Jisɔs tɨfiə nɨ naji ɨ bə́ kɨ tsɨsə
11
Butsu budɔ nə̀ ji Jisɔs kɨ tsɨsə dɨ wudɔ wɨ, lə yu tsɨsɨ ba kasɨ lɨ, wene wu nɨŋ wudɔ ba tə bə yu lə, “Baba, tɨ̂fiə bɨ nɨ naji kə kɨ tsɨsə, diəŋ nɨ Jɔŋ nə̀ tɨfiə beŋ buhu bə nɨŋ'ə nɨ bɔ kɨ tsɨsə.”2 Jisɔs tə bə bɔ lə, “Bə na tsɨsə lɨ, bə kɨ tsɨsə bə tɨdi lə,
‘Taa waha,
bənɨ kɨ kuntə yɨ wɔhɔ,
buŋkuŋ bwɔhɔ bâ.
3 Kɨ nya bɨ bidiəŋ díɔ chi,
4 gûfiɛ məmbiə maha
nɨ kə na gufiɛ məmbiə mə bənɨ bədɔ na fɨtɨ bə bɨ.
Wə kə̂ tɔkaŋ lə kə be mfɔ ntɨŋ.’”
5 Nɨ yu tədiə manɨ, yu tə fɨkə bə bɔ lə, “Bə dzê lə miɨ wudɔ nə bəŋ ntɨŋ' dza ba gəŋ bɔ kɨgwəŋ kɨ nsɨnɨ lə bbutsu kɨntɨŋ kɨntɨŋ ba tə lə, ‘Mbwə, dzâ wə, wə fe mɨ buna bisələ bitɛ, 6 mbwə wudɔ' lɛ mɨ ŋkɔŋ waa, mɨ fiəŋkə fiɔŋ fi naji ntə yu su.’ 7 Bə dzê lə nsha wu wə sə bɔɔ wa kɨgwəŋ kɨhɨ' chi fihi nə tsɔŋ lə, ‘Wə kə kɨ funsə mɨ, kə' me bɨ bə beŋ bɛŋŋ ba fasɨ kɨgwəŋ. Naji ɨ nchi dza wə lə nnɔŋ fiɔŋ ba nya wə kə.’” 8 Lə Jisɔs fɨkə manɨ, yu tə lə, “Ntə bəŋ lə, ɨ yu kə dzaha wə ba nya buna bu wə' biɛ bwa ndzɨ yu na ji nsha, tə yu jiwa ɨ yu dza wə ba nya fiɔŋ fichi fi wə na se tsa yi wə' kətə kwa mɨ kɨ boko. 9 Ŋkɨ ntɨdi bə bəŋ lə, Bə bî, bə jiba bə keŋkɛ. Bə nɔ̂ŋ, Nyɔ jiwa yu fə ɨ bə bɨkə. Bə bɔ̂ kɨgwəŋ, bə́ jiba bə́ gu bəŋ'ɨ. 10 Bə kkə̂ lə miɨ chi wu na bi, keŋkɛ lɨ, miɨ chi wu noŋko, ŋɨntɨ lɨ, wu boko kɨgwəŋ, bə́ jiba bə́ gu yu lɨ.
11 Na chɛ wɛŋ wula nə bəŋ ntɨŋ wu na ji ɨ wene bi biɔsu, ɨ yu nya yu ji ye? 12 Makə lə ɨ wɛŋ bi gɨlɨ, ɨ yu nya yu ji ntsə yi nəkɨ? 13 Ɨ bəŋ tə bə na ji bənɨ bəbiə, bə kkɨ nya biɔŋ bi ndzeŋe bə beŋ bɛnɨ, kɨ ji tɨ lə naji ɨ chaa wɛnɨ wu na ji bɔ́ jikə nyaha Kɨn'yɨntɨ kɨ Ntsaaŋ bə bənɨ bə na bishɛ bə yu ya tɨmo manɨ?”
Jisɔs bə Bɛlsibu
14 Jisɔs kɨ fosɔ tsə nə miɨ wudɔ wɨ ɨji miɨ wa ji nchindiɛ, lə tsə wa fɔ nə miɨ wa wɨ, miɨ wa gbɔ kɨ chanyɛ. Kuta wu bənɨ ŋəŋ, kɨgəsə wɨŋ bɔ. 15 Bəmanɨ bənɨ bədɔ kɨ tɨdi lə, “Yu na foshɛ bətsə mɛ ji bə buŋga bu Bɛlsibu ŋkuŋ wu bətsə lə.”
16 Bədɔ bənɨ toso lə bɔ kwe yu, bɔ tə lə yu fə̂ fiɔŋ fi na tseyɛ buŋga bu fɔɔ nə bɔ́. 17 Jisɔs kkə biŋgɔmbiɛ bibɔlə ba tə lə, “Ɨ kɨtuŋ jɛ kɨ dio bə gwɨ yi kɨ, ɨ kɨ jikə ləmiə. Kɨtsɔŋ jɛ kɨ dio bə gwɨ yi kɨ, kɨjilə kɨ' tsaŋ. 18 Na tɨ diəŋ nɨ Satan bə kɨntsu kɨhɨ jɛ kɨ dio tɨ bə gwɨ yibɔ, ɨ buŋkuŋ buhu jikə ləmiə tɨ. Nna ntɨdi manɨ ndzɨ bə na tɨdi lə nna mfoshɛ bətsə ɨji bə buŋga bu Bɛlsibu lə. 19 Jilə nna mfoshɛ bətsə mɛ ɨji bə buŋga bu Bɛlsibu lə, kɨjilə bɛnɨ beŋ na foshɛ bə bu yəŋ'ə? Fiɔŋ fi beŋ bɛnɨ ba na fɨtɨ na donchɛ lə bə nə gbɔ nsa. 20 Bəmanɨ jilə nna mfoshɛ bətsə ba ɨji bə kɨbandə kɨ Nyɔ lə, kɨjilə buŋkuŋ bu Nyɔ lə' ba bəŋ bɨŋ.
21 Bə kkə̂ lə ɨ ntɛgwɨ banchɛ biɔŋ bihi bi dzoŋ'ə ba jiŋ kɨ kɨki ku wuhu su, ɨ miɨ jikə bukɔ fiɔŋ fihi wɨ. 22 Bəmanɨ, ɨ ntɛgwɨ wudɔ wu na yakɨ yu ba ba diɔ ya yu, ɨ yu ləkə biɔŋ bihi bi dzoŋ'ə bi yu' nɨkɨ bi wɨ ba kɔ biɔŋ bihi bichi gəŋ bə bi, bɔ bə nsáŋ yihi jɛ.
23 Bə kkə̂ lə Ɨ miɨ na jimiɛhɛ kɨdia kəmɨ, tə yu na ti bə mɨ. Ɨ miɨ na chitəhə mɨ bə mbanchɛ, tə yu na tsaŋkɨ butsaŋə.
24 Kɨn'yɨntɨ kɨbiə ba kɨ fɔ nə miɨ wɨ, kɨ gəŋ kpa kɨ noŋko dɨ wu kɨ kɨ ji. Jilə kɨ' nɔŋ sɨŋsɨŋ, kɨ tə lə, ‘Njiwa ntsu mɨ tsɔŋ dɨ wu mɨ' mfɔɔ.’ 25 Tsa yi kɨ tsɔ ba ŋəŋ ɨji bə́' yənsɨ ba ga tsɔŋ ya ntsaaŋ, 26 kɨ tsu ba gəŋ ba bə bin'yɨntɨ bidɔ bibiə fumba bi na bɨfi bi yakɨ kɨ, bɔ bə bi be ba kɨ me sɔ. Biɔŋ tə kanə bəfiə miɨ wa lɨ tsa ya wɨ ba ya nɨ bi nə̀ sa bi ji.”
Kɨnlaŋ kɨbəŋ na kɨ bəyəŋ'ə?
27 Nɨ Jisɔs nə̀ bambi chanyɛ biɔŋ biŋ mɛ, kpansɨ wudɔ bu fɔ nə kuta wu bənɨ wa ntɨŋ ba tə lə, “Kɨnlaŋ kɨbəŋ na bə kpansɨ wu nə̀ bɛyɛ wa wə, ba mambɔ wə.”
28 Jisɔs chi ji lə, “Kɨnlaŋ kɨbəŋ na ji ji bə bənɨ bə na woko diɛ yi Nyɔ, bɔ fɨtɨ nɨ yi na tɨdi.”
Bənɨ kɨ se lə bɔ ŋəŋ fiɔŋ fi kɨgəsə kɨ wɨŋə lə
29 Nɨ kuta wu bənɨ nə̀ tɛshɛ yu ba fə yu ku, yu jiji ba tə lə, “Ŋkɨkɨ wu fɛŋ no na wubiə. Yu na se lə yu ŋə̂ŋ fiɔŋ fi kɨgəsə kɨ wɨŋə lə fi na tseyɛ buŋga bwɛŋ, ɨji naji ɨ bə́ tseyɛ bə yu kə. Bəmanɨ, fiɔŋ fi kɨgəsə kɨ wɨŋə lə na yasəhə fi Jɔna miɨ wu shɔŋ yi Nyɔ lə kə. 30 Nɨ fiɔŋ fi Jɔna nə̀ fəə nə̀ ji kɨgəsə kɨ wɨŋə bə bənɨ bə Ninifɛ, na tɨ diəŋ nɨ fiɔŋ fi Wɛŋ wu Miɨ na fɨtɨ ná kɨ ji kɨgəsə kɨ wɨŋə bə ŋkɨkɨ wu fɛŋ no. 31 Ná kɨ ji butsu bu nsa yi nəjiŋ'ə, ɨ Ya yi na sakɨ kɨtuŋ kɨ Shɛba ləŋ bə ŋkɨkɨ wu fɛŋ no ba fə ɨ bə́ ga yu ŋgə ntɨŋ, ndzɨ yu nə̀ dza nə kɨtuŋ kɨhɨ kɨ dzəbudə ntɨŋ lə yu ba wɔ bufɨ bu Ŋkuŋ Sɔlɔmon lə. Bəmanɨ bə wôkɔ bə wɔ, miɨ wa mɛni bə fiɔŋ fi na ko ba ya fi Sɔlɔmon lə. 32 Ná kɨ ji butsu bu nsa yi nəjiŋ'ə, ɨ bənɨ bə Ninifɛ ləŋ bə ŋkɨkɨ wu fɛŋ no ba fə ɨ bə́ ga yu ŋgə ntɨŋ ndzɨ bənɨ bə Ninifɛ bəsu nə̀ wɔ fiɔŋ fi Jɔna nə̀ tɨfiə ba yashənɨ fiə wubɔlə. Bəmanɨ bə wôkɔ bə wɔ, miɨ wa mɛni bə fiɔŋ fi na ko ba ya fi Jɔna lə.
Kɨbɨlə kɨ gwɨ lə
33 Naji ɨ miɨ bɨlə kɨbɨlə ba chɛse ji fətakɔ lɨ kə. Naji tɨ ɨ yu dze ŋka ba kusə su kə. Miɨ ba yu bɨlə lɨ, yu tiyɛ ji biandɨ wɨ, fə bənɨ kɨ beke tsɔŋ bɔ ŋɨntɨ kɨŋgbooŋ wɨ. 34 Yəsɨ yɔhɔ na kɨbɨlə kɨ gwɨ yɔhɔ lə. Ɨ yəsɨ yɔhɔ na tsalə lɨ, ɨ gwɨ yɔhɔ chi yi bə kɨŋgbooŋ. Bəmanɨ, ɨ yəsɨ yɔhɔ na tsaləhə, ɨ gwɨ yɔhɔ chi yi bə kɨjuwɔ. 35 Fi na ji lə, miɨ kɨ jiŋgə lə fa yu na gəndə ji kɨŋgbooŋ ntɨŋ maa kɨjuwɔ ntɨŋ lə. 36 Jilə gwɨ yɔhɔ chi na ji təəə bə kɨŋgbooŋ ɨji kɨŋunə kɨdɔ jikə kɨ ji kɨjuwɔ ntɨŋ, ɨ biɔŋ bichi kɨ tsalə diəŋ nɨ kɨbɨlə na ba kɨ nya kɨŋgbooŋ wə wɨ.”
Jisɔs shafiɛ fiə wu Bəfalasi lə bə wu bənɨ bə tɨfiə bilaŋ lə
37 Lə Jisɔs kanə nchanyɛ yihi, miɨ Bəfalasi wudɔ bəndɨ yu lə yu ba bɔ bə yu gəŋ diə. Jisɔs gəŋ ba be jiŋ'ɨ, bɔ kɨ diɨ, 38 ɨji yu kə wɔɔ kaŋª tsɔnyɔ. Miɨ Bəfalasi wa ŋəŋ, fi ya yu. 39 Baba kkə fiɔŋ fi yu na gɔmbiɛ ba tə bə yu lə, “Bəŋ Bəfalasi bə na wwo bwáŋ bə fío nəgwɨ kwa, bəmanɨ biɔŋ bibiə bə yəsɨ yiyə' chimə shəŋ yɛnɨ wɨ. 40 Bəŋfidi bɛŋ! Nyɔ wu nə̀ fəə nəbiŋ na tɨ yu kə wu nə̀ fəə nəntɨŋ? 41 Fiɔŋ fi naji lə bə fə̂ na lə, bə nyâ nə biɔŋ bi bə na keŋkɛ ntɨŋ bə bənɨ bə fiəŋkə, ɨ biɔŋ bichi tə kɨ tsalə bəŋ'ɨ.
42 Lɔŋ bə bəŋ Bəfalasi. Bə na nya ka mo bə Nyɔ nə ka ntɨŋ yɔɔ yi bubu bu kəsə lə ma tɨ bə biɔŋ bi bə́ na kɨsɨ bə́ galɨ bubu ntɨŋ lə bu kɨ kwete dze, bəmanɨ bə tsu bə shɨkɨ mfə yi biɔŋ bi diəŋ bə bənɨ ma bə nlaŋ yi Nyɔ. Bə tə nə̀ kɨ fɨtɨ biɔŋ bia bichi nshə sɨŋ fidɔ.
43 Lɔŋ bə bəŋ Bəfalasi. Bə na se kwa njimiɛ ji nəfiə tsɔ́ŋ yi kɨntsɨsɨ lə ntɨŋ, bə se tɨ lə bə́ kɨ tsɨsə bəŋ bə kɨŋkuntə shɨbɨŋ. 44 Lɔŋ bə bəŋ, ndzɨ bə na ji diəŋ nɨ dzə́ŋ yi na jikə yinshɛ, bənɨ gəndə yi bɨŋ ŋkkə sɨŋ.”
45 Lə Jisɔs chanyɛ mɛ, miɨ wudɔ wu nə̀ kkɨ bilaŋ bi Nyɔ lə buni tə bə yu lə, “Miɨ wu Bitɨfiə, kkə̂ lə biɔŋ bi wə na chanyɛ biŋ na bukɔ bɨ wɨ.”
46 Jisɔs chi lə, “Lɔŋ bə bəŋ tɨ bəŋ bənɨ bə na kkɨ bilaŋ bi Nyɔ lə buni. Bə ba bə kɨ tombe biɔŋ binjitə lə bənɨ tɔ, bi yakɨ buŋga bubɔlə ɨji naji ɨ bə bukɔ kə tɨmo bə kpaŋ ba chitə bɔ. 47 Lɔŋ bə bəŋ. Bə na ma dzə́ŋ yi bənɨ bə shɔŋ yi Nyɔ lə bə bə chɛ cha bɛnɨ nə̀ kkpɨshɛ. 48 Kɨjilə fiŋ na tseyɛ yɛyi lə bə na bɨmi fiə wu bəchɛ chaa bɛnɨ lə. Bɔ nə̀ kkpɨshɛ bənɨ bə shɔŋ yi Nyɔ lə, bə shə ba kɨ ma dzə́ŋ yi bənɨ ba lə. 49 Na fiɔŋ fi nə̀ fəə fə Nyɔ bə mfɨŋfə yihi tə chanyɛ lə, ‘Njiwa mfaŋ bənɨ bɛŋŋ bə shɔŋ'ə bə beŋ bɛŋŋ bə faŋə bɔ lɨ, ɨ bɔ kkpɨshɛ bədɔ ba sese gbo bədɔ nəjiŋ.’ 50 Bəma, Nyɔ ná kɨ bi bə ŋkɨkɨ wu fɛŋ no tsukɔ ŋgwembe mə bənɨ buhu bə shɔŋ'ə wɨ bəchi bə bɔ nə̀ kkpɨshɛ dze nə mbi nə gbɔɔ. 51 Yu ná kɨ bi dze nə ŋgwembe mə Abɛl lə bɨŋ gəŋ fɔ mə Dzakaliya lə wɨ wu bə nə̀ kkpɨsə tanyə wu bintɔfiɛ lə bə tsɔŋ yi bintɔfiɛ fəntɨŋ. Nna ntɨdi bəŋ yɛyi lə Nyɔ ná kɨ bi bə ŋkɨkɨ wu fɛŋ no tsukɔ kkpə yi bənɨ ba wɨ bəchi.
52 Lɔŋ bə bəŋ, bəŋ bənɨ bə na kkɨ bilaŋ bi Nyɔ lə buni. Bə' nyələ kɨguyɛ kɨ kɨgwəŋ kɨ fiənsɨ wu naji lə miɨ be sɔ ba kkə fiɔŋ fi diəŋ. Ɨji bə' nɨŋŋ mbe tə kɨ baŋkɨ lə bənɨ bə na se lə bɔ be, lə bɔ kə̂ bekɛ.”