛ fiɔŋ fi bɔ kwɛɛ yu fi bɨŋ bənɨ nəfiə nə biɔŋ bichi ntɨŋ bi yu nə̀ chanyɛ.
Mbi tsukɔ ndzakɔ nə kkpə lɨ
27 Kɨntsu kɨ Bəsadusi lə ba lə bɔ bi fiɔŋ bə Jisɔs. Bəsadusi bɛŋ nə̀ bənɨ bə nə̀ tɨdi lə naji ɨ bənɨ dzakɔ nə kkpə lɨ kə. 28 Bɔ ba ba bi bə yu lə, “Miɨ wu Bitɨfiə, Mose nə̀ bɔndu kɨlaŋ kaha ntɨŋ lə,
‘Ɨ miɨ na ji bə kpansɨ, miɨ wa kkpə lɨ ɨji bɔ bə yu kə bɛyɛ wɛŋ,
tə wəmɛni naji lə yu chî kpansɨ wa
fə bɔ bə yu bɛyɛ beŋ yɨ wu ŋku wəmɛni lə lɨ.’
29 Fɛŋ, beŋ bə miɨ wudɔ lə nə̀ ji fumba, wuntaŋ wa nə̀ ji bə kpansɨ, yu kkpə bɔ bə yu ŋkeŋkɛ sɨŋ wɛŋ. 30 Wu nə̀ kwɨntɨ wa yu wɨ chi kpansɨ wa, yu kkpə tɨ wɛŋ sɨŋ. 31 Wu nə̀ kwɨntɨ wa wɨ chi tɨ kpansɨ wa ba kkpə tɨ wɛŋ sɨŋ. Fi tɨchə tɨ ma diəŋ bə beŋ bə fumba ba bəchi, wudɔ nə bɔ ntɨŋ jikə bɛyɛ wɛŋ bə kpansɨ wa. 32 Nəjiŋ wusu, kpansɨ wa kkpə tɨ. 33 Nɨ bənɨ bə fumba ba nə̀ dzɛɛ kpansɨ wa bəchi, ná kɨ ji tsa yi bənɨ ná dzakɔ nə kkpə lɨ, ɨ kpansɨ wa kɨ ji kpansɨ yəŋ nə bɔ ntɨŋ?”
34 Jisɔs chi bə bɔ lə, “Mbi wu fɛŋ, bənɨnsə na dze bəkansɨ, bənɨ nyaa beŋ bə kansɨ, bənɨnsə dze bɔ. 35 Bəmanɨ, bənɨ bə naji lə bɔ' kwətsə bə ŋkeŋkɛ dɨ mbi wu ná ba ntɨŋ tsa yi bə́' dzakɔ nə kkpə lɨ ná kɨ jikə dzɛɛ bəkansɨ, ɨ bənɨ tsukə kɨ nya beŋ bə kansɨ lə bənɨnsə kɨ dze. 36 Bɔ ná tsɔhɔ kkpə, ndzɨ bɔ jiba ɨ bɔ kɨ ji nɨ bənchinda bə Nyɔ lə. Bɔ ná kɨ ji beŋ bə Nyɔ lə, ndzɨ bɔ' dzakɔ nə kkpə lɨ. 37 Kɨyɛyi kɨsu na ji lə Mose kɨbɛɛ nə̀ tə ba shafu lɨ lə, bənɨ ná dzakɔ nə kkpə lɨ nɨ yu nə̀ bɔndɔ tsukɔ kɨtɨ kɨ yu nə̀ ŋəŋə wɨ, kɨ doko. Shi yidɔ yasu kɨŋwatɨ ntɨŋ yi yu na tsɨsə Baba lə yu na ji Nyɔ wu Ablaham, yu ji Nyɔ wu Adze, yu ji tɨ Nyɔ wu Jakɔ. 38 Jilə yu na tsɨsə manɨ, kɨjilə bəŋku bɛŋ na bənɨ bəwəŋ, Nyɔ na jimiɛhɛ Nyɔ wu bəŋku, yu na ji Nyɔ wu bənɨ bəwəŋ, ndzɨ nə Nyɔ lɨ, bənɨ bəchi na bəwəŋ.”
39 Lə Jisɔs chanyɛ manɨ bənɨ bə nə̀ tɨfiə bilaŋ bi Nyɔ lə sɛŋ yu ba tə lə, “Miɨ wu Bitɨfiə, wə dze tsa ba fichə diəŋ.” 40 Bəma, miɨ jikə mɔŋkɔ lə yu tsu bi yu fiɔŋ.
Nchitə wu Nyɔ nə̀ kaa wa na wɛŋ wu yəŋ
41 Jisɔs bi yu wu yu bə bɔ lə, “Fi gəndə nəŋ fə bənɨ kɨ tɨdi lə Nchitə wu Nyɔ nə̀ kaa wa na wɛŋ wu Ŋkuŋ Dɛbi? 42 Ntɨlə bə na kkɨ lɨ lə Dɛbi kɨbɛɛ nə̀ bɔndu kɨŋwatɨ kɨ Kɨŋkuntə lə ntɨŋ lə,
‘Baba Nyɔ nə̀ tə bə Baba wɛmɨ lə
yu jiŋ kɨbandə kɨhɨ kɨ nədiɨ wɨ,
43 gəŋ fɔ tsa yi yu kɨnshɛ bənɨ buhu bə nchɛnɛ lə
ɨ yu tɨŋ go yihi bɔ bɨŋ nɨ kɨtɨ kɨ go yihi lə.’
44 Jilə Dɛbi na tsɨsə yu lə Baba wuhu, ɨ fi fə nəŋ fə yu kɨ ji wene?”
Jisɔs tə lə bənɨ kɨ dze tsa bə bənɨ bə na tɨfiə bilaŋ
45 Jisɔs kɨ chanyɛ bə beŋ buhu bə nɨŋ'ə bənɨ bəchi woko. Yu tə bə bɔ lə, 46 “Bə kɨ dze tsa bə bənɨ bə na tɨfiə bilaŋ bi Nyɔ lə. Bɔ na laŋkɨ ndɔŋ bindzu bi dəŋfɨ bɔ gəndə bə bi, bɔ se lə bə́ kɨ tsɨsə bɔ bidɨ bi shɨ lə bɨŋ bə kɨŋkuntə. Bɔ laŋkɨ tɨ njiŋ bitɨ bi nəfiə bɨŋ tsɔ́ŋ yi kɨntsɨsɨ lə ntɨŋ. Bɔ ba bɔ gəŋ kɨgbeyɛ ntɨŋ, bɔ kɨ se kwa njiŋ ji bijimiɛ bi nəfiə bɨŋ. 47 Na tɨ bɔ bə na chisə bəkansɨ bə bəŋku lə koso, bɔ fukiɛ bɔ bə bintsɨsɨ bi dəŋfɨ. Ŋgə wu bɔ ná kɨ ji wubiə kɨtso.”