Kɨnya kɨ kpansɨ ŋku wu fiəŋkə lə
21
Jisɔs li yəsɨ ba ŋəŋ nɨ bənɨ bə kpə lə na liyi kɨnya kɨbɔlə fikɔlɔ fi kɨnya lə ntɨŋ, tsɔŋ yi bintɔfiɛ ntɨŋ. 2 Yu ŋəŋ tɨ kpansɨ ŋku wudɔ wɨ ɨji wu fiəŋkə, kpansɨ wa ba ba li munini muŋfɛŋ fikɔlɔ fia ntɨŋ. 3 Yu tə lə, “Ntə bəŋ yɛyi lə kpansɨ ŋku wu fiəŋkə no' nya ba ya bənɨ bəchi bə sə nya. 4 Bənɨ bəchi bə sə nya, bɔ sə ba bɔ liyi ji kɨdiadia kɨ kpə wubɔlə wu' yisə kɨ shishɛ koso. Bəmanɨ, kpansɨ wu fiəŋkə no' nya fiɔŋ fichi fi yu sə ji yu nɨkɨ fi wɨ.”Jisɔs tə lə bə́ jiba bə kpodiɛ tsɔŋ yi bintɔfiɛ
5 Beŋ bə Jisɔs lə bə nɨŋ'ə bədɔ gbɔ kɨ kpɨsə wulu tsukɔ tsɔŋ yi bintɔfiɛ wɨ, bɔ sɛnti tá yi ndzeŋe yi bə́ nə̀ maa tsɔŋ ya su bə biɔŋ bi bənɨ nə̀ nya, bə́ deŋ yi su. Jisɔs tə bə bɔ lə, 6 “Bə ŋəŋ biɔŋ biŋ? Butsu ba bwa bu ta mo ná shɨkəhə wudɔ bɨŋ bə́ ŋgboso sɨŋ koso.”
Bəŋgə bə ŋkweŋ
7 Bɔ bi bə yu lə, “Miɨ wu Bitɨfiə, fiɔŋ fiŋ ná tɨchə tsa yi la? Fiɔŋ fi ná tseyɛ lə fi fia bə ntɨchə na la?”
8 Jisɔs chi lə, “Bə dzê tsa, miɨ kə̂ fukiɛ bəŋ lə bə fɨsə dzə. Bə kɨ kkɨ lə bənɨ ná ba kɨyɛŋ, bɔ dze yɨ wɛŋ, bɔ galɨ wu fiə, miɨ tɨdi lə, yu na ji Nchitə, tsa ya' ba gwɨgwɨ. Bɔ dze kɨ tɨdi manɨ, bə kə̂ wɔkɔhɔ. 9 Tsa yi bə' wɔɔ bə́ tunɔ dzoŋ bidɨ lɨ bidɨ lɨ, bəŋgə ji mbi ntɨŋ, bə kə kɨ lete. Biɔŋ biŋ naji lə bi sa tɨchə. Bəmanɨ, bi jikə donchɛ lə mbi jiwa ɨ yu ka tsa ya bɨŋ.”
10 Jisɔs chi tədiə bə bɔ lə, “Kɨtuŋ ná kɨ tunɔ dzoŋ bə kɨdɔ, ŋkuŋ wudɔ tunɔ dzoŋ bə wudɔ. 11 Biɔŋ bi kɨgəsə kɨ wɨŋə lə ná kɨ tɨchə bidɨ lɨ bidɨ lɨ. Sha ná nɨkə lɨ bə buŋga. Dzɔŋ ná kɨ ji, dzéŋ ná kɨ ji bidɨ lɨ bichi. Biɔŋ bibiə ná yinshi bɔlu wɨ, ɨ fi nya bənɨ nyiŋ. 12 Bə kɨ kkɨ lə, fə biɔŋ bia ná tɨchə, bə́ ná kwete bəŋ ba fashɛ lɨ. Bə́ ná jiba ɨ bə́ gəŋ sa bəŋ tsɔ́ŋ yi kɨntsɨsɨ lə ntɨŋ ba faŋ bəŋ tsɔ́ŋ yi buŋfia lə ntɨŋ. Bə́ ná gɨntɨ bə bəŋ bəŋkuŋ bə bənɨ bə sakɨ kɨtuŋ nəfiə ndzɨ yɨ wɛŋ, 13 ɨ tsa ya kɨ ji tsa yi naji lə bə keŋkɛ dzə yi chanyɛ bə bɔ tsukɔ mɨ wɨ. 14 Tsa yi bɔ dzɛɛ bəŋ manɨ, bə kə̂ bishɛ lə fa bə jiba bə gəŋ tambo gwɨ nəŋ lə, 15 ndzɨ ná mɨ wu ná nya bəŋ fiɔŋ fi chanyɛ ma bufɨ. Bənɨ bɛnɨ bə nchɛnɛ lə ná kafɔhɔ bəŋ'ɨ. 16 Bənɨ bə ná taŋŋə bəŋ ná kɨ ji tɨ bəchaa bə bəma, bə bəwəma, ma bitsɔŋ biɛnɨ bə nsáŋ yɛnɨ. Na tɨ bɔ bə ná fəə ɨ bə́ kkpɨshɛ bədɔ nə bəŋ ntɨŋ. 17 Ɨ bənɨ bəchi ná kɨ jikə sɛhɛ bəŋ, ndzɨ yɨ wɛŋ. 18 Bəmanɨ, yu miuŋkpaŋ ná laha nə bəŋ fi. 19 Bə kânsɨ kwa shəŋ, bə jiba bə keŋkɛ buwəŋ.
Jisɔs tə lə bə́ jiba bə́ jishi Jɛlosalɛm
20 Tsa yi bə ŋəŋə bənɨ bə dzoŋ'ə' fiɛdiɛ kɨtuŋ kɨ Jɛlosalɛm bansə lɨ, bə kɨ ji bə kkɨ lə tsa' kwətsə yi bə jishɛ kɨ. 21 Fi dze kɨ tɨchə manɨ, bənɨ bə na ji Judɛya lə̂tə ba bəndɨ dzó bɨŋ, bə na ji kɨtuŋ ka ntɨŋ fɔ̂ nə nɔ. Miɨ wu na ji kpa kə̂ kwə ba be kɨtuŋ ka ntɨŋ. 22 Díɔ ya na yi Nyɔ ná liyɛ ŋgə Jɛlosalɛm bɨŋ ndzɨ fiə wu bənɨ ba lə, bə mfə lə biɔŋ bichi ba fɔ diəŋ nɨ fi na ji bubɔndɔ kɨŋwatɨ kɨhɨ ntɨŋ. 23 Ŋgə wu kɨtso díɔ ya ntɨŋ ná kɨ ji wu bəkansɨ bə tɔ lə, bə bə na mambɔ beŋ. Shəŋ ná lo Nyɔ bə bənɨ bɛŋ, ɨ yu li ŋgə kɨtuŋ kɨŋ bɨŋ. 24 Bə́ jiba bə́ ná gbechɛ bənɨ bədɔ, bə́ kwediɛ bədɔ, ɨ bɔ gəŋ kɨ ji bəŋfia bituŋ bichi ntɨŋ. Bənɨ bə na kkəhə Nyɔ ná dənchə Jɛlosalɛm bɨŋ, gəŋ fɔ tsa yi tsa yibɔ ná fɔɔ diəŋ.
Jisɔs tə fiɔŋ fi ná tseyɛ tsa yi yu ná chisə ba
25 Biɔŋ bi nyiŋ'ə ná tseyɛ gwɨ diɔ wɨ bə fiəə wɨ ma bə mbíansɨ wɨ. Fiɔŋ fi ná tɨchə sha bɨŋ na lə, bituŋ ná kɨ ji funyi ntɨŋ, bi fɨŋgbə nɨ ŋgɔŋ məmbəŋ ná kɨ kunə, mɔ fɨ. 26 Bənɨ ná kɨ ji bə nyiŋ, bɔ jakɨ mɛ kɨkɨkɨkɨ. Bɔ ná kɨ gɔmbiɛ biɔŋ bi nyiŋ'ə bi ná kɨ tɨchə sha bɨŋ, ndzɨ biɔŋ bi bɔ́ bichi bi na keŋkɛ buŋga ná nɨkə lɨ. 27 Bəma ɨ bənɨ tə ŋəŋ nɨ Wɛŋ wu Miɨ na shichi yu ba kɨku ntɨŋ, yu keŋkɛɛ buŋga bə bubəŋ bu kɨtso lə. 28 Tsa yi biɔŋ biŋ gbɔɔ kɨ tɨchə, bə ləŋ wə ba tɔ bushi bɔ́, ndzɨ tsa yi Nyɔ yi chitə bəŋ ya gwɨgwɨ.”
29 Lə Jisɔs chanyɛ manɨ, yu fɨkə lə, “Bə dzê bufɨ nə findəŋ wɨ bə bitɨ bidɔ. 30 Bi ba bi gbɔ kɨ bete, bə tə kkə bə kaŋ yənɨ lə kɨbinchi' gbɔ kɨ yashɛnɨ. 31 Na tɨ diəŋ nɨ bə ŋəŋə biɔŋ biŋ tɨchə, ɨ bə kkə tɨ lə buŋkuŋ bu Nyɔ lə bwa gwɨgwɨ.
32 Ntə bəŋ yɛyi lə naji ŋkɨkɨ wu fɛŋ no ka kə biɔŋ biŋ bichi bambi kə tɨchə. 33 Bɔlu bə sha ná chɛti lɨ, bəmanɨ diɛ yɛmɨ naji ɨ yi ná shəshə nɨkə lɨ kə.
34 Bə dzê tsa, bə kə kɨ gəndə bə diɨ ji mbi wɛnɨ, bə mu, bə chinchi, bə galɨ bufɨ ji kɨjimiɛ kɨ sɛŋ koso wɨ, makə ɨ butsu bwa butə ba kwe bəŋ waa nɨ ntasɨ. 35 Fiɔŋ fi butsu buŋ'ə ná tɨchə bənɨ bəchi bə na ji mbi ntɨŋ. 36 Kɨjilə bə lə̂ŋ buntaŋ, bə kɨ tsɨsə bə Nyɔ tsá chi, fə biɔŋ biŋ dze kɨ tɨchə, ɨ yu nya bəŋ dzə yi naji ɨ bə bɔnsu ba chɛ lɨ ba gəŋ ləŋ Wɛŋ wu Miɨ nəfiə.”