Jisɔs chisə wəmiəsɨ miɨ butsu bu fufiɛ
14
Lə kɨ chisə jimiɛ butsu budɔ bu fufiɛ, Jisɔs gəŋ lə yu diə tsɔŋ yi miɨ wubəŋ wudɔ ntɨŋ. Miɨ wa nə̀ miɨ Bəfalasi. Bənɨ bə nə̀ ji mɨ kɨ tɨntɨ ŋkɨ bə Jisɔs lə bɔ ŋəŋ fiɔŋ fi yu jiwa yu fə. 2 Nə̀ ji miɨ wudɔ lɨmi mɨ Jisɔs nəfiə yu ji bə dzeŋ, dzeŋ ya nə̀ fə kaŋ yihi bə go mɨchə. 3 Jisɔs bi bə Bəfalasi ma bənɨ bə nə̀ ji mɨ bɔ kkɨ bilaŋ bi Nyɔ lə buni lə, “Kɨlaŋ kaha na bɨmi lə naji ɨ bə́ wəmiəsɨ miɨ butsu bu fufiɛ maa yɛ lə?”4 Bɔ jikə chisə diɛ. Jisɔs chiŋfi miɨ wa ba wəmiəsɨ yu ba tə lə miɨ wa kɨ gɨntɨ. 5 Jisɔs fichə ba bi bə bənɨ ba lə, “Ɨ miɨ wudɔ nə bəŋ ntɨŋ na keŋkɛ wɛŋ makə naŋª, yu gbɔ fɔŋ ntɨŋ butsu bu fufiɛ, ɨ miɨ wa jikə fosɔ yu kɨsɨkɨ ka?”
6 Bɔ fiəŋkə fiɔŋ fi chisə.
Miɨ chi dzê gwɨ yihi koso
7 Jisɔs bo ba ŋəŋ nɨ bənɨ na ba bɔ sabi ji bidɨ bi nəfiə bɔ jimiɛ mɨ, yu li diɛ bə bɔ lə, 8 “Tsa yi bə́' bəndə miɨ kɨgbeyɛ kɨ bibinə lə ntɨŋ, yu gəŋ'ɨ, yu kə̂ jimiɛ ji nəfiə, ndzɨ na ji kɨ ji bə́' bəndɨ tɨ miɨ wudɔ wubəŋ wu na yakɨ yu, 9 ɨ chɛ kɨgbeyɛ wu sə bəndə wa bɔ bəchi ba tə bə yu lə, dzâ wə, nyâ kɨjimiɛ kɨŋ bə miɨ wubəŋ no. Ɨ yu dza bə yaa ba gəŋ jiŋ ji nəjiŋ. 10 Tsa yi bə́' bəndə miɨ kɨgbeyɛ kɨ bibinə lə ntɨŋ, yu gəŋ'ɨ, yu jiŋ ji nəjiŋ, fə tsa yi chɛ kɨgbeyɛ ba, ɨ yu tə bə yu lə, ‘Mbwə, dzâ wə nə mɛni wə gəŋ jiŋ naha nəfiə.’ Bəma, ɨ yu tə keŋkɛ kɨŋkuntə mɨ bənɨ bəchi nəfiə. 11 Na tɨ diəŋ nɨ miɨ chi wu na dze gwɨ yihi bɔ́, bə́ ná shisəsɨ yu. Miɨ wu na dze gwɨ yihi koso, bə́ ná toto yu bɔ́.”
Miɨ kɨ chitə ji bənɨ bə ŋgə lə
12 Jisɔs fichə ba tə bə chɛ tsɔŋ wu nə̀ bəndə wa yu yu tsɔŋ lə, “Tsa yi wə na se lə wə bəndɨ bənɨ lə bɔ ba diə, wə kə̂ bəndəhə ji nsáŋ yɔhɔ makə bəwəma makə kɨtsɔŋ kɔhɔ makə bənɨ bə kpə lə bə na ji fə wə ku. Ɨ wə na bɨndɨ ba bənɨ ndzɨ bɔ ná bɨndɨ tɨ wə bɔ tsɔ́ŋ, ɨ kɨ ji lə bɔ' chi kɨbandə kɔhɔ. 13 Tsa yi wə' kaa kɨgbeyɛ, bə̂ndɨ ji bənɨ bə fiəŋkə, biŋkələ bəŋkpesɛ ma bənyimə. 14 Ɨ wə fə manɨ, ɨ wə tə keŋkɛ budə ndzɨ ba bənɨ na sɨŋ bə fiɔŋ fi chisə wə. Ɨ kɨ ji Nyɔ wu ná sɔmbɔ wə butsu bu bənɨ bə diəŋ ná dzakɔ nə kkpə lɨ.”
Ŋgaŋ tsukɔ kɨgbeyɛ kɨbəŋ wɨ
15 Lə Jisɔs chanyɛ manɨ, miɨ wudɔ wu nə̀ diɨ bə bɔ tə bə yu lə, “Kɨnlaŋ kɨbəŋ na bə miɨ wu ná diə buŋkuŋ bu Nyɔ lə ntɨŋ.”
16 Jisɔs tə nachɛ bə yu lə, “Tsa yidɔ nə̀ ji, miɨ wudɔ ka lə yu fə kɨgbeyɛ kɨbəŋ, miɨ wa bəndɨ bənɨ kɨyɛŋ. 17 Lə butsu bwa kwətsə, yu faŋ wene wu nɨŋ lə yu gəndə ba tə bə bənɨ bəchi bə yu nə̀ bəndə lə bɔ ba, lə bə́' fə biɔŋ bichi. 18 Wene wu nɨŋ wa gəŋ ba ŋəŋ bɔ wɨ, bɔ gbɔ kɨ dɨ gwɨ miu miu. Miɨ wu fiəfiə wu yu nə̀ ŋəŋə tə bə yu lə, ‘Nnə ntaŋ kə wɛŋ wufa, nna nji lə ŋgəŋ njiŋgə wu. Butɨɨ, bə kə̂ wokɔ mɨ.’ 19 Yu gəŋ wudɔ wa lɨ, wa miɨ tə lə, ‘Nnə ntaŋ bənaŋ bɛŋŋ bə nɨŋ'ə yɔɔ, ŋgɨntɨ wa ŋgəŋ mfɔ bɔ fɛŋ. Butɨɨ, bə kə̂ wokɔ mɨ kə.’ 20 Yu fɔ wudɔ wa wɨ, wa tə yihi lə, ‘Nnə mbɨkə məku, tsa na sɨŋ yi naji mba.’ 21 Nɨ bɔ chisə manɨ, wɛŋ wu nɨŋ wa tsu jiŋ ba gəŋ tə fiɔŋ fichi bə miɨ wuhu wubəŋ. Chɛ kɨgbeyɛ wa wɔ, shəŋ bə yu. Yu chi faŋə wene wu nɨŋ wa ba tə lə, ‘Fɔ̂ fɔfɔ, wə gəndə dzə́ yibəŋ bə yintse kɨtuŋ kɨchi ntɨŋ, wə ba bə bənɨ bə fiəŋkə, bəŋkpesɛ, bənyimə bə biŋkələ.’ 22 Lə yu gəŋ ba tsu lɨ, yu tə lə, ‘Miɨ wubəŋ, nsə mfə nɨ wə sə tədiə, bəmanɨ, tsɔŋ kə yisə.’ 23 Miɨ wuhu wubəŋ tə bə yu lə, ‘Chi fɔɔ wə gəŋ gəndə dzə́ yibəŋ bə yintse ntɨŋ chi, wə fə bənɨ ba, fə tsɔŋ yɛŋ yisə. 24 Kkə̂ lə miɨ miu nə bənɨ bə nnə̀ nsaa ba dɨ lɨ, ná fokɔhɔ fiɔŋ fiɛŋ fidiənə bɔ dze.’”
Chi naji ɨ miɨ fə gwɨ tə kɨ ji miɨ wu nɨŋ wu Jisɔs
25 Jisɔs chi dza kɨ gɨntɨ, kuta wu bənɨ kɨ biəlɨ yu. Yu fichə ba tə bə bɔ lə, 26 “Naji ɨ miɨ kɨ ji wɛnɛ wu nɨŋ kə, yu nlaŋ sɨŋ mɨ ba ya bətɨɨ bə mɛni, yu nlaŋ sɨŋ mɨ ba ya kpansɨ bə beŋ buhu ma bəwəmɛni bə dzə́mbɨtə yihi. Yu naji tɨmo lə yu kɨ laŋkɨ mɨ ba ya nɨ yu na laŋkɨ gwɨ yihi. 27 Naji tɨ ɨ miɨ kɨ ji wɛnɛ wu nɨŋ kə, yu ntɔ sɨŋ kɨhɨ kɨtɨ kɨ ŋ'wa lə kɨ biəlɨ mɨ. 28 Na yəŋ nə bəŋ ntɨŋ wu na se lə yu wɛyɛ tsɔŋ yi dəŋfɨ bɔ́, ɨ yu jikə saa jiŋ fəkoso ba gɔmbiɛ lə, fa yu na keŋkɛ kpə wu naji ɨ wu kwətsə bə ŋ'wɛyɛ yi kanə lɨ lə? 29 Yu jikə saa fə manɨ, yu dza ba gbɔ kɨchə kɨ tsɔŋ'ə, ɨ tsɔŋ ya ya yu bə ŋ'wɛyɛ kasɨ lɨ. Ɨ bənɨ tə kɨ chɛti bɔ wudi bə yu, bɔ tɨdi lə, 30 ‘Kɨmbwə kɨŋ nə gbɔ tsɔŋ ŋ'wɛyɛ tsɔŋ ya ya kɨ bə ŋkanə.’ 31 Diəŋ tɨ, na ŋkuŋ wula wu na se lə yu tunɔ dzoŋ bə ŋkuŋ wudɔ, ɨ yu jikə saa jiŋ fəkoso ba gɔmbiɛ lə fa naji ɨ yu bə bənɨ buhu bə dzoŋ'ə bəntsuku yɔɔ tunɔ dzoŋ bə ŋkuŋ wudɔ wa wu buhu bənɨ bə dzoŋ'ə na ji bəntsuku mbaafiɛ lə? 32 Yu gɔmbiɛ ba ŋəŋ lə fi jifia fi ya yu, ɨ yu faŋ bənɨ buhu bədɔ lə bɔ gəŋ ŋəŋ ŋkuŋ wudɔ wa yu bambi dzəbudə ba nende yu lə budə kɨ ji bɔ fəntɨŋ. 33 Fi na ji lə, ɨ miɨ kə shə biɔŋ bihi bichi, ɨ yu jikə kɨ ji wɛnɛ wu nɨŋ.