Jisɔs faŋ bənɨ gbɨfumba ntse bəfɛ
10
Nəjiŋ wusu, Baba foshɛ bənɨ bədɔ gbɨfumba ntse bəfɛª faŋ bɔ fiə, bəfɛ bəfɛ, lə bɔ gəŋ bituŋ ntɨŋ, bɔ gəŋ gəndə bidɨ bi yu ná gəŋə bi ntɨŋ bichi. 2 Lə yu kɨ faŋkɨ bɔ, yu tə lə, “Bidiəŋ' yɛŋ kɨtso, bəmanɨ, bənɨ bə banchɛ ji tsəsɨ. Bə kɨ tsɨsə lə Baba wu na ji Chɛ kə fâŋ bənɨ bə banchɛ yu kə. 3 Bə gə̂ŋ. Bə kɨ kkɨ lə chi nna mfaŋkɨ chiŋ bəŋ, bə jiba bə kɨ ji nɨ beŋ bə shíŋ'ə bəfwa ntɨŋ. 4 Bə dze kɨ gɨntɨ, miɨ kə̂ dzɛɛ kpə, makə kɨba, makə bikpa bidɔ. Ɨ bə fɔ dzə, bə kə kɨ lɨmi bə tsɨshɛ bənɨ. 5 Bə gəŋ ba be tsɔŋ yi la yi bə bɛɛ ntɨŋ, bə sa ba tsɨsɨ bənɨ bə sɔ tsɔŋ lə, ‘Budə kɨ ji sɛŋ tsɔŋ.’ 6 Jilə miɨ wu na se budə wa sɔ, ɨ budə bwɛnɨ kətə yu wɨ. Jilə yu mɨ na sɨŋ, ɨ budə bwa tsu bə bəŋ. 7 Tsɔŋ yi bə bɛɛ sɔ, bə kɨ ji kwa sɔ. Bə kə kɨ yashənɨ tsɔ́ŋ. Fiɔŋ fi diənə fichi fi bə́ nya bəŋ, bə diə, makə fi munɔ, bə mu, ndzɨ ɨ miɨ na nɨntɨ nɨŋ, tə yu keŋkɛ lɨ bikwəntsə bihi. 8 Ɨ bə be kɨtuŋ ntɨŋ, bə́ ləkə bəŋ ba nya ma la lə bə diə, bə diə kwa. 9 Ɨ bə dze kɨ ji sɔ, bə kɨ wəmiəsɨ bənɨ bə gwɨ́ lə, bə tɨfiəə bənɨ bəchi lə buŋkuŋ bu Nyɔ lə bwa gwɨgwɨ fə bɔ ku. 10 Bəmanɨ, ɨ bə be kɨtuŋ ntɨŋ, bə́ nɨŋŋ nləkə bəŋ, bə fɔ ba gəŋ dzə́ ntɨŋ ba wunə lə, 11 ‘Bidi bi kɨtuŋ kənɨ lə bi kə tɔɔ go yaha wɨ bi biŋ mɛni bi kə na kuchɛ, fiɔŋ fichi kwə̂ bəŋ fi. Bəmanɨ, bə kkə̂ lə buŋkuŋ bu Nyɔ lə bwa gwɨgwɨ.’ 12 Ntə bəŋ lə, ná kɨ ji butsu bu nsa yi nəjiŋ'ə, ɨ biɔŋ kɨ ji lɨlɨ bə kɨtuŋ kɨ Sɔdɔm ba ya kɨtuŋ ka.”Lɔŋ bə bituŋ bi nɨŋŋə mfichə shəŋ
13 Jisɔs jiji ba tə lə, “Lɔŋ bə bəŋ, bəŋ bənɨ bə Kɔlasin, lɔŋ bə bəŋ tɨ bəŋ bənɨ bə Bɛsaida. Bə kɨ kkɨ lə ntə nə̀ mfə biɔŋ bi kɨgəsə kɨ wɨŋə lə bi mɨ mfəə biŋ bəŋ ku ɨji bə bənɨ bə Taya bə bə Sidɔn, bɔ tə nə̀ dɔŋ bindzu biyi ba ku bu gwɨ fɔfɔ bə ndonchɛ lə bɔ' fichə shəŋ yibɔlə. 14 Bə kkə̂ lə, ná kɨ ji butsu bu nsa yi nəjiŋ'ə, ɨ biɔŋ kɨ ji lɨlɨ bə bənɨ bə Taya bə Sidɔn ba ya bəŋ. 15 Ma bəŋ bənɨ bə Kapanaum, bə na gɔmbiɛ lə bə́ ná bəndɨsɨ bəŋ ɨ bə bəndɨ bɔ́? Yɛ! Bə́ ná shisəsɨ bəŋ ɨ bə shi ba gəŋ mbi wu bəŋkkpə ntɨŋ.” 16 Jisɔs tə tə bə bənɨ bə yu nə̀ faŋə ba lə, “Ɨ miɨ wɔ bəŋ, tə miɨ wa wɔ ji mɨ. Ɨ miɨ nɨŋŋ bəŋ, tə yu nɨŋŋ ji mɨ. Ɨ miɨ nɨŋŋ mɨ, tə miɨ wa nɨŋŋ ji miɨ wu' faŋə mɨ.”
Fiɔŋ fi miɨ wu nɨŋ wu Jisɔs naji lə yu kɨ laŋkɨ ndzɨ fi
17 Bənɨ bə gbɨfumba ntse bəfɛ ba gəndə ba tsu jiŋ bɔ woko buni. Bɔ tə bə Jisɔs lə, “Baba, kə nə bɨndɨ yɨ wɔhɔ, ma bətsə tɨmo, bɔ woko bə bɨ.”
18 Jisɔs chi bə bɔ lə, “Nnə ŋŋəŋ Satan dza ba gbɔ nə bɔ́ nɨ dzaŋ yi na lakiɛ. 19 Bə wôkɔ bə wɔ, mɨ nya bəŋ buŋga bu naji lə bə kɨ dənchə yé bə ntsə́ yi nəkɨ su. Mɨ nya tɨ bəŋ buŋga bu bə yaa buŋga bu Satan miɨ wu nchɛnɛ lə su buchi. Fiɔŋ naji ɨ fi fə bəŋ kə. 20 Bəmanɨ, bə kə kɨ woko buni lə bətsə na woko bə bəŋ. Bə kɨ woko buni ji lə Nyɔ nə bɔndu yɨ́ yɛnɨ kɨŋwatɨ kɨhɨ ntɨŋ bɔ́.”
Jisɔs wɔ buni
21 Tsa ya wɨ, Kɨn'yɨntɨ kɨ Ntsaaŋ fə Jisɔs wɔ buni kɨtso ba tə lə, “Nna nnya kɨmbafə bə wə Taa, Ŋkuŋ wu bɔlu bə sha lə wə' nyələ biɔŋ biŋ nə bəfɨ lɨ ma bə bənɨ bə kkɨ biɔŋ ba donchɛ bi ji bə muŋwenɛ. Na nɨ fi na ji Taa, ndzɨ na nɨ wə nə̀ se lə fi kɨ ji.”
22 Jisɔs chi chanyɛ lə, “Taa nə nya mɨ biɔŋ bichi. Miɨ na sɨŋ su wu na kkɨ Wɛŋ, fiəŋkə kwa Tɨɨ wu na kkɨ. Miɨ na sɨŋ su wu na kkɨ Taa, na kwa mɨ wene bə bənɨ bə Wɛŋ' sabiɛ lə yu donchɛ bɔ Tɨɨ.”
23 Yu fichə ba chanyɛ bə beŋ buhu bə nɨŋ'ə bɔ bɔ lə, “Kɨnlaŋ kɨbəŋ na kɛnɨ lə yəsɨ yɛnɨ' ŋəŋ biɔŋ biŋ wɨ. 24 Bə kɨ kkɨ lə bənɨ bə shɔŋ yi Nyɔ lə kɨyɛŋ bə bəŋkuŋ nə̀ tsɨ bɔ dɨ lə bɔ ŋəŋ biɔŋ bi bə na ŋɨntɨ biŋ wɨ, bɔ jikə ŋəŋkəhə. Bɔ dɨ tɨ lə bɔ wɔ biɔŋ bi bə na woko biŋ, bɔ jikə wɔkɔhɔ.”
Ŋgaŋ tsukɔ miɨ Bəsamalita wu ndzeŋe wɨ
25 Miɨ wudɔ wu nə̀ kkɨ bilaŋ bi Nyɔ lə buni dza ba ba fə Jisɔs ku ba bi bə yu lə, “Miɨ wu Bitɨfiə, fiɔŋ fi naji lə mfə ba tə keŋkɛ buwəŋ bu kəkaha na la?”
26 Jisɔs bi bə yu lə, “Fi na ji bubɔndɔ Kɨŋwatɨ kɨ Nyɔ lə kɨ bilaŋ'ə ntɨŋ lə la? Wə na tanchɛ wə woko lə la?”
27 Yu chi lə, “Fi na ji bubɔndɔ lə,
‘Kɨ laŋkɨ Baba Nyɔ wɔhɔ bə shəŋ yɔhɔ chi,
nyâ gwɨ yɔhɔ bə yu chi,
nɨŋ yu lɨ bə buŋga bwɔhɔ buchi,
gâ bufɨ bwɔhɔ buchi yu wɨ,
ba laŋ miɨ wu na ji fə wə ku nɨ wə na laŋkɨ gwɨ yɔhɔ.’”
28 Jisɔs tə lə, “Wə fichɛ diəŋ. Kɨ fɨtɨ manɨ, wə jiwa wə keŋkɛ buwəŋ bu kəkaha.”
29 Miɨ wa kɨ se lə yu tseyɛ lə yu na ji miɨ, yu bi bə Jisɔs lə, “Miɨ wu na ji fə mɨ ku na yəŋ?” 30 Jisɔs chi ji ŋgaŋ ntɨŋ lə, “Miɨ wudɔ nə̀ dza nə Jɛlosalɛm kɨ shichi yu gɨntɨ Jɛliko, chi yu nə̀ gɨntɨ, yu gbɔ bənɨ bə buhi lə kaŋ. Bɔ kəchə yu, yu shə nchitə bɨŋ, bɔ foshɛ bindzu bihi ba dze ma biɔŋ bihi bichi, tə li yu mɨ lətə lɨ. 31 Fi tɨchə lə miɨ wudɔ nə̀ shichi dzə ya ntɨŋ ɨji chɛ bintɔfiɛ, yu ŋəŋ miɨ wa ba wədi chɛ bukəŋ. 32 Miɨ wudɔ dza tɨ kɨ ba, ɨji miɨ nə kɨtsɔŋ kɨ Lɛbi lə ntɨŋ, lə yu kɨ ba fɔɔ mɨ, yu ŋəŋ miɨ wa ba wədi chɛ tɨ bukəŋ. 33 Bəmanɨ, wudɔ miɨ kɨ gəndə yu ba tɨ, ɨji miɨ wu Samaliya. Lə yu kɨ ba fɔɔ mɨ, yu ŋəŋ miɨ wa ba kwese yaa bə yu. 34 Yu gəŋ fə yu ku ba ga mbiŋ bə məŋ biba bihi wɨ, kansɨ biba bia bə bindzu, tə tɔ yu nyɛŋ yi yu nə̀ gəndəə ya bɨŋ ba gəŋ ga yu tsɔŋ yi bənɨ bə ŋkɔŋ'ə ntɨŋ kɨ jiŋgə yu mɨ. 35 Bɔ bə yu me, lə bu wɔ, yu foso Bədanali bəfɛ ba nya bə miɨ wu tsɔŋ wa ba tə bə yu lə, ‘Shə̂ kɨ jiŋgə miɨ no. Ɨ wə shə ba bɨsɨ kpə wu na yakɨ wuŋ, ɨ nna mba nchi wə wu.’”
36 Nɨ Jisɔs maa ŋgaŋ wa manɨ, yu bi bə miɨ wu nə̀ kkɨ wa bilaŋ bi Nyɔ lə buni lə, “Nə bənɨ bətɛ bɛŋ ntɨŋ, miɨ wu wə ŋəŋə lə yu nə̀ donchɛ lə yu na ji jimə miɨ wu bə buyi lə nə̀ kəchə wa na wu la?”
37 Miɨ wa chi lə, “Na miɨ wu nə̀ kwesɛ wa yaa bə miɨ wa.” Jisɔs tə tə bə yu lə, “Kɨ gɨntɨ, gəŋ kɨ fɨtɨ tɨ ma diəŋ.”
Jisɔs lɛ jii Mata bə Maliya tsɔŋ
38 Jisɔs bə beŋ buhu bə nɨŋ'ə dza kɨ gɨntɨ, bɔ gəŋ be kɨtuŋ kɨdɔ ntɨŋ, kpansɨ wudɔ ji sɔ yɨ wuhu ji lə Mata. Yu ləkə Jisɔs yu tsɔŋ. 39 Yu nə̀ ji bə wəmɛni wudɔ, bə́ tsɨsə yu lə Maliya. Lə Jisɔs gəŋ be sɔ, Maliya gəŋ ba jiŋ fə yu ku kɨ woko fiɔŋ fi yu na tɨfiə. 40 Mata nə̀ ji yu funsə ji gwɨ bə ntə yi bənɨ. Mata jiji ba bi bə Jisɔs lə, “Baba, wə ŋəŋ ŋgwɨŋ shə mɨ, ŋkɨ mfunchi mɨ wumbɔŋ wə na biɛhɛ? Tə̂ la lə yu ba chitə mɨ.”