Ŋgaŋ tsukɔ bənɨ bə miɨ wudɔ nə̀ galə kə
12
Jisɔs gbɔ kɨ chanyɛ bə bɔ bəŋgaŋ ntɨŋ lə, “Miɨ wudɔ nə̀ ji su, yu nɨŋ kə wu muntaŋ'ə, mu bə́ fɨtɨ mbiŋ su ba fa mbaŋ fiədiɛ lɨ, ba ma kɨsɔ kɨ bə́ ná kɨ tsoko muntaŋ mwa sɔ mbiŋ foto, yu fə kɨntalə kɨ miɨ wu ná kɨ kɨki kə wa lə ba ga bənɨ bədɔ sɔ kə ba lɛ gbəndɨ kɨtuŋ kɨdɔ ku. 2 Lə tsa yi bə́ ba bə́ kɨ wɨntɨ ba kwətsə, yu faŋ wene wu nɨŋ wudɔ bənɨ ba lɨ lə bɔ nyâ muhu muntaŋ, yu ba bə mu. 3 Wɛŋ wu nɨŋ wa gəŋ, bɔ kwe yu kəchɛ lɨ ba kɔŋɔ yu, yu tsu jiŋ kaya. 4 Miɨ wu kə wa chi faŋə wudɔ wɛŋ wu nɨŋ, yu gəŋ bɔ chi kəchɛ yu, nya yu biba fi ba tsasɨ yu. 5 Yu chi faŋə wudɔ, bɔ kkpɨsɨ wa. Yu chi faŋə bədɔ bə kɨyɛŋ'ə miu miu, bɔ kəchɛ bədɔ ba kkpɨshɛ bədɔ. 6 Yu nə̀ keŋkɛ kwa wene miu, shəŋ yihi ji wene wa wɨ. Nəjiŋ wusu, yu faŋ yu bɔ lɨ, yu gɔmbiɛɛ lə, ‘Bɔ jiba ɨ bɔ kuntə wɛnɛ no.’ 7 Lə wene wa gəŋ, bənɨ ba chanyɛ bɔ bɔ lə, ‘No na ndiəku wu chɛ kə wuŋ, bə ba kə kkpɨsɨ yu, bishəŋə bia kɨ ji biaha.’ 8 Bɔ bu kwe yu, ba kkpɨsɨ lɨ, dze kɨŋgundu kɨhɨ ba li sa biŋ.” 9 Nɨ Jisɔs chanyɛ mɛ, yu tə bi lə, “Fiɔŋ fi miɨ wu kə wa jiwa yu fə na la? Yu ná ba ɨ yu jishi bənɨ ba bujishɛ, ba ga kə wa ji bənɨ bədɔ kaŋ. 10 Bə nə̀ kə tanchɛ dɨ wuŋ nə Kɨŋwatɨ kɨ Nyɔ lə ntɨŋ? Wu nə̀ ji bubɔndɔ lə,‘Ta wu bənɨ bə na ma nə̀ nɨŋŋə wa,
na wu wu tsɔ ta wu bo wu tsɔŋ'ə.
11 Nyi na nɨŋ yi Baba,
bənɨ kɨ jiŋgə kɨgəsə wɨntɨ bɔ.’”
12 Lə bənɨ ba wɔ ŋgaŋ no, bɔ kkə lə Jisɔs' ma ŋgaŋ wa ɨji bə bɔ. Bɔ tə kɨ noŋko lə bɔ kwe yu, bəmanɨ bɔ le kuta wu bənɨ wu nə̀ ji mɨ ba shə yu manɨ, kɨ gɨntɨ fibɔlə.
Bə́ toso Jisɔs tsukɔ kɨŋwatɨ kɨ tsufɔ wɨ
13 Fó yi Bəju lə faŋ Bəfalasi bə bənɨ bədɔ bə kɨntsu kɨ Ŋkuŋ Hɛlɔd lə, lə bɔ gəŋ toso Jisɔs ba kwe yu nə nchanyɛ yihi ntɨŋ. 14 Lə bɔ ba, bɔ tə bə Jisɔs lə, “Miɨ wu Bitɨfiə, kə na kkɨ lə wə ba wə kɨ chanyɛ kwa kɨyɛyi, ndzɨ wə letɛhɛ yəsɨ yi miɨ lə kə, ma miɨ wa ji yəŋ. Wə na tɨfiə ji dzə́ yi Nyɔ lə yɛyi. Tə̂ bɨ, kɨlaŋ' bɨŋ lə kə kɨ tsufu kɨŋwatɨ bə Kaisa ŋkuŋ wubəŋ wu Lom, maa kɨ kə bɨmiə lə? 15 Kə kɨ tsufu, maa kə kə kɨ tsufu lə?” Jisɔs kkə fiɔŋ fi bɔ nə̀ wədi bə fi, ba chi bə bɔ lə, “Bə na tosɔ mɨ ndzɨ la? Bə bâ bə kpə wu kɨtsu lə ŋŋəŋ.” 16 Bɔ ba bə wu, yu ləkə ba bi lə, “Bushi bu na ji buŋ kpə wuŋ wɨ na bu yəŋ'ə? Yɨ wuŋ ji wu yəŋ'ə?” Bɔ chi lə, “Bushi bwa na bu Kaisa lə, yɨ wa ji tɨ wuhu.” 17 Jisɔs tə bə bɔ lə, “Bə kɨ nya fiɔŋ fi na ji fi Kaisa lə bə Kaisa, bə nya fi Nyɔ lə bə Nyɔ.” Lə bɔ wɔ manɨ, gwɨ kkpə bɔ.
Bə́ toso Jisɔs tsukɔ ndzakɔ nə kkpə lɨ
18 Bəsadusi bədɔ dza ba ba bi fiɔŋ bə Jisɔs. Bəsadusi bɛŋ nə̀ bənɨ bə nə̀ tɨdi lə bənɨ ná kɨ jikə dzakɔ nə kkpə lɨ. 19 Lə bɔ ba manɨ, bɔ tə lə, “Miɨ wu Bitɨfiə, Mose nə̀ bɔndu bə bɨ bilaŋ ntɨŋ lə,
‘Ɨ jimə miɨ kkpə ba shə kpansɨ, bɔ sɨŋ bə wɛŋ,
kɨjilə wəmɛni wa naji lə yu chî kpansɨ ŋku wa
ma bɔ bə yu bɛyɛ beŋ yɨ wu ŋku wəmɛni lə lɨ.’
20 Bəma, miɨ wudɔ nə̀ ji bə beŋ bə nɨnsə fumba, wuntaŋ wa dze kpansɨ, yu kkpə bɔ bə yu mbɛyɛ sɨŋ wɛŋ. 21 Wu nə̀ kwɨntɨ yu wɨ chi kpansɨ wa, yu kpə tɨ wɛŋ sɨŋ. Fi tɨchə tɨ ma bə wu nə kwɨntɨ wa wɨ. 22 Bɔ chi yu bəchi, bəma miɨ nə bɔ ntɨŋ fumba nə̀ kə bɛyɛ wɛŋ bə kpansɨ wa. Nəjiŋ wusu kpansɨ wa kkpə tɨ. 23 Chi bənɨ ba fumba nə̀ dzɛɛ cha kpansɨ wa bəchi ma, ná kɨ ji tsa yi bənɨ' dzakɔ nə kkpə lɨ, ɨ kpansɨ wa kɨ ji kpansɨ yəŋ?” 24 Jisɔs tə bə bɔ lə, “Bə chanyɛ fətsutsu ndzɨ bə na kkəhə fiɔŋ fi na ji bubɔndɔ Kɨŋwatɨ kɨ Nyɔ lə ntɨŋ, bə ji tɨ kə kkə buŋga bu Nyɔ lə sɨŋ. 25 Fiɔŋ fi na ji na lə, ná kɨ ji tsa yi bənɨ ná dzakɔ nə kkpə lɨ, ɨ ndze yi bənɨnsə bə bəkansɨ tsukə jimiɛ. Bɔ ná kɨ ji diəŋ nɨ bənchinda bə Nyɔ lə bɔ́. 26 Tsukɔ ndzakɔ yi bənɨ nə kkpə lɨ, bə kə sa tanchɛ dɨ nə kɨŋwatɨ kɨ Mose lə ntɨŋ tsukɔ kɨtɨ kɨ boso nə̀ doko kɨ wɨ? Nyɔ chanyɛɛ bə Mose yu tɨdi lə,
‘Na mɨ Nyɔ wu Ablaham nji Nyɔ wu Adze ma Nyɔ wu Jakɔ.’ª
27 Fi na ji lə, Nyɔ na jimiɛhɛ Nyɔ wu bəŋkkpə, na Nyɔ wu bəwəŋ. Bə' gbɔ kɨtso.”
Kɨlaŋ kɨ na yakɨ bilaŋ bichi
28 Miɨ wudɔ wu nə̀ tɨfiə bilaŋ bi Nyɔ lə ba lə yu wɔ nɨ Jisɔs bə bənɨ ba na yimbiɛ, yu wɔ nɨ Jisɔs fichə fiɔŋ fi bɔ biɛ bə yu dzə yi ndzeŋe ntɨŋ, yu bi tɨ bə Jisɔs lə, “Kɨlaŋ kɨ na yakɨ bilaŋ bichi na kɨ la?” 29 Jisɔs chi bə yu lə, “Kɨlaŋ kɨ na yakɨ bilaŋ bichi na kɨŋ kɨ tɨdi lə,
‘Ɔ bənɨ bə Isla, bə wɔ̂,
Baba Nyɔ waha,
Baba Nyɔ ji miu.
30 Kɨ laŋkɨ Baba Nyɔ wɔhɔ bə shəŋ yɔhɔ chi,
nyâ shəŋ yɔhɔ bə yu chi,
gâ bufɨ bwɔhɔ yu wɨ buchi,
nɨ̂ŋ yu lɨ bə buŋga bwɔhɔ buchi.’
31 Kɨlaŋ kɨ na biəlɨ kɨŋ na ji lə,
‘Kɨ laŋkɨ miɨ wu na ji fə wə ku nɨ wə na laŋkɨ gwɨ yɔhɔ.’
Kɨlaŋ kɨdɔ na sɨŋ su kɨ na yakɨ biŋ.” 32 Miɨ wu nə̀ tɨfiə wa bilaŋ bi Nyɔ lə tə bə Jisɔs lə, “Miɨ wu Bitɨfiə, wə fichə mɛ diəŋ. Wə chanyɛ ji kɨyɛyi lə Nyɔ na ji kwa miu wudɔ jisu sɨŋ yasə yu. 33 Bə nlaŋ yi Nyɔ bə shəŋ chi, bə ŋga yi bufɨ yu wɨ buchi, nɨŋ yu lɨ bə buŋga buchi ba laŋ miɨ wu na ji fə wə ku nɨ wə na laŋkɨ gwɨ yɔhɔ, na ji lɨlɨ lə bə́ kuntə biŋ bilaŋ ba ya tɨmo mfə yi bintɔfiɛ bə nyɛ́ŋ yi tiŋɛ ma binya bidɔ bia.” 34 Jisɔs ŋəŋ nɨ yu fichə nɨ miɨ wu bufɨ, ba tə bə yu lə, “Wə na jimiɛhɛ dzəbudə bə mbe buŋkuŋ bu Nyɔ lə ntɨŋ.” Nəjiŋ wusu, miɨ tsukə mɔŋkɔ lə yu bi yu fiɔŋ.
Nchitə wu Nyɔ nə̀ kaa wa na wɛŋ wu yəŋ?
35 Lə Jisɔs kɨ tɨfiə bənɨ mbaŋ wu tsɔŋ yi bintɔfiɛ ntɨŋ, yu bi bə bɔ lə, “Fə la lə bənɨ bə tɨfiə bilaŋ kɨ tɨdi lə Nchitə wu Nyɔ nə̀ kaa wa na wɛŋ wu Ŋkuŋ Dɛbi? 36 Ɨji Kɨn'yɨntɨ kɨ Ntsaaŋ nə̀ fə Ŋkuŋ Dɛbi no chanyɛ kɨ Nchitə wa lə lə,
‘Baba Nyɔ nə̀ tə bə Baba wɛŋŋ lə,
yu jîŋ yu nədiɨ,
gəŋ fɔ tsa yi yu ná galə bənɨ buhu bə nchɛnɛ lə,
ɨ yu tɨŋ go yihi bɔ bɨŋ.’
37 Jilə Dɛbi kɨbɛɛ na tsɨsə yu lə Baba wuhu, ɨ nchitə wa tsu kɨ ji wene nəŋ?” Lə Jisɔs chanyɛ biɔŋ biŋ mɛ, kuta wu bənɨ wu nə̀ ji mɨ wɔ buni kɨtso.
Jisɔs guyɛ fíə yi bənɨ bə tɨfiə bilaŋ bi Nyɔ lə
38 Lə yu kɨ tɨfiə bənɨ, yu jiji ba tə bə bɔ lə, “Bə kɨ dze tsa bə bənɨ bə na tɨfiə bilaŋ bi Nyɔ lə. Bɔ ba bɔ kɨ laŋkɨ ndɔŋ bindzu bi dəŋfɨ ba kɨ gəndə shɨbɨŋ, fə bənɨ kɨ tsɨsə bɔ bə kɨŋkuntə. 39 Bɔ ba bɔ gəŋ tsɔ́ŋ yi kɨntsɨsɨ lə ntɨŋ, makə bidɨ bi bigbeyɛ lə lɨ, bɔ sa kwa ji bitɨ bibəŋ ba jimiɛ bi bɨŋ. 40 Bɔ chisə bəkansɨ bə bəŋku lə koso, bɔ fukiɛ bɔ bə bintsɨsɨ bi dəŋfɨ. Ŋgə wu bɔ ná kɨ ji wubiə kɨtso.”
Kɨnya kɨ kpansɨ ŋku lə
41 Jisɔs dza ba gəŋ jiŋ fə fikɔlɔ fi kɨnya lə ku mbaŋ wu tsɔŋ yi bintɔfiɛ ntɨŋ, yu kɨ ŋɨntɨ nɨ bənɨ na ba bɔ galɨ kpə fikɔlɔ fia ntɨŋ. Bənɨ bə kpə lə kɨyɛŋ nə̀ ba bɔ galɨ kpə wu kɨyɛŋ'ə sɔ. 42 Kpansɨ ŋku wudɔ dza ba ba lɨ, yu ji miɨ wu fiəŋkə, yu ga munini sɔ muŋfɛŋ, ɨji naji ɨ wu fɔ kə dɛli. 43 Jisɔs bəndɨ beŋ buhu bə nɨŋ'ə ba tə bə bɔ lə, “Ntə bəŋ yɛyi lə kpansɨ ŋku no, bə bufiəŋkə buhu mɛ, yu' nya ba ya bənɨ bəchi bə' galə fiɔŋ fikɔlɔ fi tsɔŋ yi bintɔfiɛ lə fiŋ ntɨŋ. 44 Bənɨ bəchi bə sə nya, bɔ sə ba bɔ liyi ji bidiadia bi kpə wubɔlə wu sə yisə ba kɨ shishɛ koso. Bəmanɨ kpansɨ no ba bə bufiəŋkə buhu ba nya fiɔŋ fichi fi yu na keŋkɛ, ɨji fi kwa fi yu sə nɨkɨ fi wɨ.”