Biɔŋ bi kɨgəsə kɨ wɨŋə lə bi ná kɨ tɨchə tsa yi na ba wɨ
13
Lə Jisɔs kɨ foto nə mbaŋ wu tsɔŋ yi bintɔfiɛ ntɨŋ, wene wu nɨŋ wudɔ tə bə yu lə, “Miɨ wu Bitɨfiə, bo ŋəŋ ŋgwe yi tá yi na ji tsɔ́ŋ yiŋ wɨ! Na tsɔ́ŋ yi kɨgəsə kɨ wɨŋə lə!” 2 Jisɔs chi bə yu lə, “Wə ŋəŋ tsɔ́ŋ yi kɨgəsə kɨ wɨŋə lə yiŋ? Ta mo ná shɨkəhə wudɔ bɨŋ ŋgbɔ sɨŋ koso.”3 Jisɔs gəŋ ba bəndɨ jiŋ Dzo yi Bitɨ bi Ɔlif lə bɨŋ, dia wu na jiŋgə tsɔŋ yi bintɔfiɛ ya wɨ. Pita, Jɛm, Jɔŋ, bə Andulu gəŋ bɔbɔ ba bi bə yu lə, 4 “Tə̂ bɨ tsa yi fiɔŋ fiŋ ná tɨchə, wə tə bɨ tɨ fiɔŋ fi ná donchɛ tsa yi biɔŋ biŋ bichi ná tɨchə.” 5 Jisɔs tə bə bɔ lə, “Bə kɨ dze tsa miɨ tə kə fukiɛ bəŋ ɨ bə fɨsə. 6 Bənɨ kɨyɛŋ ná kɨ ba bə yɨ wɛŋ, miɨ tɨdi lə, ‘Na mɨ yu wa.’ª Ɨ bɔ fə manɨ ba fukiɛ bənɨ kɨyɛŋ ɨ bɔ fɨsə. 7 Tsa yi bə' wɔɔ lə bə́ tunɔ ba dzoŋ makə bənchanyɛ kɨ dzóŋ'ə, shəŋ kə kɨ bɨfi bəŋ. Biɔŋ biŋ bichi naji lə bi tɨchə, bəmanɨ bi jikə donchɛ lə na mbi wu na ka. 8 Kɨtuŋ ná kɨ tunɔ dzoŋ bə kɨdɔ, ŋkuŋ wudɔ tunɔ dzoŋ bə wudɔ. Dzɔŋ ná kɨ ji, sha nɨkə bidɨ lɨ bidɨ lɨ. Biɔŋ bichi ji diəŋ nɨ bulo bu kpansɨ lə bu fiəfiə tsa yi yu sə gbosɔ.
9 Bə kɨ ji bə dze tsa. Bə kkə̂ lə bə́ jiba ɨ bə́ nya bəŋ bənɨ bə sakɨ bənsa kaŋ. Bə́ ná kɨ kɨtɨ bəŋ tsɔ́ŋ yi kɨntsɨsɨ lə ntɨŋ. Bə ná lɨmi bənɨ bə sakɨ nəfiə, ma bəŋkuŋ nəfiə ndzɨ mɨ, fə bə chanyɛ bə bɔ tsukɔ mɨ wɨ. 10 Bəmanɨ, bə́ naji lə bə́ sa tɨfiə shɔŋ yi ndzeŋe yi Nyɔ bə bituŋ bichi. 11 Tsa yi bə́ kwɛɛ bəŋ kɨ gɨntɨ lə bə́ nya bəŋ kansu ntɨŋ, shəŋ kə kɨ bɨfi bəŋ lə bə jiba ɨ bə gəŋ chanyɛ lə la lə. Tsa ya bɨŋ, bə kɨ chanyɛ kwa ji fiɔŋ fi na foto nə bəŋ dze, ndzɨ na bəŋ bə kɨ chanyɛ tsa ya bɨŋ kə. Na Kɨn'yɨntɨ kɨ Ntsaaŋ kɨ ná nya bəŋ fiɔŋ fi bə chanyɛ. 12 Miɨ ná kɨ dze wəmɛni yu nya bə́ kkpɨsɨ, chɛ wɛŋ gəŋ yu dze wene, yu nya bə́ kkpɨsɨ. Beŋ ná kɨ sesɛ gbo bətɨɨ bə bəmɛni nəjiŋ, bɔ fɨtɨ bə́ kkpɨshə bɔ. 13 Bənɨ bəchi ná kɨ ti bə bəŋ ndzɨ yɨ wɛŋ. Bəmanɨ, miɨ wu ná kansə shəŋ gəŋ tuŋ fəŋgbɨŋ na wu ná fɔɔfo.
Biɔŋ bibiə bi ná kɨ tɨchə
14 (Miɨ wu na tanchɛ kɨŋwatɨ kɨŋ yu wɔ̂ fiŋ buni), tsa yi bə ŋəŋə fiɔŋ fibiə fi naji ɨ fi bɨsɨ biɔŋ fi lɨmi ji dɨ wu fi na jimiɛhɛ lə fi ləŋ, bənɨ bə na ji Judɛya chɛ̂ lɨtɨ ba bəndɨ dzó bɨŋ. 15 Miɨ wu na ji fuŋ, yu kə̂ shikɛ lə yu chi bɛɛ tsɔŋ ba dze fiɔŋ ba tə kɨ lətə. 16 Miɨ wu na ji kə, yu kə̂ tsɔhɔ kwə lə yu ba dze kɨndzu kɨhɨ kɨ fiəfɨ lə. 17 Ŋgə wu kɨtso díɔ ya ntɨŋ ná kɨ ji wu bəkansɨ bə tɔ lə, ma bə na mambɔ beŋ. 18 Bə kɨ tsɨsə lə fiɔŋ fiŋ kə̂ tɨchə ji tsa yi kɨkumɔ ntɨŋ. 19 Bənɨ ná woko ŋgə díɔ ya ntɨŋ, ɨji ŋgwe yi wa ŋgə nə̀ kə jimiə dze nə tsa yi Nyɔ nə̀ fəə mbi ba fɔ fɛŋ. Ŋgwe yi wa ŋgə ná tsɔhɔ jimiɛ. 20 Baba tə nə̀ jikə yɛtɛ nə díɔ yi ŋgə wa lə wɨ, ɨ miɨ jikə fɔkɔ fo. Bəmanɨ, ndzɨ bənɨ buhu bə yu nə̀ sabiɛ ga lɨ, yu' yɛtɛ nə díɔ ya wɨ. 21 Ɨ miɨ tə bə bəŋ díɔ ya wɨ lə ‘Bə bô bə ŋəŋ, Nchitə wu Nyɔ nə̀ kaa wa no mɛ!’ makə lə, ‘Bə ŋə̂ŋ, yu wuhu maha!’ bə kə̂ bɨmiə. 22 Bə kɨ kkɨ lə bənɨ ná kɨ ba bɔ yundi lə bɔ na ji bənchitə bə Nyɔ nə̀ kaa, bədɔ tɨdi lə bɔ na ji bənɨ bə shɔŋ yi Nyɔ lə, bɔ fɨtɨ biɔŋ bi na donchɛ buŋga bubɔlə, bɔ fɨtɨ tɨ biɔŋ bi kɨgəsə kɨ wɨŋə lə. Jilə dzə ya lɨ, ɨ bɔ fukiɛ bənɨ bə Nyɔ' sabiɛ ba fə bɔ fɨsə dzə. 23 Mɨ ntə bəŋ biɔŋ biŋ bichi tsa bambi. Bə tɨ̂ŋkɨ.
Nɨ fi ná kɨ ji tsa yi Wɛŋ wu Miɨ ná chisə ba
24 Ná kɨ ji díɔ ya wɨ, ɨji bəŋgə ba' chɛ, ɨ diɔ jiji ba jimə lɨ, ɨ fiəə tsukə tsalə, 25 ɨ mbíansɨ fɔ nə bɔ́ ba gbɔyɛ lɨ, ɨ biɔŋ bi bɔ́ bichi bi na keŋkɛ buŋga kɨ nɨkə. 26 Bəma ɨ bənɨ tə ŋəŋ nɨ Wɛŋ wu Miɨ na ba kɨku ntɨŋ, yu keŋkɛɛ buŋga bu kɨtso lə bə bubəŋ. 27 Ɨ yu tə faŋ bənchinda buhu bɔ gəŋ bo nna yi sha bɨŋ ma yi bɔ́ ba banchɛ bənɨ buhu bə yu nə̀ sabiɛ.
28 Bə fɨ̂yə fiɔŋ nə findəŋ wɨ. Chɛ́ yi fi lə ba yi tɛ lɨ, nyí gbɔ kɨ bete su, bə tə kkə lə tsɨfɨ yashənɨ ya. 29 Na tɨ diəŋ nɨ tsa yi bə ná ŋəŋə biɔŋ biŋ tɨchə, ɨ bə tə kkə lə tsa ya ya gwɨgwɨ,ª gwɨgwɨ tɨmo fə fiənsɨ ku. 30 Ntə bəŋ yɛyi lə naji ɨ ŋkɨkɨ wu fɛŋ no ka kə biɔŋ biŋ bichi ntɨchə sɨŋ. 31 Bɔlu bə sha ná ka lɨ, bəmanɨ diɛ yɛmɨ naji ɨ yi ná shəshə nɨkə lɨ kə.
32 Bəmanɨ miɨ na sɨŋ wu na kkɨ butsu busu makə tsa ya. Ma bənchinda bə Nyɔ lə bə bɔ́ makə Wɛŋ wu Nyɔ na kkəhə. Na kwa Taa yu wumbɔŋ wu na kkɨ. 33 Bəma bə kɨ dze tsa bə wokɔɔ,ª ndzɨ bə na kkəhə tsa ya. 34 Fi ná kɨ ji nɨ miɨ wu na lɛti gbəndɨ, yu shə tsɔŋ yihi beŋ buhu bə nɨŋ'ə kaŋ, miɨ bə yihi nɨŋ, miɨ bə yihi nɨŋ, yu tə bə ntɨŋkɨ wu fiənsɨ wu mbaŋ'ə lə yu shə kɨ kɨki buni. 35 Bəma, bə kɨ tɨntɨ ŋkɨ ndzɨ bə na kkəhə tsa yi chɛ tsɔŋ ná fichə ba lɨ. Naji ɨ yu ba fudiɔ, makə bbutsu kɨntɨŋ kɨntɨŋ, makə tsa yi kɨyɔŋ kɨ fiəfiə na tinti, makə fuwɔki. 36 Yu ná kə butə ba ŋəŋ bə me. 37 Fiɔŋ fi mɨ ntədiə fiŋ bə bəŋ, mɨ ntə bə miɨ chi, ‘Bə tɨ̂ŋkɨ!’”