Kɨnlaŋ kɨbəŋ
5
Lə Jisɔs ŋəŋ kuta wu bənɨ manɨ, yu dza ba bəndɨ gəŋ jiŋ dzo bɨŋ. Beŋ buhu bə nɨŋ'ə tɛshɛ ba ba fə yu ku. 2 Yu gbɔ kɨ tɨfiə bɔ, yu tɨdi lə,3 “Kɨnlaŋ kɨbəŋ na bə bənɨ bə na kkɨ lə bɔ na fiəŋkə dia wu Nyɔ lə,
ndzɨ buŋkuŋ bu bɔ́ na bubɔlə.
4 Kɨnlaŋ kɨbəŋ na bə bənɨ bə na dɨ,
ndzɨ Nyɔ jiwa yu jisə bɔ.
5 Kɨnlaŋ kɨbəŋ na bə bənɨ bə na dze gwɨ́ yibɔlə koso,
ndzɨ bishəŋə bi mbi lə ná kɨ ji bibɔlə.
6 Kɨnlaŋ kɨbəŋ na bə bənɨ bə dzɔŋ na wo bɔ, ŋgɔ wɨntɨ bɔ tsukɔ kɨjimiɛ kɨ diəŋ wɨ,
ndzɨ Nyɔ jiwa yu fə ɨ bɔ fulu.
7 Kɨnlaŋ kɨbəŋ na bə bənɨ bə na kwesɛ yaa bə bədɔ,
ndzɨ Nyɔ jiwa yu kwese tɨ yaa bə bɔ.
8 Kɨnlaŋ kɨbəŋ na bə bənɨ bə na ji bə shəŋ yi ntsaaŋ,
ndzɨ bɔ jiba bɔ ŋəŋ Nyɔ wɨ.
9 Kɨnlaŋ kɨbəŋ na bə bənɨ bə na ba bə budə,
ndzɨ bə́ jiba ɨ bə́ kɨ tsɨsə bɔ lə beŋ bə Nyɔ lə.
10 Kɨnlaŋ kɨbəŋ na bə bənɨ bə bə́ na sesɛ gbo bɔ nəjiŋ ndzɨ bɔ na fɨtɨ fiɔŋ fi Nyɔ na se,
buŋkuŋ bu bɔ́ na bubɔlə.
11 Kɨnlaŋ kɨbəŋ na kɛnɨ, tsa yi bənɨ na sɛye bəŋ, bɔ sesɛ gbo bəŋ nəjiŋ, bɔ chanyɛ ŋgwe yi biɔŋ bibiə bichi tsukɔ bəŋ wɨ kɨlɔlɔ lɨ ndzɨ bə na ji bənɨ bɛmɨ. 12 Fi dze kɨ tɨchə manɨ, bə kɨ woko ji buni, bə laŋkɨ ndzɨ bikwəntsə biənɨ bibəŋ na ji kɨtuŋ kɨ bɔ́ ntɨŋ. Bə kɨ kkɨ lə na tɨ diəŋ nɨ bənɨ nə̀ sesɛɛ gbo bənɨ bə shɔŋ yi Nyɔ lə nəjiŋ bə nə̀ saa ba fiə nə bəŋ'ɨ.
Bə na ji ŋka bə kɨŋgbooŋ kɨ mbi no lə
13 Na bəŋ bə na ji ŋka yi mbi no. Bəmanɨ, ɨ ŋka lasɨ bundzəŋgə bu yi lə, ɨ bə́ fə nəŋ bə yi fə yi tə tsɔ kɨ ndzəŋgə? Naji ɨ bə́ tsu fə fiɔŋ fi ndzeŋe su kə, yasə kwa lə bə́ shishɛ yi, bənɨ kɨ chɛti bɔ dənchə bə go. 14 Bə na ji kɨŋgbooŋ kɨ mbi no lə. Kɨtuŋ kɨ bə́' wɛyɛ dzo bɨŋ ji kɨ ná nyələ kə. 15 Naji ɨ miɨ bɨlə kɨbɨlə ba dze ŋka kusə bɨŋ kə. Yu ba yu tɨŋ ji fiɔŋ fi bə́ tɨntɨ kɨbɨlə bɨŋ, kɨ kɨ tsalə miɨ chi wɨ wu na ji sɔ tsɔŋ. 16 Kɨŋgbooŋ kɛnɨ naji lə kɨ kɨ tsalə bənɨ wɨ, fə bɔ kɨ ŋɨntɨ nɨŋ yɛnɨ yi ndzeŋe wɨ, bɔ nyaa bubəŋ bə Chaa wɛnɨ wu na ji bɔ́.
Bitɨfiə tsukɔ bilaŋ bi Mose lə wɨ
17 Bə kə kɨ gɔmbiɛ lə mɨ mba lə mba nshiŋkiɛ biɔŋ bi na ji Kɨŋwatɨ kɨ bilaŋ bi Mose lə ntɨŋ bə bi na ji Biŋwatɨ bi bənɨ bə shɔŋ yi Nyɔ lə ntɨŋ. Mɨ mba ji lə mfə bi fɔ diəŋ. Ŋkə mbaha lə nshiŋkiɛ bi bushiŋkiɛ. 18 Ntə bəŋ yɛyi lə gəŋ fɔ tsa yi bɔlu bə sha ná ka, naji ɨ fiyəshəni fi mbiɔndu lə nə Kɨŋwatɨ kɨ bilaŋ'ə ntɨŋ, ma fi sɨ tɨmo nəŋ, naji ɨ fi chɛ koso kə fiɔŋ fisu mfɔ sɨŋ nɨ fi na donchɛɛ. 19 Fi kɨ ji lə ma yəŋ wu na bunchi kɨlaŋ kɨdɔ nə bilaŋ biŋ ntɨŋ, ma kɨlaŋ ka sɨ tɨmo nɨ la, yu tɨfiəə bənɨ lə bɔ kɨ bunchi tɨ manɨ, tə miɨ wa ná kɨ ji miɨ wuntse buŋkuŋ bu bɔ́ ntɨŋ. Bəmanɨ ɨ miɨ na galɨ bilaŋ biŋ, yu tɨfiəə tɨ bənɨ lə bɔ kɨ galɨ bi, tə miɨ wa ná kɨ ji miɨ wubəŋ buŋkuŋ bu bɔ́ ntɨŋ. 20 Bəma, ŋkɨ ntɨdi bə bəŋ lə, ɨ fiə wɛnɨ wu diəŋ jikə yakəhə wu bənɨ bə na tɨfiə bilaŋ bi Nyɔ lə ma wu Bəfalasi lə, ɨ bə ná shəshə bə be buŋkuŋ bu bɔ́ ntɨŋ kə.
Bitɨfiə tsukɔ shəŋ yi lo wɨ
21 Bə' wɔ lə bə́ nə̀ tə bə bənɨ bə fiəfiə lə, ‘Wə kə̂ kkpɨsə miɨ. Ɨ miɨ kkpɨsɨ miɨ, tə yu na keŋkɛ nsa.’ 22 Bəmanɨ ŋkɨ ntɨdi bə bəŋ lə miɨ chi wu shəŋ na lo yu bə wəmɛni, tə yu na keŋkɛ tɨ nsa. Miɨ sɛyi wəmɛni, yu kɨ kkɨ lə yu jiwa yu ləŋ bənɨ bə sakɨ bənsa nəfiə. Ɨ miɨ tsɨsɨ wəmɛni lə, ‘Mfidi!’ yu kɨ kkɨ lə yu jiwa yu be boso wubəŋ ntɨŋ. 23 Fi kɨ ji lə, ɨ wə na nya kɨnya kɔhɔ tanyə wu bintɔfiɛ lə bɨŋ, ɨ wə se lə wəma na keŋkɛ fiɔŋ fibiə yu shəŋ tsukɔ wə wɨ, 24 wə shə kɨnya kɔhɔ ka fə tanyə wu bintɔfiɛ lə ku ba gəŋ bəŋ bə yu sa nachɛ biɔŋ, wə tə fichə ba nya kɨnya kɔhɔ. 25 Ɨ miɨ dze wə kɨ gɨntɨ bə wə kansu ntɨŋ, wə diɔnɔ lə bəŋ bə yu kəmə bə nachɛ chi miɨ bə nsɨnɨ ɨ bambi dzə, yu tə kə gəŋə ba chɛse wə miɨ wu sakɨ bənsa kaŋ, ɨ miɨ wa chɛse wə miɨ wu kɨtsa kaŋ, ɨ bə́ fasɨ wə tsɔŋ yi buŋfia ntɨŋ. 26 Ntə wə yɛyi lə naji ɨ wə fɔ nə nɔ kə wə bambi kə kanə sɔmbɔ finini fichi fi bə́ na se nə wə lɨ.
Bitɨfiə tsukɔ ndzenɛ wɨ
27 Bə' wɔ tɨ lə bə́ nə̀ tə lə, ‘Wə kə kɨ biəlɨ kpansɨ miɨ.’ 28 Bəmanɨ ŋkɨ ntɨdi bə bəŋ lə, miɨ chi wu jiŋgə kpansɨ ba shəntə yu, tə yu' dzenɛ bə kpansɨ wa nə yu shəŋ. 29 Ɨ yəsɨ wɔhɔ wu nədiɨ na fɨtɨ lə wə kɨ fɨtɨ bubiə, wə tsɔ yəsɨ wusu ba tɔfu lɨ. Fi na ndzeŋe lə wə lasɨ kɨŋunə kɔhɔ kɨ gwɨ lə kɨmo, ya yi na ji lə bə́ li gwɨ yɔhɔ chi boso wubəŋ ntɨŋ. 30 Jilə kɨbandə kɔhɔ kɨ nədiɨ na fɨtɨ tɨ lə wə kɨ fɨtɨ bubiə, wə kəmbɨ kɨbandə ka ba tɔfu lɨ. Fi na ndzeŋe lə wə lasɨ kɨŋunə kɔhɔ kɨ gwɨ lə kɨmo, ya yi na ji lə gwɨ yɔhɔ chi gəŋ boso wubəŋ ntɨŋ.
Bitɨfiə tsukɔ ŋkɔŋ yi kpansɨ wɨ
31 Bə́ nə̀ tə tɨ lə ‘Ɨ miɨ kɔŋ kpansɨ, tə yu jiwa yu bɔndu kɨŋwatɨ ba nya bə kpansɨ wa kɨ na donchɛ lə bɔ' ka.’ 32 Bəmanɨ ŋkɨ ntɨdi bə bəŋ lə, ɨ miɨ kɔŋ kpansɨ, ɨjikə jimiɛ lə kpansɨ wa' dzenɛ binchi, tə miɨ wa fə lə kpansɨ wa gəŋ tsu kpansɨ wu ndzenɛ. Ɨ miɨ dze kpansɨ wu' fɔɔ nə nyunso wudɔ lɨ ba ga tsɔŋ, tə yu' dze kpansɨ miɨ.
Bitɨfiə tsukɔ munchɛŋ wɨ
33 Bə nə̀ wɔ tɨ nɨ bə́ nə̀ tədiə bə bənɨ bə fiəfiə lə, ‘Ɨ wə chanyɛ fiɔŋ ba chɛŋ'ɨ, wə kə̂ galə fi mfə sɨŋ. Wə naji lə wə fə fiɔŋ fi wə sə chanyɛ ba chɛŋ yɨ wu Baba lə lɨ lə wə jiwa wə fə.’ 34 Bəmanɨ ŋkɨ ntɨdi bə bəŋ lə, miɨ kə̂ chanyɛ fiɔŋ ba chɛŋ'ɨ. Miɨ kə kɨ chɛnti yɨ wu bɔ́ ndzɨ bɔ́ na kabala wu Nyɔ. 35 Miɨ kə kɨ chɛnti sha ndzɨ sha na kɨtɨ kɨ go yi Nyɔ lə. Miɨ kə kɨ chɛnti Jɛlosalɛm ndzɨ Jɛlosalɛm na kɨtuŋ kɨ Ŋkuŋ wubəŋ'ə. 36 Miɨ kə kɨ chɛnti tɨmo ma fo wuhu ndzɨ naji ɨ miɨ fə yu miu nə yu fi yi woso makə lə yi yii kə. 37 Ɨ miɨ bɨŋ fiɔŋ lə ‘Ɨŋŋ,’ fi kətə manɨ. Yu nɨŋŋ lə, ‘Yɛ,’ fi kətə manɨ. Ɨ yu chi yinə fidɔ fiɔŋ su, tə fia fiɔŋ fɔ nə miɨ wubiə wa lɨ.
Bitɨfiə tsukɔ nchi yi bubiə bə bubiə
38 Bə nə̀ wɔ tɨ lə bə́ nə̀ tə lə, ‘Ɨ miɨ foso yəsɨ wu miɨ lə, bə́ foso wuhu tɨ. Miɨ tsɔ kɨgəsə kɨ miɨ lə, bə́ tsɔ tɨ kɨhɨ.’ 39 Bəmanɨ nna ntɨdi bə bəŋ lə, miɨ kə̂ nyikə bə miɨ wubiə. Ɨ miɨ kə wə ŋgaŋ wɔhɔ wu nədiɨ wɨ, wə fichə wu nəməsə yu kanə kəə. 40 Ɨ miɨ sɔmɔ wə lə yu ləkə kɨndzu kɔhɔ kɨ nəntɨŋ, wə kanə nya yu kɨ nəbiŋ ka. 41 Miɨ tombi wə lə wə gəndə mai miu, wə gəndə ba fɔ tɨmo bəmai bəfɛ bəŋ bə yu. 42 Miɨ nende fiɔŋ nə wə lɨ, wə nya yu. Ɨ miɨ na se lə yu fe fiɔŋ nə wə lɨ, wə kə̂ nɨŋŋkəhə yu nnya.
Bitɨfiə tsukɔ nɨ miɨ naji lə yu kɨ fɨtɨ bə miɨ wuhu wu nchɛnɛ
43 Bə nə̀ wɔ tɨ lə bə́ nə̀ tə lə, ‘Kɨ laŋkɨ miɨ wu na ji fə wə ku, wə lo bə miɨ wɔhɔ wu nchɛnɛ.’ 44 Bəmanɨ ŋkɨ ntɨdi bə bəŋ lə, bə kɨ laŋkɨ bənɨ bɛnɨ bə nchɛnɛ lə, bə kɨ tsɨsə bə bə na sesɛ gbo bəŋ nəjiŋ. 45 Bəma, ɨ bə tə kɨ ji beŋ bə Chaa wɛnɨ lə wu na ji bɔ́. Na yu wu ba yu kɨ fɨtɨ diɔ boso bənɨ bəbiə wɨ ma bəndzeŋe wɨ. Yu ba yu kɨ fɨtɨ tɨ dzaŋ ba bənɨ wɨ bə na fɨtɨ biɔŋ diəŋ, ma bə na fɨtəhə biɔŋ diəŋ. 46 Ɨ bə na laŋkɨ kwa bənɨ bə na laŋkɨ bəŋ, ɨ mbɨ wɛnɨ kɨ ji la? Bənɨ bə kwete kɨŋwatɨª na fɨtəhə tɨ manɨ? 47 Ɨ bə na tsɨsə kwa ji bəwəma, kɨjilə fiɔŋ fi bə na fɨtɨ fi bənɨ bədɔ na jikə kɨ fɨtɨ na la? Bənɨ bə kkəhə Nyɔ na fɨtəhə tɨ ma diəŋ? 48 Fi kɨ ji lə, bə naji lə bə kɨ ji ntsaaŋ nɨ Chaa wɛnɨ wu ji bɔ́ na ji ntsaaŋ gəŋ tuŋ fəŋgbɨŋ.”